CSC-SY

بكتير من الأحيان بكون ماشي بمناطق ، او بشوف امور أو شغلات بتذكرني بالموقع ، بالمنتدى ، بالناس اللي شفتن وتعرفت عليون وتشاركنا كتير من همومنا واحلامنا وافراحنا على صفحات عالموقع هاد ، بنبسط كتير لما بحس إنو عملت شي ، ساهمت بشي جمعني بناس بحبن وبحترمن كتير وبيشرفني إني اعرفن وبنبسط بشوفتن

يمكن كون غبت كتير ، وأكيد إني قصرت كتير ورح ضل مقصر شو ماعملت ، بس لما برجع وبفوت عالموقع ، بدور على العالم اللي كنت شوفها هون .... مابلاقي حدا ، بقول لحالي "شي طبيعي ،، متل ماانت انشغلت هنن انشغلو" بكمل بالموقع ، بس هالمرة بدور على أفكارن ، على طموحن ، على اهتمامن ببعض ، او على الأقل : بدور على شي يحركني وينشطني ويخليني اتعب على حالي واتعلم واعمل وووو مشان كون متلن ، بدور على ناس نشاطها بيحركني وبيخليني اتحمس لحتى كون احسن مما أنا عليه ، بدور على ناس تخليني حاول اتعلم اكتر واستفيد اكتر من اللي تعلمتو ،،، بجي ومابدي قول شو بشوف ،، بس بزعل وبسكر وبقول : يمكن حتى هالأفكار هدول ، يمكن حتى هالنفسيات هدول ، يمكن حتى هالشخصيات هاي مشغولة لدرجة ماتكون موجودة على أرض الواقع