CSC-SY

بدأ العمل في المنتدى العام الماضي (أول 2006) وحطو اعلانات بالجامعة وعملو الطلاب مقابلات مع الدكاترة وطلبو شوية دعم مادي من ادارة الجامعة للموقع الغير رسمي ( طلع عند الإدارة لأول مرة رؤية مستقبلية متل ما بقولو ).

المهم الموقع انطلق، وبلشو الطلاب يسجلو، وبحكم اني كنت مشرف مخبر مشاريع التخرج كنت شوف الطلاب على أجهزة المخبر متحمسين وعم يسجلو ويشاركو، هلأ صار عندن فرصة يتعرفو على بعضن ويطرحو همومهم ويناقشو أمور الجامعة ..الخ. انا طبعا ما سجلت لأني كنت شوف نوعية المشاركات السخيفة متلها متل كتير منتديات عربية تانية ذات المستوى المتدني والإدارة الضعيفة، والأعضاء من نوع أمير الحب ودمعة الليل وراعي الستيشن، كما اني كنت على أبواب التخرج ومو مصدق ايمتى إفتك "باللهجة الإماراتية" من هالجامعة .

سرعة التطور بمجال المعلوماتية كبيرة كتير، وأحيانا منتأخر لنجاريها، والإنترنت كان أكتر مشروع بينتشر للعموم نموا وتطورا، طبعا كلنا منعرف فوائد هالخدمة، الإعلام والتجارة والمعرفة، وصار في جامعات ومجتمعات افتراضية، ومنها موقعنا، حتى صار في لغة اختصارات خاصة بالإنترنت، صارت الإنترنت علم كبير وبإختصاصات كتيرة.