السلام عليكم ...
صرلي زمان ما فشيت قلبي وحكيت لحدا, واليوم أول يوم بفضى فيه شوي, فحبيت أحكي وفش خلقي.
والصراحة ما حطيت عنوان لأنو في أكتر من موضوع حابب أحكي فيه.

وحـــــيــــــد

من فترة تقارب بداية الفصل الثاني ولحد الآن, صاير معي مشكلة, وهي أنو ما عاد حسيت حالي بعدت كتير عن رفقاتي أو شلتي, أو بالأحرى بعدوا عني.
السبب غريب نوعا ً ما, واكتشفت من فترة شو هو, السبب أني وقت طلعنا من فحص الخوارزميات ما كنت متدايق متل الباقي, وقلتلهم للشباب أنو الأسئلة مو صعبة متل اسئلة الدورات! ومن وقتها الناس (مو ضروري بس شلتي بالكلية) تنظرلي نظرة غريبة, يعني لهلأ ما عرفت شلون لسا في عالم بتفكر بهالطريقة, يعني لهلأ في عالم بتعتقد أنو يلي بيدرس بيكون غلطان بحقهم إذا ما درسوا!

وصلني إيميل مبارح, عالـ Junk Mail لكن الإيميل في حكي كتير حلو وبجد يعني في دافع كتير قوي للشغل, وبشكر يلي بعتلي ياه إذا كان من الموقع.
محتوى الإيميل على الشكل التالي:

إنها القناعات ..

في احد الجامعات في كولومبيا حضر احد الطلاب محاضرة مادة الرياضيات وجلس في آخر القاعة ونام بهدوء وفي نهاية المحاضرة استيقظ على أصوات الطلاب ونظر إلى السبورة فوجد أن الدكتور كتب عليها مسألتين فنقلهما بسرعة وخرج من القاعة وعندما رجع البيت بدء يفكر في حل هذه المسألتين ..

اليوم خلصت تصميم موقعي ASP .NET 2.0 بالكامل, الموقع أخد معي شهر تصميم, وبكرا انشاء الله رح أرفعو عالـ Server يعني بإذن الله بينطلق الموقع عالساعة 12 الظهر. بتمنى الكل يشوفو ويخبرني شو رأيو. الموقع مبني على نظام ASP .NET 2.0 وبرمجتو بلغة Visual Basic 2005, الـ ASP .NET 2.0 بشكل عام بتعطي كل شي جاهز بس على قاعدة بيانات SQL Server 2005 بس الـ Server يلي عليه الموقع عاطيني صلاحية استخدم Microsoft Access Database بس لأنو عاملو مجانا ً, وبالتالي اضطريت أقلب كل النظام على Access وهاد الشي خلاني أبني Classes من أول وجديد تتحكم بالـ Login والـ Registeration والـ Authentication وحتى الـ Role Management وهاد أكل الوقت أكتر شي. في حساب لكل واحد من المجموعة بيخوله يضيف أي خبر أو منتج جديد, ويعدل و يحذف منتجاتو وأخباره, أنا عندي حساب Administrator فيني عدل وأحذف أي شي (حتى المستخدمين ). الموقع فيه حاليا ً سجل للزوار بتمنى تعطوني آرائكم عليه. وانشاء الله قريبا ً وبالتعاون مع The Tornado رح نبلش بناء مشروع Magic CMS يلي بتوقع أنو ياكللي وقتي أكل, وبس يخلص بإذن الله رح يكون في منتدى بالموقع وخاص بدفعتنا. المفروض وبحسب قواعد المشاركة ما أدعي لموقعي الخاص, بس أنا رح أعتبر هي مو دعاية لأنو حابب أعرف رأي الشباب بالموقع ليس إلا, يعني الهدف من ورا هالمشاركة هو أخد رأي المشتركين وليس الربح. وانشاء الله يعجبكم الموقع.

Magic PC

يا سيدي قررت مبارح أنزل عمعرض فرص العمل Job Fair بركي بلاقيلي شي وظيفة مرتبة مع هالكلية, رحت لهونيك وصلت قالولي عالباب تعا سجل الـ CV تبعك, قلت لحالي لنشوف, بلشت أقرأ حسيتها مو CV أبدا ً يعني مالهم ذاكرين غير كم شغلة ما بيتعبو معي. المهم فتتلكم لجوا وما لاقيت غير شي 12 شركة, ولا وحدة بتحب المعلوماتية ما كان في قدامي غير فوت لعند الحجة سيريتل: "أهلين أستاذ كيف فيني ساعدك؟" "والله جاية قدم على طلب وظيفة IT هون." "اتفضل استريح أستاذ لبين ما يفضى شي شخص لمقابلتك" واستنيت شي دقيقتين, "اتفضل لعند الأستاذ هونيك لو سمحت" "السلام عليكم" "وعليكم السلام" "مممممم ... أنا عبد الله دياب طالب معلوماتية سنة تانية" "أهلين وسهلين فيك كيف فيني أخدمك؟" "والله حابب قدم عوظيفة IT عندكم" "والله يا طارق نحنا سياسة شركتنا ما بتسمحلنا أنو نوظف يلي مو متخرجين غير Customer Care بتحب هيك شي؟" "لا والله يعني أنا حابب أنو أشتغل بمجال دراستي وخبرتي" "آسف أستاذ طارق .." "عبد الله" "عفوا ً أستاذ عبد الله, والله شركتنا فيها تقدملك بس خدمة زبائن وفيك تشوف كيف الشغل بالشركة وبس تتخرج بتكمل شغل IT عنا." "والله إذا ما بيتعارض هالشي مع دوامي بالكلية ما في مشكلة" "والله الدوام مو ثابت يعني مرة الصبح مرة الظهر مرة بالليل مرة قبل الصبح فما فيني أوعدك بشي, إذا بتحب قدم طلب عالكمبيوتر هونيك وأنا رح حددلك موعد مقابلة" "طيب رح جرب" "اتفضل هون أستاذ" قعدت على هالكمبيوتر حاطين Windows ME فايت بالحيط نسيان كيف أشتغل عليه, فتحت الـ IE 5 وبلشت بحبش على صفحة سيريتل, وصلت, سجلت, قدمت الطلب Step 1 of 10, كبست Save رجع كتب Step 1 of 10 ومحا يلي كتبتو, المهم حاولت شي 60 مرة وكللو نفس الشي, فقلت لحالي بلاها! مشيت شوي, لقيت شركة أبو غزالة وكاتبين كلمة IT عالحيط فقلت تعا نجرب: "مرحبا" "أهلين وسهلين" "فيني قدم على وظيفة IT?" "متخرج؟" "لا والله سنة تانية" "طيب في experience منيح؟" "أي الحمد لله" "طيب خود هالورقة وعبيها" أخدت الورقة وإذ مافي مجال أكتب الـ Experience ما في حقل للخبرات أبدا ً, كتبت يلي فيه النصيب وأخدت ورقتين من عالمكتب ومشيت عالبيت. المهم أنو من كل المعرض ما استقدت غير بهالورقتين يلي أخدتهم وفيهم معلومات كتير مهمة للتقديم لأي وظيفة وهي محتوى الورقتين كتبتلكم ياه هون: