CSC - SY

هلأ مافي حدا عادل بشكل مطلق (الله العادل)
بس اللجنات بشكل عام (انا ما بعرف كل اللجنات) مدري كيف بقيمو! بشكل غريب شوي..
هلأ إذا في خيار بالنص بين اي ولاء أنا بصوت عليه..

مافي عدل , لأن كل لجنة بتقيم المشريع على حسب الشي يلي هي بتعتقد أنو مهم و متعوب عليه .
وحتى لو مشروع متعوب عليه وبيستحق التقدير بس اللجنة مو شايفتو هيك مارح ينعطى حقو .

والله أنا بقترح إنو يصير التصويت :
هل تعتقد أن اللجان التي تقيم المشاريع في السنوات الثالثة والرابعة والخامسة هي لجان كفؤ ؟؟

بغض النظر عن السنة التالتة والرابعة

رح احكي باختصار عن لجنة السنة الخامسة ذكاء اللي قيمت مشاريع التخرج هاليومين

العنوان: أروع لجنة بشوفها بالكلية

كان النقاش كتير ظريف والدكاترة كانو فهمانين المشاريع تمام والنقد كان بنّاء جداً وما كان في استهانة بشغل حدا

باختصار شكرا الون على الجهد اللي عم يبذلوه وعلى الرقي بالتعامل والنقاش العلمي للمشاريع

د. محمد زهير صندوق د. عمار جوخدار د. ندى غنيم

بس ما صوتت لأنو بتصور الجواب الصحيح ما موجود ضمن الخيارات على اعتبار انو كل سنة الها تقييم لحالها

يعني يمكن تقييم السنة التالتة بلجنة واحدة خطأ والمفروض يكون في لجنة متخصصة لكل نوع من المشاريع (ممكن 3 لجان تكفي)

التصويت كان المفروض يكون لكل سنة لحال
بالنسبة للسنة الرابعة فالجواب هو لأ
هاد الحكي بالنسبةلاختصاص البرمجيات، التقييم عميتم حسب المشاريع اللي مأشرفة عليها دكاترة اللجنة
يعني المواضيع اللي مومأشرفين عليها واللي مابحبو أفكارها ومابيعرفوا فيها، عميكون تقييمها سيئ جداً وعميستهينوا كتير بأشياء مابيعرفو أدى الطلاب تعبانين عليها
بالإضافة لتضويع الوقت بالضحك والمهزلة..
كان مستوى تقييم مشاريع السنة الرابعة البرمجيات هالسنة سيئ جدا
ياريت لو كان في شوية اهتمام أكتر....

صوتت لأ
على اعتبار نظام تقييم المشاريع من خلال مقابلة 30 دقيقة مع لجنة هو نظام غير عادل. (بغض النظر عن أعضاء اللجنة عادلين أم لأ)

بالنسبة للجنة مشاريع التخرج قسم الذكاء (على اعتبار قدمت عندهم) ففينا نقول اللجنة كانت متساهلة
بس متل أي مقابلة مشروع ما بظن كان في مجال يقدروا يطلعوا فعلياً على محتوى المشروع وبالتالي تقييم المشاريع رح يكون تقريبي.
وفعلاً متل ماقال The Tornado كان تعامل اللجنة مع الطلاب كتير راقي (بس لايخلو الأمر من رد على تلفونات وأحاديث جانبية أثناء عرض المشروع) وبضيف صوتي لصوته بشكر أعضاء اللجنة.

نحنا مقابلتنا كانت رائعة, 2 دكاترة, واحد حس الموضوع مو اختصاصوا أبدا ً فترك الموضوع وبعدين بلش يدقق على غير شغلات بس حرام ما كتير اتدايقنا منو, والتاني حب يورجينا عضلاتو وما خلى شغلة ما استفسر عنها ولا طلع فيها مية علة (قال الـ Plain Text أحسن بكتير من الـ XML), أما المهندسين فالصراحة كانوا الوحيدين يلي عرفانين الله وين حاططهم وعميقابلوا بشرف.

يعني ما بعرف ليش معتبر هالامور انتقاص من رقي التعامل من قبل اللجنة
لوتشوف شو عم يصير بلجان قسم الشبكات شو بتقول
اللجنة مو بس كانت بأحاديث جانبية وتلفونات كانوا عم يتنقرشو بالبسكويت والشوكولا وهنن عم يسمعو البرزينتيشن اللي ما تابعونا فيه بولا كلمة وما فهمو منه شي
هي شغلة
التعامل الاستفزازي الرهيب يعني من ضمن أعضاء اللجنة كان في مين معتبر حالو ضابط والطلاب عساكر عندو أنت روح وانت تعا وانت سكر تمك وانت احكي وانت اقعد وكلو بالعياط
يعني كـأنو ساحة حرب
عدا عن التعليق عالبرزينتشن واذا ما كان زابط يا ويلك ويا سواد ليلك بيتركو المشروع كلو وبيخنقوك بالبرزينتيشن
واذا مسكوا نقطة ضعف للمشروع وهاد وارد بكل المشاريع
خلص ما عاد يفلتوها وما عاد يشوفو شي من باقي الشغل والاشياء اللي منفذة وتعبان عليها
الوضع مأساوي للغاية
وفعلا اللجان غير عادلة
وفوقها لا بتحترم طالب ولا شغلو ولا تعبو

لاحول ولا قوة الا بالله احسن شي

ليش شو هاد الـ XML

مالي حابب احكي عن اللجنة تبع المقابلة لتطلع علامة المشروع

الحقيقة أنو المقابلات كانت عادلة كثير ,

بس الطلاب مالون معودين على هالأساليب الراقية بالنقاش
يعني انتقادات الدكاترة و حوارهم مع الطلاب أثناء
الPresentation منطقي كثير و حتى كل ّ الطلاب
أكّدوا أنو ما كان في انتقادات شخصية إنما انتقادات
على فكرة المشروع و كيف تم تنجيزه .

و بعتقد أنو العلامات المتدنية يلي شفناها بقسم هندسة البرمجيات ما كانت فكرة سيئة بهالقسم لأنو العلامات ميزت الطالب الشاغل يلي بيستاهل علامة عالية فوق 80 عن الطالب يلي ما بدو يشتغل المتواكل على الحظ و يلي هامه بس يخلص المشروع .

بتمنى أنو الأقسام الثانية (الذكاء الصنعي , الشبكات ) تتجه نحو هذا الاتجاه لأنو كانت العلامات كلها عالية و مافي تمييز بين الطالب يلي بيستاهل و يلي ما بيستاهل .

الأمر عائد غالباً لأعضاء اللجنة متل حكوا فوق
يعني في بعض الدكاترة عادلين تماماً و هنن من طرف الطلاب و بعتقد أنو منهم الدكتور زهير صندوق
مناقشته موضوعية و مريحة بشكل عام
و في بعض الدكاترة بخلوا الواحد يتوتر بالمقابلة لعدد من الأسباب (عدم أهلية للمقابلة - عدم اهتمام بعمل الطلاب - استفزاز الطلاب و جعل جو المقابلة متوتر بشكل عام ...)
و بالتالي عدا عن الحالة النفسية السيئة للطالب و المقابل ... ما عاد يقدر الطالب يشرح بشكل جيد شو عامل ...

مو صحيح هالكلام
بالنسبة لمقابلات هندسة البرمجيات البعض منها ما كان عادل أبداً
و صار في خنايق بالمقابلات و بالتالي علامات متدنية جداً و م بتليق بمشاريع سنة رابعة متعوب عليها (55 مثلاً !!)

By God Over You !

في سؤال ثاني

 هل تعتقد بأن تقييم الطلاب للجان المشاريع عادل ؟

 ممكن ينطرح ليش لأ

هاد الحكي ببين جزء من الحقيقة ليش لاء

أخي يلي انظلم يجيب دليل أو يشرح ليش اللجان مالها عادلة

و إذا شغلة واحد أو اتنين بيعتقدو أنهم انظلموا

معناتها بيجوز هنه مو عرفانين الله وين حططهم

بعدين شو بدكن الكل ياخد 90

وين التميز ببين ؟؟؟؟؟

والله حطيت ايدك على الجرح...

صراحة , انا كرهت الكلية , وكرهت بعض دكاترتها بعد المقابلة هلي اتكللت بالكئابة والتوتر هلي خلقها "رئيس اللجنة" , وهلي كانت من مسؤوليته خلق جو يسمح للطالب بعرض محاضرته .

المشكلة الاساسية انو مشرفنا "الله يذكره بالخير..." ما وقف معنا , والمقترحات هلي قدمها بفترة المشروع نفذناها , ولما عرضناها على اللجنة قال احد افراد اللجنة :

" شو هل الافكار هلي مالها طعمة وهلي ضايفينها على المشروع"

بجوز معو حق حسب تفكيروا الشخصي , بس المصيبة انو الدكتور المشرف ما تتدخل او عرض وجهة نظره فيها او حتى دافع عنها , هاد اكد لي انو كان حاطط ببالو مسبقا انو يفشل المشروع.

وصراحة شفت الفرق بين اللجنة هلي قدمت عندها ولجنة دكاترتة الذكاء بعد ما حضرت مقابلة  Tornado , فعلا متل ما وصف , كانت مقابلة روعة وكنت بتمنى هيك دكاترة بمقابلتي.

يمكن انا غلطت اني فتت بمشروع مشترك تحت قسم البرمجيات , مع اشد احترامي لطلاب البرمجيات, بس للاسف , هلي شفتوا يمكن ماحدا غيري شافوا.

انا بالنهاية بحمد الله مئة مرة اني فتت ذكاء صنعي وبشكر جميع دكاترة الذكاء.

أشكر اللًة أني أتعرفت على أراء شباب وشابات من طلبة هذا القسم . أما رأي بالموضوع بشكل عام فأن أغلب لجان التقيم تحتاج الى تقيم من قبل جهات منصفه وحريصة على مصلحة الجامعةوالمستوى العلمي وبشكل أهم هو الحرص على التمسك بالمستقبل مع الشكرواتقدير

طيب ممكن كل واحد يحط العلامة يلي أخدها بالمشروع إذا كانت نازلة ، حتى نعرف إذا العلامة إلها علاقة بتقيمو للجنة .

بصراحة أكتر من هيك عدل ما عاد في

العدل إلى أبعد الحدود

كان مشروعنا شبيه لفكرة مشروع صار بالسنة الخامسة من سنتين

وأخد أعلى علامة بوقته

وهلأ شوفوا شو علامتنا في مع انه كان كامل تماماً

أخيرا نزلت علامات مشاريع التالتة(كل عام وأنتو بخير) وهلأ صار الواحد فيه يفضفض شوي......
أول شي نحنا الله فضل علينا وجبنا 92...الحمد لله ، يعني حكيي مالو بسبب العلامة .
هي بالنسبة للعلامة أما بالنسبة للمشروع و للجنة........فَـ:
نحنا مشروعنا كان لعبة ثلاثية الأبعاد قابلة للتشغيل على شبكة.

فبالتالي القسم الأكبر من المشروع graphics ورياضيات وفيزياء بالإضافة لقسم مهم هو قسم الشبكة.

أبرز تعليقات اللجنة على المشروع :
- ليش كاتبين بالتقرير "مخطط الـ DB الأولي" وليس "مخطط قاعدة المعطيات الأولي" (خطأ قاتل كشفه أحد المهندسين).
- بعد شرح مطول...مطول...مطول...مطول للـ game engine ودوروا ووظيفتو وبنيتو خلال المقابلة قال أحدهم : يعني الـgame engine يساوي الـwrapper class (دبحني).
- التقرير سيئ (المنفذ الوحيد للنقد في حال عدم القدرة على كشف أي خطأ).
- قال أحدهم ميزة تقريركم أنو الواحد مابيفهم منو شي (تقليب 106 صفحات خلال دقايق وضمن المقابلة لازم تكون كافية لفهم شغل شهرين ونص أو أكتر... ).
- بعد شرح مطووووووووول أكتر من الـgame engine عن بنية الشبكة قال أحدهم يعني الشبكة عندكم client-server ولى peer to peer ؟؟؟ (هذا ماليس لي طاقة به )

حقيقة أنا شعرت بإحباط شديد ، يعني الواحد مجهز حالو لنقاش غير شكل والمشروع مليان بالأفكار والتقنيات القابلة للنقاش والتي لم نتمكن من إبرازها كما يجب بسبب هالنوع من التعليقات وحالة التشنج يلي كانت مسيطرة على المقابلة من جهة (وخصوصا بعد دخولنا الدرامي على المقابلة ) و بعض الإيحاءات المتقطعة بعدم أهمية ماتقول (ويلي بتتولد تلقائيا بسبب عدم القدرة على فهم ماتقول) من جهة تانية.

وكمان في ثغرات بالمشروع يلي لو ضلينا عم نقابل يومين على هالنحو مابينكشف منها شي.

ولولا أنو أحد أعضاء اللجنة "د.غسان كويتر" عندو فكرة عن شو عم إحكي بظن أنو ماكنت قدرت كمل المقابلة للأخير.......

برجع بقول بالأخير :
"كيف واحد مالو فهمان شو عم إشتغل بدو يقيم شو عم إشتغل".
ياريتهن كانوا واحد........هدول أغلب اللجنة.

آسف على الإطالة وإن شاء الله بتكون هالمقابلة الأخيرة من نوعها ، وتكون مقابلات السنين الجاية أفضل وخصوصا بعد الأخبار المبشرة عن مقابلات قسم الذكاء

لك آاااااااااااااااااااااخ

ياسيدي هي مالها حلة

وعلى كلن هي الأمور صارت مع الكل
ولسا في أسئلة بتجلط أكتر من هيك

بس لا تعليق

Wrapper Class لكان ... ما لقالو شي اسم شرشوح اكتر يتفهمن فيه يعني ، الله يعطيكم العافية
دائما بقول والله انت يلي بتقيم مشروعك مو اللجنة ، فيك تفرجي رفقاتك ويقيموه تقييم شفاف وعلمي اكتر بكتير من هيك لجان ..
معقول مشروع ياكل فصل دراسي بدك تحكي عليه بتلت ساعة ! ما بالك بمشروع التخرج ...
على الله ياشباب وعلى فكرة خلص موسم الجانرك

حلو هالكلام

أما بالنسبة لمقابلتنا:

أولا ألف مبروك لصاحبين العلامات العالية(طبعا يلي بتستحق تكون عالية )أما نحن:فأنا على ثقة كبيرة لو إنو اللجنة فهمت مشروعنا لما كانت نزلت العلامة عن 95   

بس الحق يُقال  أسخف من هيك مقابلة مافي  ومارح يكون

أثناء العرض حسيت أحد أعضاء اللجنة مابيفهم من المعلوماتية غير الفرق بين textbox و DropDownList و يمكن  كمان مكمل علمو الكبير و عامل دكتوراه بكيفية عرض رسائل الخطأ

وترك  فكرة المشروع  وبلش فزلكة بهل القصص L

حتى في مشاريع عبارة عن تعامل مع DATABASE بس , معالجين فيها رسائل خطأ بشكل كبير  فكانت اللجنة مسرورة كتير منهم وعلى حسب ماشفت علاماتهم كانت أكتر من ممتازة

(بجوز لأنو اللجنة مالقت صعوبة بفهم الفكرة J)...

 

وبالمثل لقينا علامات بالستينات مع إنو منعرف المشاريع كتير مميزة ومتعوب عليهافبعدها ماعاد حاولت كمل قراءة العلامات ...!!!!

 

؟؟؟!!!!!!!! على كل حال أكيد ما ادايقنا من اللجنة نحن  ادايقناعلى كون وجود هيك لجان بكلية الهندسة المعلوماتية  وقلة معرفتهم بالتقييم

 

وبالنهاية الحمدلله  متل كل المشاريع اكتسبنا خبرة  كبيرة كتير بهل المشروع  وهاد يلي بهم ,ويلي بهم أكتر نحن الطلاب منعرف مين يلي اشتغل وتعب ومين لأ من غير رأي (بعض) اللجان الكريمة

بالتوفيق للجميع..

لأ مارح يتغير شي تقريباً لأنو متل ماقلتلك المشكلة مو باللجنة المشكلة بالطريقة نفسها.
يعني كيف ممكن تشرح شغل سنة كاملة بـ 30 دقيقة وخاصة انو مشاريع التخرج عادة بتكون عن مواضيع جديدة وغير معروفة ولساتها بمجال البحث.
الملاحظات الي عم تحكي عنها (ويلي معتبرها سخيفة) هي الملاحظات الي ممكن تطلع خلال 30 دقيقة أما اذا بدك تشوف المشروع فعلاً كيف معمول وكيف بيشتغل وشو نقاط ضعفه أكيد لازم تتطلع عالكود وتقرا التقرير كلمة كلمة, وهالشي بيتطلب عالقليلة 8 ساعات لكل مشروع (يعني 8 ساعات قبل المقابلة مو وقت المقابلة يكون 8 ساعات )

مو مهم أديه أخدتو بالمشروع علامات أو إذا اللجنة اقتنعت ولا لأ
المهم أصحاب المشروع يكونو مقتنعين أنو شغلون صح وبس!
لا تنسو أنو المشروع علامتو متل علامة الثقافة والعربي !!!
بقى مو هالشغلة العظيمة إذا كانت العلامة قليلة مقارنة بالتعب اللي تعبتوه
(المهم تكونو مقتنعين أنو شغلكم صح وبس)

معك حق بالنسبة لطريقة التقييم....
بس كمان ممكن اللجنة تخلي المقابلة مريحة أو معتة بطريقة تعاملها...
وإنت كنت معنا بمقابلة الفصل الأول وأكيد لاحظت طريقة التعامل (وليس طريقة التقييم) يلي خلتنا مرتاحين وقت المقابلة وقدرنا نحكي عن المشروع برياحة رغم التوتر لأنها التجربة الأولى.
أما هلأ كان في حالة من التشنج والعبوس كأني فايت على معركة وماعرفنا نحكي بسبب هالتعليقات.

بالرغم أنو طريقة التقييم بمشروع التالتة نفسها بالحسابات العلمية ، بس أكيد طريقة تعامل اللجنة مافي مجال للمقارنة .

هممم
اول شي الله يعطيكون العافية المشروع أنا ما شفتو بس يلي شافوه قالولي أديش شاغلين فيه.
أما حكيك عالتقرير مو صحيح.
انت لما بتسلم تقرير قبل المشروع بشي اسبوع لازم تترك انطباع عند اللجنة انو المشروع خارق حارق.
بس يلي صار غلط انو يدققو عالتقرير كتير بمشاريع سنة تالتة مع العلم أنو دراسة هندسة البرمجيات وكيفية كتابة التقارير بتجي بالسنة الرابعة.

الله يعافيك
التقرير تسلم قبل المقابلة بيوم (وأقل من يوم) وماانقرأ التقرير إلا ضمن المقابلة
سلمنا التقرير الأحد الساعة 2:30 الضهر ومقابلتنا كانت التنين الساعة 9:30 الصبح !!!
إيمتى شافوا التقرير؟؟؟؟
منشان هيك قلت هيك .

لا , لأنو كان مقرر لنا أن نعرض المشروع بساعة (يا دوب تكفي) ولما دخلنا المقابلة اشترطوا علينا قبل أي شي إنو معنا ثلث ساعة فقط لكل المشروع يعني باختصار ما عرضنا المشروع كما يجب .

والله بتذكر أنو اللجنة كانوا متفهمين لكل شي حيكناه تماما ً (يعني عدا الشخص يلي حكيت عنو بأول رد إلي) :-s

يعني يمكن مالي علاقة بموضوعكم كتير ، لكن بذكر مقابلة مشروع التخرج تبع المعهد

كانت المقابلة متكاملة من ناحية اللجنة

المهندس الخاص بأمور البرمجة فصفص الكود فصفصة و ما كان الو أي تعليق سلبي

المهندسة تبع الشبكات سألت بأمور الشبكات ، وكيف طبقنا مفاهيم البرمجة ب ال سي شارب و مكتباتها على مفاهيم الشبكات

بحيث كان المشروع ( برنماج شبكي )

يعني كانت اللجنة محطوطة بحيث أعضائها فهمانين شو الوضع

يلي شفتو لهلق أنو المشاريع الحلوة آخدة علامات حلوة ( مع اعتراض كبير على لجنة التقييم )
خلص فضوها سيرة ولا تزعلو على العلامة المهم استفدتو ، متل ما قلت قبلاً انت بتقيم مشروعك ...

مبارك العلامة الحلوة مستر عبد الله (لحضرتك وحضرة زملائك ) ومبارك للجميع كمان، وإن شاء الله من حسن لأحسن.

 

 

بس على فكرة أنا مابتذكر هيك شغلة أبداً، وبتذكر إنو كنت أنا ورفقاتي بالمقابلة فقط لاغير

 

 

مشان الله فضولنا هالسيرة بقا...
والله عرفنا نتيجة التصويت -المتوقعة-
بتمنى يتنضف الموضوع وبعدين يتسكر ...
حاجتو...
ما بدنا مشاكل...

أول شي مبروك لكل الطلاب .. وان شاء الله اللي ما كانت علامتو منيحة بيعوضا بالمشاريع الجاية
وبيكون في عدل بالتقييم وما حدا ينظلم

كل واحد بيعرف حالو شو اشتغل وأديش تعب .. والمهم بالأخير انو اتعلمنا واستفدنا بس الواحد ما بيقدر ما يدايق لما بيحس حالو انظلم

وأكيد المشكلة مو مع أي طالب .. المشلكة باللجنة والتقييم اللي ما كان عادل (بالنسبة لبعض المشاريع) وما في داعي للخنايق

وبالتوفيق للكل بالسنين الجاية