CSC - SY

السلام عليكم جميعاً

مرت معي من قترة تجربة عمل ممكن تشوفوها فاشلة وممكن تشوفوها ناجحة بس من وجهة نظري انها ناجحة بالنسبة إلي عالأقل.
ويمكن تشوفوني "بغو أو طري" بالبرمجة أو بالتعامل مع البرامج بس أكيد ما رح انسى الدروس يلي اتعلمتها من هالتجربة وهي كانت أول مرة بشتغل.

بقا صار معي نهفات وفصول وحبيت شارككم فيها.
الفكرة بلشت بأول رمضان ...
لما بجتمع مع رفيق إلي وبيقلي إنو في براسو فكرة حابب يطبقها وبدو مساعدتي
وهي أنو هو ناوي يشتغل بشركة عما قريب.-شكرة بيع وشراء وجملة ومفرق وووو-
واطلع على طريقة شغلن ولقاها كتير فيها مشاكل بالحسابات
بقا كانت فكرتو أنو يأتمت الشغل عندن
هنن كانو عم يستخدمو برنامج محاسبة
بس كان في كتير نقص عندن وكان طلبو إنو سد هالنقص.
المهم
وقتها كنت ما بعرف اشتغل C# مع داتابيس  يعني 0 بهالباب وولا مرة فاتح C# project ولقيت إنو هي فرصة منيحة لانو اتعلم واشتغل بهالباب.
وقلتلو أنو ما عندي مشكلة...
ووقتها ما كنت حاطط ببالي موضوع المصاري ولا السعر ولا شي
حتى إنو كنت ناوي اشتغلو ببلاش يعني اشتغلو لرفيقي وبنفس الوقت اتعلم.

ويلي صار إنو الشركة ما عندها علم بالبرنامج
وهو حابب يعمل شي إيجابي للشركة
بقا قلي إنو رح يعطيني سعر رمزي على حسابو وفي حال اعتمدو عليه مناخد منن السعر يلي بدنا ياه وقلي إنو هلأ ساوي نسخة Demo ما فيها كل الميزات.
المهم أنا ما كنت مهتم بالمصاري وكان هدفي أنو اتعلم واكسب خبرة بالشغل.

وبالفعل أعدت معو كم أعدة وقهمت آلية العمل يلي رح تكون وشلون الحسابات والشغلات.
وكنت كتير متفائل أنو رح يركز معي الشغل بسرعة وبدون مشاكل..
المهم بلشت بالدتا بيس -أكتر شغلة بحبها- وخلص معي التصميم بأول يوم -وهو التصميم يلي اعتمدت عليه بالنهاية-
وهون اتصلت بالزلمة وقلتلو قبل العيد بسلمك ياه.

يعني شغلة 20 يوم -كنت كتير متفائل ومتحمس-
وبالفعل بلشت دور
واقرا عن الطبقة يلي بتتعامل مع الداتابيس بالC#
وسألت كتير رفقات
وكتير ناس ساعدوني متل (Abo Albees) و (mpcabd) و (pirate) و (Karam - H) وطبعاً رفيقي الغالي (White Star)
ولما بلشت بدي طبق الشي يلي قالولي عليه الشباب
لقيت في كتير صعوبة بالتطبيق
ومن وين بدي بلش
وشلون بدي اتعامل مع البرنامج ...
لأنو تصوري يلي كنت متصورو عن طبيعة الشغل غير هيك
هادا غير أنو المشروع عم بشتغلو لحالي وما في حدا معي ولازم اشتغل كل شغلة صغيرة وكبيرة فيه.
المهم حاولت بلش بالاجرائيات يلي رح استعملها بالداتابيس وحطيت كل الشغلات المعتة (Stored procedures)وهالشي آخد معي أيام.
المهم
لما اجيت بدي انتقل بالشغل على ال(VS) عن جد لقيت صعوبة كتير بالشغل وما كنت عرفان من وين بلش...

طبعاً أنا كنت مقصر كتير بالسنة التالتة وما كتير دقيت كود وما كنت متل الشباب التانيين يلي حسن أحسن مني بكتير متل (mpcabd) و (en.karam1989) ويلي اشتغلو ومشي حالهم وعن جد لقيت في فجوة كتيييييييييييير كبيرة بين المفاهيم النظرية يلي متمكن منها وبين الواقع العملي والشغل عن جد.

المهم انقضت الفترة يلي اتفقت عليها مع رفيقي وما خلصت الشغل وكان في كتير لسا لكملو...
وطبعاً مرضت بوقتها وصار معي كذا ظرف تاني.
وعن جد مريت بلحظات إحباط كتيييييييييييييير وأنا عم شوف العالم يلي حواليي أحسن مني وعم يشتغلو بشكل كتير منيح..وانا شقفة برنامج صغير ما عم بعرف ساويه وممكن غيري يساويه بشغلة كم يوم بس.

حتى إنو مرة دقيت لرفيقي وقلتلو ما عاد بدي كمل شغل وما عاد فضيت...

قام ما رضي وقلي مو أنت يلي بتحكي هيك بس بالظاهر في شي معصلج بالكود
بقا خود راحتك ولا ترتبط بالوقت.

بقا ما لحقت
وقلتلو إنو لسا بدو شوية شغل..
المهم
بعد شي اسبوع سلمتو نسخة مبدأية وكنت واثق مية بالمية إنو ما رح يتوافق عليها وما رح تعتمد والشركة رح ترفضها
وما كان عندي ادنى امل بأنو يتوافق عليه
بس بيجي وبيقلي أنو الشركة وافقت عالفكرة وانن طلبو يشوفوني
وانا هون انصدمت
واتدايقت شوي لأنو بلش الدوام وقتها والسنة الرابعة مو ملعبة بنوب والواحد دوبو يلحق دراستو..
ويلي صار إنو لما راح رفيقي لعند الشركة عطاهم سعر على وضعو الحالي وكان هادا السعر طالع مني هيك بدون دراسة يعني بس هيك شلفة وكان سعر قليل.

المهم
رحت لعندن وطلبو مني 3 تعديلات وشغلتين إضافيات.

بس هون أنا انحكمت بالسعر يعني صار لازم قلن أديش بدي زيادة عن السعر يلي قلن عليه رفيقي.
يعني ما عاد عندي Range كبير.

وطبعاً كانت المدة يلي طلبتها أسبوعين لساوي التعديلات يلي اتطلبت مني غير بكتييييييييييير شغلات من البنية تبع البرنامج وضيف كتير شغلات واحذف كتير شغلات.
يعني الصراحة نفضتو نفض.

المهم بعد اسبوعين خلص المشروع
ووقتها كنت كتير مبسوط لأنو خلص وكمان كنت مزعوج أنو خلال فترة الشغل اسمعت عباراة محبطة متل:

• يا زلمة شو عم تشتغل ببلاش.
• ضربت سوق البرمجة ببرنامجك هاد.
• زيد السعر لأنو حرام هيك.
• ما بيصير هيك عم يخورفوك.
• هادا برنامج خاص بهالشركة سعرو لازم يكون أربع اضعاف السعر يلي طالو أنت.

ومن هالحكي

وصار وقت التسليم.
ساويت ملف setup ورحت عالشركة أول مرة -هذا يدل إنو في مرات كتير-
سألت وين بدكم نزللكم البرنامج؟
قالولي على هادا الجهاز
اتطلعت هيك
لقيت جهاز معفن فايت بستالاف حيط
معالجو 1.8 GHz وراماتو 512 ووندوز XP SP1
وكانت الMinimum requirement لل SQL server هي رامات 512.
المهم قلت لحالي بيمشي الحال
أجيت حطيت الفلاشة وكبست عالSetup تبع الSQL SERVER
قام طلعلي رسالة Windows installer 3.1 is missing
هنيك كان في نت بطيئة
هو صحي في خط DSL بس موصول عليه شي 10 أجهزة.
نزلت الInstaller ألمطلوب لانو كان حجمو صغير ورديت كبست Setup
طلعلي رسالة DOT NET framework 2.0 is missing
من وين بدي جيبها؟؟
ما كانت معي وكان معي الDOT NET compact framework 3.5
قلت لحالي أكيد بتكون الـ 2.0 موجودة بقلبها Implicitly
نزلت ال3.5 وكبست Setup
وطلعلي نفس رسالة الخطأ.
طلعت مو موجودة وكان حجمها 22 ميغا مو خرج تتحمل من عندن
قلتلن أنو رح نزلها بالبيت وارجع تاني يوم

ورجعت تاني مرة لعندن
نزلت ال2.0 ونزلت الSQL Server 2005 ونزلت بعدها ال3.5 وأجيت بدي نزل البرنامج تبعي
قام طلعلي رسالة dot net framework 3.5 is missing
عمو ليكها ادامك؟؟؟!!!
ما مشي حالها لا بحلال ولا بحرام
لانو انا منزل الcompact framework
وهي ما بيمشي حالها عالXP
المهم رجعت عالبيت ونزلت الDot net 3.5 ونزلت 3 نسخ منها بأحجام مختلفة

رحت المرة التالتة لعندن وأجيت بدي نزلها
طلعلي رسالة There isn't enough disk space on C:
وطبعا ما بتتنزل على غير Driver لأنو لازم تحط شي بمكونات الوندوز وما كان في خيار تغيير مسار التحميل.
كان في بالسي فاضي 45 ميغا وبالD 8 غيغا وبالE كمان شي 6 غيغا
خود عطي
ما قدرنا نحذف شي من السي أو ننقلو عالD
قال لانو كل الوثائق مربوطة عالشبكة ومدري شو وما بدو ينقل شي لحالو مشان ما ينتزع شي من الترتيب تبعن

وحتى البرامج كمان ما بيقدر ينقلها.

وكل ما جي قلو رح احذف شي أو أنقل شي يقلي لأ بلاها ولي وهي بلاها وهي بلاها
والحل.؟؟؟
قال مننزل البرنامج على غير جهاز
أنا طرت من الفرحة
قلت لحالي بركي بيكون الجهاز أحسن من هادا الجهاز المتخلف.

المهم أجيت المرة الرابعة وبلشت تنزيل على غير جهاز..
وكان نفس المشكلة راماتو قليلة بس وضعو أحسن من هداك

المهم وانا عم نزل الSQL server طلعلي الشاشة الزرقا (Death screen ) وإنو في مشكلة
عدت الإقلاع وأول ما يفوت عالوندوز تطلع
لأنو الSQL server أنشأ الProcess تبعو بس ضربت.
وما مشي الحال عدة مرات وعدة نسخ من الSQL Server
وضليت عم حاول 4 ساعات صلح الوضع وحاول ارجع نزل السيرفر بس ما مشي الحال
دورت بالنت ولقيت أنو في بعض نسخ الوندوز فيها Bug مع الSQL server وفي كتير عالم عم تصير معها هالمشكلة.

المهم كان الحل إنو رح يطورو الجهاز ويكبرو الرامات..
بالمرة الخامسة أجيت لعندن وبالقعل جهاز منيح ماشي حالو كان...
أول ما أجيت بدي حمل الشغلات
انطفت الكهربا
وشعلت بعد ساعتين..
نزلت الشغلات والبرنامج
وبلشو شغل عليه

واعدت معو شي ساعتين وعم بشرحلو شلون بيشتغل وشلون بيحسب (Business logic)وهو يقلي عدل هي وهي ما بدي ياها هيك تكون
وهي مو راكزة
وهي لازم تتساوى
وهي وهي وهي
وانا سايرو وساوي يلي بدو ياه
ولأنو انا من الأصل اشتغلت متل ما قلي رفيقي وطلع بدن بالشركة مو متل مالي شاغل.
ما رح كمل البقيان لأنو مو مهم
واعملت البرنامج يقفل ب5-1-2010
هلأ فيكم تقولو خلصت هالقصة المعتة ويمكن مليتو منها بس ما بعرف بركي بيكون حدا عجبتو

هلأ الشغلات يلي استفدتها من هالشغلة:

بالBusiness :

• ما تبلش مشروع وانت مالك متأكد من إنو رح يتكمل للنهاية.
• ما تبلش مشروع إلا وانت آعد مع الزلمة يلي رح يشتغل عليه -لأنو في كتير أفكار كان رفيقي مخربط فيها واضطريت عيدها وفي كتير شغلات كانت ناقصة-
• هي أهم وحدة هلأ:لما تعد وتحكي عن الFeatures يلي بيقدمها المشروع تبعك خلي كل شي موثق بالكتابة وبالترقيم حط سعر لكل خطوة بدك تساويها مع شرح عنها وعن آلية عملها خطوة خطوة وحط لكل خطوة جزئية سعر كمان مشان إذا انطلب تعديل فيما بعد تعرف أديش حجم التعديل واديش حجم الشغل هاد وما تحط سعر للProduct ككل دفعة وحدة لأنو بهالحالة بتضيع الطاسة.
• بس تخلص هالدراسة الأولية ساوي فاتورة بالميزات هدول وحط سعر إلها.
• بس تتفق مع أي شركة بتشتغل معها بتخلي هالشي مكتوب وموقع وبيكون في بند مهم كتير إنو أي تعديل باي خطوة رح ينضاف زيادة على السعر يقدر التعديل.
• لما كان يطلب مني تعديل ما اقدر اطلب زيادة على السعر يلي  اتفقنا عليه لأنو إذا رح افتح تمي رح يقلي نحنا ما اتفقنا إنو يكون السعر هيك بالطريقة القديمة

وعلى فكرة كل الانتقادات يلي اتوجهت إلي كانت بهالباب

بالCoding :

• هلأ أنا كنت حس إنو كل شي بهندسة البرمجيات علاك ومالو قيمة وهادا كان غلطي الكبير وبلشت شغل بالمشروع بطريقة مو منيحة لانو على اساس كان لازم خلصو بسرعة واختيار بنية متل العالم رح يكلفني وقت بالبناء واضطريت عيد كتير من الشغلات يلي اشتغلتها.
• واحيانا كنت لما بدي عدل شغلة ضل نص نهار عم دور على الأراني يلي بدي عدل فيها.
• لما بدك تشتغل بالواجهات أوعى تخلي زر اسمو Button1 لأنو رح تتعذب كتير لبعدين وفي أحد الأراني كان عندي هيك زرار بقا انخبصت معي الحكايا بالزرار.
• خلي الكود مقروء وفيه (Comment) وخاصة عند الشغلات الغريبة ويلي غلها علاقة بالLogic تبع البرنامج مشان إذا انطلب التعديل ما تضيع بطريقة الحساب.
• أهم شييييييي هو الTest.

وعن جد هون حسيت بأهمية إنو الواحد يجرب كتير ويخبص كتير ويدق كتير كود علماً إنو هالشغلات صارت معي كم مرة وحسيت وقتها بقمتها

بالحياة العامة:

• لا تسمع لحكي العالم وطالما انت كان عندك هدف من قبل ما تفوت عالشغلة فأمشي فيه.
• في شي بالدنيا اسمو إحباط ...هادا صار معي كذا مرة وعن جد لما يصير معي كنت ما اعرف اشتغل شي ولما كون بمزاج منيح وكون رايق اشتغل بشكل ممتاااااااااااااز وانجز كتير من الشغل
• لما بلشت كان في براسي فكرة إنو الشغل بالمشاريع نفس الشغل بمشاريع الكلية بس لقيت في فرق كتييييييييييييير كبير بين الشغلين:
• الشغل بالكلية كنا دائماً نشتغل أربعة أو خمسة وفي مين يساعدك والشغلات المعتة ممكن تتقاسموها بيناتكم بحيث ما كتير تحسو فيها أما هون وبحالتي فكان كل شي بدي اشتغلو بأيدي بأدق التفاصيل وبأغلظ الحالات ولازم تناقش كل شي متوقع وغير متوقع لأنو ما بتعرف مين رح يشتغل على برنامجك.
• مشروع الكلية غالباً بينتهي وقت المقابلة وبعد ما تخلص المقابلة بينتسى وبيكون محشى اخطاء ما طلعت بالمقابلة وبيكون فيه كتير شغلات مسكجة سكاجة متل إنو الواحد يحط try catch بالmain أما هون فلازم كل حالة تتعالج وما يبقى أي حالة تروح منك
• لانو هادا البرنامج رح يشتغل عليه لمدة طويلة وأكيد الشي يلي مسكج سكاجة رح يخرب ورح تبين العيوب يلي فيه ورح يضرب هو بالبداية ورح يضربلك سمعتك بالنهاية.
• أنا اشتغلت كل الشغل على جهازي (مواصفاتو كتير منيحة) بس انصدمت لما شفت الجهاز يلي نزلت عليه البرنامج أول مرة خصوصي بعد ما نزل السيرفر صار بطيءءءءءءءءء كتير وبيجيب الجلطة. بقا لازم الواحد يعرف شو المواصفات يلي بدو يشتل عليها مشان يعرف الأدوات يلي بدو يستخدمها
• في كتير شغلات ما كنت انتبه عليها وكان ممكن اتفاداها متل إنو وقت إنشاء New project في خيارات متل فئة المعالجات المستهدفة (any cpu or x64 or x86) وإصدار الـDot net framework المستهدف.

والحمد لله إنو مشي حالو بالأخير واتسلم

وعن جد اتعلمت كتييييييييير شغلات بهالمشروع وكسبت خبرة منيحة من وراه مشان الأيام الجاية.

آسف إذا كنتو مليتو أو طولت عليكم بالحكي بس إن شاء الله تكونو استفدتو من تجربتي الفاشلة مدري الناجحة