CSC - SY

ملاحظة :
التصويت لا يشمل مواد الرياضيات ... لأنو مو معقول تتأتمت ...

بس معقول لأنو بالاقتصاد مؤتمتة الرياضيات + الجامعة الافتراضية كمان

بصراحة أفضلها تكون مفهومة سواء مؤتمتة ولا غير مؤتمتة!

أتمتة الرياضيات فيها مشكلة, أنو إذا الواحد بيعرف الطريق كلو ليوصل للجواب النهائي, واشتغل لشبع وخربط بشغلة صغيرة كتير عالطريق بيخسر السؤال كاملا ً. بينما المفروض بالنظام غير المؤتمت أنو الدكتور يلي عميصلح يشوف الطالب أنو فهمان وخربط خربوطة صغيرة فما يطيرلو كل العلامة. للأسف عنا بالكلية الرياضيات نظام غير مؤتمت والعلامة عالجواب الأخير بس!
ممكن تصير الأتمتة بشكل أنو يقسمو الطريق لمراحل صغيرة وعند كل مرحلة يسألو الطالب شو طلع معك, بس هيك بيصير اللي مو فهمان كتير سهل ينجح إذا كان اللي حاطط الأسئلة ما مظبط الأجوبة بطريقة ذكية كتير. طبعا ً هاد مع ملاحظة أنو لازم مثلا ً إذا الطالب اختار الجواب A بشي مرحلة فلازم أجوبتو تنبنى على هالإختيار بالمراحل القادمة وإلا فبينكشف الطالب يلي عميشلف, لكن ما بعتقد في طريقة لتصحيح هيك نموذج بشكل مؤتمت عنا, وقتها بيرجع في حدا بدو يصلح ورا الطالب, ومنرجع للتأخير والكثير من مشاكل التصحيح اليدوي.

هاد الكلام صحيح و للأسف المشكلة الي حكيت عنها باتمتة الأسئلة موجود بالجامعة الافتراضية
و الطريقة الصحيحة الي حكيت عنها بأتمتة هيك مواد موجودة بالاقتصاد يعني بيجي للطالب 50 سؤال كل 10 مرتبطين ببعضن اذا ما ظبط مع السؤال وضعو منيح طار ال 10 أسئلة وهون بينجح الي بيستاهل
بس غلاظة بعض الانظمة الي ما بتعتمد كتير على الاتمتة
هو " الخطأ يذهب الصواب" :S غليظة بشكل مرعب

أنا بفضل النظام غير المؤتمت , بس بشرط تكون أسئلتو منطقية و تصليحه منطقي أكتر

مالي صحبة مع النظام المؤتمت لإنو بكتير من الأحيان بفهم قصد الدكتور بالسؤال بطريقة تانية و بالتالي مافيني عبر عن كيفية فهمي للسؤال , و شغلة تانية إنو طريقة إستخدام الأسئلة المؤتمتة عنا صاير سيء بحس الدكتور بستغل خطأ واحد للطالب ليخسرو علامات أكتر من المفروض

بشكل عام ما بتفرء المهم تكون الأسئلة منطقية وبتختبر فهم الطالب للمادة

بس صوتت للمؤتمت (طبعا عدا الرياضيات) لأنو بقلل من مجهود الحفظ عند الطالب وقت الدراسة وبخليه يركز أكتر على فهم المادة ليقدر يرفعها أو يجيب علامة منيحة

وكمان في دكاترة تسيء (للأسف) استخدام النظام غير المؤتمت من عدة جوانب مثلا: الاعتماد على الجواب الأخير مع العلم انو السؤال عليه 10 علامات!!! وممكن الخطأ يكون بالنهاية فقط

كمان شغلة تانية: اجانا بإحدى المواد -اللي فيها مسائل وتمارين- فحص من نمط "اكتب كل شيء تعرفه عن المادة" كانت الأسئلة كلها نظرية وطويلة كتير وبتعتمد على البصم والبصم فقط!!! وهالشي للأسف كان بالسنة الخامسة وبمادة فيها جزء عملي منيح...

لذلك بفضل الأتمتة

أنا صوتت للمؤتمت لأنو بصراحة أسهل بكتتتتير متل عنا مثلا فيزيا أنصاف نواقل ...............

بعدين الواحد بيعرف حالو يا بياخد العلامة يا لا مو بيضرب أخماس بأسداس ياترى الدكتور بيحسبلي حلي صح ولا لا

مؤتمت

طيب بما أنو الأغلبية بدون مؤتمت ليش ادارة الموقع ما بتنظم حملة متل(خطadslلكل طالب معلوماتية)وبتنرفع نتائج الحملة لادارة الكليات الاربعة بلكي الله بيهديون وبيأتمتو المواد والله عيب التربية نص موادون مؤتمتة ونحنا كليتنا امّ الاتمتة وموادها ع النظام القديم يعني والله شي بيبكي انو السنة لحتى اشترينا آلة تصليح الاوراق عنا بالكلية وبالتربية من اربع سنين ورفقاتي بيعملو امتحانات اتمتة بالوقت الي نحنا سنة الماضية لحتى اتعرفنا على ورقة الاتمتة شخصي وبأنو مادة الانكليزي وتصلحت الاوراق بغير كلية يعني طلعت العلامات قبل آخر مادة (هي اذا ما صلحوها ع الايد) مع انو نص موادنا قابلة للأتمتة

بصراحة أنا مرة رفعت مادة الاحصاء (شلف )  وكان مؤتمت ، و طبيعة المادة متل الرياضيات

الأتمتة بكتير من الأحيان عم تكون غير عادلة و غير منطقية ...
بما أنو نمط الأسئلة المأتمتة إذا كانت من الشكل المعقول لح يكون الفحص سهل كتير لأنو الجواب الصح أدامنا و عم يقول اختاروني ... فمو منطقي يكون مأتمت ...
لذلك عم يجيبو أسئلة مأتمتة في كثير من الأحيان عم تكون تعجيزية أو غير منطقية ...
و الطالب بكتير أسئلة عم يعتمد على مبدأ التشليف ...
متل ما عم يصير بالبنيان و مواد الفيزيا ....
كمان هاد مو حل ....

و في مواد لما عم تجي مأتمتة تلقائياً عم تتحول لمواد تانية ....
يعني مثلاً لغات البرمجة ... هدفها الأساسي أنو نتعلم مبادئ البرمجة غرضية التوجه و كيفية توظيفها بتحليل النظم .... بس بتلاقي الفحص هو عبارة عن فحص كومبايلر جافا بامتياز .... !! بينما فحص العملي كان بوظف تماماً هدف المادة ....

لذلك بفضل الأسئلة غير المؤتمتة ... لأنو بتعطي صورة واضحة عن فهم الطالب للمادة و بياخد علامتو اللي بيستاهلها سواء للأحسن او للأسوأ ... على الأقل بتجي منطقية ... بس أكيد يعني مو قصدي أشرح و عدد و ما بعرف شو ... يمكن أسئلة العملي هي اللي بتعبر عن قصدي بالضبط ....

و بعتقد فحص الدارات المنطقية هو أكبر برهان على وجهة نظري ....

يمكن المادة الوحيدة اللي حسيت أنو الأتمتة فيها كانت عادلة للطرفين الطالب و الدكتور هي أساسيات الشبكات ..

كتب Rys:

بس معقول لأنو بالاقتصاد مؤتمتة الرياضيات + الجامعة الافتراضية كمان

بس مو بالضرورة يكون الشي اللي بدون ياه غالبية الطلاب هو الشي صح دوماً ...

أن بفضل بلا الفحص من أساسو
ونضل عالمقابلات والمشاريع

ما بعرف شو مشكلة الطلاب مع أتمتة البنيان... أنا معكون انو احيانا الواحد ما بلاقي الجواب الصح بس عادة بلاقي جواب كتير قريب عليه... بتذكر بالبنيان 1 حليت التمرين 5 مرات لطلع معي الجواب الصح وكل مرة بنفس الطريقة (كيف ما بعرف )

كانت المادة حلوة وفحصها حلو...

مساء الخير

الاتمتة ممكن ان تكون مناسبة في بعض مواد الحفظ

وملاحظة الى من يفضلها مؤتمتة ان يغير رايه

لانه في معظم الاحوال لا يتمكن الكمبيوتر ان يعرف جميع الحلول الممكنة وطبعا سوف يعطيك صفرا على حل صحيح لا يعرفه

ليس فقط الرياضيات ولكن ايضا معظم مواد الكمبيوتر يوجد حلول مختلفة لكل مسالة وجميعها صحيحة

وتحية

الكمبيوتر ما هو اللي بيختار الجواب الصحيح

جواب كل سؤال بيتحدد للكمبيوتر مسبقا

كتب farah online:

كتب Rys:

بس معقول لأنو بالاقتصاد مؤتمتة الرياضيات + الجامعة الافتراضية كمان

ما بعتقد أنو الأسئلة منطقية ...و السبب متل ما قال mpcabd ...

معناها عندكن غير شكل لأنو صرت مقدمة 23 مادة و 22 منها مؤتمت ولا مرة كانت الأسئلة مو منطقية يعني كانت اختر الاجابة أكثر دقة وهي بدها فهم مو تشليف و ضروري يكون في كم سؤال 10 كحد أقصى مو مارق على الطالب متلن لحتى يشغل مخو شوي بالمعلومات الي درسها وحاكم عقلو بالمنطق الي تعلمو ولا مرة شلفت وجبت أكتر من 20 صراحة .

ملاحظة صغيرة بظن أغلب الامتحانات الي تعد جولية بالجامعات الهاي لايف أسئلتها هيك اختر الاجابة أكثر دقة يعني الأسئلة الكتابية انقرضت من عندن ولساها عنا متل العادة

هذه مشكلة كبيرة

هذا يعني ان الاسئلة المؤتمتة هي محاكاة لاسلوب الببغاء ويعني انها كلها حفظ وبصم بما في ذلك البرمجة

تخيل يا صديقي مرة من المرات كنت في الجامعة واستغربت ان احد الزملاءالذين تخصصهم كمبيوتر

يتمشى ويحفظ من دفتر

الشيئ العجيب ان الامتحان كان في مادة برمجة c++
و الزميل كان يحفظ برامج كانها قصائد شعر
و الاعجب انه ينجح بدرجات فوق المتوسط

كتب Rys:

كتب farah online:

كتب Rys:

بس معقول لأنو بالاقتصاد مؤتمتة الرياضيات + الجامعة الافتراضية كمان

ما بعتقد أنو الأسئلة منطقية ...و السبب متل ما قال mpcabd ...

معناها عندكن غير شكل لأنو صرت مقدمة 23 مادة و 22 منها مؤتمت ولا مرة كانت الأسئلة مو منطقية يعني كانت اختر الاجابة أكثر دقة وهي بدها فهم مو تشليف و ضروري يكون في كم سؤال 10 كحد أقصى مو مارق على الطالب متلن لحتى يشغل مخو شوي بالمعلومات الي درسها وحاكم عقلو بالمنطق الي تعلمو ولا مرة شلفت وجبت أكتر من 20 صراحة .

ملاحظة صغيرة بظن أغلب الامتحانات الي تعد جولية بالجامعات الهاي لايف أسئلتها هيك اختر الاجابة أكثر دقة يعني الأسئلة الكتابية انقرضت من عندن ولساها عنا متل العادة

هي الأسئلة بدها فهم مزبوط ... بس على اد ما بدها فهم منصير منشلف

عنا على ما أعتقد ما بيكون عندك أكتر من 5أسئلة مارقين على الطالب هاد إذا كان في ...

و مو ضروري نقلد بشكل أعمى ... يعني لمجرد أنو الفحوصات الدولية مأمتمتة نحنا لازم تكون عنا هيك كمان ... !!

صحيح الأتمتة بتخلي التصحيح أسهل و بتضمن أنو كل الوراق تصلحو بنفس الطريقة .. بس بعتقد بكتير مواد ممكن تكون سلبياتها أكتر .. كما وُضِحَ سابقاً

!!!
عفواً يعني .. بس مستحيل .. !!
إلا إذا كان الشي اللي عم يحفظو هو الأسئلة اللي بدها تجي بحد ذاتها
أو بجوز كان عم يدس الSTL ... مع أنو مو لهالدرجة بدون حفظ ..

خلينا نقول انو الاختيار يتعلق بالأسئلة بحد ذاتها, يعني ممكن تكون الأتمتة جيدة جدا وبتختبر فعلا طريقة الفهم ... وممكن تكون سيئة جداً. ونفس الشي بالنسبة للأسئلة غير المؤتمتة!

المادة كانت اساسيات برمجة سي++

وكان الاخ يحفظ 5 برامج كل برنامج 5حوالي 5-6 اسطر تقريبا عن غيب

أنا صوتت انو ما بتفرق معي لأنو ما بتفرق.. كل مادة الها خصوصياتها بعدين كلو "أحسن" من بعضو
بس سؤال: مين قلكون انو بجامعات برا الأسئلة بتكون مؤتمتة؟ أنا ما بعرف أي شي بيأكد هالحكي بالعكس بعرف من تجارب ناس برا أنو الأسئلة مو مأتمتة..
ومرة كنت عم دور على أسئلة دورات بموقع لجامعة الدكتور كان قايلنا انو بيجيب منو أسئلة "لمادة مأتمتة" أم طلعت الأسئلة مو مأتمتة وأصعب بمليون مرة من أسئلتو المأتمتة..

انا بفضل بلا الفحص (نبقى على مقابلات ومشاريع )لانو عنا بالكلية ماعم يكون في إنصاف للطالب الفهمان من الطالب يلي مانو فهمان

يعني المؤتمت او غيرو نفس النتيجة

سمعت أنو الدكتور عمار عميفكر يلغي الإمتحانات العملية (ما بعرف إذا كمان عميفكر بالنظرية كمان). ويكتفي بالمشاريع والمقابلات لكل المواد. إن شاء الله خير.

في ملاحظة...
أنا معكم أنو ياريت لو كان مافي فحوصة، ونكتفي بس بمقابلات المشاريع وخاصة بسنين الكلية الأخيرة (الرابعة والخامسة)، بس المشكلة بتكون إذا الطالب ما أخد حقه من التقييم، ووقتها بكون وجود الفحص أرحم له..
يعني ماضروري أنو مقابلات المشاريع والوظايف اللي عم نقدمها تقيّيم شغل الطالب 100%.. لأنو وقت التقييم بكون في عندة جوانب بدها تتاخد بعين الإعتبار، منها:
1. نوع العمل المطلوب (وأقصد بالعمل هون المشروع)... يعني المشروع المطلوب كبير ولا صغير، سهل التحقيق ولا لأ..
2. نوعية العمل المقدم من الطالب.. وهون لحاله له عدة عوامل، منها عدد العاملين على المشروع.. وعوامل أخرى بتتعلق بأمور تقنية..
3. الوقت المحدد للمشروع.. الوقت طويل بكفي المشروع وبزيد، ولا لأ.. الوقت ضيق..
4. وهي اللي لا تراعى أبداً، أنو نحنا هلأ بالرابعة وبعدها بالخامسة منقدم أكتر من شغلة سوا، يعني بيجوا كلون سوا...
بالنسبة ألنا، واللي شفتو هاد الفصل.. أنو أعدنا أول كم أسبوع فاضيين ورايقين... آخر أسبوع كان رهيب... كل يوم في ياتسليم يامقابلة يافحص!
طيب أنو هي الشغلة لازم تكون مأخوذة بعين الإعتبار... مابعرف أنو أنا عم أحكي كلام مو منطقي، بس أنو الطالب بالنهاية هو كائن بشري يملك دماغ، وهالدماغ أنو إلا ما يستحمل وقت لينتقل من شغلة لتانية لأنو هو بالنهاية مالو أتومات DFA بينتقل مباشرة من حالة إلى أخرى بكل انسياب وحيوية!
أنو ليه مابصير في تنسيق للمواد بحيث المشاريع تكون متدرجة، بشكل أنو الطالب ما يقضي أول السنة فايق ورايق وآخر أسبوع يأعلن الإقلاع عن النوم!
ماعم أشتكي من الضغط... ماهاد كلامي.. بالعكس أنا متأكدة تماماً أنو الشغل هاد هو اللي بفيدنا بالمواد... كلامي أنو ممكن تتنسق مشاريعنا وأوقات نزولها وتسليمها بحيث أنو الطالب يشتغل كل الفصل بشكل متوازن!
وتانياً أنو يكون في طريقة تقييم واضحة ومتوازنة كمان بحيث تعطي كل واحد حقه.. وما تظلم حدا!
وهي شغلة مامستحيلة... فياريت أنو إذا بدون يفكرو يعملو هيك قرار، تتاخذ بعين الإعتبار هيك أمور

اذا بدو يصير التقييم على الوظائف والمشاريع فقط فلازم يتم تقديم هالوظائف والمشاريع بشكل افرادي (كل واحد لحال)
لأنو حسب النظام الحالي المتبع بالكلية (3-4 طلاب) أغلب الطلاب ماعم تشتغل بكل الوظائف والمشاريع (كل واحد عم يستلم مادة) يعني بيتخرج الطالب فهمان 1/3 من مواد الكلية فقط. وأحياناً 0/3

هههه ضحكتني حدا قلك أنو حملة خط الـ ADSL ما طلع منها شي ؟؟ ولا ليكون طالع منها شي وأنا مو عرفانة؟
بعدين ضروري اذا كانت كلية معلوماتية تكون الأسئلة مؤتمة؟ شو دخل؟؟ إذا عم نتعلم "أتمتة" هاد ما بيعني انو إذا كان الفحص مؤتمت رح يكون في الو أي علاقة بالشي يلي عم ندرسه!!
بعدين مين قال انو طريقة الأتمتة بالتربية ولا بالأداب هي الطريقة الصح.. بعدين كم ألف طالب هنن بالتربية؟؟