CSC-SY

ما قلتلي لمين كان الجهاز الرابع
بس على فكرة معك حق هي الشغلة بتصير كتير ومو بس هيك كمان اذا كان ابن جيران ابن خالتك بدوا يشتري كمبيوتر بيجي لعندك.
بس بظن جزء من المشكلة هو بسبب أنو 99% من محلات البيع و الصيانة عنا بالبلد مالون علاقة باللياقة نهائياً.

بس رح قلك أنا شو عملت: يلي عندوا مشكلة بجهازوا يجبلي ياه وأنا بخدموا بعيوني أما إنو أنا روح لعند حدا فآسف مشغول.

من زمان ما اضطريت "فرمت" جهاز لشخص، ما بعرف كيف، بس شكلي خلصت من هالقصة!

المشكلة ما بتقتصر على الوقت الضائع بعملية "الفرمتة"، لأنو بعد ما تفرمت رح تصير بالنسبة للشخص الي ساعدتو مسؤول عن الجهاز، و عند كل مشكلة صغيرة أو كبيرة رح يحكي معك منشان المساعدة، و ما بتخلص بعدا أبدا.

هادا إذا تجاوزنا مشاكل سيديات التعريف الضايعة و الي ما بخبرك عنا الشخص إلا بعد ما تنزل الويندوز، لحتى تبتلى بالبحث عنا على الانترنت، و الملفات الي كانت ضرورية و راحت بعد عملية الفرمتة، و هي ما بيتذكروا إلا بعد الفرمتة حتى لو سألتون قبل!

شغلة الفرمتة او بالأحرى كار الفرمتة كتير عملي مشاكل مع عالم لإني وبالفترة الأخيرة صرت اتهرب باي حجة كانت،شعبنا بشوف يلي بفرمت انو رجل مقدس وبصير بيعملو الف حساب وفورا بيعملو عبقري.
أنا الله غضب عليي وخلا واحد يلزق فيني عمل حالو صديقي الشخصي ومن اعو اصدقائي وكل يوم تلفونات بدو يسأل،صارت السيديات بيناتنا متل تنقل البيانات بالشبكة
اخخخخ شو بدو يحكي الواحد ليحكي،هاد غضب مو نعمة.
بقا انا من اليوم ورايح مابعرف فرمت ولا هم يحزنون..يقولو عني اجدب أحسن مايهلوكني...الراحة من دهب.

بظن كلنا صار معه هيك شي

أنا بقيت لحتى السنة التانية وأنا رايح جاية لعند الاقرباء والاصدقاء والجيران ولعند مدري مين لحتى فرمتله

والأحلى من هيك لما الواحد بيقللك بدي البرنامج الفلاني والعلتاني وبدك تبقى ساعة لتفهم عليه شو قصده

بعدين قفعت معي الشغلة وحديت من انتشار القصة بشكل كبير وصرت فرمت لعدد معين بس (الاقارب فقط...)

مو بس هيك كمان بشرط أنو الجهاز يجي لعندي وفرمته على حسب فراغي يعني احيانا بيبقى الجهاز عندي اسبوع ..

طبعا هاد الشرط من البداية (وكما يقال اللي أوله شرط آخره سلامة) 

بس الأغرب من هيك أنو بعد مدة دامت 3 سنوات لحتى الآن تبينلي اني لحد هلق مافرمتت لحالي (قصدي لجهازي)

فتصور يارعاك الله ....... 

كل مين جهازو بطئ بدو فورمات، وما بيطلعوا على برامج ال real time الشغالة ، او الprocesses المهم تعال فرمتلي

مو بس فرمتلي، لأ وجيب الهارد ديسك تبعك مشان تعملي backup قبل الفورمات لأنو الجهاز عليه معلومات مهمة

مو بس جيب الهارد، وجيب سيديات برامج مشان تنزللي

وساويلي update

واسمحلي اتصل فيك ليل نهار كل ما بدي برنامج وكل مابدي اشتري قطعة جديدة وكل ما أخي الصغير بيلعب عالكمبيوتر وبخربو وكل ما فلان وعلتان بفوت عالانترنت وبنزل بلاوي زرقاء ومو معروف قرعة ابوها من وين وكلها malware

ولا تنسى انو رح قول لكل معارفي عن خدماتك

ويعطيك العافية تعبناك معنا 

ملاحظة: ما انت دخلت معلوماتية مشان تصلح الكمبيوترات 

والله هالشي أكتر شي ماشي هاليومين ،،،، لأ وصار إلها كتب ومراجع وكإنو شي علم مستقل بحالو ،،، بتسأل شي حدا شو بتعرف أو شو مشتغل بيجاوبك : بعرف فرمت

بأكتر الاحيان بيكون حل سهل وسريع ، بس متل ماحكى ايمن بتصير الحكاية معاناه وقت بتتحول لمسؤولية ملاحقة وتغطية جهل وأهمال هالشخص اللي بدو يفرمت

بالنسبة إلي كل مدة ومدة عندي جولة زيارات ، يمكن اتحمل أول مرة روح لعند شي حدا ،،، بس بعد هيك اللي بدو ياني اجي مرة تانية وتالتة بعتذر ،، اللي بدو شي يجي لعندي

الله يكون بيعونك يا فراس
خدمة الناس شغلة كتير منيحة و الك ثواب كبير
و لازم ما تكون الخدمة على حساب مصلحتك
بس الصراحة الناس اللي ما فيها ذوق ف مو خرج انك تخدمها
اهم شي موازنة المعادلة

و الله نفس الشي صاير فيني ............. حتى إنو مرة طلب مني أخو رفيق إبن عمة والدي إني فرمتلوا الجهاز فاعتذرت منوا لإنو بيتوا بعيد فطلب مني إني إشرح طريقة الفرمتة على التلفون لإبنه اللي بالصف الخامس و هو بقول بكل فخر " إبني كتيرشاطر بالكمبيوتر هداك اليوم حطيت كلمة سر للكمبيوتر  آم عرفا لحالوا "

هاد غير موضوع القطع الجديدة و إنزل معي لإنو بدي أشتري جهاز و إذا خربت أي قطعة إنت المسؤول الأول و الأخير ....و غيروا كتيير.....

بس عندي سؤال ليش ما حدا بيطلب من مهندس الكهرباء تصليح مكنسة الكهرباء و من مهندس الميكانيك تصليح السيارة و من المهندس الغذائي إعطاء نصائح في الطبخ.........

الأغرب من هيك....
رفيقك ((على أساس)) يللي ما بتشوفوا بالسنة مرة أو تنين...وبيكون بنفس حارتك...بيكون من أعز أصدقائك وقت حاجتك..

وخصوصا إذا كان بيعرف أنو عندك كتير سيديات...بينكشلك الخزانة...بياخد يللي بدو إياه ويللي ما بدو إياه...وبعدين ليستأذن منك بكل أدب وذوق وأخلاق أنو ((يستعارون)) منك يومين زمان...فيك تقولو لاء؟؟؟!!!

وهات ليجي على بالو بعدبن ويردلك ياهم...طبعاً ليخلصوا أهله وجيرانه وأقربائه وأحبابه منهم..
حتى أحيانا بنسى شو عرتهم...

ولا تنسى الآثار الجانبية...في حال انضرب جهازه من إحدى سيدياتك....

صارت معي هالقصة ما لا يقل عن مئة مرة على قولة هذا صديقك وهذا قرايب رفيقك وهذا قرايبك ولحق بقى على ضياعة وقت وإذا قلتله مانك فاضي بيعملك مابدك تساعده وبيقلك ما إلي غيرك وبفكر إنو إذا انت طالب معلوماتية فانت هي شغلتك وإنت خبير فيها وبيعملك دعاية ما بدك ياها
بس المشكلة مو بالفرمتة والتنصيب بل بما بعدها من تنزيل برامج وتعاريف وغيرها هذا غير إنك بدك تعلمه كمان على بعض البرامج يلي بتنزلها متل ال nero مثلاً يلي أكتر من 10 سألوني كيف بيشتغل وعندهم ناسخات وما بيعرفوا هالشي ولا بيعرفوا كيف بينسخوا
قمت قلت لحالي آخر فترة صايرة القصة وصايرة خلينا نستفيد منها مادياً طالما عم نضيع عليها وقت غصب عنا وصرت هيك أعمل.
بس الشي يلي شفته إنو في نسبة كبيرة كتير من طلاب الكلية لحد هلق بيخافوا من عملية الفرمتة وما بيعرفوا يأقلعوا من السيدي وغيرها من هالقصص يلي لازم تكون ثانوية

عادي عادي ........

مو لحتا يكونو الناس فهمانين شو يعني IT أو معلوماتية .

الناس بتقللك إنو مهندس معلوماتية يعني بتعرف تشتغل على الكومبيوتر (وكل الشغلة طقطقة زرار على قولة أحد الجهلة يللي قللي هيك أول ما سجلت بالفرع) ومن ضمن الشغلات لازم تكون بتعرف تفرمت (لكان شو عم تدرس ؟؟!؟!؟!؟!) .

ولا يهمك سيد فراس معهون معهون هالناس بيعرفو مين نحنا طلاب المعلوماتية وبيعربفو شو شغلنا الحقيقي ومهمتنا بالمستقبل .

أبو الخل .

مرة أحد الجهلة سألني كمان  " بأي سنة بتاخدوا الفرمتة و تنزيل البرامج  ؟؟؟؟؟؟؟؟"  

انا حليتها بطريقتي الخاصة ..
صرت نزّل لقرايبيني ويندوز الانكليزي فكرهوني .. وقلتلهم أنو ما بعرف نزل غير الانكليزي !!.. فما بقا حدا يبعتلي بنوب ..

إذا صاروا يتقبّلوا الإنكليزي ... بدي فكّر نزّلهم شي إصدارة من لينكس ما يعرفوا راسها من إجريها .. بشو بتنصحوني كخطة إحتياطية ؟

السلام عليكم يا شباب

بالنسبة لفورمات الهارد ديسك هذا من نظر مصلحي الكومبيوترات ومديري ومهندسي الشبكات يجب أن يكون الحل الأخير وبالنسبة للحالة هنا فلننسى مديري ومهندسي الشبكات لأن هذه الحالة خاصة فقط بمصلحي الكومبيوتر الذين يتعاملون مع الناس العاديين في تصليح الكومبيوترات الشخصية وليس السيرفرات
بالنسبة للناس العاديين يجب على مصلح الكومبيوتر أن يتوقع ويضع في باله أن صاحب الكومبيوتر المراد تصليح جهازه هو شخص جاهل تماما بماهية الكومبيوتر وهذا شيء طبيعي ولا يجب التذمر منه لأنو مو كل الناس بتعرف بالكومبيوتر ولأنو الله عز وجل ما خلقنا متعلمين وإنما العلم شيء يكتسب بوسائل متعددة منها القراءة والاستفسار من العلماء والخبراء
فإذا وضع مصلح الكومبيوتر هذا في اعتباره وتعامل مع صاحب الكومبيوتر على هذا الأساس وجعل عمله خالصا لوجه الله عز وجل فسيرتاح كثيرا ولو أن هذا الجاهل صاحب الكومبيوتر أهان المصلح بالإستهزاء بعلمه قاصدا أو بطريقة غير مباشرة بدون قصد وهو معذور لأنه جاهل وهنا على مصلح الكومبيوتر أن يتقبل ذلك بصدر رحب وعندها يحاول أن يشرح لصاحب الكومبيوتر ماهو علم الكومبيوتر حتى يعلم ما مدى أهمية مصلح الكومبيوتر عندها صاحب الكومبيوتر يعرف ما قيمة مصلح الكومبيوتر
للأسف مصلحين الكومبيوتر هذه الأيام لا يهتمون بأصحاب الكومبيوتر ولايشرحون لهم ما يفعلون خوفا من سرقة المصلحة كما يدعون وكأن المصلحة سر في هذه الأيام حيث أي شيء يمكن تعلمه في الإنترنت في هذا العصر بإمكان أي شخص الآن تعلم كيفية صنع قنابل على الإنترنت لكن هل المواد متوفرة
فنصيحتي لكل مصلح كومبيوتر سواء كهاوي أو عامل بهذه المهنة أن يشرح لصاحب الكومبيوتر ما سيقوم به من عمل فإذا فهم كان بها وإن لم يفهم سيسكت ويعرف أن هذا شيء صعب عليه فهمه فلن يحط من قدر مصلح الكومبيوتر وأما إذا كان جاهل جدا ولم يفهم وظل يهين ويحط من قدر مصلح الكومبيوتر عندها مصلح الكومبيوتر غير ملوم على ترك العمل وترك هذا الجاهل وخليه يلاقي غير مصلح شو الله ما خلق غير هذا الجاهل لتصليح كومبيوتره بالناقص من هيك واحد
هنا في أمريكا وحيث أنا مقيم توجد شغلة ضرورية لنجاح كل عمل تجاري ألا وهي خدمة الزبائن Customer service وهي علم بحد ذاته يعلم الإنسان كيف يتعامل مع الناس بكافة طبقاتهم من أجل نجاح العمل ومن أساسيات خدمة الزبائن أن الزبون على حق حتى ولو كان جاهل يعني هنا صاحب العمل يعمل قدر الإمكان على إرضاء الزبون حتى يعود الزبون ويتعامل معه ومو بس هيك الزبون بيجر زبون ثاني وهكذا بينجح عمل التاجر لذلك كل الشركات هنا تدرب موظفيها على خدمة الزبائن وتقيم لهم دورات خاصة بذلك أرجو أن يتم تطبيق ذلك في سوريا وذلك بعون الله وبمعيتكم ياشباب حتى تعرف الناس أهمية علوم الكومبيوتر وتقدرنا وتحترمنا
نرجع لموضوع الفورمات كما قلت هو يجب أن يكون آخر حل وخاصة عندما يكون الكومبيوتر يعمل على نظام الويندووز XP لأن الويندووز نفسه فيه عدة حالات يجب إتباعها قبل عمل الفورمات وهي
أولا - عمل الأمر sfc.exe مع السويتش scannow/ بشرط وجود سيدي الويندووز
ثانيا - الدخول إلى Safe Mode  لإصلاح الملفات بعمل sfc.exe إذا ما ظبطتت الطريقة الأولى طبعا مع العلم أن Safe Mode له خيارين أحدهما مع الإتصال بالشبكة والآخر بدونها
ثالثا - عمل System Restore وهذه طبعا لا يعرفها أغلب المستخدمين العاديين ويجب على مصلح الكومبيوتر أن يعلم صاحب الكومبيوتر على عمل ذلك من وقت لآخر وإذا لم يعرف صاحب الكومبيوتر عملها فيجب على مصلح الكومبيوتر عمل Restore Point وحفظها على الجهاز لاستعمالها في المستقبل حين الحاجة
ثالثا - الدخول إلى خيار Last known good configuration من قائمة خيارا ويندووز
رابعا - إقلاع الويندووز من السيدي واختيار repair لتصليح الويندووز
بإمكان مصلح الكومبيوتر عند إعداد الجهاز وبعد تنزيل البرامج أن يعمل Partition خاص على الهارد ديسك ويعمل Backup للويندووز وهو مايسمي ASR وBackup آخرللبرامج ويحفظها على هذا Partition وبعدها يخفي هذا Partition من الظهور حتى ما يخربه مستخدم الكومبيوتر إما بعمل Group Policy أو بتغيير Permissions أو بتعديل الRegistry
بإمكان مصلح الكومبيوتر أن يعمل Startup and Shutdown Scripts ويضع فيها أوامر مثل cleanmgr.exe لحذف الكوكييز وملفات الإنترنت المؤقتة ولتفريغ سلة المحذوفات أو chkdsk أو defrag.exe أو sfc.exe أو أي سكريبت يعتقد أن مصلح الكومبيوترات أنها مهمة
يإمكان مصلح الكومبيوتر أن يعمل حساب مقيد لمستخدم الكومبيوتر غير حساب Administrator حتى مايخرب السيستم
هنالك أيضا برامج مثلSymantec PCAnyware وهي تتيح لمصلح الكومبيوتر أن يدخل على كومبيوتر المستخدم من منزله عبر خط الهاتف ويصلح الويندووز عند المستخدم بس يجب أن يكون عند المستخدم modem وعند المصلح مودم مشابه أو الويندووز سيرفر فيه ميزة RRAS هل هنالك من يستخدم هذه الطريقة يا ترى فهي توفر وقت ومال لأن المستخدم هو الذي سيتصل بالمصلح ويتحمل تكاليف الإتصال
وأفضل حل برأيي هو ومافي أحل منه هو تنزيل برنامج Deepfreeze عندها حتى لو فرمت صاحب الكومبيوتر الويندووز وبعدها أقلع الجهاز فسيعود الجهاز وكأنو ما تفرمت ولا صار أي تخريب شيء
عذرا للإطالة ولكن أرجو أن أكون قد أفدت بما لدي من علم وأرجو من الشباب الدعاء لنا جميعا بالخير والسلام عليكم 
أخوكم ماهر - أبو إبراهيم  

الحمد لله ما عملت فورمات لحدا إلا صديق واحد, بس حدا بيطلب مني شي طلب معت بحاول عقدلن الموضوع مشان يملّوا و يتركوني بحالي, و إلا بعدين الواحد ما بيخلص. بالمناسبة شكرا كتير ماهر1970 على المعلومات الكتير المفيدة. و تعليق صغير, ما بعتقد شغلة " يحاول أن يشرح لصاحب الكومبيوتر ماهو علم الكومبيوتر" بيمشي حالها مع الناس ببلدنا هون..إلا بجوز لتطفيشهن لعند واحد تاني بياخدهن"على قد عقلن" و ما بيشرحلن شي.

الأحلى من هيك بتروح لتفرمت ..الجهاز ما بده فرمتة بيكفي عمل repair أو Upgrade للويندوز ..>>>الشخص اللي بدك تفرمتله جايبك تفرمت لأنو جهازه بطيئ ولازمله فرمتة وأنا جاية الساعة خمسة آل لو سمحتي الساعة سبعة عندي طلعة ولازم يكون الجاهز خالص أبل ما روح.. مازال هيك ليش جايبني .. مصر علفرمتة ومتأكد إنا بتخلص بساعتين .. فرمته إنت .... وبعد ما تفرمت شو الئطع اللي بدا تعريف...>>> المودم .. وين سيديات التعريف اللي جاي مع الكومبيوتر>>> روحتن .. يعطيك العافية .. متل ما الله خلئك بدك ترجع عالبيت لحتى تدور على تعريف للمودم الفظيعة .. وطبعاً طلعت أنا اللي ما بعرف ومو حاسبة حسابي مو هنن اللي جهازن من سنة آنست بربكم .. مشان حل هالمشكلة تاني مرة أخدت معي اللابتوب .. آل شو ياه جايبة معك عدة الدكتور....

بالنسبة للأخ ماهر شكراً عالمعلومات بس عندي ملاحظتين .. في قسم منيح من المحلات اللي بتبيع الكومبيوترات (المراكز الكبيرة عالأقل) عاملة متل رعاية زبائن إنو في عندا مركز صيانة فيك تحاكيه بياخد الجهاز وبيحللك مشكلته إذا في مشكلة .. معظم الناس هون وللآسف بتفكر فيا مادياً .. بركي طلع الجهاز فيه شي بدن يدفعوني مصاري ..لأ بجيب واحد بعرفه بيعرف كومبيوتر بيصلحلي ياه ببلاش ..(وحزرك هاد اللي بيعرف كومبيوتر بينطرء منيه لأنك جبته .. ماهو كيف بدا تصير عنده خبرة لو ماجرب بجهازك!!!؟؟؟ إنت كان فيك تبعته علصيانة بس من غلاوته عندك ماهان عليك تسلم الجهاز لغيره)..

تاني شغلة أخي ماهر .. حكيك كله تمام وأهم كلمة فيه هي مصلح الكومبيوتر .. مين آل إنو أنا مصلح كومبيوتر .. شو مشان كلمة كومبيوتر كلا مو واردة بفرعي ...هندسة معلوماتية من وين اعتبروني مصلحة كومبيوترات ..وبظن الأخ فراس كتب الموضوع وآصد هالنئطة إنو العالم مفكرتنا عم ندرس مصلحين كومبيوترات ...

أحلى شغلة أول ما دخلت عالكلية العالم ما بتعرف شو هي المعلوماتية .. صرت اضطر أول هندسة وشد عليها ليخافو ويستهابو الفرع .. آم السنة سألني جارنا(هاد ما ألتلو هندسة) أنو سنة صرتي ألتلو تالتة ..آلي يلا السنة جاية تخرج ..ألتلو لأ اللي بعدا ..ألي ليش بئا شو مفكرين حالكن هندسة؟؟؟؟...

تعودنا ...

سلام

lool

السلام عليكم
يا شباب أهم شغلة هي الصبر على الناس الجاهلين بما هو علم المعلوماتية والحق معهم لأنهم ما بيعرفوا ونحن وظيفتنا أن نبين لهم ذلك ونتحملهم والشغلة ما بتصير بين يوم وليلة وقد تأخذ سنين لازم يكون قدوتنا الرسول محمد صلى الله عليه وسلم الذي صبر على أصحابه وقومه سنوات طويلة حتى وصلت الرسالة ونحن رسالتنا أن نوصل لعامة الناس ما هي المعلوماتية وأنا لا أقصد طبعا بالتفصيل وإنما الأساسيات يعني مثلا الجاهل بالكومبيوتر مو ضروري يعرف كيف بيعمل المعالج ويأخذ البيانات من الذاكرة وماهي الميغاهيرتز والغيغا بايت والرام ديم وإلخ من مصلحات لا يفهمها عامة الناس ويجب على من يصلح الكومبيوتر أن يأخذ الموضوع بحكمة وصبر ويشرح بشكل عام ما يفعل وليس بالتفصيل مثلا أنا وأي إنسان عادي لا يفهم بالغسالات فإذا تعطلت غسالتي طبعا سأجيب مصلح غسالات بس إذا مصلح الغسالة ما قال لي على الأقل ما هو العطل وماذا سيفعل لتصليحه فسوف أكون غير مطمئن لعمله وكذلك مصلح الكومبيوتر
أنا هنا ناقشت الموضوع تبع الفورمات لأنه خاص بتصليح الكومبيوتر ولم أقصد أن أقول بأن الذي يدرس هندسة المعلوماتية هو مصلح كومبيوتر لكن مهندس الكومبيوتر يجب على الأقل أن يكون عارفا بكيفية صيانة وتصليح الكومبيوتر
بالنسبة يلي قال لي أن ذلك ما بيظبط عنا بمجتمعنا بسوريا أقول له أن الناس هم نفس الناس سواء كانوا سوريين أو أمريكيين أو صينيين فمنهم الجاهل ومنهم العارف ومثل ماقلت تعليم وتوعية الناس شغلة مو بسيطة وتتطلب وقت وجهد وصبر يعني لينظر كل واحد منكم يا طلاب الهندسة كم من الوقت والمجهود والصبر ستبذلون حتى تتخرجون وتصبحوا مهندسين طبعا سنوات وليس أيام أو أشهر لذلك أهم شيء عاملوا الناس مثل ما بتحبوا يعاملوكم واصبروا على آذاهم
والسلام عليكم
أخوكم ماهر - أبو إبراهيم

شكرا كتير ماهر1970 على المعلومات الهامة و المفيدة و بظن إنو كلامك صحيح إلى حد ما ..........لكن المشكلة إنو لأسباب عديدة الناس عنا ما بيحبوا يتعلموا شي جديد .......يعني بتحاول تشرحله عن المعلوماتية بشكل مبسط بتلاحظ إنوا عمبيتجاهلك و بيصير يؤول عنك "مفلسف".........طبعا الكلام لا ينطبق على الجميع ...........ولكن المشكلة إنو الناس لم تقتنع أن تصليح الكمبيوتر هي مهنة و ليست مجرد " طقطقة أزرار " أو خدمة مجانية  متل تركيب جرة الغاز ....

كل مالا عم تسوء الامور !

بكرا عندي جولة فرمتة + صيانة لزبونين .

يا ربي فرجك  

بسيطة أنا أشتغل كهربجي بالإضافة إلى مهنتي كفرمتجي لأن العائلة كلها تقول لي أنت الوحيد اليفهم في هذه الأشياء.

ياالله انا كتير انبسطت وقت أريت انو في كتير عالم عم بتعاني متلي من الناس يللي مفكرين انو المعلوماتية هي دراسة وورد و اكسل وهالشغلات هي..
أنا كتير بانزعج وقت العالم بيقولو أنو بكام دورة بيمشي الحال ما في داعي لكلية المعلوماتية او انو ليش اسم كليتكون هندسة شو دخلا الهندسة ؟؟؟؟
ياالله لو بايدي انشر هالحكي يللي انحكا هون بالجرايد وعالتلفزيونات ما بقصر بس مشان العالم ما يحكو بشي ما بيعرفو في ...
(حطيتو ايدكون عالجرح تمام )

ملحوظة: رفيقي بالحارة من كتر ما فرمتله جهازه...تعلّم المصلحة تمام...يعني صار هو يفرمت أجهزة العالم...

المزعج بالموضوع أنو مفكر حالو كتير فالح...يعني بشطارتو هو...يعني لاحمداً ولا شكوراً