CSC-SY

سرعة التطور بمجال المعلوماتية كبيرة كتير، وأحيانا منتأخر لنجاريها، والإنترنت كان أكتر مشروع بينتشر للعموم نموا وتطورا، طبعا كلنا منعرف فوائد هالخدمة، الإعلام والتجارة والمعرفة، وصار في جامعات ومجتمعات افتراضية، ومنها موقعنا، حتى صار في لغة اختصارات خاصة بالإنترنت، صارت الإنترنت علم كبير وبإختصاصات كتيرة.

مثلا اذا كنت بالجامعة، وفي ملف بدي اشتغل عليه بالبيت، وما معي فلاش، بخزن الملف على سيرفر بأمريكا وبالبيت بنزلو على جهازي، مو شي بيخيل !

المهم يا جماعة وبلا طول سيرة، أنا بدي علق على حادثة صارت معي من فترة بتعكس وجه تاني للإنترنت، كنت بالجامعة وفي شباب عم يحكو مع بعضن بموضوع بضحك، وبغض النظر عن الموضوع، كان كل ماحدا يضحك بقول lol ! بشكل عفوي، اتساءلت بيني وبين نفسي معقول لهالدرجة أثر الإنترنت بجيلنا؟

وهي مثال تاني، من على زمان أول (10 سنين) كان اللي مايعجبو اسمو يروح عالنفوس ليغيرو، هلأ صار كل واحد بحط الإسم اللي بشوفو بعبر عن نفسو وشخصيتو بالإيميل والمنتديات وبيتنادى فيه، أنا شخصيا الناس اللي بتناديني anathema على الإنترنت أكتر من الناس اللي بتناديني بإسمي الحقيقي بالواقع.

وكمان مرة كان قريبي مسافر يتغرب بدولة أجنبية، وطلب مني علمو عالإنترنت شوي وكيف يستعمل الإيميل والماسنجر، وكيف بدو يتواصل مع الأهل بالوطن اذا مافي عندو لوحة مفاتيح عربية، علمتو كيف يكتب العربي بالأحرف اللاتينية، وعطيتو برنامج VB لكتابة العربي على الشاشة، اندهش كتير وقللي حاسس انو هادا العالم أنا مو عايش فيه!.

فعلا يا جماعة آخر 15 سنة شهدو تطور معلوماتي غير مسبوق، يمكن نحنا انجذبنا لهالفرع لأنو نحنا اللي عشناه، وصرنا مضطرين نتأثر بثقافتو ومصطلحاتو شئنا أم أبينا.