CSC-SY

اليوم كان في لقاء مصغّر بين 4 أعضاء من csc-sy.

إلتقيت اليوم abo-elkhell و anathema و foaad . أوّل واحد إلتقيتو كان أبو الخل (خالد). تواعدنا جنب بيتو الساعة 9 الصبح, و أنا طلعت من البيت 9 إلا عشر دقايق (مو طلع بيتو جنب بيتي) و وصّلت لهنيك و صرت حوم حول المكان. صارت الساعة تسعة, و رنّلي على الموبايل, و قاللي إنو قدّام محطة الإطفاء, أنا تطلعت حواليي و ما لقيت حدا, و سألني أبو الخل عن أي محطّة إطفاء نحنا تواعدنا جنبها, و طلع بعدين إنو نحنا واقفين جنب بعض و مو دريانين.

تعرّفت على خالد, و قاللي إنو شايفني بشي محل, بس ما عرفنا وين بالتحديد. بعدين طلع إنو مو بس نحنا جيران, كمان رحنا على نفس المدرسة الإبتدائيّة (التطبيقات) و الثانوية (نجم الدين عزّت) بس أنا كنت قبلو بسنة. تناقشنا لفترة عن الأساتذة بالمدارس هي, و عن آنسة الصف السادس هالة اللي كانت صارمة بس حبّابة, و عن آنسة الصف التاني ميسون اللي كانت تقتلنا عالطالع و النازل, و عن إستاذ العربي بالثانوي, و عن العصايات اللي  طعمنا ياها إستاذ القوميّة (أنا ما لي متذكر هي الخاطرة, بس بعتقد هيك أحسن ) و عن كتير كمان شغلات.

إنطباعي الشخصي عن خالد إنو شخص كتير كتير حبّاب, و كتير إجتماعي كمان. كمان أنا معجب بالطريقة اللي عم يحاول ينسق فيها بين العمل و الدراسة, طبعا هادا شي كتير صعب بطبيعتو. مالي متأكد إذا نحنا التقينا من قبل, بس رح نعوّض هادا الشي.

بعدين أخيرا وصلنا على البرامكة, و قعدنا شوي بكليّة الهندسة المعلوماتيّة, و بعدين تذكّرت إني حطيت شغلات للطباعة عند المكتبة اللي جنب مكتبة المستقبل, فطلبت من أبو الخل إنو نروح لهنيك, و رحنا, و نحنا هنيك تلفن anathema (من الآن فصاعدا لؤي ) و قاللو خالد إنو رح نجي لعندو, بس تبع المكتبة للأسف ضل يقوللنا ثواني و دقيقة و هلأ, و بالأخير تركناه و رحنا لنشوف لؤي. بعد ما مشينا شوي, تذكّرت إني نسيت الفلاشة, فرحت لجيبها, و بعد ما طلعت ما عدت لقيت أبو الخل. فتلت شوي بالمنطقة على أمل إني شوفهم, و ما لقيت حدا (على الأغلب كانو بالكليّة), فرجعت لعند المكتبة على أمل إنهم يرجعولي هنيك. بالأخير رجع خالد و قاللي إنو لؤي إجا, و إنو كمان همام و هاني (hanisaf) كانو موجودين بس عندن موعد و راحوا. المهم صاحب المكتبة ما خلّص من الكتب اللي كانوا من المفروض خالصين مبارح, و قلنا نستنّا دقيقة. إستنينا دقيقة, باعتبار إني مسافر بكرة و ما رح يصحلي آخدن. الكتب كانو كتب كمبيوتر عم بطبعن لإني مسافر بكره (لمدة اسبوعين) لمنطقة ما فيها كمبيوترات بوفرة . بهادا الوقت لؤي لقا المكتبة و لقطنا . أنا كنت محرج شوي باعتبار التأخير اللي سببته. المهم, تركنا الكتب بحالها, و طلعنا. استنينا فؤاد شي ربع ساعة, بعدين بعتلنا رسالة إنو هلأ فاق (10.30) و رح يتأخر. ركبنا بسيّارة لؤي و طلعنا.

إنطباعي الشخصي عن لؤي : بصراحة أنا كتير معجب بلؤي. لقيت إنو لؤي شخص متّزن و متعلم و مثقف و بيفكر بالشغلة اللي بدو يقولها قبل ما يحكيها. ببساطة لقيت إنو رجل كتير متوازن و فيه من كل الصفات الحميدة. بصراحة, نيّال اللي بدها تاخده .

أخدنا لؤي على الشام القديمة, و فتلنا فيها شوي. أنا ما كنت شايف لا الشام القديمة ولا قصر العضم, و لا متحف عنبر أو قصر عنبر (نسيت شو إسمو ) و فعلا طلعوا هدول محلات كتير حلوين. بعدين حطّ بنا الرحال في مطعم بيت الجدي (أو بيت جدّي, مالي متأكد). طلع هادا المطعم شي فخامة كتير, و كتير كتير حلو, و حسيت إنو أنا رايح شي نص عمري أو شغلة باعتبار إني ما لي شايفو من قبل ولا مرّة. كان مكتوب على الباب إنو عندن إنترنت , بس الله أعلم ما لقينا هيك شي و نسينا نسأل. حاكينا فؤاد و طلع متلي ما بيعرف الشام القديمة, فواعده لؤي عند الجامع الأموي على أساس إنو يروح يجيبو. و بعدين رن موبايلي, و كان فؤاد.

إنطباعي الشخصي عن فؤاد : من الصعب تكوين إنطباع عن فؤاد . هي المرّة ما صارلي وقت شخصي مع فؤاد .  و باعتبارة قليل الحديث بطبعه, و أغلب حديثه كان عن البرمجة و الفروق بين فروع ال cs و مواضيع تقنيّة اخرى, ما قدرت كوّن إنطباع معيّن. فؤاد شخص غامض و لا يميل للحديث (اللهم إلا إذا كان عن الحاسبات ) لهيك راحت للمرة الجاية .

أكلنا و شربنا و انبسطنا (الكازوزة ب 35 ليرة و كاسة الميلو ب 60 ... أنا كان بدي آخد خبز على الغدا باعتبار إنو 5 ورقات للقطعة بس كلنا أكلنا فول (بلا ما نقول قديش الصحن ) ).

بسبب الفول و السهر (السهر بالنسبة لفؤاد و لإلي أكيد نحنا من اللي بيناموا بالنهار و بيفيقو بالليل, و خالد نايم كم ساعة بس) ما قدرنا نحكي كتير. بصراحة هي الشغلة الوحيد اللي زعجتني نوعا ما بهادا اللقاء, لإني حبيت إنا نحكي عن كم موضوع شيّق, بس للأسف كلنا كنا تعبانين و نعسانين (ما عدا لؤي  ) و هيك حكينا عن كم موضوع بس. حكينا عن إنتشار طلاب السنة الأولى بالموقع و عن الجهد اللي استغرقو تأسيس الموقع و عن الفترة الأولى و عن شغل لؤي و خالد و عن المعامل بكلية الهندسة المعلوماتية و عن أجهزة الماكنتوش, و كل مين ما كان حاضر معنا و كنا بدنا ياه يحضر (قائمة طويلة ), و كمان حكينا عن تقسيم القرص الصلب و تنصيب سوزي و الجامعة الإفتراضية و الشبكات و المعالجات ثنائية النواة و عن جامعة لؤي ..... عدد منيح من المواضيع, بس لو كنا فايقين أكتر كانت المناقشة أكيد أروع بكتير .

بإختصار, كان شي كتير حلو.