انصحوني شو فوت ؟
|
مشرف
تاريخ التسجيل: 2006-02-19
مشاركات: 2468
الجامعة: دمشق
الكلية: الهندسة المعلوماتية
المرحلة: السنة الثالثة
|
السلام عليكم
بفضل الله وتمام نعمته جمعت 235/240 و 251/260 بالثانوية والحمد لله باعتقد بيطلعلي كل الفروع . أنا صرلي بهالمنتدى 22 أسبوع لكن ما قدمت أكتر من 3 مشاركات طبعا بسبب الباكالوريا تعبت ونلت يلي بدي يا , لكن المشكلة الكبيرة اللي واجهتني هلأ : شو بدي أدخل ؟ وليش ؟ طبعا هالمشكلة اندلعت بيني وبين أهلي بعد مرور 5 دقائق على استلامي للنتيجة ومتل أي أب وأم بدون ياني فوت (طب | صيدلة | مخبري) وبس , أنا أهلي بيعرفو أني ما بعرف أحفظ وأنو ذاكرتي الحفظية ضعيفة جدا وهادا الشي يلي خلاني ما قيم كتاب العلوم أو القومية من إيدي طول السنة مشان أبقى على اتصال مع كل معلوماتي السابقة . بالنسبة إلي أنا ما بحب فوت أي فرع ما في تشغيل مخ يعني إذا ما في مسائل ورياضيات وتفكير ما بحبو , وبلاقي كمان أنو الطب توقيف للمخ عن أحد وظائفه الأساسية وهي التفكير بعمق لأنو كل شي جاهز بس عود واحفظ ( شي بيقرف ) والمطلوب منكن يا شباب أنكم تنصحوني (والدين نصيحة) شو فوت , وأنا عنجد رح اعتمد عليكم بهالقصة , وإذا بتحبو كمان تشرحولي عن الهندسة المعلوماتية عنا بالبلد وعن إمكانية لعمل بها بعد التخرج , رجاء ً الموضوع جدي كتيير. وعلى كل حال مالي نسيان الحلوان .
{كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ وَتُؤْمِنُونَ بِاللَّهِ}
|
| |
دخول أو تسجيل لإرسال التعليقات | قراءة: 1581 |
|
عضو فعال
تاريخ التسجيل: 2005-05-25
مشاركات: 726
الجامعة: غير ذلك
الكلية: الهندسة المعلوماتية
المرحلة: السنة الثالثة
الاختصاص: هندسة برمجيات
|
مشوار الطب صعب و طويل و معت بس نهايته مغرية(دكتور قد الدنياااااااااا)
اذا قدرت تأقنع اهلك بالمعلوماتية فلا تقصر
و وضع المعلوماتية بالبلد حاليا تعيس
بس بعتقد المستقبل النا
والله اعلم
|
| |
دخول أو تسجيل لإرسال التعليقات |
تاريخ التسجيل: 2006-04-30
مشاركات: 26
الجامعة: دمشق
الكلية: الهندسة المعلوماتية
المرحلة: السنة الثانية
الاختصاص: هندسة برمجيات
|
انشا الله ألف مبرووووووووك هلأ بالنسبة لفرع المعلوماتية الفرع كتير كتير حلو بس طبعاً ليلي بيرغب فيه و بيفوتو عن قناعة أنا مابدي قول أنو الفرع سهل بالعكس يعني هو بدو شغل منيح بس الميزة يلي بتميزو أنو دراستو ممتعة طبعاً باستثناء بعض المواد يلي ممكن تواجهك بالسنة الأولى و يمكن بالسنة التانية بس طبعاً بتضل هالمواد مواد غير اختصاصية المهم أنا و بالنسبة إلي كطالب كنت سنة أولى لقيت أنو أحلى و أروع مادة هي البرمجة أما بالنسبة للفرع كفرع فبظن أنو يلي بيفوت على المعلوماتية بتنفتح الدنيا قدامه وخصوصاً أنو اختصاصاتها مطلوبة إضافة إلى أنها أختصاصات حلوة يعني في (هندسة شبكات / هندسة برمجيات / ذكاء صنعي ) و يمكن من هون لنصير سنة رابعة يفتحوا اختصاصات جديدة أما بالنسبة لتشغيل المخ فأنت لتنجح بالكلية مضطر تشغل مخك لأنها بتعتمد كتير على الرياضيات و بحب طمنك من شان الحفظ أنو لح تنسى شي أسمو بصم لأنك إذا ما فهمت و استوعبت الفكرة منيح ما فيك تحفظها و أكيد المواد يلي بتعتمد على ((الفهم ))قليلة لأنو معظمها رياضيات طبعاً في مادة الثقافة بالسنة الأولى هي الوحيدة يلي بحاجة لحفظ متل حفظ العلوم أو حتى القومية حتى تقدر تجيب علامة منيحة فيها و على كل حال هادا الشي بيضل من منظوري أنا بقصد أنو هادا لشفتو بالسنة الأولى و لازم تجمع معلومات أكتر عن هي الكلية و حتى غيرها لحتى تقدر تقرر لأن بيضل هادا مستقبلك يلي بدك تكمل كل حياتك فيه
و كن كالنجم لاح لناظر على صفحات الماء وهو رفيع
و لا تك كالدخان يعلو بنفسه في طبقات الجو وهو وضيع
|
| |
دخول أو تسجيل لإرسال التعليقات |
|
عضو فعال
تاريخ التسجيل: 2005-02-14
مشاركات: 288
الجامعة: دمشق
الكلية: الهندسة المعلوماتية
المرحلة: متخرج
الاختصاص: ذكاء صنعي
|
أول شي مبروك العلامات الحلوة..
إذا بتحب الرياضيات وبتكره البصم فإنت متلي وانا لئيت حالي بهالفرع لحد هلأ ترفعت عالرابعة بدون ما ابصم شي وكله اعتماداً عالفهم والحمد لله كتير ناجحة ومتوفئة بفرعي .. وحتى الثقافة أدمتا اعتماداً على معلوماتي تبع الإعدادي والثانوي ورفعتها...
بظن توقيعك بيدل لحاله شو ميولك وكونك بتعرف برمجة وC++ (من الموقع اللي بتوقيعك) وبتعرف directX فبظن مسيرتك لحد نهاية التالتة رح تكون أسهل من مسيرة غيرك .. ويصير عندك وات فراغ منيح لتنتج في شي غير الدراسة..بكل الأحوال موفئ..
وضع الشغل بالبلد هلأ كتير الشغل فردي ومحتاج دعم مادي كبير بس بيجوز لأدام يتحسن الوضع عن هيك ..الله أعلم ..
موفئ ومبروك للجميع علامات البكالوريا..
|
| |
دخول أو تسجيل لإرسال التعليقات |
|
مدير
تاريخ التسجيل: 2005-07-15
مشاركات: 3058
الجامعة: دمشق
الكلية: الهندسة المعلوماتية
المرحلة: السنة الخامسة
الاختصاص: هندسة برمجيات
|
هلأ بالعادة لما حدا يسألني هيك سؤال بقله فوت طب! ليش؟
لأنو اذا ما كان متأكد انو حابب يدرس معلوماتية ويشتغل بقية حياته بهاالمجال (حتى لوكان في مجالات تانية مردودها المادي أعلى) معناتها من الأفضل انو يفوت طب مشان مايندم بعدين.
|
| |
دخول أو تسجيل لإرسال التعليقات |
|
عضو فعال
تاريخ التسجيل: 2006-01-26
مشاركات: 258
الجامعة: دمشق
الكلية: الهندسة المعلوماتية
المرحلة: السنة الثالثة
|
حابب إحكيلك عن تجربتي الشخصية بنفس الحالة تماما ...... أنا جبت علامة منيحة كمان و كان عندي الخيار أدخل أي فرع .... و فعلا بعد عشر دقائق من صدور النتائج تلقيت أول إتصال من الأقارب تحت عنوان " مبروك دكتور !" و بعد أيام العيلة كلها كانت عم تحكي إنو أخيرا صار في دكتور بالعيلة _لأنو بعيلتنا ما في ولا دكتور _ ..... بالنسبة إلي لاقيت حالي بموقف كتببر صعب لإني كنت عمبحلم بالمعلوماتية طول البكالوريا و فجأة إنهالت علي النصائح من أهلي إنو لاتروح فرصة الطب من إيدك و زارني عدة دكاترة من أصدقاء والدي لإقناعي بالطب (رح يصير معك هيك شي على الأغلب) و كأني رح إنتحر إذا ما دخلت طب .... بعد ما بقيت رافض فكرة الطب ... قعدت أنا وهلي و شرحتلهم و جهة نظري و هن نصحوني إني بعد ما سمعت رأي كل الناس المؤيدين و المعارضين لفكرة الطب إنو فكر بجدية مدة يومين لحالي من دون أي تأثير خارجي و قرر ........ و فعلا رحت سجلت المفاضلة من دون ما يعرفو الأهل حتى شو سجلت غير بعد ما سلمتها ......... و أنا مو ندمان على اختياري ... لكن في نقطة هامة ........ أنا ما عم قلك أدخل معلوماتية ....... أنا عم قلك إسمع رأي الجميع بعدين قرر لحالك دون أي تأثير خارجي لأنو هاد مستقبلك أولا و أخيرا و إنت حر فيه ......... و إذا كنت حاطط ببالك تدخل معلوماتية فلا تتسرع ..... لإنو هاد القرار رح يغير حياتك يعني لاتتبع بس قلبك ... لكن لازم تكون واعي تماما فرص النجاح و العمل يعني إذا مو متأكد إنو قرارك صحيح 100% بلالك هالمغامرة و أدخل طب ........ ز أخيرا بقلك "إعقل و توكل " و إن شاء الله بيوفقك للي فيه الخير
|
| |
دخول أو تسجيل لإرسال التعليقات |
تاريخ التسجيل: 2004-11-24
مشاركات: 439
|
انا رأيي المتواضع انو مهندس المعلوماتية لازم يكنلو مكانة اكبر بكتير من الطبيب... لأنو المستوى يلي منفكر عليه والمجال والبيئة يللي منشتغل فيا والالغاز يلي منحلا يوميا من ضمن عملنا على مستوى ارفع بكتير من الطب. بس عنا ما حدا عم يستوعب هالمعادلة، امبارح كنت طالع مع شوفير تكسي وبعد ما حكينا كام كلمة سألني بالحرف الواحد: "يعني هلق يللي بيعمل دورة كيمبيوتار ما بيصير بيشتغل نفس الشغل تبع شهادتك؟"
بس بعتقد الوضع شوي شوي عم يتغير...
|
| |
دخول أو تسجيل لإرسال التعليقات |
|
مشرف
تاريخ التسجيل: 2006-02-19
مشاركات: 2468
الجامعة: دمشق
الكلية: الهندسة المعلوماتية
المرحلة: السنة الثالثة
|
كتر خيركم يا جماعة وعذبتكم معي , لكن النتيجة بعد كل يلي انحكى أني ما بحسن خلي أهلي يزعلو مني أو يغضبو علي أنا بأذن الله رح أقدم على الصيدلة والله يعيني عالحفظ , وبعدها بأقدم لأختبارات وبجيب شهادات بالمعلوماتية, وممكن أدرس منهاج المعلوماتية لحالي . آسف لأني ما رح بقدر كون معكم بس انشاء االله ما بترك المنتدى أبدا ورح حاول أني أبقى على اتصال معكم وكأني بالكلية . والله الموفق وعليه الاتكال . المحب المخلص : عبد الله دياب .
 
{كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ وَتُؤْمِنُونَ بِاللَّهِ}
|
| |
دخول أو تسجيل لإرسال التعليقات |
تاريخ التسجيل: 2006-05-22
مشاركات: 692
الجامعة: دمشق
الكلية: الهندسة المعلوماتية
المرحلة: السنة الخامسة
الاختصاص: هندسة برمجيات
|
مرحبا انا ما قريت كل الردود
بس نصيحتي إلك إذا ما بتحب الصيدلة أوعك تفوتا لأني عنجد بعتبرها
تعطيل للمخ بعد التخرج
أما المعلوماتية مخك بضل شغال حتى بعد التخرج......وإذا بتحبها أكيد رح تقدر تتحمل بعد المطبات
أما إذا دخلت شي ما بتحبو.. عند اول مطب....ببلش الندم والتحسر
وبعدين لإيمتا نحنا بدنا نضل هيك ندمر مستقبلنا كرمال أهلينا...
وبتمنالك الخيار الأ فضل.....ولا تنسى تخبرنا شو اخترت....
|
| |
دخول أو تسجيل لإرسال التعليقات |
|
عضو فعال
تاريخ التسجيل: 2006-01-26
مشاركات: 258
الجامعة: دمشق
الكلية: الهندسة المعلوماتية
المرحلة: السنة الثالثة
|
بدي قلك إذا كنت مستعد تنتحر مشان ما يزعلو أهلك فأدخل صيدلة........ 1) مستقبل الصيدلة هو إنك تفتح صيدلية و تداوم فيها لمدة 12 ساعة في اليوم طول حياتك (سجن مؤبد مع الأشغال الشاقة) 2) تسجل صيدلة + تدرس معلوماتية => فشل في دراسة الصيدلة و إضاعة السنين الذهبية من عمرك في الركض وراء أرنبين لن تمسك أي منهما 3)شو ناوي تشتغل بالنهاية (معلوماتية أو صيدلة؟؟؟؟ ): إذا بدك تاخد شهادات بالمعلوماتية معناها بدك تشتغل فيها ..... بهاي الحالة ليش تضيع خمس سنين على دراسة الصيدلة ..... و إذا اشتغلت بالصيدلة نفس الشي ... بالمختصر المعلوماتية و الصيدلة ..... لازم تختار وحدة فقط مشان أهلك لاتستلم و حاول اشرحلون معنى المعلوماتية و فرص النجاح فيها و استشهد ببعض المهندسين اللي نجحوا و صاروا من أصحاب الملايين .......و إذا ما قدرت تتحمل ضغط الأهل معناها إنت اتخايت عن حلمك بسهولة و مو خرج تدخل معلوماتبة .... لأنو هاد الموقف ولا شي أدام اللي رح تواجهه أثناء الدراسة من ضغوط ......... يعني أهلك أكيد بدون الأحسن إلك لكن ممكن يكون قرارون مبني على جهل بالمعلوماتية .... ملاحظة: لمزيد من التفاصيل راسلني على الخاص  لأنو حالتك نفس حالتي تماما ........... و إن شاء الله موفق ....
|
| |
دخول أو تسجيل لإرسال التعليقات |
|
مدير
تاريخ التسجيل: 2005-07-15
مشاركات: 3058
الجامعة: دمشق
الكلية: الهندسة المعلوماتية
المرحلة: السنة الخامسة
الاختصاص: هندسة برمجيات
|
صيدلة؟!!!
يعني طب فهمنا. بس صيدلة؟!!!
بنصحك اذا بدك تتخلى عن المعلوماتية فوت طب أو طب أسنان مو صيدلة!
|
| |
دخول أو تسجيل لإرسال التعليقات |
|
مشرف
تاريخ التسجيل: 2006-02-19
مشاركات: 2468
الجامعة: دمشق
الكلية: الهندسة المعلوماتية
المرحلة: السنة الثالثة
|
تم تعديل الخطة وبحمد الله رح فوت معلوماتية انشاء الله , أنا اتخانقت شوي مع أهلي بس بلأخير قررت ألجأ لخالي ( دكتور سنان ) وشرحتلو كل الموضوع فقام قلي ( عدم المؤاخذة ) إني بكون حمار إذا ما فتت معلوماتية , أنا خبرت أهلي أنو رح فوت فرع أبدع فيه وما يهمني لا حفظ ولا غيرو و طلبت أنو ما عاد حدا يفتح السيرة وخلصنا منها . بالأول انهارت أعصابي و حسيت أنو لازم أخضع لمطالب أهلي بس بعدين قلت لحالي معقول (يعني متل ما قال The-X-Jack)أتخلى عن آمال صرلي ببنيها 7 سنين ؟؟ يعني عنجد وقتها بكون حمار!!! الله يخليي ياكم كلكم عنجد ساعدوني وكنتو المنفذ الوحيد لصوتي بهالموضوع كتر خيركم وانشالله بكرا بالكلية بردلكم جمايلكم 
{كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ وَتُؤْمِنُونَ بِاللَّهِ}
|
| |
دخول أو تسجيل لإرسال التعليقات |
|
أرسل من قبل 
