|
مرحباً Sana A قبل ما جاوب على أسئلتك حابب أنوه أنو المعيار الأول والأهم لاختيار فرع دون سواه هو ميولك بغض النظر عن قناعات أهلك ومعارفك ومحيطك، هاد مستقبلك وبيعنيلك إلك بالدرجة الأولى وعدم توجهك لمجال بتحبيه ما حدا غيرك رح يدفع تمنو بعدين. كتب Sana A: 1 . المعلوماتية بتعتمد على الرياضيات ولا عالحفظ متل الصيدلة ؟؟؟ وكمان في كتير مواد فيزيا ولا الرياضيات أكتر ؟؟؟ وإذا فكري رياضي ممكن كون ناجحة بالمعلوماتية ؟؟ المعلوماتية فرع رياضي بالدرجة الأولى وبتحوي اتجاهات هندسية. الحقيقة بغض النظر أنو اسم الكلية "هندسة معلوماتية" دراستنا أقرب لتكون Computer Science، وطبعاً ضمن اختصاصات الكلية يوجد اختصاص هندسة برمجيات Software Engineering يللي بيهتم بالنواحي الهندسية لبناء وتطوير وتوزيع البرمجيات. الاختصاصين الآخرين هنن هندسة الشبكات Network Engineering والذكاء الاصطناعي Artificial Intelligence وعم نسمع بافتتاح اقسام لاختصاصات جديدة. كتب Sana A: 2. العمل بعد التخرج كمان من أكبر العوائق اللي الكل عم يقولولي عنها ... عنجد إنو خريجين
المعلوماتية ما حدا مقدرهم بهالبلد ؟؟؟ ومو ملاقيين شغل أبدا ؟؟؟؟ ( مع إنو أنا ضد هالأفكار
لأنو لازم نتفائل إنو متل ما هالعالم كلو تطور لازم بيوم من الأيام نحنا كمان نتطور ويدخل عنا
الكومبيوتر بمجالات أكتر من اللي هو فيها عنا حاليا الحقيقة مشكلة التوظيف وفرص العمل ما بتقتصر على قطاع المعلوماتية فقط، لكن بنفس الوقت ما صح أنو خريجي المعلوماتية ما عم يلاقو شغل أبداً. الوضع مختلف من مدينة لمدينة مثلاً فرص التوظيف من قبل شركات متوفرة بالعاصمة أكتر وبالمدن التانية أغلب العاملين بمجال المعلوماتية إما باطار عمل فردي أو ضمن مكاتب صغيرة غير متخصصة (يعني بيشتغلوا كل شي!). كتب Sana A: 3. الناس ( القليلين كتير ) اللي نصحوني بالمعلوماتية قالولي إنو يا تندرس بالشام يا بلاها
أحسن ... وأنا من حمص يعني بدي أدرس بالبعث لأني مو مفكرة بالسفر حاليا .... فشو
رأيكم بهالحكي ؟؟؟ لهالدرجة الدكاترة والكلية عنا بالبعث سيئة ؟؟؟؟ (أرجو من طلاب البعث
يساعدوني ويجاوبوني عن هالسؤال ) <> صحيح أنو من بين كليات الهندسة المعلوماتية الأربعة كلية الشام أفضل كلية أكاديمياً وإدارياً، زملاءنا بجامعتي البعث وتشرين فيهن يفيدوا بخصوص كلياتهن لكن بالنسبة لكلية حلب فالأوضاع سيئة للغاية من أجل أغلبية الطلاب بسبب بعض المدرسين المتسلطين. بكافة الأحوال ما بعتقد أنو انعدام الكوادر والظلم والمشاكل الادارية ينعكسوا سلباً عالطالب يللي عرفان شو بدو لأنو الكلية ما عادت المصدر الوحيد للمعلومات.. كتب Sana A: 4.وإذا فرضا فكرت بالدراسة هون بحمص أول سنتين وبدي إنقل عالشام على أول السنة
التالتة ... سهل أنقل ولا في مشاكل وما بتظبط دائما ؟؟؟ ( إذا حدا مرق بمتل هالتجربة ونقل
عالشام بليييييييز يعطيني رأيه ) أمور إدارية بحتة لكن غالباً بتظبط إذا ما عندك مشاكل وما حاملة مواد إلخ. كتب Sana A: 5. أخيرا ... أنا ( وأعوذ بالله من كلمة أنا ) كنت محتارة بين شغلتين هنن المعلوماتية والعمارة
(العمارة لأني بحب الرسم والديزاين) وبعدين استقريت عالمعلوماتية
فهل في بالمعلوماتية عنا تخصص إلو علاقة
بالفن والألوان والديزاين ؟؟ يعني متل تصميم مواقع الويب وهيك إشيا ؟؟ ( طبعا ما قصدي إنو تخصص كامل بالتصميم بس لأنو هيك الواحد بيعمل كم دورة عالفوتوشوب وبرامج تصميم المواقع بيمشي الحال ... أنا قصدي إنو ممكن يتضمن إختصاص من الإختصاصات التلاتة عنا
ولو شي بسيط عن ديزاين مواقع الويب والصور ؟؟؟ ) المعلوماتية ما انوجدت في سبيل المعلوماتية وإنما لتخدم علوم تانية وفي تقاطعات كبيرة بينها وبين الرياضيات والفيزياء والعلوم الطبيعية والفنون والطب وكافة الفروع الهندسية والعلوم الانسانية. بالتوفيق دائماً! 
|
أرسل من قبل 
....بس ادعولي 
