CSC-SY

السلام عليكم
انا طالبة معهد هندسة كمبيوتر طلعت الاولى وعلى اساس كمل هندسة بس صار شوية مشاكل.
وانا انشالله ما رح اتخلى عن حلمي وبدي كمل هندسة عالافتراضية وبدي رأيكم بالتعليم بالجامعة الافتراضية شو مستوا وبتنصحوني في ولا لأ ولكم جزيل الشكر.
وكمان شو رايكم بتكنولوجيا المعلومات كويسة ولا لأ
فيها فرصة حلوة إني كمل سنة تالتة بما إني درست معهد سنتين
لكم جزيل الشكر وياريت تفيدوني بآرائكم

في هون شرح عن الجامعة الإفتراضية، شوفي القسم 2.1.9

يا جماعة انا ما بدي حكي نظري بدي حدا مجرب دارس او بيعرف حدا يدرس فيها ويعطيني تفاصيل اكتر عن المنهاج والامتحانات وكيفية الدراسة
رجاااااااااااااااااء اللي بيعرف شي يدلني
مع جزيل الشكر

انا من الرقة وبعيد علي المكان لانو ما عنا مركز نفاذ
فبدي شوية معلومات مشان اقدر اسجل
ولكم جزيل الشكر وخاصة فراس وanathema

بسيطة صديقنا ahnaqsh عندو تجربة مع الإفتراضية وأكيد بجاوبك لما بيدخل على وش الصبح

مرحبا "عاشقة الهندسة".

(ملاحظة : هي مو وش الصبح, لسّا الساعة عشرة )

هلأ بالنسبة للجامعة الإفتراضيّة, في نفس الوصلة اللي حطها لؤي فيها معلومات منيحة, و لهادا رح أعطيك بس الشغلات اللي مو مذكورة هنيك.

أوّلا و من ناحية المتطلبات :

لازم يكون عندك خط إنترنت سريع, لإنو كل الدروس على الإنترنت, و إذا ما عندو الواحد خط ممكن كتير يتكاسل و ما يحضر الدرس, متل ما كتير مرّات صار فيني.

من ناحية نوعيّة الخط, ADSL ممتاز إذا عندك, و إذا مافي ISDN كمان ماشي حالو, إذا سرعة 128, بس الخط العادي الـ Dial Up ما رح يمشي حالو بالمرّة.

بحب كمان إذكر هون إنو برامج الجامعة الإفتراضيّة ما بتشتغل إلا على ويندوز, و لهادا لازم إجباري شرط يكون عندك ويندوز على الجهاز, و إذا الواحد ما بيستخدم ويندوز ممكن يتكاسل و ما يشوف المحاضرات المسجّلة.

كمان بالمناسبة, في مجموعة برامج صغار كمان ضروريين,Acrobat Reader لقراءة الكتب, و في كمان Flash و ShockWave و مجموعة شغلات صغار منشان الدروس التفاعليّة, على كل هني بيقولولك عنهن.

ثانيا بالنسبة للمصاري :

كل مادة إلها سعر معيّن, و اللي بيرسب بيدفع مرة تانية, و التكلفة بتختلف على حسب صعوبة المادة. على سبيل المثال, البرمجة 2 سعرها 7500 ليرة, بينما مهارات 1 (ويندوز و وورد ومدري شو) سعرها 4500 ليرة. الإنجليزي إلو معاملة خاصّة و كل مستوى إلو نفس السعر, 1000 ليرة سوري, و بينحط الواحد بالمستوى الملائم بعد إجراء فحص تحديد مستوى. بالمناسبة كمان دراسة الإنجليزي على الجامعة الإفتراضية مو عمليّة بالمرة, و رح إرجع لهي النقطة بعد شوي صغيرة.

ثالثا بالنسبة للإختصاصات و التكلفة.

في إتنين ممكن يهموكي, واحد إسمو تكنولوجيا المعلومات, و هو 4 سنين, و التكلفة السنوية تقريبا (بدون إنجليزي) 60 أو 65 ألف ليرة, و الثاني هندسة النظم المعلوماتية , و هو 5 سنين, و تكلفته السنوية بدون إنجليزي 70 أو 75 ألف. الدراسة بالمناسبة فصلية و في 2 أو 3 فصول بالسنة على حسب الإختصاص, و الواحد بيدفع قبل بداية الفصل.

ما ممكن حاليّا إنو تكملي بالإختصاص التاني لإنو لسا جديد, و ما كمّلو المناهج لحد السنة التانية, لهادا يا لازم تستني سنة يا تسجلي بالإختصاص الأول. في قائمة بالمواد لكل إختصاص هون و هون, وبعتقد إنك رح تميلي أكتر للتاني باعتباره "هندسي" أكتر.

رابعا بالنسبة لطريقة الدراسة:

لكل مادة تقريبا محاضرة واحد اسبوعيّا (عدا الإنجليزي اللي إلو 3 أو 4 محاضرات) , و الدراسة "تعليم ذاتي" بمعنى إنو المحاضرة بس للأسئلة, و مع إنو أحيانا بكون فيها كتير شرح, بس بتضل الدراسة ذاتيّة هون.

في وظايف كتار, بيبعتو وحدة كل كم أسبوع تقريبا, و على الوظايف 40 بالمئة من علامة المادة.

الدكاترة بشكل عام مناح, و تقريبا نص المدرسين دكاترة و نصهن مهندسين. بالنسبة إلي وقت درست إرتحت لبعضهن, مثلا الدكتورة غيداء ربداوي تبع البرمجة كتير حبّابة, بس في منهن (مع إنهن على الأغلب فهمانين) ممكن ما بيريحوا الواحد, مثلا د. زهير دحروج و د. تمّام محمود ما إرتحت إلهم, لإنو الأول بيحسوا الواحد كإنو شي روبوت عم يحكي و ما بينتبه على الأسئة تبع الطلاب اللي بيكتبوله ياها, و التاني ما استفدنا كتير منو, بجوز لإنو المادة اللي درّسها كانت "مهارات 1" و هي شغلتها فاضية نوعا ما. بالمناسبة كمان في مهندسين ما بيعرفوا الخمسة من الطمسة, مثلا في مهندس درّس "رياضيّات 1" كان مفكّر إنو i² = 1, هلأ أنا كمان حمار بالرياضيات للأسف, بس مبيّن إنو مكتوب بالكتاب إنها = -1, و لهادا ما إلو عذر.

عموما متل ما قلتلك, المستوى تبع المدرسين بشكل عام مقبول, و في منهن عدد قليل كتير مميزين, و عدد قليل كتير تعبانين, بس الغالبيّة مناح.

بالنسبة للإنجليزي, الفكرة نفسها مو كتير منيحة لإنو تدريس اللغات بدو تفاعليّة, و صعب عمل هادا على الإنترنت بالسرعات المحدودة المتوفرة حاليّا, بس على كل الأحوال التدريس مقبول نوعا ما بس في كتير حصص.

الفحوص غالبا مؤتمتة (أكيد ) و الواحد بياخد النتيجة بس بيحل آخر سؤال, و بتطلعلو الأسئلة اللي حلها صح و الأسئلة اللي غلط فيها مع جوابها الصحيح. في بعض الفحوص مو مؤتمتة, مثلا كانت عندي من زمان مادة البرمجة 1, و هي كانت عبارة عن كتابة برنامج لحل مسألة بلغة جافا. البرنامج ما كان كتير صعب, بس يومها الطلاب ضجوا و ثاروا و عملوا مشاكل و طالبوا بفحص أسهل. بالنهاية عدد الناجحين طلع كتير قليل, و تأخرت النتيجة كتير (شي شهرين) لإنو التصحيح كان طويل.

بالنسبة للكتب هي متوفرة غالبا على شكل ملفّات pdf ممكن تحميلها و طباعتها, و المؤلفين هني نفسهن اللي عم يعطوا المواد, في الغالب. بالمناسبة نوعية الكتب كتير رديئة, و معبّاية أخطاء. كل أسبوع مثلا بتصلني تصحيحات جديدة لأخطاء بالكتب, أغلبها طباعيّة, بس الشي المنيح إنو ممكن تصحيحها بمجّرد تعديل النسخة الأصلية و حطها على موقع التحميل.

ملاحظة أخيرة, يفضّل حضور المحاضرات وقت إعطائها, لإنو صحيح إنها بتتسجّل, بس غالبا بتطلع المحاضرة "مضروبة" و العياذ بالله, و بتقطّش مع الواحد و هو عم يشغّلها.

خامسا بالنسبة لمستوى الطلّاب :

هو للأسف عدم في السنة الأولى من كل آختصاص. السبب إنو "سياسة الجامعة", على حسب حكي د. ماهر سليمان مدير البرنامج التاني, كانت "إتاحة الفرصة", و لهادا قبلوا الكل للسنة الأولى, بس طبعا مو الكل رح ينجح. لهادا رح تلاقي إنو مستوى طلاب BIT بالسنوات التانية و ما بعد منيح و أحيانا كتير منيح, بينما مستوى طلاب السنة الأولي من BIT و ISE بشكل عام عدم. طبعا عدد الطلاب بالسنة الأولي أكبر بكتير, و بس اللي بيستاهلوا ينجحوا بينجحوا. على كل الجامعة عم تاخد مصاري من وراهن, فمو مشكلة.

بالمناسبة كمان عدد منيح من الطلاب "داخلين على طمع", بمعنى إنو كل ما سئلت واحد ليش دخل بيقول إنو مشان ياخد شهادة هندسة. الله أعلم ليش العالم كتير حابّين شهادة الهندسة هالأيام, بس هادا اللي عم يصير.

إن شاء الله يكون هي المعلومات كافية, و إذا عندك أي أسئلة تانية لا تتردي, و نحنا دائما بالخدمة.

(بالمناسبة, شو نوعيّة المشاكل اللي منعتك عن الإكمال بالجامعة العاديّة؟)

شكرا كتير وعذبتك معي
بالنسبة لنوعية المشاكل هي قصة كتير طويلة بس اللي خلاني ما تابع الموضوع وأسعى ورا هو انو الاول عالى معهدنا بيطلع هندسة اتمتة وحواسيب مو معلوماتية
ومرة تانية كتير بشكرك ahnagshوanathema
سؤال شوي سئيل اذا بتسمحلي اسئل؟؟؟؟
شو يعني اسمك ما فهمتو!!!!!!

اذا صارلي نصيب وسجلت وصرنا زملاء انشالله لازم نتواصل مع بعض واستفيد من خبرتك اذا ما عندك مانع طبعا
بس ما قلتلي ahnagshانت شو بتدرس هندسة نظم ولا تكنولوجيا المعلومات

هلأ إذا بيطلعلك هندسة حواسيب و أتمتة فأنا رأيي تكملي فيها, على الأقل لإنها مجّانيّة, وما فيها كل مشاكل الجامعة الإفتراضية.

بعتقد إنو هندسة الحواسيب و الأتمتة فرع رائع, و يمكن هادا الأقرب للـ hardware, مو هيك؟ على كل رأيي إنك تكملي فيه حاليّا لإنو أحسن من الفروع المتوفرة بالجامعة الإفتراضيّة, و على الأغلب أصعب, و معنى هاد إنو خريجيه رح يكون عندن فرص أكبر. بس بعتقد لازم نسأل رأي الشباب بهالموضوع, و بالمناسبة كنت عم بتطلع على المفاضلة و في كتير كليّات في بإسمها كلمة "حاسب" أو "معلوماتيّة" أو "أتمتة" و ما لي عرفان الفرق بيناتها, بقا يا ريت حدا يشرحلنا الفروق.

بالمناسبة ahnaqsh هو إختصار لإسمي الأصلي, بس لازم تسألي anathema عن معنى إسمو, هديك قصّة طويلة.

السلام عليكم
شكرااااااا كتير ahnagsh
انا بدي اسال الشهادة اللي بناخدها بعد التخرج سورية ولا بريطانية(متل ما سمعت)؟؟؟؟؟؟
وكمان بدي اسال انو المواد اللي بدنا نقدمها بكل فصل نحنا بنختارها(يعني ممكن اقدم اقل او اكتر من المواد اللي محددة بالفصل )؟؟؟؟
ولكم جزيل الشكر

المواد إنت مجبرة فيها لازم تقديميها طالما درستيها بنفس الفصل
على فكرة الجامعة رائعة و معترف فيها بكل الدول العربية و بـ 100 دولة عالميا و إذا حبيت تكملي برى في الصين عم تقدم تسهيلات و مغريات رائعة جدا

المشاكل اللي حكيتلك عنها برأيي كافية وزيادة.

ما بعتقد مسألة الخبرة العمليّة بتنطبق هون, لإنو الجامعة الإفتراضيّة ما فيها خبرة العمليّة, أو على الأقل ما بعتقد إنو فيها. بالنسبة للشهادة, فهي أكيد سوريّة. الحد الأدنى الفصلي للمواد 3, و المقررة 4, و الأعلى على ما بعتقد 5 أو 6, مالي متذكر, بس لازم الواحد يعمل 3 مواد على الأقل. على كل هي القواعد ممكن تختلف من برنامج لبرنامج أو تتغيّر, فلازم السؤال عليها.

بالتوفيق إن شاء الله, و خبرينا شو بصير معك.

كتب ahnagsh المشاكل اللي حكيتلك عنها برأيي كافية وزيادة.

ما بعتقد مسألة الخبرة العمليّة بتنطبق هون, لإنو الجامعة الإفتراضيّة ما فيها خبرة العمليّة, أو على الأقل ما بعتقد إنو فيها.

السلام عليكم
انا بدي اسأل طلاب الافتراضية ahnagsh او اي حدا عندو علم بالموضوع
سؤالي هو انو انا اذا استنيت سنة لسجل (يعني بس يصير فيها سنة تالتة هندسة نظم معلوماتية )بقدر بوقتها كمل سنة تالتة (لاني دارسة معهد)ولا هالميزة بتنطبق بس على تكنولوجيا المعلومات
رجاء اللي بيعرف شي عن الموضوع يقلي
محتاجة كتير لنصائحكم
وجزاكم الله عني كل خير

من عندي ما بقدر قلك حاليّا, بس بسّال إن شاء الله. على كل ما في سبب لأ.

اطلب العلم ولو في الصين.هذا قول نبينا الكريم,صاحب الخلق العظيم. كمان من ناحية اخرى أختي الكريمة,طالما ببالك هدف معين,فلن تتخلي أبداً عن تحقيقه,,,,,,,,,,,,,,بالتوفيق.(السؤال هو الدواء لحيرتك)

اخوكي:سلمان

بسم الله الرحمن الرحيم
اللي بدو اي خدمة عن الجامعة الاافتراضية يحاكيني عالمسنجر لأن مالي صبر كتير عالشرح بالمنتديات بقى بجاوب اللي بدو هنيك
انا بدرس فيها هندسة نظم معلوماتية
tareqr9@hotmail.com
tareqr9@yahoo.com

بتصوّر أنا "الأخ اللي إسمو صعب شوي".

بالنسبة للمشاكل اللي حكيت عليها, الحقيقة إنها كانت كتير تتعبني و لهادا كنت متضايق منها. ما بعرف إذا تحسّن الوضع هلّا ولّا لأ, بس بقدر قلّك إنو من ناحية الكتب على الأقل الوضع ساء كتير, و الكتب الجديدة (على الأقل برأيي المتواضع) سيئة كتير كإنها انعملت بيومين أو تلاتة و معناها إنو الطالب رح ينجبر يرجع لمراجع تانية إذا بدّو يفهم المقرر.

مرحبا ..
بالنسبة للجامعة الافتراضية السورية ما بعرف الكثير عنها بعض من زملائي بيدرسوا فيها ..
يمكن فيدك بالجامعة الافتراضية البريطانية .. فيها كتير من التسهيلات كالدفع على اقساط كان لسوريا حسومات .. لكنها التغت من فترة يمكن ترجع ..البرفسور بقدر شغلك وبيحترم ابداعك الشخصي .
الدراسة عن طريق وظائف ومشاريع بكجات دراسيه .. الدراسة بالانكليزي شي اكيد ولو انو حديثا صار في خدمة ترجمة برايي فشل انك تدرسي هندسة كمبيوتر مترجمة يعني كلمة اي كلمة لاء بالانكليزي

موقع الجامعة .. http://volacademy.co.uk/
موقع الفرع العربي وهو المكتب اللي عن طريقه بتم التسجيل والقبول
http://abahe.co.uk/
مع العلم انو بالدولة ما بيعترفو عليها

حطوني مرحلة 3 فورا لاني كنت متخرجه من معهد هندسة الكمبيوتر تقانة معلومات وادارة اعمال كنت التانيه وما طلعت على كلية المعلوماتية .. الان بعد وضعي منيح كتير ادام اني كنت هكون سنة تانية متعترة بالجامعة السورية .. وعم خوض تحديات بالامتحانات
كمان ممكن تدرسي وتشتغلي وتكسبي خبرة ..

وان شاء الله بالتوفيق ..

أنا متخرج من كلية الهندسة الزراعية وطالب سنة أولى في الجامعة الافتراضية في برنامج هندسة النظم المعلوماتية .. كل ما تفضل به الزملاء صحيح ومشكورين على التوضيح ... وبالنسبة لخريجي المعاهد ذات الصلة فقد سألنا الدكتور ماهر سليمان في إجتماع الجامعة الأول لهذا العام عن وضعهم في أي سنة يستطيعون التسجيل فأجاب أن خريجي المعاهد يلتحقون بالسنة الأولى من برنامج ISE وفي السنة الثالثة من برنامج BIT وعندما سألناه ما سبب التحاقهم بالسنة الأولى وليس الثانية بالنسبة للهندسة أجاب أن هناك فرقا في المستوى .
على كل حال أضيف ملاحظة : أن الجامعة الافتراضية في حقيقة الأمر دراسة ذاتية وتحتاج للجهد وهي ذات مستوى جيد لكن بما أنها تجربة حديثة في بلدنا فهي لا تخلو من الاخطاء وسوء التدبير والسرعة في اتخاذ القرارات أحياناً .. كما أن امتحاناتها فيها شيء من الفوضى نظراً لكثرة عدد طلاب السنة الأولى في مراكز النفاذ وتزاحمهم فيها وقد حصل معي خطأ سببه السيرفر أثناء الامتحان أدى لفقد الكثير من العلامات في مادة الرياضيات ..
كما أنك تراسل قسم الدعم الفني والدكاترة فلا تحصل على أي رد فهذا طبيعي لانشغالهم الدائم .
كما أن المواد ذات تكلفة عالية نسبياً وموضوع الرسوب لا يخصم شيء من تكلفة المادة في حالة الإعادة وقد اعترضنا على هذا فلم نحصل على جواب بتخفيضها أو التفكير بذلك .
على الطالب أن يدرس القرار جيداً قبل التسجيل وأن يكون له قدرة على الدراسة الذاتية وصرف الكثير من الوقت والجهد لفهم بعض الأمور التي لن يجد من يوضحها له في الجامعة نظراً لضيق الوقت وكثرة المحاضرات وخاصة الرياضيات 1 مثلاً .
أتمنى التوفيق لكل من يرغب بالتسجيل بها وشكراً للأصدقاء الذين وضحوا الكثير من النقاط

بس بدي ضيف تعليق عالجامعة الإفتراضية بس ردا عالأخت العزيزة هي معترف عليها بالدول يلي بتدرس برنامجها مثلا بالإمارات معترف عليها كشهادة نظامية أما بالسعودية فما معترف عليها لأنو ما في فرع للجامعة هنيك بس بسورية أكيد معترف عليها من الدولة عالقليلة حسب معلوماتي كأي إجازة نظامية وأنارح سجل حاليا بالسنة الأولى بفرع الBIT بكلوريوس تكنلوجيا المعلومات ...وشكرا

مرحبا جميعا .............

أنا بس بدي أعترض على حكي زميلي بالجامعة الأفتراضية لانه ما بعرف شو هو فرعه وكاتب كتير شغلات مو مزبوطه عن فرعنا الهندسة المعلوماتية ....

وأهم مشكل واللي لفتلي انتباهي هوه الوصف السئ للطلاب .... وهذا أكبر خطأ أرتكبه حيث ان جميع الطلاب _ طبعا فوجئت بهل الشغله انا - كلن عندن خبرة خيالية في مجالهن .. وهاي الحمد الله سدت ثغرة بعض المشاكل للجامعة وهيه كلا مشاكل تقنية وطبعا معروف السبب وهو الانترنت بسوريا ... بس الجامعه تسعى دائما للتحسين السريع جدا وليس من يتأمل ويعد ولا يفي ....

كمان شغلة أغلبية الطلاب تبع المعلوماتية طلاب شاطرين وأذكياء جدا جدا لكن مرت عليهن ظروف بالبكالوريا و نسبة 95% منهن مو عايدين البكالوريا متل الموضة اللي عنا ولذلك فانهم يسعون للأفضل ولكن ظروفهن تبع البكالوريا ما سمحتلن وفي منن جايب علامات شبه كاملة بالبكالوريا بس شهادة قديمة شوي يعني صرلا شي 2 سنه وهذا معظم نوعية طلاب المعلوماتية .........

أما بالنسبة للدراسة ففرع المعلوماتية بدك تفصلي تماما عن جميع التخصصات التانيه لانه كلو أهتمام ودراسة وما بتلحقي اتحكي راسك من كتر الوظايف والواجبات والمشاريع وفرعنا بالذات بين كل الفروع أسمه أكاديمي يعني كله دراسه مو متل التخصصات التانية كله عملي ....

حلووووووووووو
أنا طالب بالسنة الأولى ... أكيد اللي ما بيدرس وبيكحت دراسه ما بيتوقع نجاح حتى لو الأسئله ماتمته لانه بنعرف انو معظم مواد فرعنا ( متل الرياضيات ) مو لمصلحتنا انها اتكون ماتمته لانه لازم اتحلي كل السؤال حتى تصلي للجواب النهائي وممكن اتخربطي بأخر خطوبه لذلك هيه أصعب بالنسبة ألنا ....

وبالنسبة لمستوى المواد هيه نفسها متل دمشق بالزبط ونفس الدكاترة بس نحنا اصعب شوي انه بدك تدرسي زيادة أكتر ...

أي سؤال تاني ؟؟؟؟

أهلا زميل.

في الحقيقة أتمنّى إني كون غلطان بهادا التقدير, بس هادا كان بناء على تعاملي الشخصي, و اللي من خلاله لاحظت إنو أغلب الطلّاب اللي كانوا معي (و منهم أنا كمان) كان عندهن ضعف بكتير شغلات.

أنا افترضت إنو هادا مستوى السنة الأولى بشكل عام, بس طبعا في إحتمال يكونوا حطّوا الكسلانين مع بعضن, بناء على علامات البكالويا مثلا, و لهادا كان مستوى الشباب التي تعرفت عليهم (أغلبهم من فئتي) ضعيف.

عفوا يعني برأيكم ما نسجل بالجامعة الإفتراضية
مو كويسة thank you

إذا حدا بيقدر يفيدنا بها الموضوع
ولكم جزيل الشكر

أنا مسجلة bit سنة تالتة وبالرغم من بعض الصعوبات
إلا إنها فكرة كتير مقبولة وحلوة وممتعة لأن مافي ضغط كبير
ومواد نظربة متل الجامعات العاديةوفيكي تشتغلي وتدرسي
ويحكي الواحد الحق أن في تجاوب كبير من الاساتذة عل الاقل لهلء
بالاجابة عن أي سؤال ومافي خجل مهما كان السؤال بايخ
يعني مو متل بالكلية العادية إذا الواحد بدو يسأل سؤال
بدو يحسبها منيح ويعد ل100 منشان مايضحكوا عليه طلاب القاعة
الفهمان ويلي مو فهمان وبكملها الاستاذ كمان معو
أو بدو يحاول يلقطوا على جنب تجنبا للمسخرة تبع الطلاب

مرحبا بك في الموقع.

الجامعة الإفتراضيّة كويسة.

بس لازم تشوفي ظروفك الشخصيّة و الشي اللي بيناسبك أكتر, و لهادا ما بقدر انصحك. متل ما قال الزميل عمر طه, في شغلات ممكن تزعج, بس بشكل عام الوضع مو سيء.

إذا بدّك أي معلومات لا تتردي بالسؤال. صحيح أنا صرلي زمان قاطع, بس في عدد من الزملاء حاليّأ عم يدرسوا بالجامعة الإفتراضيّة و بيقدروا يجاوبوا.  

كمان في هادا الدليل ممكن يكون مفيد. 

what's about this http://www.csc-sy.net/node/5155

why we cant (SVU students) share our experience or study in it

كيفكم ياجماعة
أنا سبق وقريت هالموضوع قبل ماسج بالجامعة
وليكني عم أكتب رد بعد ماصرت بنص الفصل الأول

هلق للي بيقول الجامعة مافيها مشاكل بيكون غلطان
بس بالنسبة لغيرها مشاكلها سخيفة كتيرررررررررررر

بالنسبة لمستوى اللغة الأنكليزية في الجامعة أنا بشهد إنه ممتاز كتير بس طبعا الموضوع بيرجع لمدى راحة الطالب مع المدرس أو المدرسة أنا حضرت عند الآنسة سوزان مطر وعند الآنسة سوزان سعيد
الحقيقة أسلوب الآنسة سوزان سعيد بيخليك تندمج بالدرس وتتعلم ام أسلوب الآنسة سوزان مطر الحقيقة أنا ما أرتحتله بينما في عدد من الطلاب غيري أرتاحوا إلها كتير
بس بيكفي إنو مادة الإنكليزي بالجامعة ليست حفظية !!
هي مادة مهارات skills هلق بالنسبة للصعوبة مابقلك الرياضيات صعبة والبرمجة والنظم الرقمية بس صعوبتهن عادية يعني أنت أكيد داخل جامعة وبدك تدرس لحتى تنجح
بس فعلا في أساتذة أسلوبهم صعب شوي مثلا أنا مبرمج php ومحترف كمان رحت على الجامعة بدهم يدرسونا اسس البرمجة وبعدها بدهن يعلموك الجافا أو بدهن يعلموك البرمجة عن طريق الجافا بيني وبينكم فتت بالحيط مو من صعوبة الجافا إنما من إسلوب التدريس لحتى سحبت كتاب لتعليم الجافا بالأنكليزي ودرسته ومشت أموري وليكني بعرف جافا وعين الله عليي
في شغلة مهمة كتير أو هيي حسنة مهمة كتير

البريد الألكتروني الخاص بالجامعة يعني أي تعديل بجدول الفحص مافي ضرورة تطرق مشوار على الجامعة حتى تعرفه أي تعديل في أي مقرر أي تغيير أو تبديل بيوصلك على بريدك الألكتروني إضافة إلى أنك فيك تحضر المحاضرة وانت قاعد بالبيت وعم تشرب كاسة متة (ياعين على الرواق ) وحتى لمحبي الأركيلة كمان ممكن تشرب نفس أركيلة يعني شي رواق على الأخير
بشكل عام وحسب طلاب السنة الماضية
هذه السنة الأمور متحسنة كتير كتير
وخصوصا بعد تحديث برنامج حضور المحاضرات فصار يتم تسجيل حتى التشات مع المحاضرة
وليكني أنا ما عندي غير خط DAIL UP وبالكتير بيلحق عندي سرعة 40 كيلو بايت وعم أحضر المحاضرة وعين الله عليي

النقطة الوحيدة الضعيفة بالجامعة هي التواصل الأجتماعي .........ولا غير هيك ممتعة جدا وخصوصا للي داخل بدو يتعلم مو داخل منشان يقول إنه عم يدرس جامعة او منشان الدراسة

يعطيك العافية
سلامنتري

مرحبا
أنا عضو جديد بهالمنتدى من الجامعه الافتراضيه أذا بدكم أي سؤال لا تترددو بسؤالي
الجامعه بشكل عام ممتازه و الطلاب اللي تخرجو عم يشتغلو بسوريا ودول برا مثلهم مثل غيرهم
و في ملاحظه أنو منهاجنا و كتبنا أحسن و أصعب بكتييير من الهندسه المعلوماتيه بالشام
سلام للجميع