CSC-SY

السلام عليكم

بعد فترة الامتحانات اللي شارفت على الانتهاء ... حبيت اطرح فكرة للنقاش ..

يا ترى شو هو الشيء اللي بخلي اي واحد مننا يثابر ويتحمل ضغط الامتحان وصعوبة الاسئلة و .. و ..

في شخص معين بشجعك ولا مو بحاجة اي تشجيع او بتتمنى حدا يشجعك بس ما في (مين الشخص اللي بشجعك ؟ )

بتشجع حالك بعبارات معينة (شو هي العبارات هي ؟)

في اشياء بتتسلى فيها وبتفرغ ضغط الامتحان (شو هي الامور ؟)

في شغلات بتحصل (متل خبر ال60 و 50 علامة للنجاح ) بتخلي احباطك يزيد (شو هي الامور هي ؟)

تذكر الافكار اللي بدور براسك خلال فترة اي امتحان (يا ترى انت من الناس اللي بنظر لنصف الكاسة الممتلئ او الفارغ ؟)

في سؤال كان ممكن ينسال وانا نسيته ياريت تضيفه ... وشكرا سلفا للمشاركة

والله كتيييييير حلو هالموضوع اللي طرحتي والأفكار ظريفة كمان

 أنا بظن انو الدافع يأتي في المرتبة الأولى ( يعني أنتي ليش بتدرسي ولوين بدك توصلي ) لما بيكون في دافع عندك بيصير هو يدفشك دفش للدراسة

بعدين كلنا بحاجة للتشجيع من فترة للتانية لحتى نشحن عزيمتنا وطاقتنا

أما بالنسبة للأخبار المحبطة فهي شغلة مفروضة وموجودة بكل مجالات الحياة لازم نعرف كيف نتعامل معا ونتجاوزها بسرعة

في كمان التفاؤل هدا من أهم الأمور بالحياة

 أنا عندي قناعة أنو المتشائم ما بيحصل على شي وإن حصل على شي فما بيكون مرتاح فيه لازم نشوف النص المليان

بعدين أنا أؤمن أنو المؤمن بقدرته على الحصول على شي بيحصل عليه وهذا الشي صار معي شخصيا كذا مرة

في عندي كتير حكي كمان بس حاسس حالي حكيت جريدة هدول مناح مبدئيا 

أنا صراحة ً الشيء الوحيد يلي بيدفعني نحو الأمام دائما ً هو (وبدون مزح) أني حابب كون أحد يلي بيخلد التاريخ ذكرهم بأني انشاء الله كون سبب في رفع مستوى سوريا أمام العالم (وهاد وعد وعدته لله تعالى في إحدى ليالي السنة الماضية), ومن جهة الأشخاص ما في غيركم بيشجعني, أما العبارات يلي بشجع حالي فيها (بيل غيتس كان متلي متلو قبل ما يصير أغنى رجل بالعالم), أما بالنسبة لتسلايتي فعنجد (بجوز تستغربوا) أحلا شي عندي هو الدراسة ( مو تبع الكلية ) لكن أنا دائما ً في تعلم مستمر , أما إذا كان ما في شي أدرسه فبصراحة يا بعد بحللي شي خوارزمية فايتة بالحيط أو بعد ببرمج بشي جديد يا بحللي شي مسألة رياضيات من برات المنهاج , أما الإحباط فبإذن الله لغيتو من قبل الباكالوريا من قاموسي لأنو متل الآفة إذا حل بالقلب أو العقل أتلفهما , أما بالنسبة للامتحانات بتخطر شوية نكت على بالي يعني ما في شي محدد بالإمتحانات.

كتب NightWolf:

Windows Sucks, Ubuntu Rocks

Going Linux

- حب العلم بالدرجة الأولى هوي الدافع لتحمل ضغط الامتحانات .
- ما في حدا بيشجعني مع انو بتمنى حدا بس يسالني كيف عملتي بالفحص بس ما في.
- انا بشجع حالي لما ما بعمل منيح وبقول جملتي المشهورة معلش الفصل الجاي بكون فهمت المادة بشكل احسن .
- لما بمل من الدراسة بطلع شي مشوار ، زيارة لعند رفيقة مثلا ، إضافة إلى الهوس بألعاب الكمبيوتر يلي بيصيبني وقت الفحص بس .
- ما في شي معين بيحبطني ، كل شي مع التعب بيصير .
- بتصور اني بنظر لنص الكاسة المليان
- سؤال كان ممكن ينسأل !!!
ما في مبدئياً لانو انتي مو مخلية سؤال مو ناكشتيه

خبرينا عنك انتي كيف كنتي بوقت الامتحانات

أخيراً موضوعك حلو وفيه وقفة مع الذات

بالنسبة للاخ mpcabd ما بقلك غير ان شاء الله تضلك هيك .

الله يرضى عليك يا زميل وان شاء الله منشوفك شي مهم بخدمة بلدك

أنا بعتقد انك احسن منو

أنا اللي بيخليني اتحمل ضغط الفحص أنو لازم نتخرج .. يعني مو معقول بعد دراسة ابتدائي وإعدادي وثانوي و 5 سنين جامعة قوم آخر شي احبط حالي وما اتحمل هالضغط .. لأنو انضغطنا كتير صار بدنا نخلص فلازم نتحمل
-------------------
تاني شي : بالنسبة للأشخاص اللي بيشجعوني فأكيد في كتير .. أهلي وأخواتي ورفقاتي بالجامعة ورفقاتي المقربين يعني الحمد لله المحبين كتار.
--------------------
وأكيد بشجع حالي بعبارات معينة وهي أنو متل ما رب العالمين يسرلي كل امتحاناتي من وقت ما كنت بالتحضيري ولهلأ فأكيد رح ييسرلي هالفحص كمان طالما اني عم ادرس واتعب واعمل اللي عليي وادعي ربي واتوكل عليه .
--------------------
والأشياء اللي بسلي حالي فيها هي يعني القعدة مع أهلي وبشوف رفقاتي وبزور العالم اللي انقطعت عنهون بالفحص
-------------------
والحمد لله ما بيحبطني شي بس يعني ما بنكر أنو متلي متل أي طالب بيزعل لما ترسب مادة من مواده أو لما يكون متوقع علامة عالية وبتطلع 50 (ماعاد نقدر نقول 48)
-------------------
أنا بخاف من الامتحان شوي يعني شعور طبيعي بس الحمد لله ماني متشائمة وبطلع عالنص المليان دائماً .. والتوفيق من عند رب العالمين.

- يعني الشي يلي بيخلي الواحد يتحمل ضغط الفحص لأنو مافي غير هل الحل !!! يعني شو بدو يساوي؟؟ يترك الكلية مثلاً؟؟ طبعاً إلا إذا كان -اللهم- بيحب المادة يلي عم يدرسها أو فعلاً عجبتو الجامعة.
- أهلي عادة بيشجعوني أو حتى رفقاتي, بس بصراحة: أنا ما بحب حدا يشجعني .... بحب شجع حالي لحالي مشان ما يوقع غيري بمجاملتي !!!!
- طبعاً ... أكيد في شغلات بتسلى فيها , الألعاب يلي ما بلاقيها إلا وقت الفحص, والبرامج يلي بتتناسب مع وقت الفحص (مثل برامج التشفير ...) ,والتفكير فيما بعد الفحص ...
- خبر الـ 60 بيفرحني ما بيخلي احباطي يزيد !!!!....
- بتوقع أنا بنظر لنصف الكاسة المليء ... يعني قد ما كنت مُحبط , بحاول شجع حالي لحالي وحتى بدون ما حسس حدا أني محبط, بس ما بحاول شوف حالي أكبر مما أنا عليه , يعني بس وصل لقناعتي الشخصية ,ما عاد بحاول أكتر من هيك مشان ما حس حالي متكبر.
- البركة حولك !!!! ناكشة أسئلة بتدل فعلاً على أنو ضايق خلقك ....بس فكرة حلوة ,يسلمو.

*الشي يلي بشجعني هوي الخوف من الفشل وأكيد تحقيق الهدف
*يلي بشجعني بالدرجة الأولى أنا نفسي وبعدين أهلي ورفقاتي
*أهم عبارة بشجع فيها نفسي إنو معلش لازم أدرس وأتعب وبس وصل لشي يلي بدي ياه بنسى كل تعبي
*والله بما إني محبوسة بالبيت لاطلعة ولا فوتة عم بتسلى شوي بهالإنترنت.
*في كتير شغلات بتخوفني متل مثلاً إذا ما عرفت حل أسئلة الدورات كتير بتدايق.
*أنا الحمد لله دائما بالامتحان وغير الامتحان بطلع على نص الكاسة المليان .
بس بدي قول للزميل mcpabd الله يهنيك ياريت يكون عندي هالعزيمة القوية متلك.

قد يفقد الإنسان أمله في هذه الحياة
ويحس بأنه يسير على أرض غير هذه الأرض وينظر لسماء غير هذه السماء
حتى الناس يشعر بعدم وجودهم وتظلم الدنيا في عينيه
ويغدو الكون على وسعه ضيقا" ... أضيق من علبة الكبريت ...
ولكن ... هناك دائما" بصيص أمل قد لا يكون في الشخص ذاته
قد يستعيد رغبته في الحياة من كلمة قالها أحدهم بلا مبالاة ...
من نظرة عزيمة وإصرار لمحها في عينين ...
ربما من ذكرى انتصاراته القدية يستمد طاقة تدفعه لكي يمضي في الحياة
ويظل مرددا" لن أيأس ..ولن يحطمني اختبار وأو امتحان أو أي شيء ...
لأنني أملك هدفا" أريد تحقيقه ولن يثنيني عن عزيمتي أي شيء مهما كان ...
سأظل قويا"..ز ولن أنسى أن توفيقي بيد الله وحده
وكل شيء يحصل لي مكتوب في السماء وأنا علي أن أجتهد
وأتذكر قول الله عزوجل (لا يقنط من روح الله إلا القوم الكافرون )
حتى لو فشلت اليوم -فشلا" باهرا"-سأحاوا أن أعوض في المواد القادمة وسأحاول أن أستفيد من العطلة
لأقصى الحدود والله الموفق ...
أسفة إذا طولت.. وشكرا"عاموضوع كتير لذيذ.

الله يعطيكم العافية طلاب الهندسة المعلوماتية
ان شاء الله بترفعوا رؤوسنا برا

أشد على أياديكم

------------
السلام عليكم ورحمة الله بركاته
جزاكم الله خيرا.
------------

لا اله الا انت سبحانك اني كنت من الظالمين

الشغلة يلي بتشجعني هي أني ما بحب كون واحد جاهل عيشتو مالا طعمة وأكتر واحد بشجعني هو بابا وابن عمتي.
وبرأي أنو الواحد لازم يثق بحالو وبقدرتو,(بالحياة مافي مشكلات بس في حلول لازم تدور عليها).
ولما بحس حالي يائس والضغط أتلني بحكي مع رفقاتي أو بساوي شي شغلة بتسليني(بلعب على الكومبيوتر – بتفرج على التلفزيون ...)
و برأي صح أنو(ما تركز عليه تحصل عليه).

وأنت انشاء الله منشوفك بأعلى المراتب, شكرا ً إلك.

هاد من لطفك لؤي , خجلتني .

وأنا وين رحت؟ ماشي يا باسم.

كتب NightWolf:

Windows Sucks, Ubuntu Rocks

Going Linux

عنجد ماعاد في 48 أو 49؟؟؟؟ أنا هلأ اصبت بقمة الاحباط لأنو كل موادي عم اجمع واطرح فيون على أساس النجاح 48 ... أكيدة الخبرية ولا لاء؟؟؟
أما بالنسبة للأسئلة المطروحة:
يعني اذا ما درسنا شو بدنا نعمل؟؟
و أنا مو بحاجة لتشجيع و أنا بعرف حالي و بعرف قدراتي بس طبعا دائما في أهلي بيشجعوني و بضل دائما بحس انو لازم كون متل ما هنن متأملين مني وما خيبلون أملون
وأنا وقت الامتحان بحس انو عندي وقت فراغ كتير لأنو المادة بتكون مدروسة من قبل بالمذاكرات و الوظايف و بسلي حالي بالتلفزيون و الانترنت و التلفون و حتى المشاوير، يعني ما بتعب كتير لاتسلا!
و خبر ال60 او ال50 بيحبطني اذا انا عاملة حسابي شي و طلع شي تاني يعني لو عرفانة حالي لازم انجح بهالمادة عالستين بدرس و بعمل المستحيل لجيب فوق ال65 كمان بس والله اذا الواحد يا دوب بدو ينجح و بألف زور اتدبرت ال48 و اخر بيطلع بدون علامتين والله شي بيحبط!
و أنا ايماني بالله كبيير و بس اتعب بمادة الله ما بيضوعلى تعب ان شاء الله..
موفقين الكل...

عندي أكتر من دافع للدراسة يمكن تلخيصهم بوصية لعالم كبير عزيز على قلبي عنوانها:

"كن على ثغرة من ثغور الإسلام"

بالنسبة للتشجيع و المساندة الحمد لله في أكتر من شخص "رفقاتي بالدرجة الأولى" لأنو كلنا بالهوى سوا
ومن العبارات يللي بتشجعني: "حسبي الله ونعم الوكيل"
عنجد ألها سحر.. جربوها ما بتندمو
دعوة من أهلي ليلة الفحص كمان إلها دور كبير وأثر كبير

التسالي:
الحمدلله كمان كتار ممكن اتفركش بالدوري الانكليزي أو الإسباني ومتى ما علقت بتروح شي ساعتين على الأقل بس وين المشكلة ؟؟

لما بضيع شي ساعتين و بيخسر ريال مدريد وبتبلش التهاني و المباركين يكفتو على شكل SMS أو إيميلات..

*في شغلات بتحصل (متل خبر ال60 و 50 علامة للنجاح ) بتخلي احباطك يزيد (شو هي الامور هي ؟)

الحمد لله إحباط ما في نهائياً كل شي بيجي من رب العالمين يا محلاه المهم نعمل يلي علينا

وبالآخير قاعدتين ذهبيتين معلقهم بغرفتي:

{ومن يتق الله يجعل له مخرجا}
{الله ولي الذين آمنوا يخرجهم من الظلمات إلى النور}

زميل mpcabd:
أول شي بارك الله فيك بس ليش "رفع مستوى سوريا " بس..؟؟

ليش مو رفع مستو الأمة كلها والمساهمة بنهضتها؟

بارك الله فيك.....
أنا الصراحة مو جاية على بالي كون كمالة عدد وبس
بدي حاول ساوي شي مختلف عن المألوف

قد تقولوا هدول شباب السنة الأولى _سنافر_بيكونوا هيك أول ما ببلشوا بالكلية متفائلين بس ادعولنا انضل هيك ما تتغير نظرتنا

أما عن وسائل التسلية فأنا شو ما بشوف أدامي بلتهى فيه بعني إذا كان الموبايل جنبي بعد بلعب
وإذا كان التلفون جنبي كمان بعد بحكي
إذا كنت جنب الكمبيوتر يا بفوت عالنت أو بشغل شي لعبة أو بشوف pink panther
وإذا كنت جنب التلفزيون بعد بحطلي شي مباراة و شي شغلة وبعد بشوفها حتى لو كانت بايخ

ما حدا كل أهلي بيقولولي لو فتت طب مو أحسنلك؟؟؟؟
مافي غير رفقاتي شادد حيلي فيهن ............

بارك الله فيكي بس ما في هيك آية بالقرآن الكريم...؟؟

الآية:
{قَالَ وَمَن يَقْنَطُ مِن رَّحْمَةِ رَبِّهِ إِلاَّ الضَّآلُّونَ }الحجر56

{لاَ يَيْأَسُ مِن رَّوْحِ اللّهِ إِلاَّ الْقَوْمُ الْكَافِرُونَ }يوسف87

له يا عبد الله أنت على راسي و أنت أكتر من بتشجعني منشان هيك ما كتبت اسمك مع يلي بشجعوني!

والله إني حبيتك أكتر من ما حبيت أخوك..

بعدين الصلاة على النبي أهلك كم دكتور بدهم؟؟؟

لك اسكوت يا زلمة وخلينا ساكتين .... أنا ندمان على هديك الساعة .. أهلي كل مرة بيقولولي هيك ...

الله يوفقك يا عبدالله وان شاء الله بنصير كلنا بطموحك لذلك انا برأي لازم نعملنا شي شغلة يعني شلون بدي قلك نشاط يقوينا بالبرمجة او ايا شي تاني طبعا بمعيتك ومعية الشباب الطيبة والفهمانة شرواك بالخير ع اي حال بنحكي بالجامعة ان شاء الله

خلص لعيونك مرهف , أنا خدام القوادم من الروس للمقادم .
انشاء الله كنت ناوي أفتح السيرة معكم منشوف بركي بظبطلكم شي دورة برمجة بالعطلة!!

كتب NightWolf:

Windows Sucks, Ubuntu Rocks

Going Linux

أنا ما حبيت أشطح كتير تقوموا تقولو بكرا بينطفا , بس أنا والله كنت وما زلت بقول أبدأ من سوريا وأنتهي بالأمة كلها انشاء الله.

كتب NightWolf:

Windows Sucks, Ubuntu Rocks

Going Linux

TD بانتظار بقية التلعيق
mpcabd باعتقادي كمان انك احسن منو
Asmaa شكرا الك ورح جاوب على الاسئلة انا كمان
alaa1و reham ان شا الله بتتخرجي وباعلى الدرجات
kobaitari مو اصة ملل بس دايما بحب اعرف غيري كيف بفكر وقت الامتحان
jasmine كلمات ايجابية وحلوة كتير
Abo Albees أكيد ان شاء الله ما تركز عليه تحصل عليه
i_ReEm لا تخلي الاحباط يسيطر عليكي لانو هيرجعك اكتر من علامتين لورا
M-Ramy الله يجعلك من ثغرة من ثغور الاسلام
hanihh اكيد رح تبدع بالمجال اللي بتحبو

*في شخص معين بشجعك ولا مو بحاجة اي تشجيع او بتتمنى حدا يشجعك بس ما في (مين الشخص اللي بشجعك ؟ )
بحاجة للتشجيع من فترة للتانية لحتى نشحن عزيمتنا وطاقتنا - بتمنى حدا يشجعني - بضل دائما بحس انو لازم كون متل ما هنن متأملين مني وما خيبلون أملون - الاهل - الاصدقاء - أنا ما بحب حدا يشجعني بحب شجع حالي لحالي مشان ما يوقع غيري بمجاملتي - أنا نفسي وبعدين أهلي ورفقاتي -

*بتشجع حالك بعبارات معينة (شو هي العبارات هي ؟)
لن أنسى أن توفيقي بيد الله وحده
بيل غيتس كان متلي متلو قبل ما يصير أغنى رجل بالعالم
معلش الفصل الجاي بكون فهمت المادة بشكل احسن
رب العالمين يسرلي كل امتحاناتي من وقت ما كنت بالتحضيري ولهلأ فأكيد رح ييسرلي هالفحص كمان طالما اني عم ادرس واتعب واعمل اللي عليي وادعي ربي واتوكل عليه .
معلش لازم أدرس وأتعب وبس وصل لشي يلي بدي ياه بنسى كل تعبي
الانسان قد يستعيد رغبته في الحياة من كلمة قالها أحدهم بلا مبالاة -من ذكرى انتصاراته القديمة
وكل شيء يحصل لي مكتوب في السماء وأنا علي أن أجتهد
سأحاوا أن أعوض في المواد القادمة وسأحاول أن أستفيد من العطلة
كلمات تشجيعية ( ان شاء الله بترفعوا رؤوسنا برا "وجوا كمان "- أشد على أياديكم )
بالحياة مافي مشكلات بس في حلول لازم تدور عليها
ما تركز عليه تحصل علي
حسبي الله ونعم الوكيل
{الله ولي الذين آمنوا يخرجهم من الظلمات إلى النور}
{قَالَ وَمَن يَقْنَطُ مِن رَّحْمَةِ رَبِّهِ إِلاَّ الضَّآلُّونَ }
{لاَ يَيْأَسُ مِن رَّوْحِ اللّهِ إِلاَّ الْقَوْمُ الْكَافِرُونَ }

*تذكر الافكار اللي بدور براسك خلال فترة اي امتحان (يا ترى انت من الناس اللي بنظر لنصف الكاسة الممتلئ او الفارغ ؟)
المتشائم لا يحصل على شي وعلى الغالب الجميع بينظرو لنصف الكاسة المليان

هي مجموعة افكار حصلنا عليها بظن انها ممكن تلفت النظر الى امور الواحد مو مفكر فيها اضافة انها تلفت نظر الشخص نفسو كيف عم يفكر وكيف انه طريقة نظرتنا لامور وتعاملنا معها هي اهم من كل شي بحيث

الانسان من نتاج افكاره

نخرج من دائرة المتأثرين الى دائرة التاثير
وبانتظار افكار جديدة نضيفها ... بتأمل ما نخرج عن الموضوع كتير

* ان كون مميزة واترك اثر بالحياة

* بشجعني نظرة امي (واهلي ) الي وهي كلها فخر و ثقة فيني

* الاية الكريمة [وَقُلِ اعْمَلُواْ فَسَيَرَى اللّهُ عَمَلَكُمْ وَرَسُولُهُ وَالْمُؤْمِنُونَ ...] سورة التوبة لازم يكون شي متقن وببيض الوش

العبارة الانسان من نتاج افكاره هي اللي بفكري دايما لهيك دايما بفكر كيف لازم فكر وبضايق ازا اضايقت

* روح شي مشوار او اقراء شي كتاب حتى كمان بتسلى بالكمبيوتراصلا ما بديق خلقي منه لاني بحب شغلي ودراستي وبستمتع فيهن

* الاحباط ما بصيبني (الا لفترات كتير قصيرة) لان دايما بعرف كل شي بيحصل معي اكيد لخير مع انه في كتير من اللي حوليي بسموني مطنشة او مصيفة

اسفة على الخطأ المطبعي M-Ramy اكيد مو القصد (( الله يجعلك على ثغرة من ثغور الاسلام))

على مو من زكاتك..

بسيطة..بتصير

يا ترى شو هو الشيء اللي بخلي اي واحد مننا يثابر ويتحمل ضغط الامتحان وصعوبة الاسئلة و .. و ..

أكيد المستقبل يلي جاية ، وفكرة انو مافي شي سهل ، وأنا بحب الاختصاص لذلك بجي على حالي وبقول احسن ماكون عم ادرس شي مسرحية لشكسبير أو عم شرح شي جردون !

في شخص معين بشجعك ولا مو بحاجة اي تشجيع او بتتمنى حدا يشجعك بس ما في (مين الشخص اللي بشجعك ؟ )

أكيد مو أهلي .. أول سنتين كنت نق كتير وكان دائما الجواب : لو فتي أدب انجليزي مو أحسنلك ، كنا جوزناكي هلأ ؟!!!

بطلت نق وصرت جبلهن علامة الفحص وخلصت السيرة ..

غالباً انا ورفقاتي منشجع بعض لأنو كل مرة بيكون في حدا متحمس كتير وفهمان وحدا محبط ومالو ماشي الحال ، لذلك الحال متبادل ويلي متحمس بيشجع يلي مو متحمس .. 

ومابظن في متل الرفقات بهالموضوع لأنو هنن بالجو وبيعرفو شو يعني لما تقول خوارزميات أو فيزياء أنصاف نواقل .... الخ 

بتشجع حالك بعبارات معينة (شو هي العبارات هي ؟)

يلا هانت  

في اشياء بتتسلى فيها وبتفرغ ضغط الامتحان (شو هي الامور ؟)

لعبة الsnake على موبايلي @@ 

في شغلات بتحصل (متل خبر ال60 و 50 علامة للنجاح ) بتخلي احباطك يزيد (شو هي الامور هي ؟)

توزيع المواد العشوائي ببرنامج الفحص

ضغط فحوصات العملي 

لما تنزل العلامات وتلاقي يلي مو شاغل ربع شغلك آخد علامة أعلى منك بالعملي

بس كلو بالنهاية بيمشي حالو .. يعني تعودنا على الفوضى بهالجامعة 

تذكر الافكار اللي بدور براسك خلال فترة اي امتحان (يا ترى انت من الناس اللي بنظر لنصف الكاسة الممتلئ او الفارغ ؟)

انا اجمالا سلبية كتير ومخي كلو افكار سلبية . بس وقت الفحص عادة بوكل أمري لله ، حتى لو طلعت من مادة مخبصة كتير بخلي أمل وقت التصحيح تصير معجزة ( متل معجزة الخوارزميات 1 لما جبت 49 ! بس والله ماكنت مخبصة !! )

شكرا عالموضوع

SooS
أنا كمان متللك بآخر فكرة.. يعني حتى لو الواحد خبص كتير بالفحص يضل أملو بالله كبير و يدعي يصير شي معجزة... لأنو أنا في مواد كتير كنت فاقدة الأمل منا بس صار معجزة ومشي حالا.. و عقبال ما يصير معي معجزة و انجح بالخوارزميات

فكرة الموضوع جميلة
بالنسبة لي:
الشي الأساسي يلي بيخليني ثابر على الدراسة والإمتحانات هو إني حاطط هدف قدامي إني أبذل كل جهدي وحاول قبل ما الله تعالى ياخد أمانته كون تركت أثر مفيد بالتاريخ للبلد والمجتمع ويذكرني الناس من بعدي بالخير وأدخل التاريخ, بجوز تقولوا عني مصدق حالي أو عم احلم بس أنا بفكر إنو على الإنسان إنو ما يمر على الحياة كأنو ما دخلها وإنما لازم يعمل شي مفيد يستفيد منه الأجيال يلي بعده متل مانحن استفدنا من الأجيال يلي قبلنا, بالإضافة لأنو يكون راضي ربه وضميره ومجتمعه.

بالنسبة للتشجيع, التشجيع من قبل أهلي هو بشكل عام مو وقت الفحص حتى إنو ما بيعرفوا شو عم قدم مواد بس بيسألوني بشكل عام شلون عم قدم. كمان في تشجيع مهم من قبل أصدقائي وأقاربي.

العبارات يلي بشجع حالي فيها: بقول لحالي (انت عملت يلي عليك والباقي على الله) وكمان بهالسنة بالذات من كتر ما مليت صرت قول (يلا هانت لاتضيع تعب السنين بهالسنة)
ولما بيكون عنا مادة صعبة كتير أو باجهني شي فقرة ما فهمتها بتذكر شعاري بالحياة (There is nothing impossible in the life, Just try)

الأشياء يلي بتسلى فيها هي الإنترنت بالدرجة الأولى والإتصال بالأصدقاء وخاصة الساعة 6 مو هيك M-RAMY, وأحياناً لما بيضيق خلقي بطلع بتمشى وحتى لو كان برد.

بالنسبة للأشياء يلي بتحبطني هي قليلة والحمد لله بس أكتر شي بيدايقني إنو قبل الفحص بشوي يخبرني أحد الزملاء أدرس شغلة جديدة مستحيل لحق شوفها وأعرف إنو كل الناس بيعرفوا فيها.
معظم الأحيان لما بتدايق بعصب بالأول بس بعدين بروق بسرعة وخاصة لما بتصل بأحد الأصدقاء العزيزين وبخفف عني وبرجع بنسى.

بفترة الفحص كتير بتصير معي شغلة التفكير والأحلام والطموحات وبصير بشرد كتير وبفكر بأشياء كتيرة. وخاصة إني بصير بفكر بمليون شغلة بدي ساويهم بعد ماخلص فحص وبعد الفحص بلاقي حالي ما ساويت غير شوي منهم ونسيت الباقي أو ما عاد ضروري.