CSC-SY

إلى طلاب السنة الأولى من كل المحافظات:
بدي كل واحد منكن يسأل حالو هالسؤال
ليش أنا فتت على هالكلية ؟؟
شو هدفي من هالشي؟
يا ترى الواحد منا فات لهون لأنو المجال عجبو ولا لأنو الدراسة فيه ممتعة ولا لأنو الظروف هيك حكمت ولا.....
وشو طموح كل واحد فينا
يعني لازم الواحد يعرف حالو لوين رايح وشو هدفو
ويا ترى حيكون شغلة كبيرة بالمستقبل ولا حيضل عالهامش؟؟
يعني مثلاً المبرمجين معبيين الدنيا بس الأغلبية منن مافي شي يميزهن
شلون بدك تثبت موجوديتك وتترك أثر فعال بالمجتمع
شوفي خطوات عملية بتخليك تصير متميز وفعال بمجالك ؟؟
يعني بالمختصر شو هو طموحك بعد ما اخترت أو انفرض عليك هادا الفرع (وشو كان طموحك قبل ما تفوت عالكلية)؟

بعد اذنكون شباب حأطفل عليكون وشارك بهالموضوع ...

بالنسبة لسبب دخولي هالكلية ( كليتي ) وبعتقد كتير من طلاب المعلوماتية بيشتركوا نفس الاسباب , فهو المستقبل الواعد لهل الفرع , فرع عم يتطور بوتيرة عالية كتير و دائماً في مجال للأبداع والأختراع فيه و بما انو هالفرع بيمس كل جوانب الحياة الاجتماعية لذلك كان خيار كتير مغري .
هدفي اتعلم هالعلم و حاول ضيف شي للمجتمع يلي انا في ..

بعتقد انو اغلب يلي فاتو هالفرع فاتو عن رغبة لأن يلي مجمع هالمجموع كان بيقدر بسهولة ينقي غيرو , وما بعتقد انو في نسبة كبيرة الظروف حكمتون ليفوتو هالفرع .

أنا عندي قناعة انو الواحد على حسب تعبو وشغلو واجتهادو بيحدد هل حيكون مستقبلو مشرق أو يضل متلو متل غيرو عالهامش .

الموضوع كتير منيح من وجهة نظري:
المعلوماتية هي حلم الي من كنت بالصف الخامس وكنت بتمنا اني امسك الفارة وحرك واكتب شو ماكان على الدفتر (البرنامج الافضل في الماضي)
اما بالنسبي للمستقبل فانا بتما انو كون من احسن مصممة بالكرفكس عامة وبالـ3D max خاصة واساوي افلام والعاب رهيبي علي
نيدفورسبيد , رزدنت ايقل وهيك
بصراحة انا مابشوف انو المعلومات يالي بتعطينا ياها الكلية كافة يعني ازا بدو الواحد يحقق حلم لازم يشتغل ويشتغل كتير
وبتما اني اتحسن بالبرمجي هي المادي الضرورية والصعبة في الوقت الحالي وازا مشينا فيا بنتحسن كتير بغير شغلات
ونشالله كلنا بنصير كما نحسنا بنشوف حالنا

حلو كتير بس لهلأ أنا ما قلت شو هو طموحي
الصراحة أول شي أنا فتت على هالفرع لأني بحب الرياضيات كتير كتير وبكره كل شي اسمو حفظ أو بصم متل العلوم
وكمان لما شفت أخي (همام)كتير عجبني المجال يللي عم يدرسو وشلون الواحد بيصير عندو طريقة تفكير منطقية وعملية بالمشاكل
صحي أنو أنا كنت ناوي فوت شي فرع إلو علاقة بالhardware لأنو أنا كان طموحي قبل ما أدخل عالجامعة أنو صمم شي جهاز أو شي قطعة الكترونية تكون موجودة بكل بيت بالدنيا
بس لما فتت على هالكلية اتغيرت وحسيت أنو لازم أبدع بها المجال يللي اخترتو على الرغم من المعارضة الشديدة يللي كانت بالبيت (الكل بدو ياني فوت طب أو طب أسنان)
والصراحة لما بتطلّع على الناس برا بحسن أنو هنن بشر متلنا بس يمكن بيفرقو عنا أنن ما عم يلعبو
في شي شاغل مخهن وعم يشتغلو على أساسو
وليش لأ ممكن صير من هدول ويكون إلي تأثير بالمجتمع
مو بس أنا وحتى كل واحد فينا لازم يفكر هيك
وأنا كمان مع الشباب أنو الواحد على أد شغلو بيكون فعال يعني ما في شي بيجي من فراغ
ولا شو رأيكم؟؟؟

أنا والله يا هاني فتت على هالفرع غصب عن كل الناس يلي حوليي لأنو أنا من طول عمري بعرف أنو هاد ميولي, يعني حطني على كمبيوتر وانساني.

أنا طموحي بهالفرع أني أرفع اسم سوريا قدام العالم ( ومنشان ما يزعل M-Ramy ) الأمة العربية والإسلامية كلها, يعني نحنا الجيل القادم, وإذا كان عقلنا معلق بتفاهات أو كنا بدنا سلتنا بلا عنب فلازم نترحم على هالأمة لأنو الأمل فينا, ولما يضيع الأمل ضاعت الحياة. 

أول شي انا هلق مارح كون كمقيم للأخرين ابدا بس حابب علق شوي على كم شغلة

وأخيرا hurrican انا حاسس انو تفكيرك طابق على تفكيري

أنا ما كنت أبداً فكر أني أدخل هالفرع يعني طول حياتي من وقت ما كنت بالابتدائي كنت أحلم بالصيدلة و هي كانت منتهى أحلامي حتى بالبكالوريا كان بدي علاما ت مشان الصيدلة...
بس سبحان الله ما دخلت صيدلة و دخلت معلوماتية و تعلقت فيها و حبيتها حتى يمكن أكتر من الصيدلة....
لأنو بكره البصم كتير و عندي حل 100 مسألة ولا حفظ فقرة وحدة( وهاد اللي روح علاماتي بالبكالوريا الحفظ)..

أنا فتت عالكلية لأنو من أنا و صغيرة بحب كل شي الو علاقة بالكمبيوتر (من وقت ما كان عنا كمبيوتر "الصخر") مجرد اني كون عم اشتغل عالكمبيوتر لو شو ما كان بحس بالمتعة. كان حلمي انو ادرس معلوماتية بس بعرف انو مستحيل جمع مجموع يوصلني لهون، مشان هيك كان مخططي انو ادرس اي فرع تاني و بس اتخرج اعمل دورات لاتخصص بهالفرع او وقت اشتغل اتخصص بالكمبيوتر بس سبحان الله جمعت منيح بالبكالوريا ما بعرف كيف و لحسن حظي أنا عم ادرس هون. و هدفي اني اقدر كون بنت مسلمة عربية سورية بتنجح بفرع كتير ناس بيقولو عنو انو للشباب و مدري شو....
و أكيد دائما بحلم انو كون شغلة كبيرة وما ضل عالهامش بس الواقع يوم عن يوم عم يورجيني انو التميز صعب كتير و خايفة يوم من الأيام اذا ضليت عم احلم هيك انو انصدم بالواقع مشان هيك ماعد حلمت كتير، بكفي انو اقدر اشتغل بهالمجال و انجح بشغلي.. و الله يقدّرنا على انو نحسن البلد و نترك أثر بهالمجتمع ..

قصة فتاة طموحة
من وقت كنت صغيرة ويقولونا اكتبوا موضوع عن هدفك في المستقبل فدائما بلش (أحلم أن أكون مهندسة .......)وبيني وبين حالي هندسة ديكور لأني بحب الترتيب والتحف والمناظر الحلوة يعني حسيت حالي بدي فوت فنون جميلة لأني بحب كل شي إلو علاقة بهل الفرع بس بعدين وقت صرت بكالوريا إلت لحالي فيني فوت فرع تاني وتكون هديك القصص هواية وفعلا بعد ما خلصت فحص البكالوريا جمعت وطرحت وقسمت طلع معي إني بجيب 217 إن عليت 225 وطبعا حطيت ببالي هندسة الزراعة (لأني كمان بحبها كتير)أو رياضيات(لأني كنت حب آنستي بالثانوي كتير كتير) بس الفرحة وقت جبت 230 إلت لحالي خلص هندسة طبية طبعا بعد دراسة لهاد الفرع وما ضل حدا إلا سألتووعلى فكرة أنا عملت أكتر من سبع صلوات استخارة ولا مرة ذكرت فيهن المعلوماتية بس مرة ورفيقتي عمتحكي معي آلتلي عالهندسة المعلوماتية وشلون حطيتها بالمفاضلة ما بعرف ,يعني أنا هلأ حاسة حالي بنعمة والحمد لله فرع تكيفت معو تقريبا وكل هواياتي فيني مارسها رياضيات منحل وبزرع ورد وبقطف مشمش والبيت وبرتبو ...........
بدي قول ألف مبروك لسنا لأنو رفعت كل موادها بعلامات عالية

كانت الصيدلة حلمي ولا زالت وانكسر الحلم على علامة وحدة ..وقلت أكيد هالعلامة ما راحتلي عن عبث .
..رضيت بالمعلوماتية بما أني مستحيل أرجع على عذابات البكالوريا
وعاندت أهلي ومارضيت عيداعلى أمل تعوضني المعلوماتية وتكون أحسن من الصيدلة ..
وبالنهاية الخيرة فيما اختاره الله ..مع أنو وضعي مأساوي مع البرمجة لحد الآن بس عندي بصيص أمل يمكن صغير شوي
بس إلا ما يجي يوم وأهزما لهلمادة.. ولو حتى رسبت بلسنة الأولى..معليش..
والفشل أول خطوة علس سلم المجد(صحيح هي صارت سلسلة لا نهائية من الإخفاقات بس معليش كل شي كرمال الشام بيهون)
وانشالله يارب تفتحلنا أمخاخنا(ج مخ) هيك ونصير شي مهم وعليه القيمة ونفيد هالبلد ..ويفرج عن كل المعلوماتيين أجمعين..آمين

يعني بصراحة كلشي انكتب حلو كثير بس يا ترى المعلوماتية بتحبنا مثل ما منحبا
يعني نحنا قد ما كنا فهمانين و متميزين إذا بدنا نستفاد من اللي عم ندرسوا ونحس حالنا عم تقدم شي بدنا نضطر نسافر لخارج البلد و إلا النهاية موظفين بشي شركة يعني عمل روتيني
يعني قد ما طلعنا و حاولنا نأقنع حالنا بضل الطب و الصيدلة أفضل بكل النواحي(اجتماعيا و ....)

أنا بصراحة بحمد الله لانو فتت الفرع إلي بحلم فيه من وأنا صغير

وهدفي انو اعمل شي بمجال المعلوماتية يكون مميز

متل mpcabd

وان شاء الله نتوفق كلنا لتحقيق أهدافنا

انا كنت دائماً كل وقتي مضي عل الكمبيوتر يعني بدل الدراسة بالعاشر والحادي عشر دائماً مقضي وقتي عم اشتغل ع الكمبيوتر (يعني نجحت شحط)
بس الحمد لله درست بالبكلوريا و جبت 231 بعد ما كنت حاطط ببالي اني ادرس معلوماتية
بس صار وقت المفاضلة صارو يقولو سجل طب أسنان....
مفاضلة الموازي سجل طب أسنان أو طب ..................
بعدين نسجلك بشي جامعة خاصة طب أسنان أو طب بشري................
ضليت عم عاند بدي معلوماتية
أبي كان حابب اني ادرس طب لأنو هو طبيب و شايف الطب وعاجبو بينما المعلوماتية شايف انو الا مستقبل بس مو بكل مكان بتقدر تشتغل هلأ شو بنا بهالحكي

السيد مختار قال انو الدكتور أو الصيدلي احسن من حيث المكانة الاجتماعية برأيي انو الانسان هو اللي بيصنع المكانة الاجتماعية لنفسو و بساعدو بذلك دراستو
طبعاً مجتمعنا شايف انو الطب احسن شي لأنو كان مهنة انسانية بس ما ببوقع لسا كتير انساني لأنو كل العالم عم دور كيف بدا تعيش

اذا بنا نرفع راس سوريا بدو يكون في تشجيع و حوافذ و ما بتوقع هادا الشي موجود
ضمن مشاريعي المستقبلية يمكن بعد ما خلص معلوماتية (اذا ضليت عايش) ادرس إدارة أعمال و من هون لوقتا يخلق الله مالا تعلمون
طبعاً أكيد طموحي متل الكل انو نرجع المجد لأمتنا و نصير بمقدمة الأمم بالعالم و إن شاء الله هادا الشي بيتحقق

طيب لكل الشباب يللي عندن طموح عالي وأنا واحد منن شو سايتو خطوات عملية لتحققو طموحكن هاد
هادا السؤال
صحي أنو الواحد ضروري يكون عندو هدف بس لازم كمان أنو ما يخلي هاد الهدف بخيالو بس لازم بنقلو لحيز التنفيذ
يعني شغلك الحالي بالمجال هاد هل هو كافي ليحققلك طموحك ولو حتى بعد كم سنة؟؟؟؟؟؟؟
يعني أنا ما كان قصدي من هاد الموضوع بس أنو الواحد يحط الشي يللي بخيالو مع أنها شغلة كتير منيحة أنو يرسم الواحد مستقبلو
بس كان هدفي أنو الواحد يشوف حالو شو عمل مشان يحقق يللي براسو
ويشتغل كمان وكمان
يمكن تقولو هادا الشب قاعد عم ينظّر علينا
بس أنا الصراحة أضرب منكن بس قلت لحالي أنو إذا عالجت هالقضية معكن وسمعت آراءكن ممكن تكون النتائج أحسن
ما بعرف

والله يا صاحبي أنا ما عم بخلي مجال بهالمعلوماتية إلا ما عمبتعمق فيه وأدرسو لحالي ( 3D , برمجة و Design , Hardware , وناوي Linux و networking ) يعني أنا عندي إعتقاد أنو بالمعلوماتية يجب أن تصنع نفسك بنفسك, والحمد لله ما ضيعت عمري ورا الألعاب, بالعكس من وقت ما كنت صف سابع اعتنقت البرمجة والبرامج!

يعني بصراحة عم أحمد ربي صبح ومسا لأني بالمعلوماتية ماني بشي طب أو صيدلة ......
أول شي الدراسة هون ممتعة كتير كتير كتير يعني بتدرس من قلب ورب مو متل جماعة الطب والبصم و الحفظ.........
كمان المستقبل لنا هوي صحيح مو هالمكانة الاجتماعية بس بكرا بيعرفوا شو يعني "مهندس" معلوماتية ........
يعني نحنا جماعة السنة الأولى أو قبل لازم نبوس ايدنا وش و قفا لأنو مافي العدد الكبير من هادا الاختصاص .........
أما حلمك فأنت لازم تشتغل لتصلو لأنو هوي ما رح يجي لعندك ببساطة.......

و الله لحد هلأ ما بلش التنفيذ الفعلي يعني هلأ ما فينا إلا ندرس لو كان فينا نعمل شي كنا عملنا...
بس أنا برأيي دراستنا( في الوقت الحالي ) كافية

وأنا كمان كنت هيك أول وأت كنت سنة أولى .. بس للأسف.. شكلي طلعت غلطانة ..
بس تصير سنة رابعة بتكتشف إنو كل العلم تبع هي الكلية بيختصر بـ3 مواد ودورتين ,, وإنو عندك شي عشر مواد بأخر سنتين هنن تكرار لمعلومات أخدتا بالسنين اللي قبل وهالتكرار بس مشان يصيرو خمس سنين ويطلع اسمك مهندس معلوماتية مو معلوماتي ,,
"مهندس معلوماتية" بنظري هي كلمة منئعد منئولا أدام الناس ومنتمنفخ عليهن فيها إنو نحنا جبنا علامات عالية بالبكالوريا ..!!
على فكرة أنا ما دخلت الكلية لأنو المفاضلة هيك طالعتلي أنا كنت مصرة علمعلوماتية شو ماكان التمن .. وأنا وحدة من الناس اللي كتير مبسوطين بفرعن ..
سلام..

بالنسبة الي من وقت ما كنت بالثانوي كان بدي معلوماتيه وبحب كل شي الو علاقة بلبرمجه .. ولحد الان بستمتع بكل سطر كود بكتبو (رغم اني ما درست بكلية المعوماتية السورية )

حاليا بعد ما دخلت مجال العمل (برمجة مواقع الويب ) حابه اترك أثر بشكل فعلي .. وفعلا المشروع اللي عم اشتغل فيه كبير كتير ورح تتزكروني وقت تشوفوا اعلان الانترنيت عندما تصبح سوريا

وبعمل مشاريع شخصية .. وطموحي بالمختصر انه يكون تواجد عربي بالانترنيت ! ننشر ثقافتنا .. أفكارنا .. حقوقنا .. بحيث نقدر نوصل لكل واحد ونقدر نوقف التشويه الاعلامي اللي بمارسو الغرب علينا ... يعني بشو غيرنا أحسن منا ؟ (بأصد من ناحية الذكاء بس )

أنا كان حلمي من صف التاسع إني أدخل هندسة معلوماتية لأني بحب الرياضيات وكمان كل شي إلو علاقة بالكومبيوتر وكنت إشتغل على برامج متل (Photo Shop ,Flash ....) وغيرهم
وهلأ بحب البرمجة كتير كتير وعاجبتني ...
وكمان كنت فكر بهندسة العمارة لأني كتير بحب الرسم والديكور والفوتوغراف وهيك قصص ((أنا و Rasha عنا ميول مشتركة كتير الظاهر ))...يعني بصراحة بحب الفرع اللي ممكن يكون في مجال إنو ضيف في شي من عندي ويكون في تميز وما كون متل الآلة اللي عم تحفظ وتطبق شو حفظت وشو تعلمت بس ... وهاد غير إني بكره الحفظ وما بيطبق على عقلي أبدا ...
بالبكالوريا كل اللي حواليي وأهمهم بابا وماما بدهم إني أدخل موازي صيدلة وأنا مابحب هيك نوع من الدراسة...مع إحترامي لكل الدكاترة والصيادلة ولهالمهن الإنسانية...بس بلدنا ما رح تتطور بيوم من الأيام إذا بدو يضل تفكيرنا واقف عند إنو يا دكتورة يا صيدلانية يا أما بلا عذاب هالقلب بفرع غيرهم ...
بالنهاية بابا وماما اقتنعوا كتير بالفرع ومتأملين فيه متلي..بس لهلأ وبعد ما قربت تخلص السنة الأولى في ناس بس يسمعوا إنو كنت بقدر فوت صيدلة بيطلعوا فيني بنظرة ((سبحان الله ..ولله في خلقه شؤون ))!!!!!!
الحمدلله أنا كتير مبسوطة بالفرع ومقتنعة فيه وأملي كبير إنو إن شاء الله نقدر نغير شي بالمستقبل لنفيد بلدنا ...وإنو كمان نغير نظرة مجتمعنا عن أهمية هالفرع بحياتهم
وعندي أحلام وأهداف كتير إنشالله بقدر حققها و ضيف شي بهالمجال.....
وأكيد متل ما قلتوا كلكم إنو الكلية ما بتكفي أبدا وبدنا شغل كتير عحالنا .. والله يقدرنا إنو نقدر نتعب عحالنا وما تبقى الأحلام كلام ويوصل كل واحد منا للي بيحلم فيه...

على فكرة هالموضوع كتير حلو ومهم ..لأنو بعرف كتير طلاب عنا بجامعة البعث دخلوا معلوماتية لأنو هو الفرع اللي طلعلهم ...وبدهم ينجحوا ما أكتر من هيك ....
وأنا اللي حبيتو بالموضوع وبطلاب السنة الأولى بالشام اللي تعرفت عليهم لهلأ إنو كان عنا معاناة مشتركة بالبداية لقدرنا نقنع أهلنا بهالفرع وإنو كلهم عندهم إصرار وتفاؤل بالمستقبل متل اللي عندي ...

أنا فتت معلوماتية ليش؟؟؟
لأن شفت ناس دخلوا هذا الفرع وهلأ هنن بمستوى اجتماعي كتير مرموق
وحسيت أن راح زمن الحفظ و الدراسة التقليدية وأجا الزمن يل لازم فيه الواحد يضيف شيء للحياة و يكون مستمتع بالشىء يل عم يعملو "إن شاء الله التوفيق يكون حليفنا ويكون اختيارنا صائب"

حكيك صح...
بس ما كل ما يتمناه المرء يدركه...
يعني الواحد حتى وهو صغير ما بيعرف لوين متجه مستقبله، يعني ممكن يهتم بشي و يطور حالو فيه بس يدخل كلية تانية مغايرة تماماً للي بخياله أو اللي كان يخطط مشانها...
بس أهم شي الواحد يقتنع باللي طلع له و وقتها بيقدر ينتج ..
الشغلة التانية أنو المكانة الاجتماعية مو محصورة أبداً بالطبيب ولا الصيدلي ، بالعكس الواحد بعلمه بيصنع مكانته مو بالمهنة اللي عم يمارسها

انا اول شي بحب المعلوماتية تاني شي هيك المجموع امر بس فوق كل شي المعلوماتية احلى فرع

متل ما بقول المثل:

اللي  ما بطول العنب  بقول عنو حصرم

بصراحة..أنا من وقت ما كنت صغيرة اسمي الدكتورة نور ..الكل بالعيلة وبراة العيلة بنادولي الدكتورة نور..يعني من صغري بحب الطب وكنت دايما اقرأبكتب خالي تبع الطب..مشان هيك كان هدفي ادخل طب..بس لما طلعوا النتائج ماحدا نصحني بالطب وخصوصي الأطباء والطبيبات وقالولي شو بدك بهي الشغلة ووجعة القلب؟!!
المعلوماتية اخترتها بعد الطب مباشرة لأنو الصيدلة ما بحبها بنوب (الكيمياء)مع العلم أبي كان بدو ياني فوت صيدلة موازي بس أنا مابدي ولهلق بحمدالله إني فتت على هالفرع لأنو حلو كتير (صحيح عم نلاقي شوية صعوبات بس أول خطوة في طريق النجاح هي الفشل)
بعدين اقتنعت بفكرة أنو الدكتور موبس بالطب البشري.. بأي مجال الواحد بيحسن يصير دكتور..
الله يقدرنا نكون قد المسوؤلية ومانخيب ظن حدا فينا

والله اللي خلاني فوت على هالفرع هو حبي للمعلوماتية رغم معارضة الكل لهالفكرة من اساسها بس الصراحة ما كنت هيك متخيله للوضع يعني برمجة وشبكات و كنت مفكر انو بس hardware(صيانة و تطبيق كمبيوترات ...) بس طلع ظني مو بمحلو و الحمد لله انو طلع في عنا بالكلية شغلات احلى متل البرمجة بس الصراحة عاجبني الوضع بس لازم الواحد يتعب على حالو كتير بهالفرع لحتى يصير شي مهندس خارق
وبالتوفيق للكل

اي مبينة اللي ما بطول العنب بقول عنو حامض

سؤال تاني شو بتتوقع حالك رح تشتغل بس تتخرج ان شاء الله....................
يعني شو خططكن المستقبلية ((لا تقولو بكير لأنو اللي ما بيجسب ما بيسلم ))..................