|
السلام عليكم
بتتذكروا الإعلان عن مشروع تعليم الصم
http://www.csc-sy.net/node/4201
وبالوقت الحالي كان في إعلان تاني عن يلي حابب ينضم للفريق وإنو كان في جلسة تعريفية اليوم .
ملخص الجلسة اليوم إنو رح يكون في دورة تدريبية رح تبلش قريبا بس ليصير في عدد منيح ، هالدورة رح تستمر لشهر تسعة بعدها بيصير كل شخص فيها قادر انو يعطي دروس بلغة الإشارة بالمادة يلي هوي بيحددها ، وبعد هالدورة المطلوب من كل شخص متطوع إنو يعطي على الأقل ساعة واحدة بالاسبوع لتدرس الطلاب الصم ..
حكينا شوي عن طبيعة الصم بشكل عام ، وهيي إنهن أذكياء وبيحبوا يفهموا كل شي لأنهن انحرموا من الفهم وكانوا يبصموا كل شي ، والصدمة بالموضوع إنو الطلاب الصم بيوصلوا للصف الحادي عشر أو أكثر وما بيقدروا يفهموا اللغة العربية يلي بيقروها ، لأنها بتختلف عن لغة الإشارة أولاً وبسبب التدريس الفاشل يلي ما قدر من البداية يربط بين اللغتين وبالتالي فالطلاب الصم ما بيفهموا أبدً إذا قرؤوا المنهاج لحالهم ، وبالمناسبة الصم يلي بيقدروا يقرؤوا لغة الشفاه أسهل بكتير لأنو ببساطة بدهن مدرس بمكان واضح وقريب ويحكي على مهلو ، أما طلاب الشعبة الحالية فهني ما بيقدروا يقرؤوا لغة الشفاه .
تعلمنا كمان كم إشارة اليوم على سبيل التعرف على اللغة ، واللغة جداً ممتعة ولو إنو بالبداية بتتنسى ، وجو المتطوعين بشكل عام كتير حلو .
المشروع إنساني بحت وحالياً تابع لمنظمة واحدة عم تمشي بإجراءات إنو يصير معترف عليها ، وبالتالي المتطوعين ما الهن أي سلطة ، يعني يلي اقترح بالموضوع الماضي انو يدربوا المدرسين في معهد الصم على لغة الإشارة فهادا مشروع كبير والمفروض من الدولة إنها تعملو ، بس للأسف النظرة لمتل هيك طلاب بتضل قاصرة وكأنهن مو بشر متلنا ومن حقهن إنو يتعلموا ..
يلي بيحب ينضم للفريق يتصل بالأخ ’علي’ على الرقم 0988278032
|
أرسل من قبل 
