|
إحم إحم ...
بالنسبة للسنة الثانية :
الفصل الأول :
الخوارزميات /1/ و /2/ :
في عندكم كتاب الخوارزميات /1/ و /2/ الموجود في مستودع الكتب بالكلية للدكاترة عمار خير بك - مادلين عبود - راكان رزوق الكتب التي بتمثل المنهاج المتبع للإعطاء .. جيدين كبداية وأخذ فكرة بنصح الشباب يقرؤوهم ..
بالنسبة للمراجع ... فمتل ما تفضلت Aida_Kh عن السيدي الموجود بالمكتبة .. وفي عدة كتب بتساعد مثل Introduction to Algorithms و Algorithms & Data Structures وفي كتاب رائع شفته مع رفيقي من شهرين واسمه Pascal : Object-Oriented & Data Structures كتاب فعلا رائع بيبدا بالباسكال من الصفر وحتى البنى الشجرية والتنظيم وغيرها ..
البرمجة /3/ :
وبتشمل لغة الـ C++ لغة حلوة بس بدها تعب .. وممكن تلاقوها صعبة شوي لأنها مختلفة عن الباسكال من حيث الكود وطريقة كتابة برنامج .. ممكن تستفيدوا من السلايدات تبع الدكتور غسان كويتر .. وممكن من المرجع العربي : كيف تبرمج بلغة C++ للدكتور صلاح الدوهجي أو من مرجع أجنبي C++ : How to Program كتاب رائع فعلا ومفهوم وحتى المرجع العربي السابق معتمد عليه من حيث الأمثلة والتمارين ....
الاحتمالات والإحصاء :
مادة اسم على مسمى ... كلها احتمالات ونرد وعلب وكرات بيضاء وسودا ومدري شو .. بعدين التوقعات الرياضية والوسط الحسابي وهيك شغلات .... المرجع المناسب إلها هو كتاب الاحتمالات في كلية العلوم ... الإحصاء ما بينعطى فيها غير آخر محاضرتين بس .. وسهلين ..
التحليل /3/ :
هي بصراحة عبارة عن قسمين :
- المعادلات التفاضلية
- التحليل العقدي
المراجع المناسبة هي الكتابين موجودين في كلية العلوم كمان .... ثقيلة الدم شوي ... شوي ..
الدارات المنطقية :
هي المادة ( ومتل ما بيفكروها البعض ) أسهل بكتير من الدارات الكهربائية والإلكترونية .. سهلة وحلوة وكلها منطقيات 0 و 1 بس .. عناصر محدودة وطرق ظريفة للحل .. مشكلتها الوحيدة هي بمدرسينها ....... كتاب المادة ( الدارات المنطقية ) للدكتور عبيد أحسن مرجع للمادة ..
الانكليزي /3/ :
هي مادة مفتوحة ... بترجع للمدرس .. بيعطيك يللي بده ياه وبيلغي يللي بدو ياه ...
هي بالنسبة لمواد الفصل الأول ...
الفصل الثاني : وهو أخف من الفصل الأول ...
التحليل العددي :
مادة كتير حلوة بتعتمد على استيفاء توابع وكثيرات حدود وحل معادلات من الدرجة الثالثة وتفاضلات بطرق بيعطوك ياها وما عليك غير تحفظ هالطرق.... مشكلتها الوحيدة أنه مدرس المادة د.عبد الله عمر فارض النظري .. أي إثبات القوانين وهيك شي .. يعني غلاظتها بالنظري ومو العملي .. المرجع الأنسب إلها هو كتاب التحليل العددي (1) للدكتور بحبوح ... وعلى فكرة مرجع الدكتور ومدرسة العملي كمان 
الاتصالات الرقمية :
مادة صعبة وغليظة ... هي الحقيقة المرة عنها ويمكن اشهدتوا هالشي بالمنتدى ... كلها إشارات وتحويل فورييه وهالشغلات المعتة .. مدرسة المادة د.نداء سلمان بتفرض عدة كتب :
-الإشارات والنظم
-الاتصالات الرقمية
-نظرية المعلومات
وللأسف بتجيب منهم الأسئلة ..... بس مو مشكلة لوقتها نحنا شباب السنة الثالثة منحللكم الموضوع بمعرفتنا 
بنيان الحواسيب :
مادة بتتعلق بالـHardware تبع الحواسيب .. صراحة هي مادة كتير كبيرة .. من الذواكر للمعالجات لبرمجتها لمساري المعطيات .. شغلة طويلة ... في كتاب Computer Design & Organisation و Computer Architecture كتابين مرتبين للمادة ومنهم انعمل المقرر ..
مهارات التواصل :
Piece of Cake ... يعني مادة تسلاية .. عمللك مشروعين من قفا إيدك عن العلاقات بين الكائنات البشرية .. مشروع تحكي فيه عن المدري شو .. محاضرات عن الوعي واللا وعي البشري والتخاطب الذهني والحركي والرئوي والأمعائي ... وبتجيب علامة فيها !!
اللغة العربية :
ما بدها معرفة .... مارين فيها بمآسينا بالإعدادي والثانوي .. المدرس الأخير يللي عطى المادة السنة الماضية كان مرتب ومقدر ... وكان بيشرح منيح .. طبعا أسئلته ما كانت سهلة وضربت كتير عالم .. ( مو كتير بس ما توقعوا أنهم يجيبوا علامة قليلة فيها .. ) طبعا لا يخفى أنه هادا كان من إهمال لأنه ما كان يحضر اكتر من 20 طالب ..
بالنسبة للبرامج يللي ممكن تستخدموها للخوارزميات وغيرها .. فأقرب برنامج ممكن هو Delphi لأنه بيشتغل على باسكال... ممكن تتعلموها عن طريق كتاب Delphi 3 كتاب مفهوم بس قديم ... أو ( بأسوأ الأحوال ) من مدرس خاص ...
بالنسبة إلي .. عاوني Renwar على الدلفي وقتها .. كنت فايت بميت حيط بس الحمد لله أنجدني ... Thanx Renwar !!!
إذا نسيت شي خلي شباب السنة التا.....لتة يقولوكم ياه 
صحي Ray أنتي ضمنتي نجاحك حتى فتحتي الموضوع !؟!؟!؟
|
أرسل من قبل 
