CSC - SY

هادا دليل لطلاب المعلوماتية لجميع السنوات

وكوني كنت سنة أول حبلش حط معلومات عن المواد يللي بالسنة الاولى وذلك حسب رأي الأعضاء هون يلي بالمنتدى:

المواد:

مبادئ عمل الحاسب:

الدكتور المعطي : الدكتور زهير صندوق .

العملي : الأنسة فرح حمشو

علامة العملي :30

نظام أسئلة النظري : مؤتمتة.

الوصف (من العضو rash88):

الدكتور زهير صندوق والدكتورة ريما شعبان الكتاب بيتألف من فصولة ممتعة وفصولة جامدة

أهم شي القراءة المركزة فيها وربط الأفكار بين الأبحاث كلها, البحث التاني والتالت بدهن متابعة أثناء السنة وبعتقد المادة بدها حضور لأنو بيجي أسئلة من يلي بيحكيه الدكتور
70 نظري و30 عملي بتحكي المادة عن بنية الحاسوب ومبدأ عمله

2)ترميز المعلومات هاد البحث مهم كتير وأكتر من هيك ممتع ، والدراسة لهاد البحث بتكون من الكتاب ومن نوطة بتعطيها المهندسة ريما

3)الفصل التالت مكونات الحاسوب المادية و مبادئ عملها هاد البحث أهم بحث مشان الفحص أما الرابع معلوماتو بسيطة(محيطات الحاسوب) والخامس فيه معلومات بين الأسطر بدو الواحد يستخرجها والسادس عن الشبكات المادة مؤتمتة بتتكرر شغلات بسيطة من أسئلة الدورات بتصور 5 أيام لدراسة المادة قبل الفحص كافيين

وفي نوطة منزلة هون عالموقع كمان ممكن تفيد

هنـــــــــــــــا

التحليل 1 و2:

الدكتور المعطي : الدكتور محمد الخطيب والدكتور عبد الله العمر(التحليل 1) والدكتور محمد الخطيب والدكتورة سلافة العلي (التحليل 2).

العملي : الدكتور محمد الخطيب والدكتور عبد الله العمر(التحليل 1) والمهندسة :هدى حبش (تحليل 2).

علامة العملي :20

نظام أسئلة النظري : نظام فرنسي (غير مؤتمتة).

الوصف (من العضو rash88):

المادة سهلة ومافيها كمية للدكتور محمد الخطيب ما في داعي للكتاب 80 نظري و20 عملي(النظري أخو العملي يعني منروح مرتين عالفحص مرة منقدم من20 ومرة من80) بتحكي المادة عن تقارب السلاسل وتباعدها واشتقاق واستمرار بس المشكلة الأسئلة بتكون غير متناسبة مع الموجود بالدفتر يعني كل تمرين بدو وقت طويل للتفكير مشان هيك ننصح بتمارين خارجية إن وجِد ويلي بدو مندبرلو وأسئلة الدورات كتير هامين وفي طريقة تصحيح متبعة بالتحليل إذا بتكون الطريقة كلها صح بس الجواب النهائي خطأ العلامة كلها بتروح حتى لوكانت 20 علامة(يعني متل نظام الأتمتة)

(من العضو hanihh) :

كانت التحليل من أحلى المواد عندي لأنو بحب الرياضيات

التحليل واحد كان فيها المنهاج قريب على منهاج الباكالوريا (نهايات واستمرار واشتقاق توابع إضافة إلى متتاليات وسلاسل) والمادة مو صعبة وبدها حل تمارين كتير، التمارين الخارجية كتير مفيدة والمراجع كمان مهمة وممكن تفيد ومن المراجع المقترحة ويللي كان متوافر عندي ودرست منو (calculus)

وهادا الكتاب يعد المرجع الأجنبي الأساسي إضافة إلى أنو كتب كلية العلوم والهندسة المدني ممكن تفيد كمان

والتحليل 2 هي استمرار للتحليل 1 وكانت بشكل أساسي التكامل (سلاسل التابعية في البداية وبعدين بيضل التكامل لحتى آخر السنة وطرق حسابو والتكامل المحدد وحساب مساحات)

وكمان التمارين الخارجية شغلة مهمة كتير ولازم الواحد يجيب تمارين من وين ما بيصحلو لأنو التمارين الموجودة بالمحاضرات مو كافية .

وصلات مفيدة:

كتاب للتكاملات

ملاحظات (تكاملات)

ملاحظات2 (تكاملات)

أسئلة في التكاملات

الجبر العام:

الدكتور المعطي : الدكتور ناصر أبوصالح سابقاً.

العملي : الدكتور ناصر أبوصالح

علامة العملي :20

نظام أسئلة النظري :فرنسي.

الوصف : (ما كتير مهم لأنو الدكتور ترك الكلية)(من العضو rash88)

كان بيعطينا الدكتور ناصر أبو صالح والأسئلة مو كتير غريبة عن الموجود(هي المادة متل مواد البكالوريا بس بدها دراسة) بتحكي عن التطبيقات(متباين غامر....) زمر منتهية وغير منتهية,حلقات وطبعا مو مأتمتة 80 نظري و20 عملي وكمان ما في داعي للكتاب

فيزياء أنصاف النواقل:

الدكتور المعطي : الدكتور نزار شعبان .

العملي : ؟؟؟؟؟

علامة العملي :20

نظام أسئلة النظري : مؤتمتة.

الوصف:(من العضو hanihh)

المادة كانت معتة كتير ومالها أدنى فائدةفي مجال المعلوماتية ويمكن عدها من باب الثقافة العامة

تدور المادة كلها نحو الألكترون ومنغوص جواتو وبأول خمس فصول المعلومات كلها عن الالكترون وعن طبيعتو الكمومية يللي لهلأ ما فهمتها وبالفصل السادس بيكرسو المعلومات هي باستخدامها بالوصلة بين نصفي النواقل ومنشوف شو بيصير لما منساوي هيك وصلة والمحاضرات هامة كتير ومنها بتجي الأسئلة غالباً

الدكتور بيطلب دراسة بحثين من الكتاب والباقي من المحاضرات والفهم يكاد يكون صعب كتييييير

ومتل ما قلت أنو المادة بمجالنا مالها مهمة بس بغير مجالات ممكن تكون مهمة كتير متل هندسة الالكترونيات والاتصالات

بالعملي أخدنا فصلين وكان العملي سهل نسبياً وممكن ينجاب فيه علامة عالية.

الوصف (من العضو ray):

هي المادة أولاً النظري فيها من 80 والعملي من 20 مؤتمتة بس هون بقا الشغلة ، إذا أجتكن الخطأ يلغي الصواب يا عيني بتكون أمكن داعيتلكن على التمام طبعاً هلأ أنتو فايتين على الكلية جديد وما بتعرفو شو هالمصطلح : هاد المصطلح يعني بشكل بسيط أنو مع كل علامة بترحلك معها علامة تانية مجاناً يعني مثلاً إذا كنت طالع من الفحص ومبسوط ( متل ما كنا بالفصل الأول ) وحاسب أنو ما يرحلك إلا 4 علامات بيقوم بيطلعو ( لسعادة الحظ ) 8 ... إن شاء الله ما بيصير معكن هيك شي بس أنا حبيت تعرفو شو هالمصطلح قبل ما تفوتو الجامعة لأنو بتذكر يوم رجعت من فحص الفيزيا كنت كتير مبسوطة وعم قول مراعينا كتير بنظام هالتصحيح أنو كل علامة بتروح هي ورفيقتها سوا ( سيران ) وما كنت أعرف هالنظام اللطيف هاد وأثره الضار بالطلاب !!!!
بالنسبة للمراجع أنا ما قربت عليها لأنو شفت المادة ما دخلها بالكلية تبعنا لا من قريب ولا من بعيد درست المحاضرات ، وفي وقتها الدكتور قلنا على بحث نقراه من الكتاب وقرينا من الكتاب، بقا يعني يستحسن تجيبو الكتاب....
بالنسبة للدراسة بقلب السنة لازم تندرس بقلب السنة لأنو مليانة وممتلية وقبل الفحص ما بيقدر الواحد ينسق هالكم الهائل من المعلومات بعقله وهي مو بس للفيزيا لكل المواد الدراسة جوات السنة أحسن

وصلات مفيدة (موضوع المناقشة)

الانكليزي 1و2

الانكليزي أسهل مادة عنا ( يمكن لقيتو هيك لأني بحب الانكليزي كتير) مناخد من كتاب من OXFORD اسم الكتاب : NEW ENGLISH FILE الكتاب كتير حلو وفي GRAMMARS متل االي كنا ناخدها بالبكاوريا ، طبعاً أخدنا بأول فصل 3 أبحاث من هاد الكتاب وبالفصل الثاني أخدنا 4 فصول الباقيين لأنو الكتاب كلو 7 فصول ،
أسئلة الفحص أجت من برات الكتاب بس منوعة بين الGRAMMAR و المفردات VOCABULARY و ال PHRASAL VERBS ووو....
الأسئلة مو صعبة بالعكس يعني كانت المادة كلها بالنسبة لألي متل الترويح عن النفس بين باقي المواد تبعنا....
بحب قلكن أخيراً بالنسبة للإنكليزي يستحسن أن تجيبو الكتاب .

البرمجة 1و2

الدكتور المعطي : الدكتور باسم قصيبة والدكتور غسان كويتر(البرمجة1) والدكتور محي الدين مراد (البرمجة 2) .

العملي : عدد من المهندسين

علامة العملي :30

نظام أسئلة النظري : فرنسي.

الوصف (من العضو rash88):

أهم شي التركيز مع الدكتور أثناء المحاضرة مليون بالمية وواحد من الدكتورين يلي بيعطوا المادة التركيز الزايد معو بأدي للنوم وبلاقي الحضور كتير مهم مالازم أبدا الإستهتار بهل المادة حتى لو كانت الأفكار يلي عم تتاخد قليلة ومو محرزة تندرس, أهم شي السؤال عن أي شي بيخطر على البال حتى لو يمكن تفكروا سخيف لأنو هي المبادئ الأساسية للبرمجة كلها وما بكفي الدراسة لحالها من الكتاب أو من المحاضرات, استنتجت آخر شي(من بعض الطلاب) المراجع كتير ضرورية أما أسماء المراجع أنا ما بعرفها لأني وقتها ما جبت شي ، وبعتقد الواحد صبح ومسا فطور وغدا وعشا يحل ويفكرحتى يصير يحل بمنامو وإذا انحملت المادة هاد مو يعني عدم فهم لأ بس يمكن يكون عدم تمرس أثناء السنة يعني بهل المادة لازم الواحد يفكر يفكر يفكر يفكر وبالتالي ياكل ياكل ياكل ياكل
30 عملي و70 نظري وأد ما فيكن تحسنوا علامة العملي لا تقصروا ولازم تهتموابالأفكار يلي بالعملي لأنو بالفصل التاني بتكون من سياق الحل بالبرمجة 2وبس10علامات من مية بتقيم شغلك عالكمبيوتر و4 للتقرير و8للحضوروالوظايف و8 مذاكرة نظريةو70 لفحص النظري الأخير لازم تنحل أسئلة الدورات مشان التمرس بس ما بيجي منهن
بالنهاية بقول المادة أكتر من حلوة وأنا ما حسيت بمتعة البرمجة1 حتى درست البرمجة2

الوصف (من العضو ray):

البرمجة 2 :
بداية العملي فيها 30 علامة أما النظري 70 علامة ..
طبعاً كفكرة بسيطة العملي علامته بتنقسم على امتحان عملي يمكن 8 علامات ومذاكرة مدري كم علامة... في وظايف كمان مدري كم علامة ، وفي علامة حضور على ما أعتقد ، إضافة لعلامة التقرير واللي هو وظيفة كبيرة شوي ( مو كتير ) بيحاولو يخلوها تشمل أغلب أبحاث الكتاب وهي عليها 4 علامات
المادة ممتعة كتير بتحتاج متابعة .. ضروري دراستها بقلب السنة وحضور محاضراتها ... يعني المتابعة مع الدكتور والانتباه التام معو بيعطو نتيجة كبيرة أنو الواحد بيطلع من المحاضرة فهمان كل شي... ( طبعاً هي الملاحظة بتطبق على كل المواد مو بس على البرمجة 2 )
هلأ محاضرات الدكتور ممتازة تمام للدراسة ، واضحة ومفهومة ، بيندرس منها بسهولة كمان الكتاب مفيد ومفهوم بس حسيت أنو النظري فيه كتير شوي أكتر من كتابة الطرق ( خوارزميات ) يعني كان كتاب البرمجة 1 أحلى منه لأنو فيه كمية نظري أقل وأكواد برامج أكتر ، بس كمان الكتاب حلو ومافي شي.... طبعاً أنو النظري كتير هذا لا يعني أنو بدو مدة دراسة كتيرة لحتى تنحفظ هالمعلومات..لأ أبداً مو هيك.... النظري فيه هو مجرد شرح ( موسع شوي ) يعني مثلاً بالملفات files and text files( بحث من أبحاث البرمجة 2 )شرحوا منيح عنها وكيفية ربط الملف بالبرنامج وكيف بيتعامل البرنامج مع الملف وهيك قصص ....
أما بالنسبة للمدة اللي لازم تتخصص للبرمجة 2 فهي شغلة شخصية ..يعني أي طالب ما بيقدر يلتزم ببرنامج دراسة طالب تاني أبداً ، هي شغلة ملكات وقدرات ، بس هي مادة بتعتمد على الفهم بدرجة 90% ... أما ال 10 % الباقيين هنن حفظ التعليمات يعني حتى مو حفظ ... شي بيجي من المران.. مثلاً تعليمات ربط الملفات ببرنامج أو فتح ملف للقراءة قبل القراءة هي اللي بتجي من المران
هلأ في بحث من الكتاب اسمو الرسم البياني فيه طلاب كان بدهن يحفظو حفظ ( حتى أنا أول ما سمعت فيه بأول محاضرة لقيت أنو الحفظ هو الطريق الوحيد لحتى حصل كم علامة منه ) بس لقيت أنو مافي مجال للحفظ هون بالمرة.... يعني إذا ما نسيت شي تعليمة من التعليمات أو شي سطر من الكود بتنسى كتابة شي كلمة أو حتى وين بدها تنكتب .... فعملية الحفظ مو فعالة بالمرة.... بالعكس ، يعني مثلاً هاد البحث نفسو في عليه بالكتاب كم مثال... لا تفكر أنو تحفظ هالكم مثال لأنو ممكن يجو نفسهن وتكون كسبت العلامة...بس كمان في احتمال أنو ما يجي نفسهن وإنما على تيهتهن ( شبيههن ) وهون بتكون خسرت علامات إذا كنت قد حفظت الكود عن ظهر قلب !!!! هلأ السؤال الذي يطرح نفسه إذا ما حفظنا شو بدنا نساوي ؟؟؟
الجواب أنو تفهم كل شغلة لشو، وكيف صارت ، ليش انكتبت ، وشو بيصير إذا ما انكتبت.... لحتى تعرف كل كلمة شو الجدوى منها وهيك ما بتعود بتنسى شي...
أسئلة الدورات مفيدين بكل المواد وخاصة بهي المادة لأنو ممكن تاخد فكرة كيف بتجي الأسئلة وشو طريقتها و تقسيم العلامات... يعني بتاخد فكرة عن ورقة الفحص قبل ما تتفاجأ بطلتها البهية يوم الامتحان...
الفائدة ( برأيي ) كتير مفيدة ... يعني بصراحة هي المادة اللي حسستني أني داخلة كلية معلوماتية... بتعتمد على المنطق والتفكير وبظن انو بتفيدنا بكرا بالبرمجة 3 وووو.....
هاد كل شي عندي ..

الجبر الخطي :

الدكتور المعطي : الدكتور عبد الله العمر (نظري + عملي) .

علامة العملي :20

نظام أسئلة النظري : فرنسي.

الوصف:(من العضو hanihh):

المادة تتلخص بكلمة المصفوفات (يعني مادة رياضيات تانية)

بندرس كل شي عن المصفوفات وكل العمليات يللي ممكن تتعلق فيها والمادة مالها كبيرة والدكتور بيجيب من أسئلتو وفيها أبحاث متقدمة بس ما أخدناها متل الفضاء الشعاعي

وعلى هوا قولة الطلاب من السنوات المتقدمة المادة مهمة بس ما بعرف بشو

دراستها حلوة وما بدها دراسة جوات السنة

بيكفيها قراءتها مرة وقت العملي ومرة وقت النظري لأنو النظري نفسو العملي

المحاضرات شغلة أساسية بالمادة والدكتور ما بيطلع عنها بأسئلتو حتى أحياناً بيجيب التمرين متل ما هو يللي بالمحاضرة

وصلات مفيدة (هون)

الأسئلة كانت صعبة نوعاً ما وغالبها إجى بيعتمد على البصم مو على الفهم يعني لازم الواحد يكون حافظ الأسئلة حتى يجيب علامة محرزة

الدارات الكهربائية والالكترونية:

الدكتور المعطي : الدكتور نوار العوا والدكتورة نداء سلمان .

العملي : عدد من المهندسات

علامة العملي :30

نظام أسئلة النظري : مؤتمتة.

الوصف (من العضو hanihh):

الدارات الكهربائية والالكترونية:

المادة كانت عنا متل الهم فتنا عليها بوهم أنو السنة الماضية كانت نسبة النجاح 0%وبلشنا فيها ونحنا خايفين منها

كانت المادة معتة جداً وطريقة التدريس سيئة للغاية والإعطاء أبداً مو منيح وبعد شي أربع محاضرات ما عدنا فهمنا شي ويئسنا من المادة وحسينا بمدى صعوبتها

بس لما حضرنا عند العميد (الدكتور الآخر للمادة)

حسينا أنو المادة ممكن تنفهم وممكن الواحد يحبها

صحي هي كانت صعبة كتر وفيها كتير شغلات صعبة بس الحمد لله إذا الواحد درسها متل العالم وعرف من وين يدرسها ممكن ينجح فيها ويجيب معدل كمان

المادة من أسمها دارات كهربائية والكترونية يعني مناخد فيها كل شي يتعلق بالكهربا

النظري هو عبارة عن معلومات مجردة مو ممكن تتخيلها وقد تكون صعبة في بعض الأحيان وتعجيزية في بعض الأحيان

والعملي كنت مفكرو أننا بدنا نشتغل على دارات حقيقية إدامنا ومكثفات ووشائع وترانزستورات بس ما طلع في شي من هاد

العملي كان كلو عبارة عن برنامج أسمو workbench هادا البرنامج بيسمحلك أنو تساوي دارات وتشوف شلون بتشتغل

الوصف (من العضو ray):

طبعاً برنامج WORKBENCH بالعملي مرة بيشتغل و 10 لأ ليش الله أعلم!!!
بصراحة المادة مو سهلة بس بدها متابعة 100% وقتها ممكن يمشي الحال فيها ، طبعاً غير المعلومات المجردة اللي بتحويها هي عبارة عن مسائل ، عن كل بحث بالكتاب في شي 4 أو 5 مسائل لهلأ ما عرفت حلون ،أحياناً إذا بتركز بدراسة المحاضرة وبتبلش تفهم بترتفع معنوياتك فرد مرة ، بتقوم بتجي شي مسألة لطيفة ظريفة بتعد أدامها شي ساعة زمان وبالاخير كأن شيئاً لم يكن وما بتنحل معك بتقوم معنوياتك بتنـــــــــــــــــــــــــــــزل ، بس أهم شي ما تيأسو مع أنو الكلام اللي انكتب عن هالمادة ما بيأس بنوب بس يمكن إذا بلشتو فيها من أول الفصل و أنتو عم تحلو وتفهموها يمشي حالكن معها ، كمان ممكن تصير من المواد المفضلة عندكن ( مع أني بستبعد هيك شي ) (((إذا حدا عندو إضافة يكتبها ولا يستحي ,يمكن استخدام زر تحرير في صفحة الويكي)))