CSC-SY

حابة نتناقش بموضوع أظن هو مهم بالنسبة لكتير من الطلاب بهالفترة

وهو موضوع الشغل والدراسة معاً
بالنسبة للطلاب اللي جربوا هالشي....
يعني هل بيقدر الواحد يدرس ويشتغل بنفس الوقت؟؟؟؟
وكم ساعة ممكن يكون الشغل وقت الدوام بالكلية؟؟؟؟

وبالنسبة لإلنا(طالبة سنة تالتة) منلحق شغل ودراسة بالسنة التالتة ومشاريع و........

بتمنى تفيدونا ......

بالنسبة إلي roro 2007

أنا صراحة جربتها بالسنة الأولى ... وفكرت أنه من الممكن أني أدرس واشتغل بنفس الوقت .. وقتها بالفصل الأول حملت مادة وحدة بس .. لكن كانت علاماتي مو جيدة .. وأهلي ما رضيوا بهالمستوى .. بقى كان فيني كمل شغل ودراسة .. بس صراحة متعبة كتير والدخل كان مو قد التعب وكان بدي بس الخبرة .. ولقيت أنه ما في داعي تعب حالي كتير ...

بس هلأ (( بعد سنتين )) لقيت أنه لازم اشتغل .. كوني شب صار عمري 20 سنة وعيب ضل آخد الخرجية من أهلي .. بس رح يكون شغلي من النوع يللي ما بيعطلني أبداً عن دراستي .. بالعكس بيقويها ويمكنها .. وبنفس الوقت ممكن اشتغلها وأنا بالكلية !

جربتها أيام السنة الرابعة متل ما تفضل Dr.Siko في تعب كتير
أنا كنت داوم 25 ساعة بالأسبوع طبعا في كتير محاضرات نظري ما احضرها
وعلاماتي في السنة الرابعة ماشي حالة بس مو متل باقي السنوات لكن الجيد إنو كان في خبرة منيحة
أنا برأي يجرب الواحد ولو فصل بالأخص إذا ما بيهمه المعدل كتير ويشوف..

بدكم تسألو أبو الخل عن هالموضوع وشوفو شو بيجاوب.

My mobile was stolen, if you gave me your number after 1/4/2008 send it to me again

شكرا Dr.siko وabo_omer لأنو فدتونا بتجربتكم

ما فينا نقارن بأبو الخل .... أبو الخل عنده ظروف خاصة ..

برأيي الخبرة العملية على أرض الواقع بمجال المعلوماتية ضرورية جداً، ويللي معو تجربة عمل سابقة حتى ولو كانت internship رح تكون أفضلية الاختيار لصالحو بالوظائف المستقبلية، لذلك ما تروحي الفرصة. كمان تجارب الزملاء بتدل على إمكانية متابعة متطلبات الدراسة الجامعية بالتوازي مع العمل من خلال تحديد الأولويات وتنظيم الوقت.
بالتوفيق إن شاء الله.

أنا جربت اشتغل وادرس بالسنة الخامسة, كنت اشتغل 25 ساعة بالأسبوع

الفائدة: كتير فوائد, أول شي بتكسبي خبرة عملية ممتازة وبتكسري حاجز الخوف من عدم إيجاد وظيفة جيدة بعد التخرج, بالإضافة لأنو رح تتوفرلك فرص عمل أكتر وأفضل من فرص العمل للأشخاص يلي ماعندهم خبرة, وأنا كتير استفدت من هالشغلة. وأهم شي إنو بيزداد عدد المعارف المهمين بمجال العمل.

الأضرار: الضغط الكبير, يعني يادوب تلحقي وظايف ودراسة وشغل, بس ثقي تماماً إنو إذا بدك بتلحقي, والسنة الثالثة سهلة نوعاً ما. أما بالسنة الرابعة بعتقد إنو كتير صعبة الدراسة مع الشغل (بالنسبة للبرمجيات أما الباقي ما بعرف)

من خلال تجربتي بعتقد أنو الواحد فيو يوفق بين الشغل والدراسة بس بدو يسن سنانو على أنو العلامات ما ح تكون عالية وأنا بعرف أنك شطورة وبدك علامات عالية

بس من الناحية التانية بقللك الدراسة ما لح تطعميكي خبز يعني الكلام النظري بيضل نظري وبميدان العمل لح تتعلمي بسرعة أكبر بكتير بالإضافة للوقوع تحت مشاكل وحلها يلي بيعطيكي للمستقبل خبرة عملية كبيرة
ومتل ما قالو الشباب مع الشغل أكيد نفسية الانسان بدها تتغير للأفضل طبعاً لأنو بيصير يحس حالو جزء فعال من المجتمع
السيئة يلي قلتها هو الضغط الكبير ويلي ممكن أحياناً يخليك تفكري تتركي الشغل هو جزء ما بينتسى طول العمر وبس تتجاوزيه حتشعري بالفخر لأنك كنت قد المسؤولية
وبالتوفيق انشالله ومعليش جربي أول فصل.....

بعتقد انو الشغل كتير ضروري وخصوصا ضمن الاختصاص
أنا صحيح شغلي ماله علاقة بالدراسة بس كتير مبسوط بالشغل مع انو الضغط كتير كبير وخصوصا وقت المشاريع والفحص
بس من نظرة ايجابية بقول اني من 6 شهور لحد الآن تحسنت علاقاتي الاجتماعية كتير ويللي بعتقد انو هي مهمة بقدر أهمية الدراسة
وبظن انو لو الشخص تخرج ومع علامات عالية هالشي ما بيأهلو ليدخل سوق العمل بدون خبرة بالتعامل مع الناس

والله اللي بيقدر على الدراسة و العمل بنفس الوقت شيئ جميل..
ليش لا..!!

عنجد شكرا كتير عالفوائد اللي حكيتوها
الحقيقة إنكم شجعتوني كتير على إني كمل شغل وقت الدوام
هلأ من قبل ماإسألكم كنت رحكمل لإني كتير الحمدلله مبسوطة بالشغل ومتل ماقلتوا الواحد بيكتسب خبرة ...
بس كنت خايفة شوي من وقت الدوام بالكلية وكمان اهلي ماكتير عميشجعوني على فكرة الشغل والدراسة لإنو من هلأ ماعاد شافوني بالبيت وماعاد في شي اسمو راحة أو وقت تسلاية إلا نادراً..
بس القرار بالنهاية إلي..
انشاءالله رحكمل..

والله يختار الخير....

عفوا إذا تعليقي قاسي بس عندي نقد للموضوع يعني إذا فينا نكون أكتر موضوعية بتعليقاتنا .... يعني بكل المواضيع الموجودة عن الشغل الردود هي من نوع "الشغل شيء جيد ..." و "لازم الواحد يجرب ... "
يعني الكل بيعرف هاد الشي ..... بدنا خبرات و أفكار و ليس تنظير .
انا بشتغل من سنة و نص 8 ساعات باليوم(على الأقل) بمجال غير مجال المعلوماتية (بس قريب منه) و تجربتي مع الشغل كالتالي :
- قويت شخصيتي و تحسن تعاملي مع الناس و تحسن وضعي المادي بس كتير زعلان إنو الشغل بغير مجال دراستي .
- علاماتي بالكلية تحسنت لأنو قلة الوقت خلتني حس بقيمته فصرت أستغله بشكل أفضل .
- أهم شيء خسرته هو التعلم الذاتي خارج الكلية -يعني من وقت ما اشتغلت نزلت ساعات البرمجة بالبيت بنسبة 80% - .
- و تحذير هام هو إنو جو العمل كتير مختلف عن الدراسة و هو أشبه بالإدمان (خصوصي إذا نجحتي فيه ) و تركه أصعب مما كنت أتخيل (ممكن يسبب إكتئاب و إحساس بعدم الفائدة ).
- و أخيرا يمكن إذا رجعت بالزمن سنة و نص كنت رح أختار إني أشتغل ...بس يمكن كنت دورت على شغل بمجال دراستي .
و عندي سؤال للبيشتغلو بشركات بمجال المعلوماتية هل هناك شركات محترمة بمجال المعلوماتية تقبل الطلاب غير المتخرجين بدون خبرة برواتب معقولة (يعني بدون ما نتصب عليهن ) لأني كتيير حابب غير مجال شغلي .

على كل حال بظن الصعوبة بالنسبة للطالب هي بالحصول على شغل بالمجال الي بدو ياه, بس متى ماحصل عالشغل رح يتم تقييمه على حسب مستوى شغله مو على حسب الشهادة الي معه.

انا لساتني من الأغرار بس بحب قول انو الأحسن انو يكمل الواحد دراسات عليا بعدين يكمل شغل من بعرف