CSC-SY

مقدّمة

صرلي فترة عم حاول دوّر على وسيلة إتّصال بالإنترنت تكفي حاجات الجامعة الإفتراضيّة, بإعتبار إنّي سجّلت على عدد من المواد لهادا الفصل و ناوي إن شاء الله احضر الدروس و ادرسهم.

الـdial-up ما بيأدّي الغرض على الإطلاق, لإنو إذا كان المدرّس عم يكتب كتير أو عم يفتح شغلات على سطح الكتب (برنامج الدروس تبع الإفتراضيّة بيعتمد على نقل صورة شاشة المدرّس + الصوت من الميكروفون) فرح يبطأ الخط كتير و تعامل البرنامج كتير سيء مع هيك وضع, لإنو بيضل ينقل بشكل تسلسلي و ما بيقطش شي, لدرجة إنو ممكن الواحد يدخل سؤال و يكتشف إنو المدرس مشي عن الموضوع من زمان, يعني الواحد عم يسمع الحكي اللي انحكى من خمس دقايق, و مو عرفان شو عم يصير هلّا.

اللي ما عندن ADSL و بدن يحضروا معناها مجبرين على مقاهي الإنترنت أو مراكز النفاذ, و الإثنين إلهم مشاكل. مقاهي الإنترنت مو شرط يكون فيها كل البرامج المطلوبة (جافا, فلاش, shockwave) و ممكن تكون زحمة أو جوها غير ملائم (و أنا بحبو موت لجورج وسّوف!). مراكز النفاذ دائما زحمة خصوصا المركز الأساسي, و شاشاتها 15" عم تشتغل على 1024ْْx768و معدّل الإنعاش 60 هرتز مو ممكن تغيير لا هي و لا هي. لهادا كتير متعبة للعيون. عموما الخيارين بدهن نزلة و الفكرة من التعليم الإفتراضي إنو الواحد يقعد معزز مكرّم ببيته و يجيه الدرس لعنده, مو يروح يتشنطط مشان يحضره.

ما الحل؟

لهادا اضطرّيت ابحث عن حل. الـADSL بطبيعة الحال رابع المستحيلات و خارج الصورة من الأصل. الـwireless مو موجود و ممكن ما ينوجد أصلا. الإنترنت الفضائي, صحيح إنو سريع كتير بالتحميل, بس الـlatency تبعه كتير فظيعة و ما رح يأدّي الغرض. ما بقي عنا هيك غير الـISDN.

بالنسبة للإشتراك بالـISDN فهو مو صعب كتير, أو على الأقل مو بصعوبة الـADSL. رسوم تغيير الخط 220 ليرة مقدور عليها, بس بشرط يكون في إمكانيّة بالمقسم و هي موجودة بعدد منيح على ما يبدو. كان بدّي أوّل شي ركّب خط جديد للـISDN بس للأسف ما في خطوط (إيمتى بصير في؟ تعا لعنّا بعد العيد), لهيك انجبرت على تغيير الخط الأرضي و تغير الرقم إجباري. صحيح إنو كتير ناس بيعرفوا هادا الرقم, و تغييره رح يساوي مشاكل, بس المضطر....

مودم الـISDN

المودم الخاص بالـISDN كتير غالي. أرخص واحد موجود عنّا بالسوق حاليّا سعرة 7200. بالمقارنة مودمات الـADSL كتير رخاص. طبعا هي مو مودمات بالمعنى الحرفي للكلمة, لإنو الـISDN و الـADSL خطوط رقمية, بس هادا الإسم المعروف عنّا.

كان ببالي أوّل شي ابحث عن مودم متوافق مع لينوكس, لإنو هو النظام اللي بستخدمه أغلب الوقت و كنت متوقّع إنو يكون هادا صعب, بس الظاهر إنو عدد منيح من مودمات الـISDN فيها دعم للينوكس. السبب إنها مو مودمات من الأصل, بس من كتر إستخدام كلمة مودم بيغيب هادا الشي عن ذهن الواحد. الموديل الشائع(أبو الـ7200) بيشتغل على لينوكس من دون أي مشاكل, على ذمّة كتيّب التعليمات و عدد من مواقع الإنترنت. فآخر شي اشتريت أبو الـ7200. هادا الجهاز موديل Unik-22 و هادا موقعه على الإنترنت. صحيح إنّو بيجي بعلبة كرتون بيضا بدون كتيّب تعليمات (هادا بيجي pdf على الـسي دي) و مو مبيّن كتير راكز, بس شكله منيح بعد التجربة. ممكن وصله للجهاز عن طريق كبل USB و ما في ضرورة وقتها لوصل فيش الكهرباء, أو عن طريق كبل Serial و وقتها لازم وصله على الكهرباء. بيجي معو تفريعتين رقمي لوصل طرفيّات ISDN تانية, و تفريعتين تمائلي لوصل تليفونيين عاديين أو شي متل هيك. التعريف على ويندوز كان كتير بسيط.

الإتّصال

خطوط الـISDN ممكن تتصل على سرعتين, 64K و 128K. الـ64K تكلفتها نفس تكلفة الإتصال العادي. يعني إشتراك شهري بـ500 ليرة من آية, أو ساعات. الـ128 أغلى, سعر ساعته على الـscs-net هو 48 ليرة, و الإشتراك الشهري على آية 2500. لهادا الـ64 هو الخيار الأحسن. صحيح إنو الـISDN الـ64K نفس سعر المودم العادي, بس في عدد من الفروق بتخلّيه أفضل. أوّلا تأسيس الإتصال بيتم بسرعة كبيرة, أقل من ثانية. هادا بيسمح إذا كان في ضغط على الخط بإعادة الإتصال بشكل آلي عدد كبير من المرّات إلى أن يعلّق. ثانيا, السرعة الفعليّة هي 64 كيلوبت في الثانية, بينما الـDial-up سرعتة الإسمية 56 و الفعليّة أقل, و بتتراوح مع كل إتّصال, بس غالبا مو أكتر من 46. ثالثا, و هو الأهم, الـlatency (التلبُّث) أقل من الـDial-up بكتير. الـlatency هي المعيار الأهم بالنسبة للشغلات التفاعليّة, مثل الدروس. بشكل عام, صحيح إنّو التكلفة الأوليّة عالية بس هادا الخيار الوحيد المتوفّر للمضطرّين.

____

ملاحظة: مركز إيبلا بيعطوا كفالة سنة على الـUnik-22, بينما أغلب المحلّات التانية بتعطي كفالة ست أشهر, لهادا الشراء من عندهم أحسن.