|
اسمحولي عبرعن مشاعري اتجاه هاد اليوم يلي حسيت فيه إنو جامعتنا بعيدة شوي عن النظام و الدكاترة مفكرينا فايتين على شي برنامج مسابقات مو على فحص......... يتبدا القصة كالعادة الحملة لشي مادة بقدمو فحصن بالقاعات ورحنا عالقاعات طبعا كانت القاعة الأولى ملانة فرحنا عالتانية أنا وشي سبع بنات مضى عالوقت دقيقتين ولا حياة لمن تنادي ..مر خمس دقايق وما صار شي و كل طالب آعد على طاولتو وبينتظر فرج الله فقلت لحالي يا بنت روحي إسألي ما بتخسري شي فحملت حالي وسألت وإذ بتقلي تبع الإمتحانات وهي عمتصرخ "ييييييييييه إنتو بلش فحصكن بالهنغار "(يعني حبو يغيرو شي ) وبتروح بتبهدل وبتخانق الطلاب وكأنو الحق عليهن المهم يلي بالقاعة الأولى تكرموا عليهن وخلوهن أما نحن المساكين فما لقينا حالنا غير عمنهرول ورا الآنسة داليا لضبنا بشي مدرج نقدم فيه هالفحص و هي تسكر باب وتفتح باب وتوزع هالبنات وبقيت حضرتي وبنت تانية عالتصافي وحطونا بالمدرج الأول يلي عمقدمو فيه النظامي وطبعا شافونا المراقبين متوترين فما كان منهن غير البسمة الحنونة والكلمة الحلوة  وبكل ذوق بيسأل المراقب "شو وين كنتو؟؟؟؟؟؟؟" وبكل لطف بجاوبو "عمندور عالفحص يا إستاذ!!!!!!" وسلموني هالورقة وطبعا ما بديت لبعد خمس دقايق لحتى هديت شوي وبعد بسم الله كان السؤال عن المصفوفة المربعة بديت حل والحمد لله كلو روعة وعمرتب وأنا مستمتعة بس حبيت بعد ساعة تقريبا إقلب الورقة إطلع عالسؤال التاني وإذ بلاقي ملاحظة أد النملة بخط قياسو 8بتقول إنو ما في استخدام مصفوفات ثنائية يعني هي مربعة بس بمصفوفة أحادية ,قلت لحالي عميمزحو أكيد أنا ما الي فهمانة عيد وإقرا آم طلعت القصة جد, طبعا بعد هالفرحة الكبيرة  حاولت إبدا من الأول إهدم وإبني أفكار جديدة (وهاد أصعب شي) بس كانت المحاولة شبه فاشلة ويلي شجعني لعدم محاولتي مرة تالتة الدورة الماضية يلي كنت حالة فيها بنسبة 75% من الأسئلة صح آم اندهشت ب57 .............. فقلت لحالي انتقلي عالسؤال التاني لعل وعسى يعني .......وإذ بسمع صوت مراقبة عمتقول بقيان خمس دقايق .... فطبعا اعتبرت الكلام مو لإلي لأنو وعدونا بوقت إضافي........ بس نسينت إني عمقدم مع النظامي ومع النظامي إضافي مافي........... وهيك بكون خلصت بس بتمنى بقا يحسبولنا حساب بهل الكلية لأني رح صير شك إذا منتسبين لجامعة دمشق وبتمنى من الدكاترة يبطلوا مقالب مالها لزوم وماحدا يقلي الحق علي لأني ما كملت قراية السؤال لأنو من الصفحة الأولى ببين السؤال منتهي ومالو كمالة بحيث طلبوا استدعاء الإجرائيات ....... والحمد لله على كل حال
لو كان للعِلمِ من غَيرِِ التّقى شرفٌ لكان أشرف خلق الله إبليسُ
|
أرسل من قبل 
) (فضايل قل هو الله أحد )
