CSC - SY

الظاهر ما حدا عجبتو الفكرة؟!!!

مكرر

بغض النظر إن كان مكرر أم لا ...
الفكرة جميلة واتمنى الاستمرار بها
شكراً لك BEN ADAM

طيب لحتى يجي الأخ فؤاد , ممكن نبدأ لقاءنا االافتراضي الأول مع الأخ العزيز mpcabd مشرفنا الغالي.
معك المايكروفون mpcabd , فيك تجاوب عالأسئلة.

اسم العضو الحقيقي .(ليس من الضروري ذكره)
عبد الله دياب.
2-مكان الاقامة الحالي.(ليس من الضروري ذكره)
مشروع دمر
2-الدراسة الحالية .
سنة ثانية هندسة معلوماتية.
3-لمحة موجزة عن بداياتك مع الكمبيوتر.
بدأت مسيرتي مع الكمبيوتر من سنة 1996 لما بابا جاب أول كمبيوتر, والصراحة أني ذاكرتي ضعيفة كتير عن الماضي لذلك ما بذكر مواصفاتو بس بذكر أنو كنا ننزل Windows 3.11 من على 11 قرص Floppy Disk.
ضليت من 1996 حتى 1999 بس ألعب, وبعدين انبهرت وقت شفت أبي عمبيستعمل VBA بالـ Excel وكان وقتها عمبيساوي برنامج لتنظيم عقود وزارة الكهرباء, وكان برنامجو بيعبي فراغات العقد لحالو وبيكتب المبالغ النهائية على شكل مفقط, كذا ليرة سورية فقط لا غير, وقتها حبيت أني بلش البرمجة وفتت على عالم المعلوماتية من هونيك, واتطورت من VBA لـ Viual Basic 2005 وبعدين لـ C#.
4-الخبرات التي يتمتع بها(بما فيها من شهادت يحملها..).
برمجة باستخدام اللغات: Viual Basic 2005, #C وأكيد العزيزة Pascal والمقرفة ++C.
تصميم مواقع إنترنت باستخدام ASP .NET مع SQL Server و MySQL.
5-المجال الذي تجد نفسك فيه(من مجالات المعلوماتية).
ما بعرف بس بحس حالي منتمي لهندسة البرمجيات والذكاء الصنعي سوا, وان شاء الله من هلأ لصير سنة رابعة بيكونو دمجو التنين سوا, وإلا رح أضطر أختار أحدهما وعالأكتر هندسة برمجيات.
6-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).
أنا مالي بموقع يسمحلي أني أعطي نصايح, لكن نصيحتي يلي حابب قولها أنو لا تقولو في شي صعب, لأنو كل شي سهل أمام إرادة الشخص وإرادة الله, كل شيء ممكن ولا شيء مستحيل.
7-طرفة حصلت معك خلال مسيرتك المعلوماتيه.
أحلى طرفة هي تسجيلي بالكلية والخنايق يلي ساويتها والحروب يلي نشبت بيني وبين أهلي وبعدين ما عملت غير يلي بدي ياه وفتت لهون.
________________________________________________________
يلي بعدي foaad

من بعد إذن الأستاذ فؤاد أنا حابة رد قبله :

- اسم العضو الحقيقي .(ليس من الضروري ذكره)
هبة ...

-مكان الاقامة الحالي.(ليس من الضروري ذكره)
.......

-الدراسة الحالية .
سنة ثانية هندسة معلوماتية.

-لمحة موجزة عن بداياتك مع الكمبيوتر
أنا أبدا مو متل العضو اللي جاوب قبلي
بتذكر إنو جبنا كمبيوتر سنة 1999 وحبيته كتير .. وصرت بس إلعب فيه لعبة frogger 2 ليلا نهارا .. بعدين تعرفت عال office وهيك .. وحسيت إنو مجال دراستي لازم يكون شي بيتعلق بهالجهاز .. وفعلا الحمد الله هيك صار ...

-الخبرات التي يتمتع بها(بما فيها من شهادت يحملها..).
corel draw
photoshop
باسكال
c++
بس آخر تنين مو شهادات ..

-المجال الذي تجد نفسك فيه(من مجالات المعلوماتية).
هندسة البرمجيات .. لأني بلاقي حالي أكتر شي بالبرمجة .. وبحبها وبحب الخوارزميات ..

-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).
أنا اللي بدي نصائح .. مو أنصح ...
بس خبرة السنة اللي معي ياها حاليا .. بتحليني قول لطلاب الأولى فقط إنو ما كتير يحملو السلم بالعرض .. يعني الكلية بدها برادة أعصاب شوي .. وإلا منتعب فيها كتير .. يعني ما عم قول لا تدرسو .. ما حدا يفهمني هيك .. بس أبدا مو العلامة اللي بتتوقعوها بتجيبوها

-طرفة حصلت معك خلال مسيرتك المعلوماتيه.
موقف ما بنساه
مرة لما كنت بالسنة الأولى .. وكان عندي تاني يوم تسليم تقرير البرمجة .. ( التقرير الأول ) وأنا ما كنت إحضر برمجة متل العالم وما بعرف شي عنها تقريبا .. ومدري كيف بهاليوم .. قررنا أنا ورفيقتي lotus.11 إنو نشتغل هلأ بالتقرير والساعة كانت 4 العصر وقعدنا بهالقاعة وبلشنا نكتب كود باسكال .. وبلشت أخطاء الكومبايلر .. وأول خطأ هوو كان عند ال if وما فهمنا شو عم يصير .. والساعة صارت خمسة .. وماعاد نلحق .. إمت فجأة تذكرت معلومة مدري منين إنو ال if بدها begin ... end مدري إيمتى .. وما عاد تذكرنا .. آمت اقترحت رفيقتي إنو نسأل طالبين كانو معنا بالقاعة .. عم يشتغلو عالجهاز .. وأنا ما قصرت وسألتهم : إيمتى ال if بدها begin ... end
ولحالكم تصورو الموقف اللي انحطيت فيه لأنو هالطالبين طلعو سنة خامسة وأنا هيك عم إسألهم .. يعني في واحد منهم .. حسيت اللي صار فيه كأنو أحلى نكتـــــــــــة بيسمعها بحيــــــــــــاته
وأنا كنت بموقف جـــــــــدا محرج
طبعا ما بلومهم أبدا لأنكم بتعرفو أديش هالسؤال سخيـــــــــف
ودريت بعدين إنو الدكاترة عملي ونظري كانو كل محاضرة يكررو إنو :
if بدها begin ... end لما بكون فيها أكتر من تعليمة .. ويمكن بسبب هالموقف ماعاد أنسى هالمعلومة بحيـــــــــاتي :)

تفضل أستاذ فؤاد

Cool idea go on

شو عم يتدلل علينا فؤاد ؟؟؟

كتب en.karam1989:

شو عم يتدلل علينا فؤاد ؟؟؟

أخي مدير وبدو يتأخر منشان الروزة ..

بس مو شايفين انو الأسئلة شخصية شوي؟
أنا بظن انو على مدى السنتين ونص الماضيين من خلال مشاركاتي بالموقع جاوبت على كل الأسئلة السابقة, يعني لما تعرف شخص لفترة طويلة بتصير بتعرف عنو معلومات كتير بدون ماتسأله بشكل مباشر.

على كل حال, مشان ماتعرفوا تفكروا اني مأنزع وشايف حالي رح جاوب

1-اسم العضو الحقيقي.
فؤاد.
2-مكان الاقامة الحالي.
بالبيت. (و أحياناً بالشغل )
2-الدراسة الحالية.
هندسة معلوماتية - سنة رابعة (إعادة)
3-لمحة موجزة عن بداياتك مع الكمبيوتر.
سنة 1989 كان عنا ZX Spectrum+ بتذكر وقتها تعلمت كيف اطبع اسمي عالشاشة, بس طبعاً استخدامي الأساسي للكمبيوتر كان (ومازال ) للألعاب,
أما بالنسبة للـPC فمو من زمان (تقريباً بالـ1999) وكانت مواصفاته وقتها (معالج 133MHz وذواكر 16MB و هارد 1.6GB) أقل من مواصفات أي Pocket-PC حالياً
بالنسبة للبرمجة كنت حبها من أيام الـZX Spectrum+ يعني أول لغة برمجة تعلمتها (قصدي تعلمت تعليمة أو تنتين فيها) كانت BASIC يلي كانت تجي مع الجهاز, وبعدين تعلمت Pascal بالمعهد1 وضليت استخدمها فترة منيحة (من خلال Delphi)

4-الخبرات التي يتمتع بها(بما فيها من شهادت يحملها..).
صرلي حوالي أربع سنين بشتغل مبرمج بشركة الحضارة للأنظمة, بشتغل بشكل رئيسي على VB.NET وSQL Server.
بالنسبة للشهادات ماكتير بحب الشهادات التجارية (Microsoft, Oracle وغيرها)
بس معي شهادة [1]المعهد المتوسط لهندسة الكمبيوتر (قبل الكلية درست بالمعهد وبعدين كملت بالسنة التانية بالكلية وقبل المعهد درست سنة هندسة ميكانيك, اي ميكانيك )
5-المجال الذي تجد نفسك فيه(من مجالات المعلوماتية).
البرمجة و UI Design
شخصياً بحب اكتب كود أكتر بكتير من رسم مخططات UML وماشابه وبحسه أحياناً أوضح وأسهل من اللغات الطبيعية يعني ببعض الأحيان بلاقي الكود أوضح من التوثيق (Documentation) المرتبط بهالكود!
وأكره عليي انو شوف برنامج بواجهات قبيحة. متل Rational Rose مثلاً (يعني برنامج موجه لمهندسي البرمجيات بهالقباحة فعلاً مصيبة - يعني متل واحد عم يستشير دكتور بدخن ووزنه شي ميتين كيلو )
6-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).
التجريب.
لازم تجربوا (عالقليلة بمعدل ساعة باليوم) شغلات جديدة (بالبرمجة أو بالبرامج أو... بحسب الاختصاص الي حابين تكملوا فيه)
أو اذا ماكان في مجال لازم تقروا أو تتعلموا عن شي جديد (كمان عالقليلة بمعدل ساعة باليوم).
7-طرفة حصلت معك خلال مسيرتك المعلوماتيه.
طرفة, طرفة, طرفة...
يعني لوكان السؤال عن مصيبة أو بلوة كان أسهل
طيب.
في مرة كنت عم اكتب اجرائية بـ SQL Server 2000 وكانت نتيجة التنفيذ غريبة ومو متل مايفترض الكود يشتغل, وبعد ساعات من التجارب طلع معي انو في comment (تعليق) اذا بحذفه بتشتغل الاجرائية واذا برجعه مابتشتغل! طبعاً أول شي ماصدقت حالي وعدت الشغلة شي عشر مرات! وجبت زميلي وورجيته الحالة الغريبة. وطلعت مزبوطة. بعدين اكتشفت انو بجوز تكون هي bug بـ SQL Server
ومن وقتها ماعاد حبيت الـ comments

ماشالله عليكون ماكنت بعرف كل هالشي عنكون هبة وعبد..

الله يعطيكم العافية جميعا...
بس الأخ فؤاد ما حددت مع مين رح يكون اللقاء التالي
يا ريت نترك الاختيار للأخ فؤاد حصراً .

كتب BEN ADAM:

الله يعطيكم العافية جميعا...
بس الأخ فؤاد ما حددت مع مين رح يكون اللقاء التالي
يا ريت نترك الاختيار للأخ فؤاد حصراً .

إي والله فكرة حلوة كتير
كل عضو بيكتب عن حالو و بيحط العضو التالي
بس بحيث يكون من الأعضاء المعروفين اللي بيدخلوا كتير عالمنتدى

كتب foaad:

كتب BEN ADAM:

يا ريت نترك الاختيار للأخ فؤاد حصراً .

ليش؟!
أنا مابدي احرج حدا بطلب الاجابة عالأسئلة, بلكي مابدو يحكي
على كل حال يلي حابب يحكي يتفضل, يعني انا بختار العضو *

لانو هيك قواعد اللقاء

بسم الله الرحمن الرحيم
1-اسم العضو الحقيقي.
المعتصم بالله.
2-مكان الاقامة الحالي.
درعا.
3-الدراسة الحالية.
تكنولوجيا معلومات(BIT) بالجامعة الافتراضية السورية -سنة رابعة (على أبواب التخرج ان شاء الله).
4-لمحة موجزة عن بداياتك مع الكمبيوتر.
بصراحة بداياتي مع الكمبيوتر مو بعيدة (ما صاري زمان)
بدأ اهتمامي بالكمبيوتر فعليا مع دخولي للمعهد المتوسط لهندسة الكمبيوتر سنة 2003 , وخلال هالفترة كونت فكرة جيدة عن بعض لغات البرمجة مثل

(pascal,C++,Delphi,HTML...) وبلشت اهتم أكثر شي بالبرامج (يعني بذكر ما كنت خلي CD برامج نزل جديد بالسوق الا اشتري..).
5-الخبرات التي يتمتع بها(بما فيها من شهادت يحملها..).
بالنسبة للغات البرمجة فبعتبر نفسي حاليا غير متقن اتقان كامل لأي لغة برمجة , ولكن من حيث الاهتمام بحب Java Script,SQL .
وعندي اهتمام ببعض برامج الـGraphics و الـ Animation :
Adobe Photoshop CS - Macromedia Flash MX (حاليا ما عم اشتغل عليهم كثير) بس أيام المعهد بذكر ما كان يمر يوم الا ما كون صممتلي شي جديد .
وبالنسبة للشهادات ,معي شهادة مساعد مجاز في هندسة الكمبيوتر ( اتخرجت سنة 2004 ودرست بعدها هندسة نظم حاسوب بجامعة المامون الخاصة لمدة سنة ونص تقريبا وتركتها وسجلت بعدها بالجامعة الافتراضية السورية ).
-المجال الذي تجد نفسك فيه(من مجالات المعلوماتية).
بصراحة ميولي أكثر شي نحو التصميم (GUI) بالبرامج وغيرها. وبحب كثير الأمور المتعلقة بالـ Security .
6-نصيحتك التي تقدمها لزملائك من المهتمين بمجال المعلوماتية(خصوصا أعضاء الموقع).
نصيحتي هي التوكل على الله و البحث ثم البحث ثم البحث , يعني ما لازم نفكر انو كل شي لازم يجينا جاهز , لازم نشتغل ونتعب عحالنا , خصوصا انو الانترنت حاليا عم يوفر علينا كثير وقت وتعب بالحصول عالمعلومات.
7-طرفة حصلت معك خلال مسيرتك المعلوماتيه.
هي مو طرفة بس كثير كانت عم تصير معي..
كثير أوقات بكون أشتغل عالكمبيوتر وفجأة بنقر على شي شغلة بالماوس (مرة بذكر كنت بدي شغل برنامج) بيقوم بيطفي الكمبيوتر ,, فأنا انصدمت وقتها ...فكرت شي فيروس..
بالاخير اكتشفت انو انقطعت الكهربا

يللي بعدي أخي الغالي ahnaqsh

I am In And Waiting My Turn

i hope i can get my turn too

شايف وصل البل لدقننا 8O

على كل هي إجاباتي عن الأسئلة, و الموضوع ظريف و إن شاء اللّه يعمل تآخي و شفافيّة أكثر بالموقع.

1. اسم العضو الحقيقي .(ليس من الضروري ذكره)
   أحمد

2. مكان الاقامة الحالي.(ليس من الضروري ذكره)
   دمشق

3. الدراسة الحالية
   الجامعة الإفتراضيّة, برنامج هندسة النظم المعلوماتيّة, السنة الأولى
   المعهد العالي للترجمة و الترجمة الفوريّة, إختصاص ترجمة إلكترونيّة و سمعبصريّة, السنة الأولى

4. لمحة موجزة عن بداياتك مع الكمبيوتر
   أوّل شي وقت كنت صف عاشر عملت أوّل دورة كمبيوتر بمركز للكمبيوتر قريب من بيتي. بعد هي الدورة كنت أستأجر ساعات عند مركز تاني, و بتذكّّر إنو اتفق أبي معه على ساعة و نص باليوم لمدّة شهر بمبلغ إجمالي 1350 ليرة.

   المرحلة التانية إجت وقت جبنا كمبيوتر (كنت صف أوّل جامعة(أدب إنجليزي)) و انفلتت على الألعاب فلتة وحدة, و صرت ألعب باليوم على الأقل 4 أو 5 ساعات و أحيانا كل اليوم إذا عطلة, و ضل الوضع هيك للسنة التالتة. بهي الفترة ضليت مهتم بالهاردوير متل بفترة البحث عن جهاز و كنت اقرا مجلّات PC Magazine و مقالات DansData.

   بالمرحلة التالتة تغيّرت اهتماماتي. بصيفيّة اللي قبل السنة الرابعة جبت لينوكس و كنت بقعد 10 ساعات كل يوم على الكمبيوتر و بقرا عن البرمجة و لينوكس و الهكر كمان, بس ما استفدت إلا معرفة سطحيّة, لإنو كنت اقرا بس أوّل فصل و أحيانا بس المقدمة من كل كتاب.

   بعد السنة الرابعة شفت إني بحب هادا الفرع أكتر من الأدب الإنجليزي, و سمعت عن الجامعة الإفتراضيّة و سجّلت فيها. المشوار لسّا طويل طويل بس الحمد للّه الطريق كتير حلو. :ismile:

5. الخبرات التي يتمتع بها(بما فيها من شهادت يحملها..)
   في شهادة الأدب الإنجليزي, و إن شاء اللّه بس خلّص الجامعة الإفتراضيّة بصير عندي إنجليزي و كمبيوتر و بشتغل بشركة.

6. المجال الذي تجد نفسك فيه(من مجالات المعلوماتية)
   ما بعرف لسّا...

7. نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع)
   من تجربتي المريرة, بنصحهم يبعدو عن الألعاب لأنها تضييع وقت, و في كتير شغلات حلوة أكتر بس كمان مفيدة على عكس الألعاب. كمان الألعاب و القعدات الطويلة على الكمبيوتر بتضعف النظر كتير, و ما رح ينتبه الواحد على هادا الشي إلا لما يكون سبق السيف العذل. لازم الواحد يقعد نص ساعة أو ساعة و يرتاح نصف المدّة بعدين, أو يطبع على الورق و يقرا.

   أيضا لازم الواحد يفكّر و يدرس الموضوع قبل ما يعمل أي شي و هيك بيستفيد و بيوفر على حالو التعب و الخسارة و البهدلة. عندي كتير أمثلة (للأسف) على هي النقطة,بس نخلّيها لفرصة قادمة.

8. طرفة حصلت معك خلال مسيرتك المعلوماتية
   متذكّر كتير بلاوي صارت معي (شر البلية ما يضحك) بس ما متذكّر ولا طرفة...
   إذا خطر ببالي بضيفها

في كتير من أصدقائنا و زملائنا حابب سلمهن المايكروفون بعدي كدلالة إنو حابب إتعرّف عليهم أكتر و استفيد من تجاربهم, بس طبعا الأبدى حاليّا هو صديقي القديم و مديرنا الهمام همام.

ولي .. وصل البل لدقني
مع انو انا مو من أنصار هيك مواضيع وبتصور احد فوائد المنتديات هي الـ anonymity بس مع هيك ما في مشكلة
امنحوني شوية وقت لاكتب الاجابة .. يلي بيحب يضيف شي قبلي ما في مانع

Your Turn

كتب BEN ADAM:

كتب ridaa78:

كتب eng.samar:

I am In And Waiting My Turn

Your Turn

عفوا!!
بس هاد انتهاك لقواعد اللقاء
بس ما دام الأخ همام ترك الفرصة مفتوحة لأي واحد حاب يجاوب عالاسئلة , لحتى يحضر إجاباتو , فما في مانع يكون اللقاء التالي مع
eng.samar
بس يا ريت بعد eng.samar نترك المجال للأخ همام.

ياريت عدم الالحاح ع همام
قال بس يفضى بيكتب

دورك eng.samar

Give Me Some Time To Be Ready

Tomorrow InSha'a Allh

1-اسم العضو الحقيقي .(ليس من الضروري ذكره)

همام
2-مكان الاقامة الحالي.(ليس من الضروري ذكره)

دمشق
2-الدراسة الحالية .

ماجستير في هندسة المعلوماتية .. اختصاص شبكات ونظم تشغيل . سنة اولى دبلوم -يعني اعادة بعد ما حملت مادة ! -

3-لمحة موجزة عن بداياتك مع الكمبيوتر.

بزمناتي كنت بمدرسة بصف السادس بسنة ال 94 على ما أذكر وفرجونا وعلمونا على برنامج عربي مساوى على كمبيوتر صخر. البرنامج كان عبارة عن سلحفاة بترسم متل ما بتعطيها تعليمات: مثلا بتقلها "رق" معناها رفع قلم و "نق" معناها نزل قلم ومدري شو بيمشي لقدام ووو..كان وقتها بدهم يبيعونا البرنامج على فلوبي ب 1000 ليرة بس منيح ما كان عندي كمبيوتر.

بعد سنة ونص دخلت دورة ويندوز بمركز الحضارة وبعد سنتين جبنا الكمبيوتر ووقتها كان عندي فحوصات التاسع . الجهاز يلي جبناه كان خارق بزمانه -معالج 166 وذواكر 32 مع هارد ضخم 3 غيغا- وجبنا معو سيديات ألعاب فيفا 98 و NBA98 ولعبة سيارات لهلا بشوفها أحلى لعبة سيارات عالكمبيوتر كان اسمه International Rally Championship ووقتها علقت بالألعاب

وقت دخلت الانترنت عالبلد كانت شي متل السحر .. ووقت دخلت الكلية كان أكتر اهتماماتي هي كسر البروكسي لأنو وقتها كان كل شي محجوب .. ويمكن هالشي يلي خلاني اختار قسم الشبكات حتى من بداياتي بالكلية

4-الخبرات التي يتمتع بها(بما فيها من شهادت يحملها..).

ما في هالخبرات الكبيرة ... اشتغلت بويندوز دومين فترة منيحة وبالبرمجة فترة منيحة وبتطبيقات ال VoIP فترة منيحة كتير. وكانت نقطة التحول وقت بلشت مع رفقاي ببناء مزود انترنت سوا فهالشي عطاني خبرة كبيرة باللينكس ويمعظم الخدمات يلي بتتقدم على الشبكة مع قواعد البيانات وكل أجزاء الشبكات والتجهيزات يلي تستخدم.. وكان استخدامنا الكبير للبرامج مفتوحة المصدر ساعدنا كتير بهالقصة

حالياً معي شهادتين : LPIC-1 و LPIC-2 وكنت عم فكر قدم على شهادات MCSE بس بسبب الطلب بالخليج مع انو بعتبر انو عيب على طالب معلوماتية يقدم عليهم .. هنن أبسط من انو يضيع الواحد وقت عليهم.. وكمان باكل أتلة من جماعة الأوبن سورس -بسبب تعصبهم الشديد ضد مايكروسوفت -

بالنسبة للبرمجة ببرمج شوي بالجافا وكنت طقطق شوي بال php وحالياً عم نشتغل شوية perl scripting

5-المجال الذي تجد نفسك فيه(من مجالات المعلوماتية).

كل شي الو علاقة بالشبكات وبنظام التشغيل لينكس + سيكيوريتي الشبكات

6-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).

الكلية ما بتعلمك شي .. بس بتعطيك طرف الخيط , وانتوا لازم تكملوا وتشتغلوا لحالكم .... لا تستنوا شي من الكلية غير التفكير المنهجي , اما الشي العملي فعليكم

7-طرفة حصلت معك خلال مسيرتك المعلوماتيه.

حاليا مو متذكر شي غير الاعلانات يلي متل : "يعتذر الدكتور عن محاضرة السبت الماضي".

ما شالله

اسم العضو الحقيقي
سمر

الدراسة الحالية
هندسة معلوماتية سنة رابعة هندسة برمجيات
لمحة موجزة عن بداياتك مع الكمبيوتر
أول جهاز كمبيوتر كان سنة 2001 كان فيني سمي VCD
يعني علاقتي مع الكمبيوتر الحقيقية بلشت من السنة الأولى.
.حتى بالمدرسة كنت أهرب من حصة المعلوماتية

الخبرات التي يتمتع بها
شهادات مافي
java و C++ المفروض صير خبييرة فيها بعد مشروع الـــ Compiler
OpenGL خبرة متوسطة
SQL Server
Asp.net

المجال الذي تجد نفسك فيه
Web-based Application
أنا هلأ حاليا بأول الطريق بس إن شاء الله بدي كمل فيه.

نلصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع)
لطلاب السنة الأِولى والتانية: إذا على بالكم تتعلموا شي شغلة (لغة مثلا) بلشوا مباشرة ولا تنتظروا الجامعة

وللكل بشكل عام متابعة الأخبار التقنية:
www.artechnews.com
http://itwadi.com/
http://www.aitnews.com/index.php
http://news.bbc.co.uk/2/hi/technology/default.stm
http://www.cnet.com/

طرفة حصلت معك خلال مسيرتك المعلوماتيه
أكتر طرفة مابناساها كانت لما كنت عم أجمع وراق الجامعة من شان تسجيل سنة أولى...
بصراحة أنا أول وحدة من العائلة بفوت على الجامعة فما كان عندي معرفة بالنشاطات يلي ممكن تصير بالجامعة
المهم لما نزلت على الجامعة رحت نقلت من ورقة معلقة على الحيط الوراق المطلوبة من شان التسجيل من بين المتطلبات كان في ورقة بدنا نجيبها من مكتب التدريب العسكري..ماانتبهت إنها بس للذكور فقط لذلك سجلتها ضمن الوراق المطلوبة "هو المفروض إستغرب لما شوفه الورقة بس فكرت أنو في تدريب عسكري للبنات كمان
المهم...رحت طرقت مشوار على قرنة كلها عساكر وجيش..أنا والوالدة...من شان جيب الورقة المطلوبة وكل الناس هنيك صارت تستغرب من وجودنا بهيك مكان..والأحلى من هيك أنو ماحدا نبهنا من هنيك أنو الورقة بس للذكور ويبعتونا من مكتب لمكتب ...هيك لحتى بعتونا على مكتب كلية العلوم...وبس لوصلت لهنيك فهمت الطبخة بعد فقعت الموظفة ضحك علي لما طلبت الورقة
وتوتة توتة خلصت الحتوتة..يلي بتنم عن ذكاء

================================================
بعدي دور ridaa78

اسم العضو الحقيقي
ابو عجاج الملقب ب رضا

مكان الاقامة الحالي
جسديا المانيا مدينة مانهايم
روحياً دمشق صالحاني الاصل مزاوي السكن

الدراسة الحالية
هندسة معلوماتية سنة اخيرة هندسة برمجيات طبية

لمحة موجزة عن بداياتك مع الكمبيوتر
أول جهاز كمبيوتر كان سنة 1997 ووقتها كنت اول مرة بشوفو بحياتي ف ما بعرف كيف بيتشغل ولانو اختي اللي اصغر مني كانت بمدرسة التجارة وكان عندون حصة كميوتر ف بتعرف كيف بشتغل ف يوم اللي جبنا الكميوتر كانت اختي نايمة ورحت فيقتها وقلتلها كيف بشتغل قالتلي اكبس الزر البرتقاني ومن وقتها لهلق بتقلي انا اللي علمتك الكميوتر يا مهندز الكميوتر
المهم من وقتها بلشت رحلتي مع الكميوتر وصار حلمي اعرف كيف بتساوو هال برامج فسالت شو لازم ادرس لاتعلم تصنيع البرامج فقالولي computer science فقررت ادرس هالفرع باميركا لانو بسوريا ما كان في لسى معلوماتية وبسبب 11 ايلول قررت حول ع المانيا
وهي ليكو حلمي سنة زمان بتحقق ان شاء الله

الخبرات التي يتمتع بها
الصراحة خبرات ما عندي لانو من فترة قصيرة جدا بدات اشتغل بمجالنا وقبلها كان شغلي مقتصر ع الجلي بالمطاعم والتعتيل بالاسواق
اما ازا قصدك خبرات الجامعة ف بشكل اساسي اشتغلنا جافا و قواعد معطيات اوراكل
وانا برايي نحنا ممكن نتعلم اي لغة واي شي بمجالنا لو كان عنا الاصرار والصبر

المجال الذي تجد نفسك فيه
طبعا بعد التدريس اللي بحبو اكتر شي لانو فيه تواصل مع الاخرين مو قاعد خلف كميوتر ونازل تكبيس زرار
بحب تصميم قواعد البيانات و تصميم مشاريع للبرمجة غرضية التوجه
باختصار بحب كل شي فيه تشغيل مخ وما بحب الشغلات السهلة لانو بمل بسرعة

نلصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع)

نفس نصيحة فؤاد كل يوم لازم نتعلم شي جديد
وبحب ضيف امنية بدأت بتنفيذها شخصياوهي
انو نخصص ساعة بالاسبوع او الشهر للعمل الطوعي
يعني نعلم حدا شغلة منعرفها

طرفة حصلت معك خلال مسيرتك المعلوماتيه
في كتير رح احكي وحدة صارت معي ووحدة صارت مع رفيقي
اما اللي صارت معي
ف لما كنا عم نساوي البكالوريا الالمانية بمدينة كيل كان عنا مادة البرمجة وكانت ع التوربو باسكال طبعا كل الشباب مالون علاقة بالبرمجة وطبعا انا اولهون فقلت لازم ادرسها منيح و افهمها وبالفعل كان عندي وقتها كمبيوتر وبلش جرب برمجة كل يوم شوي هيك لحتى فهمت ووقت فهمت صرت فهم رفقاتي حتى كان يجيني اكتر من 10 طلاب من صفي وغير صفوف وكان يطير عقلون انو عم يفهمو بعد ما ياسوا انو يفهمو شو هي البرمجة
فانا فكرت اني ختمت البرمجة ووقت بلشت بالجامعة عرفت انو اللي عرفتو هو 1 من مليون من البرمجة لذلك المادة الوحيدة اللي اضطررت لعيدها مرتين هي البرمجة 1

اما النهفة اللي صارت مع رفيقي
ضل شي 6 اشهر يفكر شلون i=i+1 يعني مو منطقية لو بتضيف اي عدد ل i ما بتزبط لحتى بعد ما سال شي 100 مرة قالو هي عملية اسناد و مو معادلة مقارنة

================================================
بعدي دور shashi

حيو صالحية ..  

أول شي كنت آخر شخص بتوقع أنو يكون ضيف بهالموضوع لأنو مالي من أصحاب الخبرة .. .. بس شكراً رضا ...
1-اسم العضو الحقيقي .(ليس من الضروري ذكره)
اسمي (شذى)
2-مكان الاقامة الحالي.(ليس من الضروري ذكره)
الشام
2-الدراسة الحالية .
سنة أولى هندسة معلوماتية.
3-لمحة موجزة عن بداياتك مع الكمبيوتر.
على فكرة هاد أحلى سؤال ... بداياتي مع الكمبيوتر كانت سنة 2000 كان جهاز منحوس كتير أول جهاز جبناه لأنو بعد أسبوع ضرب الهارد وبعد شي شهر خربت الطابعة ... وكانت مواصفاته حسب ما أذكر pentium 2 سرعته 366 MHZ يعني بالنسبة لهلأ ولي جهاز قاتل .. وبلشت أتعلم الشغل عليه بالنظر يعني حاول أتفرج على أخي كيف بيشتغل عليه .. وبعدين جرب لحالي وبظن أنو هي أحسن طريقة للتعلم "Self learning" ولحد الآن ما عملت ولا دورة كمبيوتر ..وطبعاً لا يخلو الأمر من الألعاب يعني ما بقي جزء من أجزاء THE SIMS1&2 ما لعبته ولحد هلأ ..
4-الخبرات التي يتمتع بها(بما فيها من شهادت يحملها..).
Adobe photoshop 7 & CS1 & CS2 & CS3
Turbo pascal(partly) beginner in 3DMAX
5-المجال الذي تجد نفسك فيه(من مجالات المعلوماتية).
سؤال كتير صعب عليي هلأ .. بس بظن برمجيات ...
6-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).
Hope is a walking dream , so start coding
7-طرفة حصلت معك خلال مسيرتك المعلوماتيه.
ولي شو كتار .... بس أحلى وحدة .. بآخر الفصل الأول وقبل تقديم تقرير البرمجة 1 بيوم واحد ..كنت خالصة حبيت أتميز شوي فأعدت عدل بطريقة عرض النتائج ... فالمفروض يكون النتائج المعروضة عبارة عن جدول .. فأنا من ذكائي الخارق رحت حطيت الطباعة بقلب loopبالغلط والله لا يورجيكون عند ما تنفذ البرنامج ..طلعلي شغلات عجيبة غريبة فجأة امتليت الشاشة بأرقام وأشكال غريبة وما عاد وقف .. ويضل يكتب ... وأنا صافنة فيه أنو شو عم يصير ...ومبسوطة بالمنظر:) ... بعد شي دقيقة من التنفيذ فجأة بيطلع اللابتوب صوت غريب BeeeeeeBBBB ....وبيعمل restart ..
كان موقف فظيع وخصوصي أنو كنت مو نايمة من شي يومين ..
وأكيد بتفق مع عبد بنقطة ما قبل الجامعة والمشاكل مع الأهل بس أبداً ما كانت طريفة
--------------------------------------------------------
اللي بعدي My virtual friend NIGHTWOLF

اسم العضو الحقيقي

نايت الملقب ب محمد الساطي

مكان الاقامة الحالي

الشام - صالحية ( وبدكم الصراحة عالمسنجر :mrgreen:  )

لمحة موجزة عن بداياتك مع الكمبيوتر

بداياتي ..ممم أول مرة شفت الكمبيوتر عند خالي بعام الـ 1997 وكان طبعاً عم يصلح فيه مدري شو بس كتير استهجنت الفكرة أنو حاطط مفك وعم يشتغل بما كنت اعتبره آلة خارقة وكتير كنت مهتم فيه لدرجة متابعة أي برنامج عن الكمبيوتر بالتلفزيون . بس البداية الحقيقة كانت بعد التاسع يعني أول ال 2000 وقتها كان مسخر للألعاب لدرجة أني خلصت 14 لعبة بصيفية وحدة .. أما بداية التعلم فكانت بعد البكالوريا وخصوصي أني كنت معهد وعندي وقت بحر وكلو الحمد لله Self Learning . وبدون ولا بدورة .

 الخبرات التي يتمتع بها

الصراحة خبرة بمعنى محترف ما في . لأنو ما في اختصاص ما حبيتو وفتت فيه ( وهي شغلة بصراحة مضرة ومفيدة )

بس فيني قول أنو عندي معلومات بالمجال التالي :

DataBase ( Oracle + mySql)

NetWorking ( CCNA + MCSE ) , a little bit of ethical hacking

Design ( HTML + PHP + Oracle Application Express ) using DreamWeaver + Zend Studio

Programing : C++ , Java , C# ,(q basic )

Programs : 3d max , photoshop , eJay

صح صح معي شهادة معهد متوسط اتصالات اختصاص معالجة بيانات .

المجال الذي تجد نفسك فيه

والله كتير بحب الشبكات بس مدري ليش القدر دائماً بيدفشني على قواعد البيانات.

نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع)

بصراحة كل النصائح يلي سبقتني بس عندي ملاحظة صغيرة

دائماً اشتغل شغلة بتحبها لأنو حتبدع فيها ولا تركض ورا شغلة بس لأنو غيرك نجح فيها. والعلم دائماً بدو متابعة . والغرور عدو لكل متعلم .

طرفة حصلت معك خلال مسيرتك المعلوماتيه

طرفة ... والله كلها الحياة طرفة بس يمكن فيني قول أنو كيفية دخولي للكلية هي طرفة بحد ذاتها وعبرة ودرس بنفس الوقت . طبعاً القصة طويلة شوي وأغلب العالم حواليي بيعرفوها

 اي اي تذكرت وحدة كتير حلوة

أول يوم إلي بالكلية طبعاً ما بعرف حدا منوب ولا بعرف حتى وين المدرجات بقى عم بحكي قدام رفيقي قللي أنو في طالب كمان طالع من معهد التقانة بيكون رفيقو وعطاني رقمو

وقت اتصلت فيه قلتلو الجملة التالية يلي لهلق بيهتني فيها " السلام عليكم ، زياد ، أنا ما بعرفك وإنت ما بتعرفني " ووقتها اتفقنا نلتقي وننزل عالكلية سوا وطبعاً هاد الشخص عرفني على جماعتي الحالية الظراف كتير كتير

يلي بعدي صديق المعسكر العزيز M-RAY-Y

waiting for my turn

 اهلين والله , اجا دوري

اسم العضو الحقيقي

محمد يامن سرايجي

مكان الاقامة الحالي

الشام - كفرسوسة

لمحة موجزة عن بداياتك مع الكمبيوتر ( C.V )

بتذكر حالي اول مرة شفت الكمبيوتر يعني لما كنت صف سابع تقريبا على يد عمي هلي بيشتغل بتصميم اللوحات على ال CorelDraw وببعد سنة تقريبا جبنا كمبيوتر على البيت وشي طبعي انا نزلت ال CorelDraw وجربت اشتغل فيه وكنت لاقي الدعم من اهلي وعمي
بعدين نزلت الاختراع العظيم VisualBasic هلي كنت انو عن طريقوا ممكن نساوي العجائب ( الة حاسبة - فعلا شي عجيبة!)
بالتاسع قررت اني اختص بمجال المعلوماتية وقتها لقيت شوية صعوبات لانو كانت اختصاص جديد بس امي (الله يخليلي ياها) دعمتني ورحت سجلت فيها ( وبذكر كان حتى يسجل الطالب لازم يجيب 200 علامة على الاقل)
والحمد لله توفقت بالبكالوريا وكنت عم ادعي اختص هندسة حيث كانت نسبة القبول بالجامعة 3%

 الخبرات التي يتمتع بها

بشكل خاص خاص جدا بحب ال 3D Graphics والتصميم على 3DSMax+Maya
بعد ما قويت حالي بالبرمجة وخصوصي ال C++ توجهت لمجال تصميم الالعاب (الذ شي برايي بعلم الكمبيوتر)

كمان بال C# لتصميم برامج هلي بيلزمها الواجهات

المجال الذي تجد نفسك فيه

Game Development

نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع)
من رايي الخاص : البحث الذاتي ومحاولة تطبيق كل شي نظري لعملي
محاولة مساعدة هلي حوليك ولا تبخل بشي عند ياه

طرفة حصلت معك خلال مسيرتك المعلوماتيه

مممممم.... اي اتذكرت  , قص الله ايام الطرف ايام الثانوي
كانت شلتنا مفظعة بالمدرسة
 هو مقلب اكتر من طرفة - بس كان لذيذ ومعلوماتي ..
كان يوميتها عن درس شبكات عملي ومدري شو كانت عم تعطينا الانسة عن برنامج Client تحت الدوس اسمه يمكن كان netcon.exe (بغض النظر عن اسم البرنامج) وكانت لما تكتبوا ما تحط اللاحقة, فبعد ماخلص الدرس رحت انا على الجهاز هلي عم تشتغل عليه وانشأت ملف اسموه netcon.bat وحطيت بيقلبوا الكود التالي:
:1
goto 1
وبس, ولما بيتم تنفيذ netcon بيشتغل ملف الباتش
بالفئة هلي بعدنا درينا انو صارت مصايب -- لك ليش ما عم يشتغل البرنامج !! عنجد الله يعين الانسة يوميتها , يمكن انحرق اعصابها على الاخر

--------------------------------------------------------------- 

مممممممم هلي بعدي رح يكون هاني اتش اتش hanihh

محتوى البرنامج السابق بكل بساطة أنو يطفي الجهاز أول ما يشتغل, ووقتها حطيتو عالـ Start up تبع كل الأجهزة, وشوفو شو صار.
ضلو الأجهزة ما تشعل, لحتى بعد يومين سألني أستاذنا المعلوماتية إذا بعرف صلحهم, فرحت قعدت وبلشت أشتغل عالـ DOS وأعمل حالي عمبصلحو, وآخر شي رحت ناح مو حاطط الملف وغيرتلو أسمو فما عاد اشتغل .

http://www.mieweb.com/

حلو كتير
وانا بانتظار دوري

لك وينو هاني ؟؟؟؟

ليكني ليكني...

1-اسم العضو الحقيقي .(ليس من الضروري ذكره)

محمد هاني الحمامي .....

2-مكان الاقامة الحالي.(ليس من الضروري ذكره)

دمشق ميسات
2-الدراسة الحالية .

كلية الهندسة المعلوماتية جامعة دمشق السنة التانية.

3-لمحة موجزة عن بداياتك مع الكمبيوتر.

كانت البداية سنة ال97 لما كان عنا الكمبيوتر الخطير يللي وصفو همام.-معالج 166 وذواكر 32 مع هارد ضخم 3 غيغا-:) .ووقتها كان ممنوع أنو أشعلو أو أشتغل عليه قال مشان ما التهى عن دراستي وبتذكر أنو أختي الكبيرة كانت حاططة password للويندوز

ويللي كان مسموح هو ساعة لعب (rally championship ) يوم الخميس بس

وبتذكر لما كان همام سنة تانية ويشتغل عالباسكال كنت أعد اتفرج عليه وهو عم يرسم رسمات عودية..

وقتها كانت شغلة بتفلج بالنسبة إلي ..

4-الخبرات التي يتمتع بها(بما فيها من شهادت يحملها..).

هلأ خبرات بمعنى خبرات ما في ...

بس بعرف اشتغل عالباسكال والدلفي والC++...

وإلي هواية بهندسة الصوت ومعالجة الصوتيات وإن شاء الله بالصيف رح احترف هالشغلة عند صهري ..

5-المجال الذي تجد نفسك فيه(من مجالات المعلوماتية).

لسا ما وجدت حالي بأرنة بس بعد دورة الOpen GL لقيتها كتير شغلة ممتعة وحلوة..

وطبعاً بحب الرياضيات بشكل رهيب..

6-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).

حالياً ما في نصيحة بس متل ماقالو الشباب فوق

7-طرفة حصلت معك خلال مسيرتك المعلوماتيه.

لما كنت سنة أولى حبت آنسة مبادئ عمل الحاسب أنو تختبر ذكاء الطلاب وتشوف قدرتن على التصرف بالمواقف الحرجة وبالأزمات ووقتها كان السؤال..

بالوورد ..شلون بتخلي كتابة موجودة بالنص بس ما حدا يقدر يشوفها..بدون استخدام الdelete يعني بس ما تكون ظاهرة..

الكل بلش يفكر ويفكر ...

أجيت أنا وشلفت أنو منخلي لون الخط أبيض ..

واتفاجأت بالآنسة عم تقلي مزبوط برافو عليك...ووقتها زودتلي علامات...

يللي بعدي يللي بعدي ....

صديقي MorhAf

2-الدراسة الحالية

معلوماتية سنة ثانية.
3-لمحة موجزة عن بداياتك مع الكمبيوتر.

البداية كنت بالصف الرابع. طبعاً ما كان في شي عالكمبيوتر غير حديقة الأناشيد و مدرسة الحروف و يوميات طفل مسلم و بتذكر كان عنا قاموس صخر تبع الانكليزي مالو حلة و أكيد Encarta 97 بس بعد شي 4 سنين حتى عرفت شو هي الEncarta ومن هالقصص بعدين بعد شي سنة تقريباً بلشت آخد انا و اخواتي دروس بالMS Office وبعد شي 6 شهور بلشنا بالVisual Basic عملنا آلة حاسبة و رسام يعني من قريبو.

بعدين من السابع للعاشر كنت بس العب عالكمبيوتر بالعاشر رجعت اشتغل شوي اشتغلت شوية Flash, Photoshop, HTML, and JavaScript بالحادي عشر عملت موقع الي و بالبكلوريا كالعادة ما في شي بس انترنت.

4-الخبرات التي يتمتع بها(بما فيها من شهادت يحملها..).

بالنسبة للخبرات فيكن تقولو Jack of all trades but master of none

Pascal, Delphi, C++ PHP and JavaScript

Photoshop, Flash, Dreamweaver and Adobe acrobat professional

Check out.

5-المجال الذي تجد نفسك فيه(من مجالات المعلوماتية).

يمكن بال Web programming و الله مابعرف

6-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).

أول نصيحة انو يسمعو نصيحة فؤاد تبع انو يتعملو كل يوم شي جديد

نصيحة تانية: أهم شي الانكليزي. يعني انا اكتر شغلة بندم عليها انو ما بلشت دروات انكليزي من بعد البكلوريا فوراً تأخرت للسنة حتى بلشت. بتوقع انو نقطة ضعف الطلاب السوريين هي الانكليزي

7-طرفة حصلت معك خلال مسيرتك المعلوماتيه.

Pass!

بعدي Captain M-Ramy

1-اسم العضو الحقيقي .(ليس من الضروري ذكره)

لكان مالح إذكره بدي خلي سر

2-مكان الاقامة الحالي.(ليس من الضروري ذكره)

دمشق

2-الدراسة الحالية .

ماجستير في كلية الهندسة المعلوماتية جامعة دمشق السنة الأولى
أو
سنة سادسة هندسة معلوماتية

3-لمحة موجزة عن بداياتك مع الكمبيوتر.
البداية الحقيقية_إذا استثنينا الألعاب_ كانت مع لغة q basic بسنة 2000 وقتها عملت برنامج بيعزف غنية رأفت الهجان وبيحسب كم شغلة ماعاد أتذكر مدري رفع لقوة مدري ....
ثم قرابة سنة 2002 عجبتني شغلة القطع و hardware وصرت الحق المواصفات و المميزات وسرعة الرام و هالشغلات هي

4-الخبرات التي يتمتع بها(بما فيها من شهادت يحملها..).

لغات البرمجة بشكل عام java, C#, C وبالأخص ++C وعلى أكتر من بيئة
وعتعتت شوي بالـ OpenGL
بمجال الوب اشتغلت php, jsp asp.net بس كلها ضمن إطار مشاريع الكلية يعني بعرفها بس مالي خبير فيها
قواهد المعطيات Oracle, Sql Server بالمعنى الحرفي وليش بالمعنى المتداول

مو كل مين كتب كم استعلام صار شاغل DB

درّست بعدد من المعاهد، أول مرة درّست ++C وقت كنت سنة تالتة بمعهد النور لطلاب سنة تانية حواسيب
وحالياً بالجامعة والحمدلله

الشهادات مع نص وحدة وهو نص الـ007

5-المجال الذي تجد نفسك فيه(من مجالات المعلوماتية).
COMPILERS
أو بالأصح بناء التطبيقات الكبيرة فهي بحاجة إلى تروي وتحليل دقيق قبل البدء بالتنفيذ فالخطأ عادة ما يكون مكلفاً

6-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).

أضيف على كلام الشباب
دائماً نقي الخيار _أو البندورة_ الأصعب
أي لما بدك تساوي شغلة وعندك طريفتين وحدة سهلة ووحدة صعبة
نقي الصعبة لأنها بتعطيك خبرة و فائدة، وبتضل معك بعد التخرج
حتى لو انضغطت يومين تلاتة زيادة، معلش بتلاقيها قدام

7-طرفة حصلت معك خلال مسيرتك المعلوماتيه.

هئ هئ!

يللي بعدي
كرم 89

لا تواخذوني عالتأخير بس ما كنت عرفان أنو دوري
1-اسم العضو الحقيقي .(ليس من الضروري ذكره)
كرم
2-مكان الاقامة الحالي.(ليس من الضروري ذكره)
ريف دمشق - دوما
2-الدراسة الحالية :
هندسة معلوماتية سنة ثانية في جامعة دمشق

3-لمحة موجزة عن بداياتك مع الكمبيوتر.
جبنا كمبيوتر لما نجحت من السادس عالسابع بمعدل
وقتها كان الهارد 2 غيغا والسرعة 133 (يعني شي ناهي )
وكان وقتها مقتصر على الألعاب الضخمة (الشدة)
بس بصراحة تعلمت عليه كتير وخبصت لشبعت
بعدها أجى السوبر كومبيوتر بعام الـ 2003 (لساتو لهلأ )
وهون كان في نقلة نوعية
بس هادا الكمبيوتر ما استخدمتو غير للألعاب
أما من ناحية البرامج فما اشتغلت عليه غير على الـ Registry
بصراحة وقتها كنت قضي أيام وليالي على الريجيستري عم خبص فيه وكل يومين فرمت من ورى شي تخبيصة
بس فيك تقول أني وصلت لمرحلة الاحتراف فيه وقتها
أما من ناحية البرامج الاختصاصية فما اشتغلت فيها قبل الكلية
ما عدا الفيجوال بيسك 6
أما الباقي كلو بلشت فيه من وقت دخولي للكلية

4-الخبرات التي يتمتع بها(بما فيها من شهادت يحملها..).
البرمجة : ديبلوم باسكال (ديلفي) & سي بلس بلس
التصميم : مبتدئ فوتوشوب وثري دي ماكس
ومن جديد بلشت حب الـ open gl
برمجة النت : متقدم هتمل (html) & متقدم (javascript) - طبعا يدويا دون برامج مساعدة
برامج أخرى : Registry Editor

5-المجال الذي تجد نفسك فيه(من مجالات المعلوماتية).
مدري لسا بكير
بس بحب الغرافيكس كتير

6-نصيحتك التي تقدمها لزملائك من المهتميبن بمجال المعلوماتية(خصوصا أعضاء الموقع).
لا تدوروا عالعدل بالكلية

7-طرفة حصلت معك خلال مسيرتك المعلوماتيه.
والله من ورا هالشلة المصونة تبعنا صارت كل أوقاتنا طرف بطرف
بس في طرفة صارت معي ما رح أنساها
بعنوان : البرمجة 1
قبل سنة وشهر منهلأ كنا عم نقدم فحص برمجة 1 وطبعا اللي هي مفروض تكون تعريف مبادئ البرمجة
المهم .
حملتها ....
بس وقتها ما تضايقت منوب
لأنو كانت نسبة النجاح قليلة كتير كتير
فقلت لحالي متلك متل كتير من الطلاب
أجى الفصل التاني وزادت الخبرة بالباسكال بعد ما اشتغلنا كتير شغلات ما كنت متوقع حالي أني ساويها بالباسكال
مثلا : عملت برنامج يحل لعبة السودوكو (تصور بالباسكال السوداء )
وعملت برنامج لحل مسألة الوزراء الثمانية (مع أني ما كنت بعرف شي اسمو خوارزميات - الحكي موثق وفي شهود )
وشغلات وشغلات
وفعلا وقتها أقريت أني كنت لازم أحمل البرمجة 1 شيت الدورة الأولى لأني اكتشفت أني كتير كنت مقصر بالفصل الأول
حلو ..
وبعد كل هالحكي حملت البرمجة 1 مع العلم أني رفعت البرمجة 2 بمجموع جيد
وقتها اتضايقت كتير كتير وما عرفت شو بدي ساوي
آخر شي لقيت الحل .... اتفشش بالدكتور وفعلا وقتها ما قصرت
وأجت السنة التانية (والحمد لله )
وصرنا نشوف شوفات ما بتنحكى بالخوارزميات .
ولا النقلة النوعية من الباسكال للسي
المهم وقتها كان حلمي أني رفع الخوارزميات .... فعلا حلم
وأجت الفحوصات وكانت آخر مادة برمجة 1 للحملة
وقتها بليلة الفحص كنا عند سهيل (محل كاونتر) للساعة 9 المسا
وأجى وقت العلامات
والحمد لله رفعت البرمجة 3
وبعدها صار الحلم حقيقة (ترفعت الخوارزميات والحمدلله )
وما بقى بين هاللغات غير البرمجة 1 وأنو كانت تطلع العلامات ... عبس .. بس ما كنت عايرها اهتمام أبدا لأنو على أساس مأمن الترفيع
طبعا على أساس
وإذ ......... انحملت
شو هالحكي .....
البرمجة 1 انحملت ؟؟؟؟
هادا الواقع

وما زلنا مع مغامرات البرمجة 1
بعمري ما رح أنسى هالقصة
بس اللي ما فهمتو ... شو قصة الـ 58 مع البرمجة 1 ؟؟؟؟
-------------------
اللي بعدي
BlackSigma

اي ان شاء الله بتترفع الفصل الجاية بمعدل و بتخلص من هالهم..
(و انا كمان)......
بس شو هي لعبة السودوكو؟؟؟؟؟؟؟؟اول مرة بسمع فيها....