CSC-SY

السلام عليكم ورحمة الله وبركاته

- انعقد اليوم الساعة 1:30 الاجتماع المقرر بين إدارة الكلية وبين طلاب السنتين الأولى والثانية
للأسف كان الحضور قليل -نوعا ما- بس بصراحة تفاجئت بنوعية الحضور
بعد الروتين المعتاد لأي اجتماع فتح السيد العميد باب المناقشة فانهالت الشكاوى بكل جرأة وشفافية من الزملاء والزميلات
بشكل ما توقعتو من طلاب سنة أولى, وهذا بدل أكيد عالوعي والجرأة والهمة العالية للزملاء والزميلات اللي حضروا
والظريف بالوضوع انو حتى المحاضر السياسي ما سلم من أسئلة الشباب والصبايا
فلكم مني كل الاحترام والإعجاب

- طبعا متل ما شفتو انو الدكتور نوار كتير متعاون -ضمن الإمكانات المتاحة-
وشفتو بالتأكيد صراحة الدكتور صلاح الدوهجي وجرأته الكبيرة اللي منشكره عليها وله منا كل الحب والاحترام
ومحاولته لمعالجة قضايانا ومشاكلنا فنحنا مو لحالنا -بفضل الله-
وكونوا واثقين انو لتحقيق اي شي بهالكلية لازم نتعاون ونتكاتف ونترك اللوم واليأس شوي

مشان اللقاء اللي طلبوا مني الدكتور نوار رح يكون قريب انشاء الله بس بتمنى اسمع رأيكون

ملاحظة أخيرة
لكل اليائسين والميئسين اللي ما حضروا أو يلي حبطوا يلي كان بدون يحضروا كلمة أخيرة
أن تضيء شمعة خير ألف مرة من أن تلعن الظلام!!

والله ما حضرت راحت عليي كانت عندي تيم كانتر ؟؟؟؟؟؟؟؟؟؟

يلاا المرة الجاية ........

طلع سكوري الأول هههههههههههههههههههههههه

أنا كنت بدي احضر .. بس الدعوة للسنة الأولى و التانية بس ..

خيرها بغيرها .....

شو ما حدا حضر من طلاب السنة التانية

طيب شو كانت نتائج الاجتماع؟؟؟؟؟.......
كان بدي احضر بس الظروف ما سمحتلي.......خيرها بغيرها

شوية أوراق مالها طعمة .....

سيدي كلو متل ما قال فراس حبر على ورق ومالح يطلع شي انا متاكد اكيد هديك السنة كان في هيك اجتماع وقالولو عن نسبة نجاح مادة غير اختصاصية إلنا متل الفيزيا ويلي ما بتطلع فوق ال20 وهالحكي من هديك السنة وهلق والبرمجة كمان مالها أنظم بس ماشي الحال الدكتور بدو يانا نكون متميزين كتيير لحتى نجح بالمادة بقى ما لنا غير الدراسة لا اعتراض لح يفيد ولا بلوط وصحي قال قلبوها قوميات المحاضرة صحي شو صاير ؟

إذا تناقشو بفكرتي البوفيه المفتوح خلص كلو بيهون

والله يا صاحبي EhabLM ما في خواص ..

الطلاب ( متبرمين ) و ( نقاقين ) منذ " الأزل " وإلى " الأبد " ..

.
.

يا جماعة الزلمة عبيمدح فيكن .. ردوا عليه منيح .. عالأقل تبع إنو من باب .. المدح بيحرج .. !!

انا ماحضرت بس بتمنى يكون في نتائج ويكون هالاجتماع احسن من الاجتماع يلي صار وقت كنا سنة اولى........لانو للاسف ماشفنا اي شيء ايجابي ولو بسيط بس الامل بيضل موجود وان شاء الله خير
وشكرا جزيلا على مجهودك اخ EhabLM

أنا ما حضرت .. ان شاءالله يطلع منها شي ولو اني بشك

يا ريت من الطلاب يللي عم يقولو إنو حبر على ورق و مافي فايدة،يحتفظوا بهالطاقة السلبية لإلن،وما يبحتروها يمين و شمال،لإنو لسا في كم شغلة منيحة بهالبلد حتى ينزعوها بحكيون....

أساساً بلدنا و تعليمنا و مدارسنا وجامعاتنا ما صار  فيها هيك..إلا من ورا هالحكي ... 

لو فعلاً رايدين تحسنوا الجامعة في مية طريقة و طريقة، وماشاء الله الواحد فيكون إذا حط شغلة ببالو ما بيقصر...معلش تعذبوا شوي و عانوا من البيروقراطية..هي بلدنا هيك مو منقعد و منتكتف لأ ومنضحك عالعالم الإيجابيين ...!!

بعدين منستغرب ليش صارت حالة الجامعة هيك..!!!

قبل كل شي شكرا الك ايهاب ومنعرف اديش عم تبذل جهد (مشكور) لتحسين الكلية...
بس عندي ملاحظة: انو الكلية ليى ماشي حالها, بس يلي صاير فيها السبب في مو حكي العالم السلبي, لأنو هاد ما كان موجود لولا الوضع يلي كان عم يصير... والطاقة السلبية أجت نتيجة اجتماعات سنتين (أنا حضرتون) وطالبنا بنفس الحكي يلي طالبتو في, بس ما شفنا نتيجة !!!
وان شاء الله السنة يكون في نتائج على ايد ايهاب ...

ملاحظة :
العميد عاتبنا اليوم لانو كانت نسبة الحضور قليلة بالاجتماع و قلنا انو نشيل فكرة انو هالاجتماع عالفاضي و مافي منو فائدة وبصراحة انا تفائلت بكلامه و من هون و رايح ان شاء الله لح صير احضر هيك اجتماعات

بداية شكر لكل المتفائلين والإيجابين واللي فهموا موضوع المنتدى!!
وانا آسف لسماع بعض التعليقات اللي أقل ما يقال فيها انو ما لها معنى وما بتعبر عن اهتمام صاحبها-
على كل صرلي بالكلية 4 سنوات وهي الخامسة وبتصور اني على اطلاع على وضع الكلية اكتر بكتير من زملائي المتشائمين بالأولى او بالتانية
وبعرف شو فينا نساوي وشو مافينا نساوي!
-ومتل ما تفضلت Joolnar ما وصلنا لهالمستوى إلا بسبب التشاؤم وإلقاء اللوم عالآخرين والهروب من تحمل المسؤولية وحارة كل مين ايدو الو ..
بعني اذا بدنا نضل نحكي ليش الموظف الفلاني ما عم بقوم بعمله وليش المخبر الفلاني مليان فيروسات وليش الانترنت بطيء وليش ...
ما منخلص بس الحل مو انو نلوم غيرنا ونلعن الواقع - برأيي الحل انو نبذل جهدنا ونشتغل بايدنا ونعتمد عحالنا بعد ان نوكل أمرنا لله عز وجل..
بكل الأحوال ياريت اللي عندو كلمة طيبة يحكيها واللي ما عندو ما في داعي يسمعنا سلبيته وتشاؤمه
بتمنى ما حدا يزعل, وقريبا رح تسمعوا كتير أخبار ومشاريع حلوة رح تصير بالكلية وبحب اكدلكن انو رغم الوضع العام والروتين والسلبية و .. و.. في كتير شباب وبنات عم يشتغلوا لهالكلية من قلوبهم دون تذمر او لوم او سلبية

بكرة انشاء الله بخبركن بالنتائج

اولا الموضوع اللي طرحتوا ما بلش بشكل سليم
وبعدين اغلب القضايا المطروحة في طريقها حاليا للحل
ولو انك حضرت الاجتماع كنت عرفت هالشي

والله انا عانيت 4 سنين من التفاؤل المطلق وصار معي كتيير شغلات سيئة بدءاً من الثانويةحتى هون والله انا بنبسط إذا بيمشي الحال والله يوفقكم وان شاء الله بتتغير هالفكرة وEhabLM لا تاخد من حكيي انو تثبيط الله يسامحك بس انا بزعل لما بشوف الطلاب مهتمين والإدارة لأ بس حسب حكيك خلص ان شاء الله خير ولا تزعل مني ما قصدي ثبط من كمعنوياتك

الله يبارك فيك
وانا متأكد انك وبقية الشباب من أصحاب الهمم العالية!
وانشاء الله بكونلك دور بالنشاطات الجاية