CSC-SY

السلام عليكم

بدي اسم مناسب لكفي نت جديد(يـُفضـّل بالانجليزي),بفضل ما يكون مأخوذ من قبل..

أنا بنصحك تساوي برنامج بسيط جدا ً بيولد كلمات عشوائيا ً وبعدين اختار أحدها.
أنا هيك ساويت بآخر مشروع إلي واخترنا اسم Uroho وعجبني

CerntrinoCaféNetDuo

كافي نت!

STORM NET
or
GW NET
or
csc-sy NET
or
your name NET
or

لو سوا ما مسمية خدمة تسريع الانترنت Asra3 Net كان طلع اسم كتير مميز .

و لو ما كان اسم الإنترنت Inter Net لكان اسم حلو .....
يعني بدي أفهم شو دخل هالموضوع بالمعلوماتية ...أو حتى بالمواضيع العامة !! ... لأنو ما بيهم وما بيفيد حدا من مستخدمي الموقع و مجرد المرور عليه هو إضاعة للوقت !!
بطلب من المشرفين إغلاق الموضوع و كل موضوع من هاد النوع.

I agree with you. That's complete nonsense! 

سميه Digital Cafe شو رأيك؟؟

طيب إذا بتعتبر مجرد المرور عليه إضاعة للوقت , ليش مريت عليه حضرتك !!!

أنا ما بعتقد أنو غلط, والزلمة إذا حابب ياخد رأي الأعضاء باسم محل فما فيها شي غلط, وخصوصي أنو BEN ADAM مواضيعه عادة ً ظريفة, فأكيد مو مشارك بالمنتدى بس ليسأل عن اسم محل, يا ريت تنظروا للأمر بإيجابية أكتر, ويلي مو عاجبه الإشراف وطريقته بيقدر يحط مشكلته بمنتدى المشاكل والإقتراحات والإدارة بتتكفل فيها.

هو الاسم بيجي آخر شي بس اهم شي انو يكون في شي خط t1 (: قال يعني لح نقدر نأمن هيك تجهيزات او على الأقل ADSL ارخص شي ومنيحة سرعتو

من شان الاسم حاول تفكر كعدوك على قول ميكيافيلي فكر باسم ما حدا خطر على بالو ياخد هيك اسم على سبيل المثال سميه باسم متل الفيرماختاو اللوتفاف وعن جد عم بحكي
او شي اسم الماني هي فكرة حلوة برأيي ما بعرف انا ما كون محلك بسميه شي اسم الماني

طيب ليش أنت حابب تعمل مشكلة من ولا شي ؟؟؟!!!
إذا معتبرو موضوع مالو طعمة و في ضياعة لوقتك الثمين
مافي داعي تدخل عالموضوع من الاساس ....
و يلي قرا الموضوع اسم محل و ما عجبو ما رح يكمل بالردود نص ساعة إلا إذا اهتم بالموضوع !!!!!!!!!!!!
بعدين نحنا ناقشنا كتير موضيع مالا علاقة بالمعلوماتية يعني كتير عادي إذ حب يستشير أعضاء المنتدى
بعدين الاسم بيتعلق بالمعلوماتية ما عم يسأل عن اسم لمحل وجبات سريعة ؟؟؟؟؟؟؟؟؟؟؟!!!!!!!!!!!!!!!!!!!

كلام مقنع و منطقي.

الحقيقة فعلا (متل ما ذكر BlackSigma) إن ما عنّا سياسة واضحة بخصوص المواضيع الممنوعة...

سميه
kooora net

سميه
العالم .نت

شو رأيك بإسم: Spiral Cafe
أو Twisted Cafe

سميه "انترنيت على كيفك"

الله يعطيكم العافية جميعا.. غلبتكم معي,, بس بصراحة ما عجبني ولا اسم من الأسماء يللي أعطيتونياها..

فأنا عندي كم اسم فكرت فيهم وهن :

Cyber cafe - Hyper net - Noble cafe - Proxy net

وأنا محتار بيناتهم بس علأغلب رح اختار Proxy net فشو رأيكم؟

بالظبط يعني لو كان عضو جديد بتحذفوه ليش ؟

بعتقد أنك عم تحذف موضوع لأنو مخالف مو عم تمنع شخص من المشاركة

يا أخي مشان الله احذفو للموضوع , خلص ما بدنا مشاكل , احذفو!!!

mpcabd , احذفو أخي للموضوع ...

واذا بتحذفولي حسابي بيكون أفضل....

برأيي الشخصي إنو الجانبين معهم حق.

من ناحية الموضوع الموضوع نوعاً ما عام, بس إلو علاقة بالمعلوماتيّة و ما في شي مخالف للقواعد (القواعد ما بتمنع إلا المواضيع التي بتعمل حساسيّات). يعني ممكن بنفس المنطق على منتدى طبّي يكون في سؤال عن إسم لصيدليّة. لو شفت هيك موضوع على الأغلب ما رح احذفة, بغض النظر عن الشخص اللي طرحه, و هون كمان في عنصر شخصي نوعاً ما بإعتبار أنا بثق بـBen Adam , و بحترم رأيه.

من ناحية تانية المشكلة صايرة إنو نحنا تساهلنا كتير من ناحية الحذف بالماضي (و أنا صرلي زمان كتير ما حذفت شي). القواعد ما بتمنع المواضيع العامّة, بس ما عاد عنّا كتير مواضيع علميّة, و لهادا كان في رغبة التقليل من المواضيع العامّة. ما كان عنّا سياسة واضحة, و لهادا بالنسبة للمواضيع بالمنتدى العام في مواضيع بتنحذف و مواضيع بتضل... الظاهر إنو هادا كان غلط, بإعتبار إنو سبّب "إنشقاق" عدد من الأعضاء السابقين اللي راحوا لمنتدى ite, علماً إنهم ذكروا مشاكلهم من قبل و كان على رأسها سياسة الحذف غير العادلة. 

الأعضاء الغيورين على جديّة الموقع  بيأيدوا حذف كل المواضيع غير المرتبطة بالمعلوماتيّة أو الدراسة مباشرة, و منها هذا الموضوع, و منها غيره. يعني المسألة مو متعلقة بهادا الموضوع بالتحديد, و لا بـBen Adam على وجه الخصوص, هي مسألة عامّة لازم نلاقيلها حل, فليش ما نتناقش فيها, و هلّا وقت ملائم.

معناتا شو عم تستنوا

تعليق صغير :
بعتقد مو من حق أي شخص يطلب علناً إنو يتسكر موضوع معين أو يقرر إنو هاد الموضوع غير مناسب , على الرغم من إني بحيي الأعضاء على غيرتهم على الموقع و محتواه بس هاي الشغله من اختصاص إداره الموقع و الطلب العلني لهيك امور هو انتقاص من قدره الإداره و الإشراف على عملهم, بس بنفس الوقت لازم الإداره ما تفتح المجال لهيك مشاكل تصير بلإتفاق على منهج معين و واضح للجميع بالتعامل مع المواضيع الممنوعه والمسموحه .
كل شخص فينه يرسل رساله خاصه لأحد المشرفين أو المدراء و إعلامه بوجود موضوع غير مناسب لسياسه الموقع و محتواه وعندها لازم على الإداره "و بشكل حاسم بدون خيار و فقوس " إما تغلق الموضوع مع التبرير المقنع أو تسمحله مع التبرير المقنع إيضا
و نحن كمان من واجبنا كل ماشفنا موضوع غير مناسب نعلم المشرفين عنه مع السبب برأينا.
يعني هيك بنكون تخلصنا من الحساسيات الشخصيه و رفعنى من مستوى النقاشات الموجوده داخل المواضيع.
وعندي طلب للإداره تتناقش بهملوضوع بين بعضها بجديه و تحط منهج و طرق واضحه للتعامل مع المواضيع اللي فيها جدل.