بحثالمحتوياتتسجيل دخول |
بدون عنوان أرسل من قبل mpcabd في الإثنين, 2008/04/21 - 8:01pm.
السلام عليكم ... وحـــــيــــــدمن فترة تقارب بداية الفصل الثاني ولحد الآن, صاير معي مشكلة, وهي أنو ما عاد حسيت حالي بعدت كتير عن رفقاتي أو شلتي, أو بالأحرى بعدوا عني. السبب غريب نوعا ً ما, واكتشفت من فترة شو هو, السبب أني وقت طلعنا من فحص الخوارزميات ما كنت متدايق متل الباقي, وقلتلهم للشباب أنو الأسئلة مو صعبة متل اسئلة الدورات! ومن وقتها الناس (مو ضروري بس شلتي بالكلية) تنظرلي نظرة غريبة, يعني لهلأ ما عرفت شلون لسا في عالم بتفكر بهالطريقة, يعني لهلأ في عالم بتعتقد أنو يلي بيدرس بيكون غلطان بحقهم إذا ما درسوا! قعدت هداك اليوم وحاولت حلل كل أفعالي, وما لقيت أي شي بيستاهل أنو هيك يصير فيني, وسألت أحد أعز أعز أصدقائي (أقرب من أخي إلي) وطلع معنا نفس الشي! شو الحل؟ الـــضـــغـــطمن بداية العطلة الإنتصافية وأنا الحمد لله عمبشتغل بشركة BrightSoft على أني Web Developer, والشغل كتير حلو. ونصيحة يلي بيصحللو يشتغل بأي شركة IT لا يقصر, لأنو كل يوم بيتعلملو شي 15 شغلة جديدة بحياتو ما سمع عنهم, وخصوصي إذا اشتغل مع اختصاصيين. الشغل مع جمالو وفائدتو أخدلي وقتي, وصرت أستعمل البيت على انو مكان للنوم فقط, الصبح بالكلية ولآخر الليل بالشركة, وبرجع تعبان بتعشى وبنام. فكرت من فترة أنو هالشي رح يأثر على دراستي أكيد, فأخذت إجازة دائما ً كل إثنين وأربعاء, الأربعاء بكتب محاضرة البنيان, والإثنين بدرسلي بشي ليرة! وقت صار عنا وظيفة خوارزميات لقيت حالي مضطر أشتغل لآخر الليل صرت نام الساعة 3 الصبح كل يوم, وفيق الساعة 8, يعني 5 ساعات فقط, ما عدى وقت صلاة الصبح. لقيت حالي بعدت عن أهلي, وصرت كأني زائر بجي كل يوم وبنام بالبيت عندهم, ما عاد عرفت أخبار حدى من العيلة! وهلأ ارتبطت بمشروعين خارج الشركة, وبوظيفة تانية يوم السبت, وبالتالي صار بدي اليوم يكون 48 ساعة لأقدر نام بس, والمشروع يلي مستلمو بالشركة تسليمو بآخر هاد الشهر, يعني ممنوع آخد أي إجازة. بزمانو أخي Firas حط هالمدونة (عمل مرهق) ووقتها كنت لساتني سنة أولى وقلت لحالي "مو معقول الواحد يوصل لهالمرحلة", اكتشفت هلأ أنو أكتر طلابنا اللي بيشتغلو هيك صاير فيهم (أخونا The-X-Jack بينام بالشغل يعليي عليه  ).الضغط مفيد ببعض الأيان لأنو بيخلي الواحد يضطر يأنجز بسرعة وبإتقان منشان يخلص من الشغلات يلي عليه وما يرجعلها أبدا ً, بس احيانا ً بيصير الضغط مشكلة كبيرة وبتدايق صاحبها, وبتخليه يمشي وهو عمبيفكر بهمومو وبالتالي ممكن كتير حدى يسلم عليه وما ينتبهلو, أو يطلب منو شي طلب وينسالو ياه, وهون منرجع لأحد أسباب المشكلة السابقة! الـــتــــدريــــسالحمد لله من السنة الماضية اكتشفت شعور التدريس, شعور التدريس شعور كتير حلو, وخصوصي أنو بدو يعود الواحد على فهم غيرو, وبيزيد من روابط الألفة والمشاركة بين الناس. بنصح كل الطلاب أنو يجربو عالقليلة مرة واحدة يدرسو, ولا يقولو ما بيطلع معنا, لأنو بتذكر أنو وقت كنا بالثانوي كانو يسألوني الطلاب عن شي مسألة رياضيات, وبعد ساعة شرح يطلعو مو فهمانين عليي, وكنت فكر حالي فاشل بالتدريس! بس هلأ الحمد لله عمبلاقي تفاعل كبير مع دروسي. من فترة استلمت تدريس البرمجة بلغة Scratch للأولاد الصغار من دون سن الـ 15 سنة بالجمعية السورية للمعلوماتية كل يوم سبت, والطلاب يلي تأهلو للدورة عملو اختبار IQ ونجحو فيه بنسبة أعلى من 75%, وهلأ صرت عاطيهم درسين والحمد لله عمبلاقي الولاد كتير متفاعلين وعندهم أفكار, يعني اتصورو لو هدول صارو قدنا, شو بيكونو بيقدرو يساوو؟ بعتقد رح يشكلو جيل خارق, وبصراحة اتغيرت نظرتي للجيل يلي بعدنا لأني كنت شوف فيهم الكسل والبرودة وعدم الإهتمام. التدريس كتير حلو ومفيد, خبرتو حلوة وبدو شغل, وبجد برجع بشجعكم أنكم تشاركو بفعاليات تدريسية لأنها رح تغير من نظرتكم للعلم يلي اتعلمتوه من قبل. الــخـــاتــمـــةلا تواخذوني طولت عليكم بس حبيت شارككم بمشاعري وهمومي, شكرا ً لحسن استماعكم. ( عام )
 وعليكم السلام ورحمة الله وبركاته..
فحص الخوارزميات
عسى أن تكرهوا شيئاً وهو خير لكم..الأسئلة مو صعبة متل اسئلة الدورات! أنا حملت المادة وزعلت كتير يومها (وأعلنته يوم حداد  ) بس هلأ رضيانة بهالشي هاد، بعدين في شغتلين:1. كل واحد تعب على حالو وقت الفحص، الله ما بيضيع تعب حدا، وكل واحد ألو مقدرة، وألو ظروف... 2. كل واحد رح ياخد نصيبه بالنهاية. ----------------------
لقيت حالي بعدت عن أهلي, وصرت كأني زائر بجي كل يوم وبنام بالبيت عندهم, ما عاد عرفت أخبار حدى من العيلة!
هون حدث ولا حرج... صار الوقت الوحيد اللي بقضيه معهن هو على الأكل وبس... عم نعيش بالكلية وبالأخص أدام هالشاشة المربعة أكتر ما نعيش مع أهلنا!
 بتوقع عبودة ما فيني ناقشك إلا بقصة وحيد .. لأنو الشغلتين التانيات عاديات كتير وصايرين ..  بتوقع عبودة ما فيني ناقشك إلا بقصة وحيد .. لأنو الشغلتين التانيات عاديات كتير وصايرين ..
لذلك ملتقانا بالجامعة انشالله !.. بس مو لأنو الشغلتين التانيات "عاديات كتير وصايرين" لأنو ما بفهم فيهون ....  بتعرف لأول وهلة على المدونة .. ما توقعت أنك تكون أنت الكاتب ..  حسيت حالي بعدت كتير عن رفقاتي أو شلتي, أو بالأحرى بعدوا عني. ---------------- الشلة : نطلع معنا شي طلعة أنت : عندي شغل ما بحسن .. الشلة : تروح عالرحلة . أنت : ما بغضر روح عالرحلة لأنو عندي شغل .. الشلة : طيب مايز أنت : شو مايز ما مايز ما عد لحق .. دوبني أنت : تلعب فيفا ؟؟ الناس ما عادت استوعبت الآخر .. للأسف نظرة الحسد على النعمةو موجودة عند 90% من الأشخاص .. وأنت إنسان كتير مميز"من دون مجاملة" .. إذا بدي أتغاضى عن ذكائك .. مميز لأنو لسه عندك قدرة على احتمال كل هالضغوط..
طولي بالك شاشي شو كل هالقد شايفة الحالة مأساوية ... اذا خليت خربت.وبالنسبة لطبيعة الحياة اللي أنت عايشها.. بظن هي أحلى خبرة وأحلى ذكريات ممكن أنك تحملها على مدى كل حياتك ..
طبيعة الحياة يلي عم يعيشها عبد الله عادية بالنسبة لطالب محب للعلم وبدو يشتغل على حالو ويتعب مو يقضيها تسلاية واذا مفكرة ما في غيرو هيك فبقدر دلك على الأقل على 10 بيشتغلو متلو وأكتر كمان ..لا تستغرب رح قلك ليش!! أول شي أنت شب عمرك 19 سنة عم تشتغل تقريباً بـ3 مجالات مختلفة .. يمكن أي شب عمرو بيساوي ضعف عمرك ما بيساوي هيك .. إذاً هادا بيزيد تميز على تميزك .. وبالنهاية .. الإنسان اللي بدو يبتعد عنك لتميزك .. ما بظن أنك بحاجتو ...
ما بظن هو عم يحكي عن يلي ابتعدو عنو لتميزو .. ويلي قصدو عنهم ما بيعملوها وبيحبولو الخير كتير بس صايرة مشكلة تعارض أوقات .. ومتل ما بيقولو بعيد عن العين بعيد عن القلب
اذا مالك قد المسؤولية طلع منها..
واذا قررت تضل فهي فترة وبتمر ودائماً الانسان بيمر بحالة ضغط نفسي بيطق منها منشان الله خلق الترفيه .. خليك رجال متل ما بعرفك وحديثنا بيبلش بالكلية وحقك عليي كان لازم افتح الموضوع معك من زمان .. لأنو كان ببالي وما قلتلك !!  وحـــــيــــــد الـــضـــغـــط الـــتــــدريــــس احلا عبود طول بالك خيوووووووووووو  الله يكون معك انا مريت ولا زلت بهي الفترة اللي عم تحكي عنها إن شاء الله كلو الواحد بيلاقيه بمستقبلو بعد التخرج
الحل ابسط مما تتخيل بس بدو جرأة وقوة شخصية وهدول موجودين فيك
أنا هاد يلي صاير عندي, بس هلأ انضغطت لأنو بدنا نسلم المشروع يلي مستلمينو بآخر هاد الشهر, وإنما الحق يقال الشركة سمحتلي أشتغل ببيتي لو اضطر الأمر بدون ما يفرق راتبي, يعني كأني عمبشتغل بالشركة.
خصص فقط يومين بالاسبوع او الافضل ساعات محددة بالشهر للشغل مثلا 40 ساعة بتصير انت حر بالروحة ع الشغل وقت تكون فاضي بتشتغل اكتر ووقت لا بتشتغل اقل هلق بتقلي ما بيرضوا بالشركة... اي مع السلامة لانو وقتها بيكونوا ناس استغلاليين بدون حدا يشتغل شبه ببلاش وشغل محترفين... صدقني لو هنن بالفعل بدون ياك بتمشيهون ع كيفك لانوهنن كسبانيين اكتر ----  in 2 qoute i just wanna say  الله بيعين... هادا الضغط منتشر على ما يبدو, بس بنصحك بعدم تشتيت إهتماماتك, خصوصي من ناحية الشغل, إذا كان هدفك الأول أكاديمي (العلم و إفادة الآخرين). من ناحية الشغل, برأيي إنو الدراسة أفضل بكتير. أهم الفوائد اللي ممكن الواحد ياخدها من الشغل هي: 1) الخبرة, و هي مهمّة نوعاً ما للي بدّو يكمّل شغل بشركات و ما إلى ذلك. الخبرة فائدتها (الوحيدة) هي الحصول على عمل في نفس المجال في المستقبل1. كمان لاحظ إنو معدّل أكتساب المعرفة العمليّة بيبدا عالي و ممكن يصير صفر بعد فترة. بالإضافة إلى هذا, في أنواع من المعرفة (عمليّة أو غير ذلك) بتضر الواحد, لإنه بصير تفكيره متركّز على أشياء معيّنة و ما بيشوف الصورة الكبيرة; الفهم ما بيجي من التعمّق بالتفاصيل, و إنما من تجاوزها. أمثلة على الحالات السابقة: تناقص معدّل إكتساب المعرفة: أمثلة شخصّية, أنا واحد من الناس اللي تعلّموا كتير عن إستخدام ويندوز أوّل ما جابوا كمبيوتر, و بعدين ما عاد إهتمّوا بالموضوع, و التعامل اليومي مع النظام ما عاد علّمن شي جديد. أوّل فترة صعبة, حتّى تحريك الماوس صعب و بدّو تفكير, بعدين بتسهل الشغلة و بعدين بتصير روتين و بيتوقف التعلّم. نفس الشي صار معي وقت نقلت على لينوكس, و أكيد نفس الشي رح يصير مع كل بيئة جديدة يحاول الواحد إستخدامها. التركيز على الصورة الضيّقة: في كتير أمثلة, بس بشكل عام الصورة الضيقة هي الإفتراضات اللي عنّا و ما منعرف إنها إفتراضات و ممكن تكون غير هيك. مثلا متل اللي بيقول على علبة الحاسب الشخصي معالج, أو اللي بيفكّر الحاسب الشخصي هو نفسه الحاسب, و السلسة مستمرّة.... خطر بيئة العمل هو الإنغماس الشديد, لدرجة إنو الواحد ما عاد يشوف شي غير اللي قدّامه... 2) المصاري, و هي مهمّة إذا الواحد بحاجتها. بس المهم كفاية الحاجة و عدم التحوّل إلى إدمان الراتب , بعرف واحد من أصدقائي بيشتغل بشركة براتب 40 ألف شهريا بمراسلات شركات ملاحيّة, و الشغل لهاه عن دراسته و جاب معدّل وسط. للآن هو بيعرف إنو ما بيحب هادا المجال بس ما في شي تاني بيعطيه نفس الراتب, و ما بيقدر يترك لهادا السبب. 10 أو 15 ساعة أسبوعيّا تكفي للمصاريف الشخصيّة بكل تأكيد, خصوصا إذا ما في مسؤليّات (زوجة, أولاد, إيجار بيت, فواتير البيت, و غيره مما شاكله). كمان ممكن يتطوّر عند الواحد صعوبة ترك الشغل إذا كان في مشاريع قائمة (أو منجزة بنجاح) أو عملاء أو إرتباطات (صداقة, زمالة, حب) مع الزملاء من اللي بتصير بالعادة تحت الضغط الشديد. بإختصار, رأيي إنو إذا كان الواحد عندو طموحات أكاديميّة فالأحسن ما يشتت حاله, و الأفضل التركيز على الدراسة, و بذل الجهد لتحصيل الفهم و العلامات العالية. الباحث عمله هو التعلّم. Disclaimer ما عندي أي معرفة بطبيعة العمل ضمن شركات تقنيّة المعلومات, و ما عم بنصحك تترك العمل لأنّه يمكن (للبعض) التنسيق بين العمل و الدراسة, و يمكن (للبعض) التنسيق بين العمل و الدراسة و التفوّق. أنا بس عم قلّك رأيي (اللي عم طبقه), و الأخطار اللي برأيي (و ممكن ما تكون) موجودة بالعمل. بس الأوضاع بتختلف بتفاصيلها, و التفاصيل مهمّة, و كل إنسان إلو قدرة و إستطاعة. الخيارات بتعتمد على أولويّات الواحد. __________________ [1] الخبرة ليس إلّا وسيلة إلى الراتب الثابت و الوظيفة الآمنة: في كتير ناس درّسوا إنجليزي لغير المختصّين سنوات (على 25 ليرة/ساعة) مشان يسافروا و يشتغلوا بالسعوديّة على الخبرة, و على الأغلب رح يفنوا عمرن بهادا الإختصاص. 
الـــتــــدريــــسالحمد لله من السنة الماضية اكتشفت شعور التدريس, شعور التدريس شعور كتير حلو, وخصوصي أنو بدو يعود الواحد على فهم غيرو, وبيزيد من روابط الألفة والمشاركة بين الناس. بنصح كل الطلاب أنو يجربو عالقليلة مرة واحدة يدرسو, ولا يقولو ما بيطلع معنا, لأنو بتذكر أنو وقت كنا بالثانوي كانو يسألوني الطلاب عن شي مسألة رياضيات, وبعد ساعة شرح يطلعو مو فهمانين عليي, وكنت فكر حالي فاشل بالتدريس! بس هلأ الحمد لله عمبلاقي تفاعل كبير مع دروسي. من فترة استلمت تدريس البرمجة بلغة Scratch للأولاد الصغار من دون سن الـ 15 سنة بالجمعية السورية للمعلوماتية كل يوم سبت, والطلاب يلي تأهلو للدورة عملو اختبار IQ ونجحو فيه بنسبة أعلى من 75%, وهلأ صرت عاطيهم درسين والحمد لله عمبلاقي الولاد كتير متفاعلين وعندهم أفكار, يعني اتصورو لو هدول صارو قدنا, شو بيكونو بيقدرو يساوو؟ بعتقد رح يشكلو جيل خارق, وبصراحة اتغيرت نظرتي للجيل يلي بعدنا لأني كنت شوف فيهم الكسل والبرودة وعدم الإهتمام. التدريس كتير حلو ومفيد, خبرتو حلوة وبدو شغل, وبجد برجع بشجعكم أنكم تشاركو بفعاليات تدريسية لأنها رح تغير من نظرتكم للعلم يلي اتعلمتوه من قبل. هالصيفية رح خوض تجربة التدريس ....  يلي معلقة عليها آمال كتيرة...إدعولنا
 مممممم ... صراحة مبينة حياتك كتير حلوة يا هيك الضغط يا بلا ....  طول ما إنتا مقتنع بالشي اللي عم تعملو فينك تحط كل هلشي وراك  مالح قلك غير وفقك الله وصدقني لسا بيجي أيام بتنضغط أكتر من هلأ وممكن الناس ما تصدقك أنو يمر عليك يومين ما تفضى تقرأ لإيميل!!! أهم شي حوال تقعد مع أهلك ولو 15 دقيقة يوم الجمعة وفقك الله
أهم شي حاول تقعد مع أهلك ولو 15 دقيقة يوم الجمعة
بالشهر ولا بالسنة
له يا زلمة وين حديث الرسول صلى الله عليه وسلم "اعط لكل ذي حق حقه" انت بهي الحالة عطيت كل شي للشغل يعني مو شغلة حلوة تضغط حالك كم سنة وبعدين تفرط  ياسلاااااااااااااااااام عالضغط حلو كتير لو منقيم أضرارو الجانبية ......... بس فعلا و نصيحة مني لكل طالب مهما انضغط يعمل جهدو إنو مايبعد لا عن أهلو ولا عن رفآتو لأنو برأي هنن الأساس بحياتنا. فبصراحة بعد ما توفت رفيقة إلي السنة الماضية , صرت إتمنى إنو ترجع الأيام وإرجع إحكي معها أو شوفها حتى لو على حساب دراستي. بس للأسف ............!!!!!!!!!!!!!!!!!!!!!!!!!!!!!!!!!!!!!! ونفس الشي صار معي بالنسبة للأشخاص يلي فقدتهن هالسنة , ومن وقتها مهما كنت مضغوطة بترك كل شي وما بروّح جمعة حلوة مع أهلي أو شي رحلة لذيذة مع رفآتي (يعني هو بالأصل ما بروّح علي شي ).
وبعدين خلينا نتخيل إنو ضلينا بعاد عن أهلنا ورفآتنا وحصلنا على كل شي منتمناه من شهادات وما شابه أنا واثقة بوقتهاا مارح نلاقي حدا يفرح معنا بشكل حقيقي لما نحتاج لحدا يفرح معنا> فخلينا نحط ببالنا إنو الدراسة والشغل هنن شي ضروري كتير بس أكيد مو كلشي . ومتل ماانذكر حديث رسول الله (أعط لكل ذي حق حقه).
(انتبهوا أنا ماكنت عمنظّر أو شي بس الأفكار يلي ببالي حطيتها
أهم شي حوال تقعد مع أهلك ولو 15 دقيقة يوم الجمعة
عنجد... أهم شي أهلنا.. صحي أنو الواحد ما يكون ألو رفقات بيعاني، بس مو متل لما بيبعد عن أهله (طبعاً أصدي يبعد عنهن غصباً عن إرادته)..بيجوز نحنا ما منعشر فيها أنو الأب والأم أديش بيحتاجو أولادهم يكونو جنبهن، بس منحس فيها لما منضل طول النهار برا البيت، ولما منوصل بتلاقي نظرات عيونهن غير! يعني بيكفي إذا بتطلع الصبح وبتسمع كلمة الله يرضى عليك.. بتحس نهارك كلو غير شكل.  اي و الله ... أهم شي الأهل ... يعني عالأقل وقت الفطور و الغدا و العشا هلأ أنا ما عمبقول الأهل مو مهمين.
اي و الله ...
هاد يلي هامك أبو شنغل, كرشك وبس أهم شي الأهل ... يعني عالأقل وقت الفطور و الغدا و العشا
ما بعتقد أنو غلط نوصل لهالمرحلة, بس كأنو ما كنا مفكرين أنو رح نوصل لهالمرحلة أبدا ً, مو؟
من ناحية غلط، مو غلط... لأنو هالشي هاد خارج عن إرادتنا، ومو غلط أبداً الواحد يشتغل ويكد ويتعب على حاله، بالعكس.. وصح متل ماقلت ما كنا نتوقع نوصل لهيك مرحلة...بس متل ما الكل قالوا:"اعط لكل ذي حق حقه" هلأ انا عم اشتغل كمان ويمكن نام بالشغل اليومين الجايين بسبب اطلاق مشروع ... ما بتصور انو هالشي غلط انا مع كل اللي قالوا انو أهلنا لازم نعطيون حقون و (أعط لكل ذي حق حقه) بس نحنا هلأ ببداية حياتنا واذا ما تعبنا بهالوقت (بالدراسة والشغل) وانضغطنا كتير وكانت ايام استثتائية بحياتنا ما رح نقدر نبنيها صح ... خاصة اذا كان الشخص بيعرف شو بدو ولوين ماشي !! بكل الأحوال الله يقدرنا نوفق بين كلشي |
)
© 2004-2008 CSC-SY
كمان أنت عبد حامل شي 15 بطيخة بايد وحدة .....يعني بدك تدرس وبدك تتفوق وبدك تشتغل وتعلم.......يعني مو ناقص إلا أنو بدك تصير rockstar..... بالنهاية متل ما قلت اليوم عنا شي 24 ساعة ...طبعا كلنا متمنى يكون أكتر من هيك ....بس شو بدك تساوي......