CSC-SY

مراحب بالكل ..
محسوبتكن جديدة ع المنتدى والدنيا امتحانات ومحدا فاضي لحدا .. ..
عبعمل بحبشة ع النت .. بخصوص الـ MCSE طلع معي المنتدى الرهيب هاد بشكركن عليه كتير الشكر
بالاخص الموضوع العالمي ( خمس نجوم ) :" http://www.csc-sy.net/node/2546 ) . بتشكر الكل الي شاركو فيه .

بس لقيت انه مافيها شي اسأل الاخوة الأقدم مني هون عسى اني استفيد ..

من بعد اذنكم انا طالبة حاسوب ونظم معلومات - تعليم مفتوح ولاحدا يعصب علي لاني تعليم مفتوح -جامعة حلب - سنة تالتة يعني باقيلي سنة وبتخرج ع الهفا ههههههه اذا شديت الهمة طبعاً..

السؤال مو هون السؤال اني رفيئتي الله يصلحا بقيت تلح علي اني ادرس MCSE . MCSE لوقت ما دخلتني بالجو مع انها حقوق !! .. واليوم معاد فيي انسى كلامها عن قيمة الشهادة وقوتها وفائدتا إلي بعد التخرج..!!

بس انا ماعندي اطلاع على المنهاج غير من هالموضوع الي اعتبرته خمس نجوم فوق لانه كتير فادني
.. بديت بالكتب والسيديات الي لقيتا بالسوق وبديت بمنهاج 70-270 ولقيته سهل كتييييييييييييير . من عدا كم شغلة بايخة

اللي بدي اوصله : صحيح انه عنا مافي ولا مركز امتحاني لمايكروسوفت حتى اخد الشهادة وضروري اني سافر ع لبنان او الامارات او مصر حتى قدم ؟؟

في معهد بالشام اسمه نيوهورايزن ومعهد بحلب اسمه اكزيكوترين وفي واحد تالت قالتلي عليه بس نسيت اسمه . لحد الآن الكل صرعوني انو بيمشي الحال عندن . بس في ناس تانيين قالولي انو ميكروسوفت بس تسمع اني سورية الجنسية بتسحب الشهادة لانو مافي امتياز لمركز امتحاني لسوريا من ميكروسوفت فوراً .؟؟ واني ما عذب حالي من الاساس ولا أدرس ولاشي ..

- برأيكن بدها المواد وقت كبير ؟ يعني بقدر على راس السنة الجديدة اخد الشهادة مثلاً ؟

بدي منكم الرد بكل ماتعرفوه درست هالمواد صحيح هنن صعبين كتير بس بيفيدوني كتير بكرا ان شاء الله في سوق العمل مع الشهادة الجامعية بس اتخرج بستفيد؟؟؟ .. وبنفس الوقت اذا قدمت امتحاناتي عند اكزيكوترين او نيوهورايزن بستفيد؟؟؟ "
ملاحظة أكيد حضرتكن بتعرفو انو الامتحانات بتوصل تكلفتا للخمسين الف " .

سؤال اخير : بتنصحوني اعمل دورة فيهن قبل الامتحان ولا بيمشي حالي لوحدي لانو مافي ميزانية كتير . " بالمرة مافي " . يعني بيطلع معي نتيجة ولا لأ ؟

رجاء كل الي عندو معلومة ولو بسيطة بهالمجال يكتبلي ياها لانو ضايعة بهالتساؤلات.
بتمنالكم كل التوفيق والخير في عملكم والسلام عليكم ورحمة الله

أختكم بالله .
=========

السلام عليكم ورحمة الله
بالنسبة لموضوع تقديم الامتحانات بسورية فهو ممنوع طبعاً لانو نحن (إرهابيين) ومثل ما قالولك الشباب انو بالشام مافي مراكز معتمدة لتقديم الـ MCSE ولو حصل وقدرتي تقدميها بالشام فشهادتك رح تخسريها مباشرة لو مايكروسوفت عرفت بذلك وحصل هاد الشي مرة بشهادات سيسكو لما طلاب قدموها بحمص عن طريق سيرفر مرتبط بلبنان واللي حصل انو كلون خسروا شهاداتون ووقتها انعرض علي اني قدم وما قدمت والحمد لله
بالعودة لجذر الموضوع وباعتبارك لسا ما بدأت فبصراحة ما بنصحك تدرسي الـ MCSE للأسباب التالية:
أول شي إدارة أنظمة التشغيل والشبكات لا تحتاج فقط سوفت وير وإنما هاردير وير أيضاَ ضروري وبالتالي رح تكون ظروف العمل مو كتير مناسبة الك كفتاة انك تشتغلي بالهاردوير وتتعاملي مع عدد كبير من المستخدمين ضمن بيئة شبكة
ثانياً: بصراحة من خلال خبرتي بهاد المجال واني درست الـ MCSE كاملة بالشام وهلا موجود بدولة أجنبية لقيت انو فرص العمل المتاحة ضمن إدارة أنظمة التشغيل والشبكات أقل بكتير من فرص العمل المتاحة ضمن مجال البرمجة مثل السي شارب مثلاً ...يعني مقابل وظيفة وحدة للشبكات ممكن تلاقي عشر وظائف ضمن البرمجة وخصوصاً الجافا والسي شارب (وأكتر شي طبعاً السي شارب) وطبعاً حتى برواتب أعلى تصل للأضعاف أحياناً
ولذلك نصيحتي الك إذا بتلاقي حالك قوية شوي بالبرمجة فادخلي بمجال الدوت نت واكسبي فيها خبرة أحسن ما تضيعي شهور وسنين مع الـ MCSE

طيب ومن شو بتشكي شهادات الأنظمة الـ Open Source متل اليونكس و اللينكس ,مثلاً شهادة LPIC! . خليها تضل Microsh*t والحكومة الأمريكية عاملة حظر علينا لنشوف شو رح يطلع معهم, ( لا تخافو قربت نهايتها)..

أولا أختي Lady_Oscar بيحق للسوريين تقديم الفحوصات وبشكل طبيعي ولكن مو بالأراضي السورية و هنن مابيسألو عالجنسية بيسألو عمكان الإقامة
أنا قدمت فحوصات وأخددت شهادات من مايكروسوفت

هلق مشان المركز هو بمعهد أكاد بحلب وفي عندو ترخيص من شركة prometric فرع تركيا المسؤولة عن تقديم فحوصات مايكروسوفت
يعني بالأخر أنتي رح تتسجلي عند مايكروسوفت بأنك مقيمة بتركيا
....
....
طبعا رفيئتك كان معها حق ومنيح سمعتي نصيحتا

شكرا لمشاركتك و موفقة

اختي الكريمة من حيث التعامل مع الهاردوير بصراحة أنا ما بلاقيها كتير مناسبة الك انو كل شوي يحكي معك حدى ويقلك تعي صلحيلي الكمبيوتر سواء سوفت وير ولا هادروير (أنا هاد رأيي الشخصي.. انت قد يكون ما عندك مشكلة في ذلك)
بالنسبة لفرص العمل ..الكلام اللي قلتوا أنا سابقاً ينطبق بشكل أساسي على الدول الغربية لانو في كتيييير شركات بتعتمد بكتير من برامجها على الـ (in house development) يعني الفريق التقني ضمن الشركة هو اللي بيطور جزء من برامجها على عكس عنا بالدول العربية بتلاقي معظم الشركات بتعتمد على الـ (on shelf packages) يعني حزم برمجية جاهزة وبالتالي عندكون بسورية ممكن تتساوى فرص الحصول على الوظائف في كلا المجالين
بالنسبة لقضية تقديم الامتحانات مثل ما قللك الياس انو العملية مرتبطة بمكان الإقامة وبالتالي فيكي تقدمي بلبنان على أساس انك مقيمة بلبنان وفي كتير ناس عم يعملوا هيك ونظامية مية بالمية وما في مشكلة
بالنسبة لكورسات الـ ICDL فهو تابع لمنظمة اليونيسكو العالمية وبالتالي أي دولة عضو بالأمم المتحدة ممكن تفتح مراكز معتمدة الها على أراضيها وتقدم الامتحانات بشكل نظامي
بس مع ذلك بالنهاية عم قللك إذا لسا ما بدأت فأفضل إلك انك تفوتي برمجة (هاد رأيي) ..
وآسف إذا كون عم سببلك الإحباط بس لازم اني نبهك من هلا قبل ما يوقع الفاس بالراس

الزميل (بن آدم ) شكراً عالرد انا بسمع سمع باليونكس واللينكس ومابعرف اي شيء عنن مابتصور رح اقدر امشي فيهن بسرعة الويندوز وتطبيقاته
الزميل الياس : شكراً على التشجيع والكلام الجميل بس بيبقى شغلة انه بالنسبة للمعهد الذي ذكرته هو الوحيد المخول تقديم الامتحانات بشكل نظامي ( انا حكيت عن معهد نيوهورايزن بالشام واكزيكوترين لاني اغلب وقتي بقضيه بالشام )

يعني اذا بدي تصل معن بأي طريقة اسأل؟؟ قلن انتو عندكن امتياز او بتقدرو تسجلوني على اساس اني مقيمة بتركيا هيك؟؟ لأنو أكدولي اننن معتمدين لتقديم الامتحانات المذكورة عند ميكروسوفت.

طبعاً شكراً كتير على المساعدة والروح المعنوية العالية.يعني بتنصحني اتابع بهالمجال ؟ .انا حاطة ببالي اخلص الـ MCSE بأسرع وقت ممكن بس في كتيرين عالنت بالمنتديات عبقولو لبعض انتبهي لا تدرسي MCSE قبل الـ A+ بس انا مافي ميزانية كتير لكل هالامتحانات بعدين انا ماشي حالي بالهاردوير بشكل مرتب متل ماحكيت من فترة ايه كمان خوفوني من دراسة شي اسمه Testking بس فيه اسئلة الفحص بس حتى ما تنجحي وتكون مالك فهمانة عملي منيح وفي قسم معارض عبقول لا الاحسن تاخدي الشهادة وبعدين بتعملي الخبرة على مهل..لانو الشهادة بتفتح طريق تدريب عند الشركات او تطوير المهارات على رواق وهيك شي يعني !

الزميل IT بشكرك كتير على حرصك وتفصيلك بس عنجد انا تعبت من اصرارك على البرمجة البرمجة خصوصي وقت قلتلي " الفاس بالراس " حسيت حالي عم بخسر كل تعبي وان كل دراستي رح تكون ع الفاضي يعني كل اللي عبيعملو MCSE او اخدو الشهادة ماعبستفيدو منها! هيك عبحس من كلامك..

رح كفيMCSE واذا لقيت حالي مروقة عليها مخططي اني اكمل مع شهادات CISCO بنفس المجال شبكات يعني . اما البرمجة فبصراحة انا الخوارزميات والC++ عنا بالكلية لوقت ماخلصت منن مابقي حدا لحدا ..لهيك متعقدة من فكرة البرمجة كتير . اذا عندك مقالة او موضوع للمبتدئة في البرمجة ياريت تنزله هون بستفيد منك كتير وبشكرك عليه سلفاً

هي أرقام المعهد بحلب :
2280422
2280348
4644295
4659085
www.accad.net
info@accad.net

بنصحك تتابعي بالشي يلي بتحبي لأنو مارح تفلحي إلا في
و طبعا لازم تاخدي الـ A+ و الـ Network + والـ TCP/IP
ومشانت موضوع Testking هدول بتدرسيون بعد ماتخلصي المادة يلي بدك تقدميا بس طبعا لازم تكوني فهمانة المادة يعني حيكون هدول الأسئلة للمساعدة فقط

تسلم دياتك زميل الياس على الرد والعناوين وكلامك كله .
اسفة ماتابعت لانشغالي بالامتحانات قريباً ادعولي اخلص على خير خلال هالشهر وبعدها هجوووم على الشبكات بكل قوة بتمنى اذا حدا بيقدر يتفضل علي بمخطط دراسي للمنهاج ولو TXT . او يبعتلي رابط حتى احضر برنامجي لاني نويت ادرس لوحدي وعندي 3 أجهزة فيهن كرت شبكة 2 منزلي وواحد محمول رح اتدرب عليهن . ولا بتفضلو الـ Virtual PC ؟؟؟ ..

شكراً كتير جزاكم الله خيراً

مشان مخطط الدراسة هوة كالتالي

مواد تحضيرية مهمة قبل البدء

+A

+network    

TCP/IP

--------------------------------------------------------

مواد الـMCSE من مايكروسوفت

ْXP or Vista

Server 2003

Active

Infra 1

Ifnra 2

Desing Securty

 (exchange (or another support

--------------------------------------------------------

موادة دعم بعد الـMCSE

CCNA

Linux

----------------------------------------

هلق مشان تطبيق العملي أنا بنصحك ببرنامج VM ware work station هاد أفضل برنامج للجهاز الوهمي

الياس حابب أسألك شو تكلفة الدراسة بأكاد؟ وكم مدتها؟
وبحكم أني طالب هندسة معلوماتية فالمواد التحضيرية اللي حكيت عنهن أنا آخدهن ومافي داعي أرجع أعيدهن...فهل ممكن أنو أبدأ مباشرة بكورس الـMCSE ؟

وشكرا مسبقا

شكراً كتير زميل إلياس على الرد وعذراً للتأخر بالرد

بدي نصيحتك وباقي الشباب .. الي عبيصير معي كل ماناقشت حدا من زملائي عن فكرة اني احصل على الـ MCSE بيقولولي مااتعذب لانها مالها قيمة وماحيكون الها الأثر الابجابي والأهمية احد الزملاء بعتلي الرابط التالي ع الميل وخلاني اتشاءم انا بعرف اني مافيي كون مهندسة رغم دراستي ل50 مقرر إدارة نظم معلومات MIS على مدى السنوات الأربع بالكلية .
ومع احترامي للجميع الي عبشوفه انه النتيجة النهائية لأربع او خمس سنوات جامعية حتى بالمعلوماتية بسوريا هي ان تعلق الشهادة على الجدار ثم تأتي الخبرة والدراسات التقنية التانية لهيك حيروني :

http://www.engineerscanada.com/e/pub_news_02_03.cfm
http://www.cicnews.com/1998/12/evaluation-mcse-certification-12499.html

هي الروابط الي حيرتني بعد مااطلعت عليها وهي تاريخ قديم نسبياً ..رح تقولولي بفرد مرة صرتي ب كندا الصراحة هو لانه عمي عايش بكندا من 30 سنة ياترى بيقدر يفيدني بهالمجال :(انا لحد الآن مافتحت الموضوع لاني مابدي اطلع على اساس اني اشتغل اي شغل .. ( هيدا اذا عطوني فيزا ) بس بدي وقت الي احكي اني اعرف وين الله حاططني

يعني محتارة بين رأيين رأي بيقلي كملي دراستك بالكلية حالياً وركزي ع الشهادة MCSE وبعدها تابعي في نفس المجال بس ع التقيل يعني خبرة+سيسكو وهالحكي . ورأي تاني بيقلي لا الشباب ماعبيستفادو من هالشهادات اذا مافي معها جامعة كيف البنات (مع الاحترام لرأيهم ) .وانا بصراحة احتمال كبير اني سافر قريباً (هيك عبخطط بالأحرى). وانزل كل سنة قدم امتحاني يعني مطولة لسا شغلة التخرج لهيك عبدور على اقصر الطرق في حال كسبت وظيفة معينة في بلد الاغتراب ( خلصت الـ ICDL ولغتي الانكليزية جيدة جداً ..وعندي هواية كبيرة بالتصميم MAX وCAD " بعرف حتقولوا شو جاب هي لـMCSE وهي بنت ! " بس هيك الواقع وانا مصدومة ومحتارة تابع بهالمجال لأني حبيته ولقيت فيه فائدة من ناحية قوة الشهادة كمشروع للمستقبل " . وشكراً لكم على الرد سلفاً وبعتذر لاني عندي تحليل وتصميم نظم معلومات بكراادعولي والسلام .

والله إذا طالعة على كندا
خدي الـ MCSE والكلية مع بعض

أنا بنصحك عملي يلي براسك ولا تردي عحدا
ومن ناحية العمل بعرف كتير بنات مستلمين أكبر الدومينات بأكبر الشركات

السلام عليكم ورحمة الله
انا كمان طالب حاسوب ونظم معلومات سنة ثالثة درست الكورس بالتعاون مع زملاء وقدمنا الإمتحانات بطرابلس على أنو مقيمين بلبنان من شي شهر بس مابعتقد تخلصي المنهاج من هون لراس السنة بتوقع المنهاج بدو حوالي 6-8 أشهر ومافي مشكلة بالنسبة لل A+وال network+ طبعاً باعتبار عندك معلومات سابقة وخبرة جيدة بس رح تتعزبي شوي بالإمتحانات التجريبية لأول مادة70-270 "Testking" وبعدين بصير كلشي سهل على كل حال بالتوفيق .

لو بدها تركز بالكورس منيح بتخلص ممكن حتى قبل ذلك

وعليكم السلام

أخي انا رح قدم على 70-270 في ويندوز XP سمعت انه صار في منهاج تاني فيه الـVista صحيح هالحكي واذا كان صحيح بتنصحوني ادرس اي واحد فيهم انا على ذمة الراوية الي خبرتني انه اذا درست الـ Vista بختصر امتحان او بختصر مرحلة وهيك شي . وشكرأً لردك

برأيك اذا تفرغت تماماً يعني مارح التزم بشغل كرمال هالدراسة بتخلص معي بأربع اشهر ؟ " يومياً 6 ساعات " ؟؟
شكرأً لرودكم جميعاً

هاد الشي أكيد بيعتمد عليكي
يعني على سرعة استيعابك ودراستك ...يعني في ناس بتخلص بساعة صفحتين وفي ناس بتخلص بساعة 20 صفحة
كورس الـ MCSE بالأساس مصمم من مايكروسوفت بحيث انو ينعطى في 40 يوم بمعدل 8 ساعات في اليوم (طبعاً هاد الشي في الغرب اللي هو استاذ السرعات في كل شيء)
أما عنا المعاهد عم تتماشي مع وضع الطلبة ولذلك عم يطول الكورس لـ 6 أشهر

الاخت Lady_Oscar
إذا مستعدة تدرسي كل يوم 6 ساعات فهي فعلاً همة عالية أنا بحييكي عليها وبصراحة أنا استمريت بالدراسة حوالي 8 أشهر بس مدة الدراسة كانت حوالي ساعتين يومياً خمسة أيام في الأسبوع كانت درسين عملي وثلاث دروس نظري بس نصيحة حاولي تركزي على الإختصارات الهامة جداً سواء في الحياة العملية أو حتى في الامتحانات بصراحة أنا لما قدمت الإمتحانات قدمت مادة الـ vista بدل مادة الـ Xp وهاد الشي بيعطي شهادة إضافية يلي هية Microsoft Certified Technology Specialist
بس عدد المواد هو هو يعني لازم تقدمي سبع مواد لتحصلي على الشهادات الأربع والمواد الي اخترتا أنا هي كالتالي مع أرقام الإمتحانات :

290 Managing and Maintaining a Microsoft Windows Server 2003
Environment

291 Implementing, Managing, and Maintaining a Microsoft Windows
Server 2003 Network Infrastructure

293 Planning and Maintaining a Microsoft Windows Server 2003
Network Infrastructure

294 Planning, Implementing, and Maintaining a Microsoft Windows
Server 2003 Active Directory Infrastructure

298 Designing Security for a Microsoft Windows Server 2003 Network

350 Implementing Microsoft Internet Security and Acceleration (ISA)
Server 2004

620 TS: Configuring Microsoft Windows Vista Client
وطبعاً ممكن تغيير بعض المواد مثل الـ (ISA)
Server
بس ممكن تستفيدي في المستقبل من مادة الـ vista وخاصة إذا أردت تحديث الشهادة لـ 2008 ويمكن لسا إعادة المادة في حال الرسوب " لا سمح الله طبعاً مع أنو النجاح بدو 700 من 1000" مجانية
والشهادات الي بتحصلي عليهون هنن

Microsoft Certified Technology Specialist Microsoft Windows Vista:
Configuration
Professional MCP 2.0 -- Certified Professional
Systems Administrator Microsoft Windows Server 2003
Systems Engineer Microsoft Windows Server 2003
يعني MCSE - MCSA - MCP - MCTS
مع تمنياتي بالتوفيق

مشان ال MCSE
فالشباب حكوا اكتر ما فيني احكي... مع العلم انو انا حامل الشهادة من شي 3 سنين

اهم شي متل ما قالو الشباب معرفة بالشبكات و الهاردوير و السوفت وير

انظمة التشغيل متل windows server و windows xp

بعتقد كل امتحان بيكلف 100 دولار

بس ما بعتقد بتقدري تدرسيها لحالك.... لانو وقت توصلي لل sql server فهاد لحالو مصيبة باجرتين....

بس عندي خبر حلو.. وهو اذا درستي " ما عنا شك بقدراتك "
mcse فالاسئلة دائما بتجي نفسها تقريبا.....

يعني قبل الفحص عملي داونلود لاسئلة اخر امتحان ... و فينك تقولي انو الاسئلة هي 90% نفسها...

و لذلك بتلاقي كتير هبلان ... بس معون هالشهادة...

بتمنى كون فدت باي شي...

بس مشان انو المنهاج بينعطى برى ب 40 يوم 8 ساعات يوميا
فهاد لانو مفترضين انو اللي بدو يدرس المنهاج... رح يكون بيعرف A+ او ما يعادلها و بيعرف بال N+ networks او ما يعادلها

"طبعا هاد فقط mcp فما بالكون لل MCSE

و سلامي للكل

مافي داعي للشكر
وأنا مستعد للمساعدة بأي مشكلة ممكن تحصل
هلق إذا فعلاً بدك الأحسن فأنا بنصحك بمادة
Implementing and Managing Microsoft Exchange Server 2003
بدل مادة برنامج توزيع الإنترنت وأمنه الـ350 Implementing Microsoft Internet Security and Acceleration (ISA) Server 2004
هية أحسن من ناحية العمل ( تختص بانشاء مراكز بريد الكتروني ) بس المادة صعبة شوي وبصراحة المعاهد في أغلبها ماعبتدرس هي المادة والمواد الإختيارية متعددة إذا بدك تتطلعي عليها من الرابط التالي
http://www.microsoft.com/learning/mcp/mcsa/windows2003/default.mspx
http://www.microsoft.com/learning/mcp/mcse/windows2003/default.mspx
أما بالنسبة للدراسة عالنت شوي صعبة المادة الأولى سهلة وبما انا xp أو vist فالكل عندو إطلاع عليها بس الـ windows2003 فيو العديد من الأشياء الجديدة وبعتقد مافي حدا ممكن يساعدك مثلاً بالـ Active Directory بالشكل المطلوب عن بعد أو حتى بالـ ISA وإذا اعتمد طريقة الصور والفيديو فإنت بتعرفي السرعة بالنت عنا أما إذا بدك تسجلي بشي معهد ومستعجلة متل ما عبتقولى لأنو إذا بتفكري بسنتين ممكن كتير تكون الإمتحانات الغيت لا تنسي أنو الـ 2008 نزل بس ممكن تسجلي دورة مكثفة مثلاً في معهد عندو دورة مكثفة خلال 3 أشهر فقط