CSC-SY

السلام عليكم
اين توصي سوري مقيم بالسعودية ان يدرس المرحلة الثانوية هل في سورية ام في السعودية؟ ولماذا؟ علما بان متوسط مجموعي في المرحلة الاعدادية 96%
هل يقدم الثانوية في السعودية ومن ثم سوف ياتي الى سورية من اجل الجامعة وهنا لن ينال فرعا من الفروع الأكثر رغبة بالمفاضلة العامة وبمفاضلة السوري غير المقيم فانه مطلوب مجموع كبير بالاضافة الى نفقات تصل الى نصف ماتتقضاه الجامعات الخاصة.اذا يوجد صعوبة حتى بمفاضلة السوري غير المقيم وخاصة القادمين من السعودية لارتفاع معدلاتهم، احدهم قال انه من الممكن ان لاينجح البعض في الثانوية في سورية(طعبا هذا عائد لقدر الاشخاص ثم طموحاتهم) ولكن نفس هؤلاء ممكن ان ينجح بعضهم بالسعودية لأن الدراسة اسهل خاصة بطريقة التقويم المستمر وعدم مركزية الامتحانات النهائية.ارجو مراعاة الرد على صلب السؤال فقط وعدم الدخول في نقاشات في صعوبة الثانوية هنا او هناك،وان يقدر انني سأذهب مع والدتي واخواني واخواتي الى سورية واترك ابي في السعوديةوهذا سوف يعود على والدي بتوفير جيد نتيجة ارتفاع ايجار المساكن العائلية وتكاليف تنقل عائلة ذات حجم كبير جوا، عائلة الجم الكبير يعني الكل وراء بعضهم البعض،واذا تم قبولهم بالموازي بفروع مرغوبة فان ذلك سوف يكلف حوالي 5 ملاين.
اذا اين سوف تكون فرصتي اكبر للحصول على فرع من الفروع الأكثر رغبة؟
أطيب التحيات

مرحبا سراط كيفيك
حببيب قلبي انا نصيحتي اليك انك تبقى ب السعودية وتدرس التانوية هنالك وتجيب علامات عالية هنالك بعدين ترجع لسوريا تدرس هزن لانو التعليم عنا ب الجامعات ممتاز جدا وخصوصا جامعة دمشق معترف فيها بكل العالم ولو بدك تصرف مصاري بس بعدين في نتجية مرضيةاخوك الخواجة اسامة

هاد الحكي بحكم الخبرة و التجربة الشخصية, أنا إجيت من السعودية و قدمت البكلوريا هون.

البكلوريا هون مانا صعبة و ما فيا شي زيادة عن السعودية غير متل ما قلت
هون فيك تجمع الرقم لبدك ياه تقريبا بس الفروع هون عم تفرق على علامة أو تنتين فبدك تكون مركز تمام
حقيقة البكلوريا من ناحية العلم و المعلومات مانا صعبة نهائيا بس في ضغط نفسي رهيب رح تتعرضلو هون بعمرك ما اختبرتو بالسعودية
ضغط نفسي ما فيك تهرب منو بتشوفو بعيون كل رفقاتك حتى الأساتذة بالرغم إنن كانو دائما ينبهونا إنو لازم نهدا و مع هيك إذا كان الطالب عندو إستاذ خصوصي بتلاقي الاستاذ بيحكي معو مباشرة بعد الإمتحان, يعني حتى الأساتذة بكونو مضغوطين.
يعني بدك تحاول تكون رايق و هادي عطول السنة و هاد شي شبه مستحيل(غير إذا كنت بايعا), فبدك تحسب حساب الضغط النفسي و قد ما حكيتلك عنو ما رح تحس فيه حتى تجربو, و خاصة إنو رح يتغير الجو عليك.

إذا استحملت الضغط و معظم الطلاب عم يستحملوه, فبقى بدك تركز عرقم المجموع لبدك ياه من أول الصيف لأنو عندك دورة صيفية. رقم إنت بتحددو و بتضل تعيدو ببالك كل يوم كل يوم. حتى لو حسيت للحظة إنو مستحيل تجمع هاد الرقم لا تتنازل عنو أبدا.

بالأخير لو ما كان إسمها بكلوريا كانت كتير سهلة و كان أي واحد حصل عالمجموع لبدو ياه. بس كونا تقرير مصير و ترسخت ع مدا سنين طويلة إنو البكلوريا عنا بعبع لهيك صعبة, حتى بتلاقي الأهالي بيورثوا للولاد.

بجميع الأحوال سواء قدمت الثانوية هون أو غير هون بنصحك تساوي الدورة بتفيدك هون أو هنيك و كتير بتسلي و أهم شي بتعلم للبدو يركز من أول الصيف.

أنا رأيي حسب أنت شو حاطط ببالك بدك تفوت ..
يعني إذا بدك هندسات فما فوق فكتير صعب أنو تاخد الشهادة من السعودية و تجي لهون لأنو عحد علمي العلامة التامة هونيك ما عادت تجيب شي هون..
أما في حال بدك شي أقل من الهندسات فبرأيي خليك هونيك خود الشهادة و بترجع بتدرس بالجامعة هون بناء على تعديل شهادتك..

الرأي فوق كان بشكل عام أما حسب حكيك فأنت عم تقول بدك فروع أكثر رغية يعني منرجع لحكي الأولاني أنو برأيي تدرس هون بسوريا
و كمان عم تقول أنو مجيئك لهون رح يوفر كتير
يعني بصراحة صارت باينة كتير أنو الافضل تجي لهون
عكلن الله ييسرلك و يخترلك يلي فيه الخير
و أنا هاد مجرد رأي
و السلام عليكم

ممكن تناقش حالك اذا فينك تدرس بقوة (تعب على حالك) قدم بسوريا  

لأ روح ادرسها بسوريا أحسنلك...أنا أخي درس الحادي عشر بدولة خليجية وبعدين نزل على سوريا وعميقدم بكلوريا هونيك...وحسب ما شفت وضعو أنا...فوضعوا كتير رائع...يعني لا تاكل هم أنو يكون في صعوبة عليك...الشاطر بالسعودية شاطر بسوريا ولا تصدق يفرق المستوى كتير عليك...رح تتعذب شوي بالرياضيات وبجوز ترجع تدرس منهاج سوريا العاشر والحادي عشر تبع الرياضيات لتأسس حالك بس بالأخير النتيجة بتكون مرضية....ولا تتنازل أبدا عن هالقرار قدام أهلك...وحتى لو كان معنى هالقرار أنك تعيش سنة كاملة بسوريا لوحدك.
بالأخير بتمنالك التوفيق شو ما كان قرارك.

مرحبا أخي
أن كنت بالخليج كمان و أخدت البكلوريا من هنيك
بنصحك تبقى و تاخدا من هنيك
لأن فرق منهاج الرياضيات شاسع يعني بدك تتعذب كتير هون ليمشي حالك
يعني أنا بجامعة و عانيت
و صحيح الشاطر بسوريا شاطر بالسعودية بس هالشاطر بدو أساس ليقدر
يكمل اذا وضعك بيسمح انك تدخل موازي فجيب معدل عالي و ادخل طب أو هندسة متل ما عملت أنا علما أنو بلا الموازي فسلم على معدل
لأن ال 10% يلي بيحذفوا عم تكسر المعدل و أحسن من هندسة زراعة ما بتجبلك
بالنهاية استخير
لأن الخطوة مو بسيطة و انا بنصحك أنو تاخدا من السعودية
موفق

اخواني يوجد تضارب في الآراء، ارجو تكثيف البحث في الموضوع وخاصة من خبرات اناس كانوا في السعودية او نزلوا من السعودية لتقديم الثانوية حتى الاخ اكس واي الذي نصح ان اخذ الثانوية في السعودية فان مستوى الكلام عن تعب وليس استحالة في الحصول على نتائج مرتفعة، الاخ هيلالي عاد من السعودية واخذ مجموع جيد حتى تمكن من دخول المعلوماتية التي سمعت من احد أقاربي الذي درس بمعدل 15 ساعة يوميا في الثانوية العامة بسورياوماستطاع الا هندسة مدنية.
سوف اهدي صاحب الجواب المهني المدروس 5 محافظ جلدية اصلية.
شكرا جزيلا مقدما وكان الله في عون العبد مادام العبد في عون أخيه

ليك هي درس 15 ساعة أو ما بعرف أديه أخطر أساليب الضغط الغير المقصود بسوريا.
على سبيل المثال كنت مكتفي ب 13 ساعة باليوم, و هاد معناتو 13 ساعة كحد أقصى و أيام كتير ما كنت لحقا
و في عندي رفيق كان يقلي هي شغلة ساعات الدراسة شغلة بايخة, قلي ما كان عندي برنامج واضح بس معظم الوقت عم بدرس. طبعا رفيق متفوق.
هلأ بالنسبة للرياضيات بين سوريا و السعودية إنو بآخر السنة التانية ثانوي بسوريا عطو بحث مختصر عن التفاضل و التكامل. بعدين بيردو بيشرحوه بشكل مفصل بالبكلوريا.
بالسعودية هاد البحث مو موجود بالتانية ثانوي بس مفصل كتير بالتالت ثانوي.
بالنسبة للفيزيا بالسعودية بيعطو الميكانيك بالحادي عشر و الكهربا بالبكلوريا.
هون بسوريا بيعطو نص الميكانيك بالحادي عشر و نصو بالبكلوريا و معظم هالمعلومات آخدا بالسعودية. و نفس الشي الكهربا نص بنص.
الكيمياء
المعلومات هون غير تماما الموجودة بالمنهاج السعودي بس ما بيطلعو قد تصو.

هلأ بالأخير أهم شي بسوريا الناس هون بتدرس و بتركز ع العلامة و النص علامة يعني هون بتدرس بس مشان العلامات.على سبيل المثال هالمواد التلاتة لفوق بينظرولون الطلاب إنن 60+40+20=120 علامة مو رياضيات و فيزيا و كيميا, يعني قديش فني أمن من هال 120 علامة.

و بالأمتحانات كتير بيهتمو بالدقة بالأجوبة يعني الجواب الصح هو الجواب الدقيق. بهي نقطة بنفرق عن السعودية (طبعا أنا ما قدمت الثانوي بالسعودية فما بعرف). إنو هنيك كتير مرات بيحاسبو أو بيجبو أسئلة مجملة و مانا كتير دقيقة, وهون نفس الشي بيجيبو هيك أسئلة بس معظم الأجوبة بتكون دقيقة. هلأ هون المجموع من 240 و الأساتذة بيصلحو إنو هاد الجواب بيروح نص علامة و هاد مثلا علامة إلخ. بالسعودية المجموع بيكون بالآلاف و بيهتمو بالنسبة المئوية أكتر, و بهيك حالة بتنجبر بعض العلامات أثناء عملية التقسيم.

بالأخير متل ما قلتلك بالأول بتشوف الفرع لبدك ياه و بتشوف أديه بدو علامات بالمفاضلة التانية هي السنة. و بتزيدون علامتين و بتركز تجمع هاد الرقم من أول السنة, و عأساسو بتلاقي حالك عم تدرس, و عنجد مانا صعبة بنوب, بالعكس بلاقي هون أسهل لأنو بتعرف شو كاتب بالضبط و بتعرف شو بتاخد بالضبط, لولا الضغط النفسي لهون.

و بالتوفيق

مرحبا حبيبي كيفك يا باشا هلأ أنت سألت هالسؤال بمنتدى المعلوماتية وأنا رح جاوبك ع أساس أنك بدك تفوت معلوماتية أوكي وتجيب فوق ال98 ونص لتفوتها

أنا صرلي بالرياض 15 سنة تقريبا وأخدت البكالوريا هونيك وأجيت لهون وقدمت عالموازي وطلعلي معلوماتية لحسن الحظ

وكل سنة عم أدفع 110000 ليرة مايعادل 9000 ريـال أي أنو لأتخرج إن شاء الله رح كون دافع 45000 ريـال ما يعادل 550000 ليرة وهادا طبعا مبلغ مابيتقارن مع الجامعات الخاصة يلي تقريبا إزا بدك تفوت معلوماتية فيها بدك تدفع ضعف المبلغ يلي عم تدفعو هون بالسنة الوحدة ويلي هو 220000 ليرة

هي مشان مواضيع الكلفة ويلي أنت أعلم فيها طبعا

وتاني شغلة أنا ما بعرف إزا أنت هلأ عاشر أو حادي عشر
بس إزا كنت حادي عشر فجموعك هالسنة مجموع مع مجموعك السنة الجاية صار النظام تراكمي هونيك وأنت بتعرف طبعا والأسئلة من (((((( المدرسة )))))) يعني إزا كنت متفوق سهل عليك أنك تجيب مجموع عالي وأكيد ما رح تفكر حتى تفكير ها أنك تجي لهون

الملخص لهالحكي إزا بتجيب أعلى من 98 ونص خليك هونيك وإزا بتجيب معدل أقل ف رح يطلعلك فروع أقل من المعلوماتية ع حاكيك رسمي يعني أما إنك تفوت بالمفاضلة العامة ف أنسى وضعك لأنو حتى تجارة يمكن ما يطلعك

نصيحتي ضل هنيك وإزا بدك مساعدة أنا جااااهز

أنا نصيحتي لك ومن واقع تجربتي إنك تأخذ بكلوريتك من السعودية أحسن لك إلا إن كانت لديك صبر كبير على الدراسة وعندك إمكانية إعادة البكالوريا إن تحتم الأمر خصوصا أخي الفاضل اختلاف المستويات بين هون والسعودية " أنا أقصد مستوى الأسئلة لا مستوى المادة المعطاة " عموما إذا حبيت ممكن اتناقش معك على الماسنجر لما خلص فحوص

هلأ طبعا أنت وين راح تشتغل ؟! أذا بالسعوديه و ما رح تطلع لأنه في كتيير دول ما معترفه بالجامعات الخاصه هونيك بس بيضل التعليم هون أفضل

انارأي انو عنا البكلوريا حلم شبه مستحيل لغير الانسان السوري
يعني عنا الواحد عم يعيدها مرتين لحتى يمشي الحال اما بالسعودية بضل أحسن بعدين اذا جبة مجموع منيح وكامل بالسعودية بيطلعلك كلشي هون