CSC-SY

الى متى لح يضل تعذيب طلاب السنة الاولى يعني التحليل 2 اجت صعبة بلعناها قلنا هالمادة مهمة ولازم نكون متمكنين كتير لحتى نقدر نرفعها اجت الجبر الخطي كمان متل النار وبيجي بيقلولنا حولي هالمصوفة لمصفوفة قطرية وهي طبعا ما بتتحول وبيجو بيقلك حل هالمصفوفة حسب غوص وبدك تساويها درجية اول شي بتلاقي انو ما بتتساوى وبنجي اليوم على الفيزيا كمان نفس العلة نفس اسئلة الفصل الأول الفرق الصغير انو اجت بدي نقي اختيار واحد من اصل 4 او 3 واجى آخر 4 اسئلة 6 علامات لكل سؤال هادا غير الدارات يعني بصراحة الاسئلة تبع العميد ما في منها بس المصيبة بالكهربائية يعني بالمشرمحي صار 4 مواد ولسى في ناس مو ضامنة هالبرمجة 1 او 2 بقى ليش هيك عم بيعملو فينا الدكاترة قلت لحالي اسمو العميد بيشوف هالمنتدى بركي بيشوف هالموضوع وبيحكي مع حدا من الدكاترة لانو فعلا ما لح كذب عليكم إذا بقلكم انو أكتر من نصف الدفعة صارت مهددة بالرسوب بقى رجائي انو العميد يصلو هالحكي لانو فعلا كل دكتور بينسأل بيقلنا ما دخلني بالمادة تبعو يعني شو بدكنا نرسب السنة ولسى القومية الواحد ما بيضمنها ناس كتير كانت رايحة ودراستها ولا بتلاقي حالها حاملة هالمادة بدون سبب يعني 5 او 6 مواد حمل لمعظم الطلاب بقى ارجو يا سيادة العميد انو تكون متل ما عودتنا بكرمك وانو تحكي مع هالكم دكتور بركي بيقدرو ظرونا والمصيبة لسى للي عايد البكالوريا مرتين الحمد لله مالي منهم بس كمان لا ننساهم

يا حبيبي هيك سياسة الجامعة من يوم يومها
بكرا كمان بس تطلع عالتانية و الله لتشوب شي بشيب
انا اكيد حاسس بشعورك لانو نحنا جماعة ال القرار تبع الستين منفهم على بعض يعني هلق صار بدك تحط المواد و تعد ليل نهار تعت فيهن لحتى تضمن النجاح
بالمناسبة انا وضعي مو احسن من وضعك بس شو طالع باليد

خليها لربك اخي وسيم وبعين الله وانشالله لا انت ولا انا ولا اي طالب بكليتنا بيرسب ...........

والله بعيننا انشالله على هادكاترة وعلى سياستهن اللي عم يطبقوها علينا..............

الظاهر انو معتبرين انو الطلاب فاتو معلوماتية تحدي الهن وهنن ما بيقبلو حدا يتحداهن وما رح يرتاحو لحتى يشوفو نص الدفعة رسبانين بالسنة............

بس والله العظيم حرام عليهن هيك يعاملونا ويجيبولنا هيك اسئلة ويروح كل التعب اللي تعبناه عالفاضي ..........

((((( انما اشكو بثي وحزني إلى الله ))))

نفس الحال بس الحلو أنو انا ............... تمسحت ....... لا والله ما تمسحت

عن جد يا ريت يا دكتور نوار تشوف هالموضوع ...
لأنو عن جد الوضع عنا كتييير بأسي ...
بس بدي أفهم ليش الدكتور ما قلنا أنو جواب واحد اللي صح ....
و أحلا الشي أنو آخر أربع مجموعات اللي عليون 24 علامة كل واحد 6 من أصعب الأسئلة ...
و هنن اللي مختارين فيون أكتر من جواب صح ...

طيب بما أنو اللي صار صار ...
ممكن من بعد إذنك تنظر بهالطلب ...
إذا الواحد مجاوب جوابين واحد منون صح و التاني خطأ .. ممكن تروحولو نص علامة المجموعة ... يعني هيك المنطق بقول .. مو معقول تروح كل العلامة ...
بعدين حتى في أسئلة أكتر من جواب فيها صح ..و أولهون آخر مجموعة ... يعني نحنا كيف بدنا نحطو خطأ و هو صح ..؟؟

و حتى مشان الجبر ...
يعني معقول السؤال التاني .. كلو ضرب مصفوفات ..و بدنا نحسب A^4 يعني شو الشغلة تعجيز ...
حتى المحاضرة الدكتورة كانت ما تكمللنا الحل و تقول أنو الحل طويل مشان هيك ما لح نكمل .. طيب كيف بتجيبو بالفحص ...
يعني أنتو عم تعطونا علمات بس لأنو منعرف نجمع و نطرح و نضرب ..
إذا أفكارنا صح ليش ما يحاسبونا على الأفكار ....
يعني الأسئلة كان بدها وقت كتييير و طويلة و ما حدا لحق يكتب ....
يا ريت بس تذكرو دكتورة الجبر بأنو ما تحاسبنا كتير على هالشغلة و خصوي A^4 ...

و شكراً إلك حضرة العميد ..

طول بالك أخي
يعني يلي عم تحكي عنو مو بس بالسنة الاولى
إن شاء الله بتنجح وبتصير سنة تانية
بس وقتها..........صدقني لح تترحم على السنة الأولى
متل مو نحنا لما إن شاء الله ننجح على التالتة رح نترحم على التانية
هاد شي طبيعي
يعني أكيد وقت يصير عندك معلومات أكتر لازم تواجه صعوبات أكتر
وإلا كيف بدو يتأكد الدكتور إنك بتستاهل تنجح وإنك عم تستخدم المعلومات بشكل صحيح
بدون هالشي بتصير الشغلة متل إمتحان التحليل العددي يلي كان عنا اليوم
كل طالب كتب على الأقل 4 صفحات وجهين (يعني 8 وجوه) بس كل شي حفظ لأنو كل التمرين إما محلولة بالمحاضرات أو تمارين مشابهة لها
بقا شو الفائدة............طلعنا حفيّظة
بس طبعا حفيظة بشكل آني.........يعني بعد شهر بتحدى أي طالب يقدر يحل الأسئلة

بس هو العبرة لما تكون الأسئلة الفحص منطقية مو اختبار مدى ذكاء الطالب وسرعة كتابة عما صير عما تجي الاسئلة على مستوى الكلية للطلاب الجيدين ويتم مسح الطلاب الوسط من قائمة
النجاح مثل زمان كان النجاح 50وكان الأسئلة جيدة وصار النجاح 60 و ضل نفس المستوى من الأسئلة

بظن السيد العميد ممكن يتدخل اذا طلعت نسبة المترفعين من السنة الأولى هالسنة أقل بكتير من العادة (أو أكتر بكتير من العادة) بس مابظن النسبة رح تفرق كتير عن غير سنوات بكرا بس تطلع النتائج ببين معكون.
لا تنسوا انو سلالم التصحيح بتتغير لزيادة أو انقاص عدد الناجحين بالمادة وبالتالي بالنتيجة النهائية نسبة المترفعين كمان مابتفرق كتير من سنة لسنة.

لكن بطلت إحلم ب26 حزيران

شو ؟
شو ؟ اديش؟؟؟؟ حباب بشر أديش نسبه النجاح ؟

السلام عليكم ...بعين الله ليس معين سوى الله بس ما منقدر نقول الا هالجملة : من لايرحم لا يرحم ...والله صرلي سنتين راسب بالكلية كل سنة على مادة ومادتين ..بالسنة الأولى على مادة وبـ الأربعينات والتانية على مادتين ...أنا السنة القادمة ان شاء الله ثالثة ..بس لازم كون خامسة مستقلين هادا الشي ..والحمد لله يلي على 50 بعين الله ما لنا غير الله ...

طيب لو سمحتو نحنا عم نتناقش بالمواد يلي انظلمنا فيهانحنا طلاب السنة الاولى
بظن في موضوع لتتناقشو فيه بهالقصة
يعني لا تطلعو عن صلب الموضوع الاساسي إذا بتريدو
مع احترامي للكل

بصراحة أنا أريد أن أعبر عن تضامني الشديد مع طلاب السنةالأولى, بالقعل ما في دكتور عم يقدر والأسئة عم تجي صعبة شوي, بس باعتبار أنو العلامات بتخضع لمبدأ العرض والطلب فإن شاء الله بتطلعوا كلكم ناجحين. لأنو في مبدأ بيقول لما بتكون الأسئلة صعبة بتنرفع العلامات ولما بتكون الأسئلة سهلة بتتنزل العلامات وهو مبدأ مطبق في الجامعة منذ الأزل

وهي شغلة ما حتصير بحياتها بجامعة دمشق , يعني أصلاً هنن برأيهم أنو التصحيح الحالي هو المنطقي, ويجب على الطالب أنو يتأقلم مع الوضع, لأنو هيك هي طبيعة الجامعة, ما حدا بيقدر يجبر الدكتور على أي طريقة تصحيح (وفي مرة سألنا أحد الدكاترة أنو شلون علاماتك بتطلع بسرعة أكثر من غير دكاترة, فقال: ليش ولادي بالبيت شو عم يساوو!!!)

أتمنى النجاح للجميع وشكراً لكم

يعني بعتقد نحنا عنجد بهالكلية دفعة الفيران البيض !!!

يعني سؤال ممكن دكتور يحط أسئلة بدون مايجرب يحلها ؟؟!! هادا اللي صار معانا بالجبر بنسأل الدكتورة ماعم تطلع المصفوفة القطرية بتقلك لأ اكيد بتطلع انته اكيد منقص شي مستحيل يكون مافي مصفوفة قطرية وبس تطلع لبرا وتقلها حليه شو بتقلك ؟ لا هي ماالمصفوفة ما الها مصفوفة قطرية ( طبعا بعد مناقشة الدكتورة الزميلة اللي حلت السؤال ) والأنكى السؤال كلو 30 علامة جمع وضرب مصفوفات وقسمة حدوديات كلها عليها 20 علامة وجملة المصفوفة ليس لها مصفوفة قطرية عليها 10 علامات !!

غير الساعتين اللي دوبن كفوا نحل سؤالين !! وغير التضارب الدكتورة عايدة قالتلنا بدي الأرقام واحسبلها 36 ضرب مصفوفة كاملة وبعدين 17 ضرب مصفوفة وبعدين 20 ضرب مصفوفة وارجع اجمعون وطبعا بدون آلة حاسبة وبالأخير بنطلع بتكون الدكتورة أسمهان قالت بس بدي شكل المعادلة بدون حساب !!!!!!!!!!!

يعني عنجد مابدي نق وبعرف هاد واقع لازم نتقبلو ونعيش معو بس يعني لإيمتى هيك والله لو كانت الأسئلة بتتناسب مع مستوى الإعطاء ما كنا شكينا بس أغلب شغلنا مجهود فردي وبالأخير مافي فايدة يعني اسئلة التحليل اجت فيها نوع من الصعوبة بس الدكتورة فعلا ماتركتلنا مجال لانو كان شرحها كافي ووافي وماحدا فينا قال شي بس هيك يادوب بينرشحلنا كم كلمة متل الجبر والدارات الكهربائية وبالأخير بيجي الضرب شو الهدف ماكنت اعرف ؟

فياسيادة العميد انضربنا بالعملي وقلنا التعويض بالنظري ان شاء الله وهي هلا الضرب بالنظري وبمواد المعدل كمان ياربت بس يكون في نوع من المراعاة لهالشي اللي عم يصير معانا مو معقول نص الدفعة تبقى سنة أولى !!

لازم يكون في مرجعية للدكتور بالتصحيح .. يعني مثلاً الأسئلة و سلم التصحيح و هيك شغلات ما لازم تكون بناءً على رأيو و بس ... لازم يكون في شي متل مجموعة من الدكاترة الخبيرين مسؤولين عن هالشغلات ...
يعني ما عم نشكك بنزاهة حدا .. بس مو الإنسان بيغلط أو أحياناً بسيء التقدير .... الدكتور مالو ملاك حتى ما يغلط ....

و أكيد وقت بيجنمع أكتر من رأي بتصير نسبة المنطق أكبر بالأسئلة و التصحيح ....

و حتى بعد التصحيح ... لاوم تنأخد عينات عشوائية و يختبرو مدى سلامة التصحيح ....
مو هيك كنا نعمل بالبكالوريا ... و ما كان حدا ينظلم ... و لا كان حدا يقول عم يشككو بنزاهتي ....
إذا ماتت الرقابة لأنو في ثقة ... أكيد ما لح يضل ضمير كل الناس صاحي .... مع احترامي للجميع .....

عيب جامعة محترمة يكون فيها هيك شي ....... شو نحنا قاعدين بسوق الهال و لا بجامعة دمشق ...!!!!!!!!
اللي من حقو يترفع بيترفع ..و اللي مو من حقو بيعيد المادة ... بس مو عرض و طلب ... !!!!

أحد اهم الخطط لنجاح الطلاب انو مايكون للاسئلة هل يعني بجي العميد بقول ضروري الطلاب كلها تنجح أكيد .....
نحنا بالبعث جابولنا بأمتحان انكليزي 11 صفحة وكلها reading
وبعدين أجت الرياضيات2 وجابلنا الدكتور تمرين اختر الاجابة وفي الاه 4 أجويبة وتنين منهم صح وهوي مانو عرفان لمين بدوا يحسب صح

ثانياً وبكل صراحة نحنا مو بمدرسة لحتى حدى يجيب ال Dady أو يروح يحكي مع الموجه أو المدير لحتى يبهدل أستاذ ما !!
هاد دكتور على فكرة ( ولازم تحترموه سواء رضيتو أو لأ ) وما بعرف اذا بتعرفي شو يعني دكتور ....

أنا مع هيك مو رضيان عالموضوع بس صار عادي كتير وأقل من عادي تصير أي مفاجأة بقلب الامتحان والمفروض صار عندكم خبرة بتقديم المواد
بتحبي تعرفي دكتورنا شو جابلنا خيارات بآخر فحص نوعاً وكماً وطريقة اجابات
عوضكم على الله والله يحمل معكم .

و ما بصير الواحد يتعود على الغلط ...لأنو بيكبر الغلط و بيستفحل ....
إذا أنتو تعودتو ..نحنا ما بدنا نتعود ....

خلص يا جماعة والله هالحكي ما بيفيد شي يلي تقدم راح والاسئلة كلا انحطت وطريقة التصحيح مارح تتغير شو ما عملتو وليكن السنة الماضية كان عدد الراسبين كتير كبير وما حدا عملن شي نحنا هيك فرعنا يعني ازا نفدت اول سنة بلا رسوب الا ما ترسب شي سنة بعدين والعبقري او يلي حظو حلو بينفد فخلص حاج تعزبو حالكن وحاولو تركزو هلق ع الثقافة بلا ما نحملا كمان

السلام عليكم

بس خليني وضح شغلتين بنظام الامتحانات

 1- صعوبة الأسئلة أو سهولتها أو طريقة التصحيح -ضمن الوضع الحالي- ما ف أية جهة الها رقابة عليها -إلا ضمير الدكتور- متل ما قلي يااها مياشرة أحد المسؤولين عن الموضوع!

 2- الشي يلي منقدر نتابعو وبكل فعالية هو وجود أسئلة غلط, أو غير قابلة للحل ضمن الوقت المعطى عالإطلاق, أو أسئلة من خارج المنهج

أو نمط أسئلة مخالف مثل نمط أكثر من جواب صحيح يلي بالعالم كلو ما في منو ويلي حكينا في من سنتين ولهالفصل لحتى دريوا بالكلية عنا انو ممنوع!!!

لهيك بتمنى من طلاب السنة الأولى انو يمروا عالهيئة الإدارية يوم الخميس بعد الساعة الواحدة ليشرحولي شو صار بالزبط بامتحانات الجبر والتحليل والفيزياء وإذا الأسئلة موجودة حدا يجيبها معو .... وبصير خير إن شاء الله...

طيب يا جماعة ... حولو على الITE
لأنو أفكار الأعتراض جهزت مع الحلول المناسبة ...
و حاج ناكل بهادل من اللي أكبر منا ...
الحمد لله أنو عنا موقع لإلنا و ما حدا بيحكي معنا فيه كأنو ولاد صغار ....

و على فكرة حلولنا منطقية و إن شاء الله لح نستفيد منها .. متل ما استفدنا وقت عملي الجبر ....

و مرة تانية شكراً على تعاونك ...

هلق بجد في مواد متل التحليل 2 والله من المواد الممتعة والدكتورة سلافة ومحمد الخطيب ما قصرو في اعطاءها بنوب وانا بقول رغم انو اجت اس~ئلة التحليل 2 من الأسئلة الصعبة وانو متوقع احملها حتى لو كنت جايب هالعشرين يلي مالح تفيدني بشي بس بصراحة مستوى الإعطاء بيتناسب شوي مع الأسئلة بس كمان انو يجي دكتور الفيزيا ويعصبلنا ياها والله مالح نشتغل فيها هالمادة المعتة وحرام هيك مادة تنعطى لانو تضييع لوقت الطالب بهالوقت كنت قريت على بنية هندسة المعالجات ومعمارياتها احسن من مية مرة من دراسة هالكتاب الزبالة يعني لح لاقي حالي كل شي بالبكالوريا كنت آخدو بالإلكترونات انصاف النواقل لح هنن يلي عم بتنذكرهم مو اكتر بينما باقي المعلومات لح تنتنسى بعد الامتحان بيومين بس بجد بالنسبة للجبر الخطي صار ظلم كتير يعني لو غيرو السؤال انو هل بدل اوجد صار شغلة تانية وانا الحمد لله ما عانيت من هالقصة لانو حسيت انو ممكن يتلاعبو فينا بس الخوف انو هنن بيحاسبو على الجواب الأخير ولو حكو عكس هيك اي دكتور مالو مستعد يغير من نمط تصليحو
ويعني معلش يبجيو كم مادة بدهم شغل كتير بينما انو نحمل هالسنة من شان والله قومية يلي بيصير فيها شلف بتوزيع العلامات .....

بجد لو بيطلع بس 50 واحد بس على التانية ما حدا لح تفرق معو بليرة بقى حاجة تقولي يتدخلو شو هنن SWAT