CSC-SY

كنت قاعد بـأمان الله عم اتصفح الموقع وشفت موضوع اسمو (مشروع موقع كلية الهندسة المعلوماتية بجامعة البعث) ... مافتت عالموضوع لأنو ما بهمني بس تذكرت مقابلة مشروع السنة الرابعة تبعي يوم الثلاثاء الماضي: 15 تموز 2008 وحبيت اكتب بالمدونة تبعي مشان فش قلبي شوي ولو طلعت طويلة!!!

مشروع السنة الرابعة تبعنا كان (موقع كلية الهندسة المعلوماتية)

ومجلس إدارة الكلية ببداية المشروع كان متحمس ووافق بشرط نحقق كل المتطلبات اللازمة بالموقع ووعدوا بتشغيل الموقع في حال كان كامل وما فيه مشاكل... وحتى انو الدكتور نوار عميد الكلية والدكتور صلاح الوكيل الإداري نصحونا بأكتر من شغلة بالعمل وخاصة فيما يتعلق بالأساتذة والسيرة الذاتية وهالمواضيع (مشكورين)

أنا بالبداية ما كنت بهالمشروع بعدين فتنا فيه واللي خلاني اتحمس كتير انو كل واحد مننا بيتمنى يكون في موقع للكلية يشوف فيه كلشي! من علامات واعلانات ومواد واساتذة وأسئلة وملفات...الخ!!!
وكمان بهمنا اذا بدنا نطلع ندرس برا يكون في موقع محترم لكليتنا باللغة الانكليزية حتى يشوفوه بجامعات برا ... خاصة انو في كتير دكاترة متميزين عنا وفي مشاريع حلوة عم تصير وأكتر من Paper تم نشرها من الكلية!!!

المهم بلشنا نشتغل وما كذبنا خبر !! وكان الدكتور خليل عجمي هو مشرف المشروع (وكان كتير محترم معنا وكان يناقشنا بأسلوب حلو وينصحنا دائما ويضيف الناقص بكل اجتماع)
وصلنا للفترة اللي بيشتغلوا فيها الطلاب أكتر شي وهي بعد الفحص!!! وبلشنا نشتغل بضغط أكبر وصار الانجاز جيد جداً ومرت علينا أيام ما ننام فيها غير أقل من ساعتين! وحتى ما بالبيت !!!
وجهزنا كم شغلة حلوين كتير واشتغلنا بأسلوب منهجي بالبرمجة!! وسهل التعديل والتطوير
كان عنا نظام إعلانات للكلية بينزل فيه اعلان مرتبط باساتذة أو مواد معينة أو اعلانات ادارية ونظام كامل (شغال) لمعلومات الأساتذة (نظام الأساتذة لحالو كان ممكن يكون مشروع) ودخلنا عليه معلومات الدكتور عميد الكلية كمثال على اعتبار انو عطانا الـ CV تبعو مشكوراً...
وكان عنا نظام مواد يسمح بتخزين كل معلومات دليل الكلية الخاصة بالمواد (وفرغنا كم مادة من الدليل عالموقع كأمثلة) وكمان في نظام ملفات مع المواد بيرفعها أستاذ المادة وبتظهر للطلاب مع المادة بالإضافة لنظام منتدى بسيط مرتبط بكل مادة لطرح الأسئلة على الأساتذة!!!
ونظام العلامات اللي بيسمح برفع العلامات بسهولة من ملف الـ Excel مباشرة من دون تعقيدات وكل طالب بعدين بشوف علاماتو الخاصة فيه!!
ونظام دليل الكلية!!!

والموقع كان ثنائي اللغة بالكامل (عربي + انكليزي) !!!!

كل هيدون كانوا شغالين!!!!

فتنا عالمقابلة بأمان الله (وطبعا طلاب التالتة وما فوق بيعرفوا انو ممكن الواحد يتعرض لاستفزازات كتير من مهندسين أو دكاترة) أحيانا بكون الهدف منها مجرد محاولة لمعرفة هدوء الطالب أو ثباته بالمقابلة وطبعا نحنا كنا منعرف هالشي من مشروع التالتة وأكتر من دكتور نبهنا لهالموضوع قبل المقابلة وكنا متفقين (5 طلاب) قبل ما نفوت انو نبقى هاديين بالمقابلة

اللجنة تبعنا كانت مؤلفة حسب البرنامج من:

د. مادلين عبود (رئيس اللجنة)
د. غسان كوتير
د. صلاح الدوه جي
د. باسم قصيبة
د. x

ومشرف المشروع: د. خليل عجمي
فتنا ما لقينا غير د. مادلين و د. x والمشرف الرائع د. خليل
قلنا لحالنا ما مشكلة المهم نحنا نقابل ونورجيون شو عاملين
بلشنا طبعا بالـ presentation مشان نشرح العمل وبعدين ننتقل للـ demonstration !! من الـ slide رقم 7 تقريباً اعترض د. x! وبلش ينتقد، علماً انو لسا ما كان في شي كتير مهم!! وكان كلامو غير منطقي أبداً بس متل ما اتفقنا قبل المقابلة بقينا هاديين وحاولنا نناقشوا بهدوء رغم عدم المنطقية الواضحة بكلامو! قضينا ربع ساعة (وقت المقابلة ما بيتجاوز عادة 45 دقيقة بالكتير) عم نحاول نقنعو أو نحاول نمشي الموضوع ونسايرو بس مشان ما يضيع علينا الوقت وفي إحدى اللقطات التي تعبر عن الاحترام الزائد ... عصّب لحالو ومشي!!! وهيك قضينا المقابلة على هالحالة!!! كانت المقابلة مجرد شخص بدو يفرض رأيو علينا وانو نحنا غلط وكلشي عاملينو ما بيسوا شي وطبعا تجاوز الموضوع هالحد لوصلت المقابلة لدرجة (المهزلة أو المسخرة)ولولا الطاولة والـ projector مستحيل كان أي شخص يكتشف انو في مقابلة هون؛ الدكتور خليل عجمي مشكوراً اتدخل بكتير من المواقف وحاول بس يوقف هالكلام مشان نقدر نكمل ونحنا سكتنا مشان نقدر نكمل ولكن هو بقي مصر انو شغلنا كلو غلط، قلنا طيب انتظر بس لتشوف الـ demo والعرض تبعنا وبتشوف انو نحنا عاملين كل هالأشياء!! ما قبل!! نص الشغل اللي مشتغلينو ما شافوه وكمان الـ presentation ما قدرنا نكملو!!!وهي بعض اللقطات من المقابلة التي تدل على المهزلة اللي صارت!!

• "الدكتور" يغضب مرتين ويخرج من المقابلة وهو يدخن سيجارة
• يطلب منا أن نغير النظام الإداري للامتحانات وذلك بإضافة رقم جديد لملف العلامات الذي يصدر عنها (نحنا كنا عم ناخد المعلومات من الملفات حسب ما الامتحانات بتصدرها)
• اتهامنا الصريح والمباشر بالكذب (وانو نحنا ما مشتغلين شي وعم نحكي بس كلام نظري ما مطبقين منو شي) طبعا هو ما قبل أصلا يشوف شو مشتغلين وكل الكلام اللي حكيناه موجود ومطبق بالمشروع اللي موجود معنا هلأ اذا بحب شي حدا مهتم يشوفو؛
• الـ security بالموقع اللي هي أهم شي بأي موقع بالعالم ما سأل عنها ولا خلانا نحكي عنها أصلاً
• لما كنا عم نورجيه نظام الملفات المرتبط بالمواد كنت مدخل معلومات مادة خوارزميات 2 من دليل الكلية قبل المقابلة ورفعت ملفين معها، سميت الأول (تحويل شجرة معممة إلى ثنائية) ودورت على هيك ملف عندي ما لقيت فرفعت pdf عن الـ ++C كمثال بس! ولما وصل لهون ما سأل أي شي ولا حكا عن تشفير روابط الموقع ولا عن صلاحيات الملفات ولا عن طريقة الشغل ولا العرض !!!!!!!! ::::::::: يا حزركون على شو سأل!! ::: ليش الملف تبع الخورازميات هو ++C وطبعا ما وقف هون... لما شاف الملف هيك زعل وقام من أمام الكمبيوتر وما عاد بدو يكمّل (حسسني انو كل الشغل راح عالفاضي لأني انا كنت مشتغل المواد وملحقاتها وحسيت كمان انو اللي عم يحكي معي هو طالب أول ما فايت عالكلية بطريقة التفكير أو شي تاني على التصرفات اللي أقل ما يقال عنها انو صبيانية)
• لما كنا عم نورجيه نظام العلامات: كان الزميل معاذ هو اللي مشتغل فيه وجهز قبل المقابلة ملف excel متل ملف الامتحانات وحط فيه كم اسم وكم علامة ومشان يورجيه انو نظامنا كامل ومعالج كل الحالات الممكنة دخل طالب بنظام 50 وطالب بنظام 60 وطالب كمان ناجح وطالب راسب وطالبين في خطأ بالاسم تبعون (يعني لما رح نبحث عنون لنخزن العلامة ما رح نشوفون موجودين عنا)،ودخل الملف للنظام وتخزنت معلومات الطلاب الناجحين والراسبين وطلعت واجهة لاختيار الطلاب اللي كان في أخطاء املائية بادخالهم (كانت كتييييير User friendly لأبعد الحدود) وبسهولة قدر مباشرة يختار الطالبين الصحيحين ويدخل علاماتون !!! ويا حزركون شو المفاجأة كانت!!!!!!!!!!!!!!!!!! يعني انا كنت رح انجلط عوضاً عن معاذ اللي اشتغل كتييييير بنظام العلامات!! اسمعوا الاقتراحات العتيدة "للدكتور" بالنسبة للعلامات: أول شي قال ليش ما جايبين ملف فيه 100 اسم !!! ليش بس 7 ، ما بتعرفوا انو النظام لازم يتم اختباره على data كبيرة مشان نتأكد انو شغال تمام! اذا على 7 أسماء طلع 3 أخطاء ... تخيلوا كيف بفكر .. هو افترض انو الأشياء اللي نحنا حطيناها غلط حتى نورجيه كيف النظام بعالج الحالات الخاصة هي أخطاء بشغلنا وبمعالجة النظام للملف... يعني بدل ما تكون نقطة قوة صارت بالعكس... (علما انو كلامو صح بالنسبة لحجم الـ data الكبير اللي لازم نجرب عليه والملفات الكبيرة موجودة عنا ومجربة) وكمان قال ليش ما مدخلين كل العلامات اللي عند داليا السابقة والحالية .. (ولي على حظي) .. وكمان قال انو ما في داعي لكل هالنظام وارفعوا الملف excel وحطولوا رابط بالموقع! طبعا قلنالو انو نظام العلامات من شروط مجلس ادارة الكلية مشان الموقع! وكمان مطلوب تكون البنية بتساعد على اجراء عمليات احصائية في المستقبل عند طلبها من ادارة الكلية .. فاذا رفعناه ملف ما عاد فينا نعرف أي شي او نعمل احصائيات!! وهون عصّب للمرة المليون وشغل سيجارة مرة تانية وقال حاجة تحكولي عن اشياء ما عاملينها وزعل وطلع لبرا (علما انو كلمة في المستقبل موجودة بالتقرير وقلتلوا ياها بالمقابلة)
• اللغة يمكن كلها ما بيعرف شو عاملين فيها وبتصور ما بيعرف انو الموقع عربي وانكليزي كمان أو ما صرلنا فرصة نقلوا ياها لأنو ما شافها بالـ demo ولا وصلنالها بالـ presentation

حاجة لهون ... المقابلة كانت كلها هيك... كانت كلها تعجيز بتعجيز .. وصل معنا فيها انو شغلنا غلط وكان لازم نغير بعض الأنظمة الإدارية في الكلية ... !!!!!!!!!!!!!!!!!!!!!

الدكتور خليل يمكن كان مصدوم أكتر مننا! وحاول كتيييييير يقنعوا انو هالكلام ما صحيح بس عبث !!! لا حياة لمن تنادي

وهيك مضيت المقابلة ... يمكن هو حقو انو يعترض أو ما يعجبو الشغل، بس ما حقو أبداً يتعدى علينا بالكلام والاهانة بهالطريقة السيئة اللي لا تمت بصلة لدكتور جامعي يفترض انو هو بأحد أكتر الأماكن المرموقة بالمجتمع!

بعرف انو الموقع بفوتو عليه دكاترتنا، بتمنى ينعاد النظر بمقابلات (عفوا مهزلات) بعض المشاريع، لأنو اللي عم يعملوه البعض (يفتقر لأبسط أساليب الذوق والاحترام للانسان اللي واقف أمامو)... ما في بالعادة احكي هيك عن مدرس بالجامعة .... لأنو هو المدرس ونحنا الطلاب ... بس اللي صار كان فيه اهانة مباشرة النا كأشخاص قبل طلاب (من حيث الاسلوب أو الكلمات اللي توجهتلنا واللي ما كنت متوقع اسمعها يوما من مدرس بالجامعة)

كنا ناويين نكفي بالموقع بعد المقابلة وناخد ملاحظات الدكتور نوار والدكتور صلاح والدكتور عمار خير بيك وبعض الدكاترة الآخرين على العمل الحالي مشان نكمل! ونرفع الموقع، بس بتصور انو لهون وحاجة!!! كل الشغل تبعنا ما مستعد أعطي سطر واحد منو للكلية بالوضع الحالي وبعد كلشي صار فينا (أكبر عيب بالعالم انو نحنا كلية هندسة معلوماتية وما عنا موقع لكليتنا)

ما حدا مننا نحنا الـ 5 مفكر كتير بالعلامة... لأنو لما قررنا نعمل هيك موقع (وانا بحكي عن حالي لما فتت مع رفقاتي بهالمشروع) كان هدفي الأول والأخير يكون في موقع لكليتي... موقع محترم اقدر اعطيه لأي حدا بكل ثقة سواء كان عربي أو أجنبي حتى يشوف شو عنا بالكلية...

بس عنجد يا عيب الشوم عاللي صار!!!