|
اذا بدي دور على شغل وين لازم اتجه؟ أهم شي إنك تشتغل ضمن المجال. في كتير طرق:
- الطريقة الأنجح هي إنك تسال الخريجين اللي عم يشتغلو إذا كنت بتعرف حدا منهم لأنو ما شاء الله ما عاد في شركة بالبلد إلا وفيها شي واحد من كليتنا.
- الإعلانات في الجرائد والإنترنت.
- دليل معرض شام فيه عناوين كل الشركات تقريبا, احصل على نسخة منه وابعتلهن السيرة الذاتية تبعك وإلا ما تحكي معك شي شركة.
هل أنا هلأ بمؤهل بيسمحلي اني بلش دور على شغل؟ أكيد لاء, وخاصة في السنوات الثلاثة الأولى. لذلك غالباً رح تضطر تشتغل كمتدرب بأول فترة يعني بدون راتب أو براتب رمزي. التوفيق بين الشغل و الدراسة: صعب كتير ورح يصير عليك ضعط مو طبيعي والسبب إنك لما بدك تدرس رح تلاقي حالك ماإلك حيل تتطلع بالكتاب. طبعاً المفروض بأوقات الضغط والإمتحانات بالكلية تاخد إجازة لحتى تقدر توفق بين الشغل والدراسة. الشغل أثناء الدراسة رح يكون بالتأكيد له فائدة عملية كبيرة إلك بغض النظر عن الجانب المادي لأنو رح يصير عندك خبرة عملية بتفيدك بإنك تلاقي فرصة عمل ممتازة بعد التخرج وبراتب عالي. وبتفيدك كمان بدراستك نفسها. والشي الاهم إنو رح يروح عندك هاجس البحث عن عمل بعد التخرج تجربتي: أنا بعد ما خلصت السنة الرابعة اشتغلت بشركة خاصة وبقيت فيها للتخرج, و كان الراتب فيها جيد. الشغل سبب لي تعب كبير وكنت دائماً مشغول ومضغوط وحامل عشر بطيخات بإيد وحدة بس اتحملت لأنو كانت ظروف عملي ممتازة وكنت داوم على كيفي. الشغل أكيد أثر على دراستي بس بشكل بسيط لأنو بالأساس أنا ما كنت أحضر مواد نظري إلا ما ندر, بس طبعاً كنت معظم الأحيان ما إلي خلق ووقت للدراسة وكنت بس اشتغل الوظائف والمشاريع وهاد هو سر النجاح بإنك تشتغل بإيدك. وبعد ما تخرجت صحلي فرص عمل بشكل كتير كبير ورواتب ممتازة بفضل الله لأنو كان عندي خبرة, وتاني يوم بعد مقابلة التخرج كنت متفق مع الشركة اللي عم اشتغل فيها وبلشت عندهن دوام والمفتاح لهالشي كان مجال مشروع تخرجي وهو التنقيب عن المعطيات بالإضافة لسنة الخبرة اللي عندي وكوني الخريج الاول, لذلك قدرت احصل على عمل مناسب وراتب جيد. نصيحة أخيرة: إذا عندك المقدرة على تحمل الضغوط وحاسس حالك قادر توفق بين الشغل والدراسة, وصحلك فرصة جيدة, فلا تتردد لأنو أنا بعتبرها ميزة إنك عم تدرس وتشتغل. ومجرد ما لاقيت حالك رح تقصر بدراستك اترك الشغل لأنو دراستك أهم.
There is nothing imposible in life, Just try
|
أرسل من قبل 
